1. Ucat taripirinacan pä tunc llätuncan marana, Ammoronajj Moronir catuntatanac turcañ munasaw mä yatiyäw apayäna.

2. Ucat Moronejj uca mayïwipat walpin cusisïna, cunalaycutejj jupajj Laman jake catuntatanacar mankʼayañ mankʼjj quipca jakenacapataquiw munäna. Uqhämaraqui quipca jakenacapjj nuwasiri tamapan chʼamapatac munaraquïna.

3. Uca Laman jakenacasti walja warminacamp wawanacamp catuntapjjäna, ucampis Moronin catuntatanacap taypinjja, jan ucajja, Moronin catut catuntatanac taypinjja, janiw mayni warmis wawas utjcänti. Ucat Moronejj mä amuyun arustʼäw luräna, Laman jakenacat waquiscaspas uqhäm Nefi jake catuntatanac irpsuñataqui.

4. Ucat jupajj mä kellkat kellkasina, Ammoronan Moronir kellkat apancän uca pachpa lokeripampiw apayäna. Acanacaw Ammoronar kellkat arunacapajja, aqhäm siwa:

5. Ammoron, aca jakenacajj contra aca nuwasïw utjatap laycu, jan ucajja, jilaman jupanacjjar lurat nuwasïwit kellkansma. Uca nuwasïwsti jupan jiwatap khepat sarayañataquis amtascactawa.

6. Nayajj Diosan chekapar uñjañapat taket sipan colerasiñ espadapat khanañchirisma. Janitejj juchanacamat cutiquipstas nuwasirinacam quipca orakenacamaru, jan ucajja, juman catut Nefi orakemar cut-taycätajja, uca espadapajja jumjjar aytatätamwa.

7. Jïsa, jumatejj ucanacar istʼasmajja, ucanac jumar yatiyirismawa. Uca jumamp jilanacamampjam jiwayirinac janitejj jiwayañ munäwinacam jaytanuc-cätajja, quipca orakenacamar nuwasiri tamanacamamp jan cut-tcätajja, catoker suyir ajjsarcañ mankhapachat nayajj yatiyirisma.

8. Ucampis cunjämatejj ucanacar apanucupctajja, ucat Tatitun jakenacaparu nuwasctajja, uqhäm wastat lurañam amuyiristwa.

9. Jichhajja, nanacajj jumanacar catokañatac waquichasitäpjjtwa. Janitejj munäwinacam jaytanucupcätajja, jumat jayar apanuc-cta uca Diosan colerasiñapajj kʼala tucqhatäñamatac jumjjar apakatawa.

10. Ucampis Tatitojj chekpachaw jacasqui. Janitejj cut-tapcätajja, nuwasiri tamanacajjajj jumanacjjaruw jutapjjätam. Jumanacasti lakaw jiwañamp sartʼatäpjjäta, cunalaycutejj nanacajj marcanacajjampir orakenacajjampirojj catusisipcaquïwa. Jïsa, iyawsañajjs Diosajjan munäwips imapjjäwa.

11. Ucampis nayajj jumar inamay parlquirists uqhäm amuyasta. Jan ucajja, jumajj mankhapachan wawapäcasmas uqhäm amuyasta; ucat nayajj aqhäm sas kellkatajj tucuyta: Janitejj jumajj mä chachamp warmipamp wawanacapamp mä catuntatatac catuycätajja, janiw catuntatanac turc-cäti; uqhäm lurätajja, nayajj turcäwa.

12. Ucat janitejj uc lurcätajja, nuwasiri tamanacajjampiw jumjjar jutäma. Nayajj warminacajjarus wawanacajjarus armanac laquintä, ucat nayrïr tuti orakesäqui uca quipca orakemarus arctapjjäma. Ucatsti wilat wilani, jacäwit jacäwïniwa, nayajj nuwasïma ac-chʼpach orakjjat tucqhatäñamcama.

13. Nayamp jakenacajjampiw colerasipjjta. Jumajj nanacar jiwayañ munapjjesta, ucampis nanacajj arjjatasiñajjac munapjjta. Ucampis jumatejj jucʼamp tucqhañ munapjjetätajja, nanacajj jumarojj tucqhañ munapjjaraquïma. Uqhämaraqui nayrïr tuti orakejjäqui uca orakejj catusjjañataquiw chʼamtʼapjjä.

14. Jichhasti, kellkatajj tucuytwa, nayajj Moronïtwa, nefi jakenacan jilïripätwa.

15. Ucat Ammoronajj uca kellkat catokasinjja, wal colerasïna, ucatsti yakha kellkat Moronir aptʼayaraquïna. Acanacaw aqhäm sas kellkat arunacapajja:

16. Nayajj Lamanat sarakeri Ammoron pʼekechirïtwa, nayajj jumanacan jiwayat Amaliquian jilapätwa. Nayaw jupan wilapätjja, uqhämat uqhäm lurasipjjäma. Nuwasiri tamanacajjampiw jumanacjjar jutapjjäma. Janiw nayajj achusïwinacamar ajjsarcti.

17. Juman awquinacamajj jilanacapar sallkjasa, apjasaw marcar apnakañ wactʼcän uc jupanacat lunthatapjjäna.

18. Jichhajja, jumanacatejj armanacam apanucupjjätajja, ucat qhitinacarutejj marcar apnakañajj wactʼqui ucanacan sarayataparjam jaysapjjätajja, nayajj jakenacajjaruw armanacap apanucuyä, ucatsti janiw jucʼamp nuwasiycäti.

19. Jumajj wal wal naya contrajj achustajja, uqhämarac marcajj contrasa, ucampis janiw nanacajj achusïwinacamar ajjsarapcti.

20. Ucampis cusisisaw nuwasir jakenacajjatac mankʼa imañajjatac catuntatanac mayïwimarjam turcañ antutä. Nanacasti wiñay nuwasïw lurapjjaraquïma, Nefi jakenacar chʼamajjar jaysayañajjcama, jan ucajja, wiñay chhaktañapcama.

21. Parlquistas uca Diosat parlasajj jumajj sistawa: Jumanacajj uca Diosaruw jan catokapctati –sasa. Nanacajj janiw uqhäm cancañar uñtʼapcti, jumanacas uñtʼapcaractati; may sañäni: Uqhäm cancañatejj utjaspajja, cunjämatarac yatsnasti, cunjämtejj jumanacar lurapctam uqhäm nanacar jan lurapjjatapsti?

22. Jilamajj mankhapacharuw sari -sasaw maysat nayarojj sista. Ucat supayamp mankhapachampitejj utjaspajja, jiwayctas uca jilajjamp utjir janit ucar qhitcätam? Ucampis ucanacajj janiw cunäquisa.

23. Awquinacamajj amanut Jerusalenat irpsunipcän uca Zoramat nayajj Ammoron sat sarakerïtwa.

24. Jichhajj nayajj kamasan Laman jakëtwa. Aca nuwasïwejj jupanacan sallkjatanacapat cutsuyañataquiwa, marcar apnakañ wactʼqui uc jicjjatañatac catjjäsiñataquiwa. Uqhämasti, Moronir kellkcta uca kellkat tucuyta.