1. Jichhajj wawajja, nayajj amuyastwa, yakha juman jan amuyat cunaw amuyumar llaquisiyi. Ucasti Diosan juch luririr mutuyañapan chekapätapawa; jumajj juch luririn llaquisiñ utjäwir qhitatäñapajj jan chekapäcaspas uqhäm amuyasiñ muntajja.

2. Jichhajj wawajja, nayajj uc khanañchäma: Cuna oraket-tejj nayrïr awquisamp taycasampejj luratäcän uca orak yapuchañataqui, Diosan jupanacan Eden huertata qhitanucutap khepatjja, jïsa, jupajj jak huertat apsusinjja, Eden huertaruw inti jalsu token querubinanacamp take tok jarqʼir naqhir espadampejj uchäna, jacañ kok imañataqui.

3. Jichhajja, uñjtanwa, jakejj Diosjamaw tucüna, asquits ñankhatsa yatisa. Ucat jaketejj amparap loktasapäna, jacañ kokat qʼichekaraquisapäna, uc mankʼasasti wiñayataquiw jacasapäna. Ucat jupan achut jan mankʼañapataquiw Dios Tatitojj querubinanacamp naqhir espadamp uchäna.

4. Ucat juchanacapat cutiquipstañataquiw mä pachajj churasïna, jïsa, yantʼatäñatac pacha, juchat cutiquipstasin Diosar lokañatac pacha.

5. Cunalaycutejj, Adanatejj ucspachajj amparap loktasa, jacañ kokat mankʼasapänjja, jupajj Diosan aruparjamaw wiñayataqui jacasapäna, juchanacapat jan cutiquipstañatac pachanïsa. Uqhämaraqui, Diosan arupajj inamayaruw tucusapäna, jachʼa khespiyañ arustʼajj jarcʼatäsapänwa.

6. Ucampis jakenacan jiwañanacapatac ut-tʼayatänwa. Ucat cunjämatejj jacañ kokat jithektayatäcän uqhämaraquiw orakjjat jithektayatäpjjañaparaqui. Jakenacasti wiñayataquiw chhakat tucupjjäna. Jïsa, jupanacajj tincut jakenacaruw tucupjjäna.

7. Uqhämajja, jumajj ucat amuyasmawa, nayrïr awquisamp taycasampejj acapachan kollan cunanacanarac Tatitun nayrakatapat jithektayatäpjjäna. Ucat jupanacan quipca munañaparjam luririnacar tucutapjj uñjaractan.

8. Jichhajja, jakenacan uca janchi jiwañat cutsutäñapajj janiw waquiscänti. Ucajj jachʼa cusisiñ arustʼaruw tucjjasapäna.

9. Ucat ajayun jan jiwcayätap laycu, tincusin takpach jakenacar janchi jiwañjj kollan cancañat jarcʼakeri jiwañjj puriyatap laycu – kollan cancañat jarcʼakeri jiwañasti sañ muni, Tatit nayrakatata jarcʼakatäña – ucat jakenacan uca kollan cancañat jarcʼakeri jiwañat cutsuyatäñapajj waquisïna.

10. Ucat ñankharu, janchin irpatäsa, ucan munañaparjam luririr jupanacan tucutap laycu, aca yantʼatäña utjäwejja jupanacan waquichasiñanacapatac utjäwiruw tucüna; waquichäw utjäwiruw tucüna.

11. Jichhajj amtasim wawajja, janitejj cutsuyir arustʼajj utjcasapänjja, (uc maysar uchasa) jupanacajj jiwatäpcasp ucspachaw ajayunacapajj Tatit nayrakatat jarcʼakatäsinjja, llaquisis tʼakhesipjjasapäna.

12. Jichhajja, jakenacaru tincut utjäwit cutsuyañataquejja, janiw cunjämats utjcasapänti. Jakenacan jan yäkatap laycuw jupanac pachpar uca utjäw puriyapjjäna.

13. Ucat chekapäñarjama, aca yantʼatäñatac waquichasiñ utjäwinjja, jakenacan juchanacat cutiquipstañap toketaquiw cutsuyir arustʼajj ut-tʼayatäspa. Janitejj uqhämäcaspajja, qhuyapayäwin luräwinacapajj chekapäñan lurañaparuw tucqhaspa. Jichhajja, chekapäñan lurañapajj janiw tucqhatäcaspati; ucatejj tucqhatäsp ucqhajja, Diosan Diosäñapajj tucusispawa.

14. Ucat takpach jakenacan tincutapjj amuytan, jupanacajj chekaparjam taripañan cat-thapitäpjjänwa. Jïsa, Diosan chekapäñaparjam taripäwisti jupan nayrakatapat wiñayataquiw jupanacar jarcʼakäna.

15. Jichhajja, janitejj juchanacan tʼakhesiyäwipar phokhañajj utjcasapäna, qhuyapayir arustʼajja, janiw ut-tʼayatäcasapänti. Ucat qhuyapayir arustʼa ut-tʼayañataquiw chekapäñarjam taripañan mayïwinacapar phokhañataquejj Dios pachpajj orakenquirinacan juchanacapan tʼakhesiyäwinacapar phokhe, Diosan phokhatpach asqui Diosäñapataqui, qhuyapayasir Diosäñapataquiraqui.

16. Jichhajja, jan mutuyäwimpejja, juchat cutiquipstañajj janiw jakenacar purcasapänti. Uca mutuyäwisti ajayun jacañapjam wiñayäñapawa. Uca mutuyäwisti cusisiñ arustʼat maysäjjan ut-tʼayatawa. Uca cusisiñ arustʼasti ajayun jacañapjamajj wiñayäñaparaquiwa.

17. Jichhajja, janitejj jakenacajj juch lurapcasapänjja, cunjäms juchanacapat cutiquipstapjjasapänjja? Janitejj leyejj utjcasapänjja, cunjäms juch lurapjjasapänjja? Cunjäms leyejj utjasapänjja, jan mutuyañampejja?

18. Ucampis mutuyañajj ut-tʼayatawa, asqui leyiw churataraquïna; ucasti jakenacarojj jan wali luräwinacapat llaquisiñ puriyaraqui.

19. Jichhajja, janitejj mä leyejj churatäcasapäna; jiwayir jakejja, jiwañapawa –sasa. Jiwayasp ucajja, ajjsaraspat jiwayañjja?

20. Uqhämaraqui, janitejj juch lurañjjat leyejj jan utjcaspajja, jakenacajj janiw juch lurañ ajjsarapcaspati.

21. Uqhämaraqui janitejj leyejj utjcaspajja, camächaspas chekapar uñjañajja, jakenacatejj juchachasipjjasp ucajja? Jan ucajj cuns luraspa taripäwisa, qhuyapayäwisa? Janiw ucanacajj jakenacjjarojj cuns lurcaspati.

22. Ucampis leyejj churatawa, mutuyäwejj chictʼataraquiwa. Juchat cutiquipstañajj churataraquiwa. Uca juchanacat cutiquipstañajj nayanquiw siw qhuyapayäwejja. Jan uqhämäcaspajja, chekaparjam taripañajj uca jak catusaw leyin chʼamap jupjjar uchaspa; ucat leyejj mutuyäwi uca jaker churaraqui. Jan uqhäm luratäcaspajja, chekapäñan luräwinacapajj tucqhatäspawa, Diosan Diosätapas tucusiraquispawa.

23. Ucampis janiw Diosan Diosätapajj tucusquiti. qhuyapayäwejj juchanacat cutiquipstirinacajj nayanquiw siwa, qhuyapayäwisti juchanacan tʼakhesiyäwipar phokhäwi laycuw utji. Uca juchanacan tʼakhesiyäwipar phokhäwejj jiwatanacan jactäwip ut-tʼayi; jiwatanacan jactäwipasti Diosan nayrakataparuw jakenac wastat api. Ucat jupanacajj jupa nayrakataruw cut-tayatäpjje, luratanacapata chekapäñarjama, leyirjama taripatäñanacapataqui.

24. Chekaparjam taripañajj takpach mayïwinacap phokhayi, qhuyapayäwisti take cunatejj jupancqui ucatjja, nayanquiw siwa. Uqhämasti, juchanacat chekpach cutiquipstirinacaquiw khespiyatäpjjaspa.

25. Qhuyapayäwejj chekapäñat lunthatcaspas uqhämt amuyta? Nayajj sismawa: Janiw mä jucʼs lunthatcaspati. Uqhäm lunthataspajja, Diosan Diosätapajj tucusispawa.

26. Uqhämat Diosajj oraken kalltäwipatpach ut-tʼayat munäwinacap phokhayi. Uqhämat jakenacan khespiyasiñapamp cutsuyatäñapampejj ut-tʼayata, jupanacan tucqhatäñapamp llaquisiñapampejj ut-tʼayataraqui.

27. Uqhämasti wawajjay, qhitinacatejj jutañ munapcaspa ucanacajj jutapjjaspawa, jacañ umanacat jan jarcʼatäsaw umtʼapjjaspa. Qhitinacatejj jan jutañ munapcanejja, janiw jutayatäpcaniti; ucampis khep khepa urunjja luratanacaparjamaw jupanacar cut-tayatäni.

28. Jupanacatejj urunacapan ñankh lurañ munapjjchïna, janirac juchanacapat cutiquipstapcarac-chïnjja, Diosan cut-tayañaparjamaw ñankhajj jupanacar luratäni.

29. Jichhajj wawajja, acanacan jumar jucʼamp llaquisiyañapjj janiw muncti. Juchanacamampic llaquisim, juchanacat cutiquipstañar apanir llaquisiñamcamajja.

30. Wawajjay, Diosan chekapäñaparojj janic jucʼamp jaychasismati! Diosan chekapäñapar jaychasisajja, janipun mä jucʼs juchamatjja, janiw juchäquit sas arsuñ munamti. Antisas Diosan chekapäñapajj chuymaman phokhatpach utjpan. Ucajj lakʼjam llampʼüñar jumar irp-pan.

31. Jichhasti, wawajjay, Diosan jawsatätawa aca jakenacar ar yatiyañataqui. Jichhajj wawajja, saram, chekampi suma amuyumpi jakenacar ar yatiyaraquim juchanacapat cutiquipstañar irpaniñamataqui, jachʼa qhuyapayir arustʼan jupanacjjar wactʼäwinïñapataqui. Diosajj arunacajjarjam jumar churpan. Uqhämäpan.