1. Almajj Amulecan arunacapan Zeezromar amuctʼayatap amuyäna, cunalaycutejj Amulecar tʼunjañataqui, cʼarisiñaparu, sallkjañaparu, Amulecan catjatap jupajj amuyasïna; Zeezroman juchanac luratapat yatisajj qhathatiñ kalltatap amuyaraquïna. Ucat Almajj lacap jistʼarasaw Amulecan arunacapat ircatañataqui, jucʼamp khanañchañataqui, jan ucajja, Amulecajj kellkatanacat khanañchcän ucat jucʼamp khanañchañatac arsuñ kalltäna.

2. Jichhajja, cawquïr arunactejj Almajj Zeezromar arscän ucanacjja, muyuntätäpcän uca jakenacaw istʼapjjäna, (jupanacasti waljanïpjjänwa); jupajj aqhäm sasaw arsüna:

3. Zeezrom: Cʼarisitamaru, jan wali chʼiqhi amuyunïtamar catjatätam laycojja, janiw jumajj jakenacaruquit cʼarintctajja, jan ucasti Diosaruw cʼarint-tajja. Jupajj takpach lupʼïwinacam yati, uqhämaraqui jupan Ajayupan lupʼïwinacap toke nanacar yatiyatapjj amuyaractawa.

4. Arustʼaman supayan yatïwiparjam wali yatitjamätap nanacan yatitajj amuytawa. Arustʼamasti cʼarisiñataqui, aca jakenacar sallkjañataquiwa, jupanacan nanacjjat ñankha arsuñanacapataqui alisnucuñanacapatac amtayañamataqui.

5. Ucajj timaman arustʼapawa, jupasti jumjjar chʼamapampiw uc luri. Jichhajja, cuntejj nayajj jumar siscsma, uc takenir satajjat amtasiñam munta.

6. Nayajj takpach jumanacaruw sapjjsma: Ucajj timan aca jakenacar catjañatac sipitapänwa, ucasti jumanacjjar sarayañapataqui cadenanacapamp jumanacar muytayañapataqui, catuntäwipan chʼamaparjam wiñay tʼunjäwir cadenrantañapataquiwa.

7. Cunapachatejj Almajj uca arunac arscän ucapachajja, Zeezromajj Diosan chʼamapar iyawsatap laycojj jucʼamp qhathatïna, uqhämaraqui Amulecampin Almampin jupat yatitapat iyawsayataraquïna. Jupan chuymapan lupʼïwinacapat lurañ munañanacapat jupanacan yatitapat jupajj iyawsayataraquïna. Diosan arjañarjama jupanacan ucanac yatiñanacapataquiw chʼamajj churatäna.

8. Ucat Zeezromajj wal jupanacar jisctʼasiñ kalltäna, Diosan khapak marcapat jucʼamp yatiñataqui. Almarusti sänwa: Cuns sañ muni, cuntejj Amulecajj jiwatanacan jactäwipat arscän ucajja: Takeniw jiwañat jactapjjani, asquïsa ñankhäsa Dios nayrakataruw luräwinacaparjam taripatäñatac irpatäpjjani – sasajja, cun sañarac mun ucasti? – sasaw jisctʼäna.

9. Ucat Almajj ucanacat jupar khanañchañ kalltäna, aqhäm sasa: Waljaniruw Diosat jan amuyat cunanacat yatïwejj churata, ucampis chʼama camächitajj jupanacar churataraquiwa, jan ucanac yatiyañapataqui, jan ucajja, kawkha Diosan aruptejj jupajj jaken wawanacapar churqui jupanacan jupar yäkañaparjama, chekäñaparjama, uca jupan churañaparjamaquiw jupanacajj ucanac yatiyapjjaspa.

10. Uca laycojja cawquïritejj chuymap chʼollkheptayqui ucajja, mä jucʼac arutjja catoke; qhititejj chuymap jan chʼollkheptayqui ucajja, arut waljarac catoke, jupanacarusti Diosat jan amuyat cunanacat phokhat yatiñapcam yatïwiw churata.

11. Cawquïrinacatejj chuymanacap chʼollkheptayapqui ucanacaruw arut yatiñajj jucʼac churataraqui, jupanacan Diosat jan amuyat cunanacapat jan cuns yatiñapcama. Ucat supayan catuntatäsa, jupan munañaparjamaw tʼunjäwir irpatäpjjani. Ucaw mankhapachan cadenanacap satäqui ucajja.

12. Amulecasti khanpun arsüna, jiwañata, aca jiwir janchit jan jiwquir janchin utjäwir jactañata, luräwinacasarjam taripatäñasatac Diosan taripäwip nayrakatar irpatäñat khan arsuraquïna.

13. Chuymanacasatejj chʼollkheptayatächejja; jïsa, jiwasanacatejj chuymanacasar aru contra chʼollkheptayapjjstanjja, aru contra jiwasanacan jan jicjjatasiñapcama, jiwasanacan utjäwinacasajj sinti ajjsarcañäniwa, juchañchatäpjjatas laycu.

14. Jiwasanacan arunacasaw juchañchapjjestani, jïsa, take luräwinacasaw juchañchapjjestani; jiwasanacasti kʼañuw jicjjatasipjjañäni; lupʼïwinacasaw jiwasanacarojj juchar jakontapjjaraquistani. Uqhäm ajjsarcañ utjäwin jicjjatasisasti, janiw Diosasar uñcatañ muncañäniti, ajjsarapjjañäniwa. Jiwasanacataquisti walïniw karkanacampir kollunacampir jiwasanacar alljatañapatac mayiñajja, jupan nayrakatapat imantasiñataqui.

15. Ucampis janiw uqhämäcaspati. Jiwasanacajj jupa nayrakatar maqhatasaw khapak cancañapan saytʼapjjañasäni. Jupan chʼamapana, jachʼäñapana, sarayäwi chʼamapan saytʼasa, jiwasanacan wiñay pʼenk tucuñataqui, takpach jupan taripañanacapan chekaparjamätap arsusipjjañasäniwa. Jupan sutipar iyawsapqui juchat cutiquipstañatac achunac achupcaraqui, ucanacar khespiyañatac chʼamanïñapjja, takpach luräwinacapan asquïtapjja, jaken wawanacapar qhuyapayatap arsusipjjañäni.

16. Ucat nayajj sapjjsma: Uca khepatjja, mä jiwañaw jutani, jïsa, payïr jiwañaw utjani. Ucajj kollan cancañat jarcʼaker jiwañawa; ucapachaw cawquïrinacatejj juchanacapamp janchi jiwañarjam jiwapqui ucanacajja, kollan cancañat jarcʼaker jiwañarjamaw jiwapjjaraquini; jïsa, jupanacajj asqui cunanacat jarcʼaker jiwañ catokapjjani.

17. Ucapachaw tʼakhesïwinacapajj ninamp azufremp sancʼa kotjamäni, ucan nina lawrapasti wiñayan wiñayapaw lawri. Ucapachaw Satanasan catuntir chʼamaparjam jupanacarojj munañaparjam jup catuntatïpana, wiñay tucqhäwir cadenrantatäpjjani.

18. Ucat nayajj sapjjsma: Cutsuyäwejj jan utjcaspas uqhämäpjjaniwa. Diosan chekapäñaparjamajj janiw cutsuyatäpcaspati; thujsantañ cancañan jan jucʼamp utjatap laycu, janiraquiw jupanacajj jiwapcaspati.

19. Cunapachatejj Almajj uca arunac arsuñ tucuycän ucapachajja, jakenacajj jucʼamp muspharapjjäna.

20. Ucampis jupanac taypin Antiona sat mä jilïr sarayiriw jacʼachasisin jupar säna: Jakenacajj jiwañat jactasin jiwir utjäwit jan jiwir utjäwiruw turcatäpjjani, jupanacan jan jiwañapataqui, – sisctas ucajj cunasa?

21. Camsañs muni aqhäm sir kellkatajja: Jiwasanacan nayrïr awquisampin taycasampin jan mantas jacañ kokan achupat jan mankʼas jan wiñay jacapjjañanacapataquiw Diosajj querubinanac naqhir espadamp Eden huertat inti jals tokeru uchi? Ucat jiwasanacajj amuyasipjjsnawa, janiw cunjämats jupanacajj wiñay jacapcasapänti.

22. Almajj juparojj sänwa: Nayajj ucjj khanañchañampïscäyätwa. Jichhajja, Diosan aruparjama Adanan jarcʼat achuta mankʼatap laycu tincutap amuytan; uqhämaraqui amuytanwa, jupan tincutap laycuw takpach jakenacajj tincutaru chhakataru tucupjjaraquïna.

23. Jichhajja nayajj sapjjsmawa: Adanatejj ucapachajj jacañ kokan achupat mankʼasapänjja, janiw jiwañajj utjcasapänti. Arusti inamayaquïsapänwa. Diosarusti cʼarisiyasapänwa, cunalaycutejj jupajj sänwa: Jumatejj mankʼätajja, chekpach jiwapunïtawa.

24. Jichhajja, jiwañan jakenacar puritap uñjtanwa. Amulecajj uca jiwañat arsünjja, ucasti janchi jiwañawa; ucampis jakenacarojj juchanacapat cutiquipstañapatac pachaw churatäna. Ucat uca jacañajja yantʼir utjäwir tucüna. Ucasti Diosamp jiquisiñatac waquichir pachawa; nanacajj arsupcta uca jan tucusir utjäwitac waquichir pacharaquiwa. Uca jan tucusir utjäwisti jiwatanacan jactäwip khepatawa.

25. Oraken kalltäwipatpach luratäqui uca cutsuyir arustʼajj janitejj utjcasapänjja, janiw jiwatanacan jactäwipajj utjcasapänti. Ucampis cutsuyir arustʼajj luratänwa. Ucasti jiwatanacan jactäwiparuw utjayani. Uca jactäwit niy arsupjjaractwa.

26. Jichhajja, nayrïr awquisamp taycasampitejj jacañ kokan achupat mankʼapjjasapänjja, jupanacajj wiñay llaquisitäpjjasapänwa, waquichat pachat jarcʼakata. Uqhämajj cutsuyir arustʼajj janiw phokhascasapänti, Diosan arupasti jan cunataquïsapänwa, inamayaquiraquïsapänwa.

27. Ucampis janiw uqhämäcänti, antisas jakenacan jiwañapataquiw arsutäna; jiwañ khepatsti jupanacajj taripäwir jutapjjañapawa, jïsa, cuna taripäwit-tejj nanacajj arsupcta, uca quipca taripäwir jutapjjañapawa; ucasti tucuyäwiwa.

28. Diosasti jakenacar puriyañatac ucanac ut-tʼayatapatjja, cunatejj jupanacatac ut-tʼayatäcän ucanacat yatiñapan waquisiñap jupajj amuyasïna.

29. Ucat alajjpach qhitanacar jupanacamp parlir qhitäna, jupanacasti Diosan khapak cancañapat jakenacarojj uñjayapjjäna.

30. Jakenacasti ucapachat ucsaruw jupan sutipjjar mayisiñ kalltapjjäna; ucat Diosajj jakenacamp parläna, oraken kalltäwipatpach waquichatäcän uca cutsuyir arustʼa jupanacar yatiyäna. Jupanacan iyawsataparjama, juchat cutiquipstataparjama, kollan luratanacaparjamaraquiw ucjj jupanacar yatiyäna.

31. Uqhämasti Diosajj camächitanac jakenacarojj churäna, acapachatac nayrïr camächitanac jakenacan pʼaquipjjatap laycu, jupanacajj Diosanacjamaw asquit ñankhat yatir tucupjjäna, chuymapatjam lurañatac utjäwiruw uchatäpjjäna, munañaparjam ascs ñankhs lurañataqui.

32. Ucat cutsuyir arustʼa yatiyatapatjja, Diosajj jan ñankha lurañanacapataquiw jupanacarojj camächitanac churäna. Uca ñankha lurañan mutuñapajj payïr jiwañawa, asqui cunanacat wiñay jarcʼaker jiwañäquejj ucawa; cutsuyir arustʼajj ñankha luririnacjjarojj janiw chʼamanïcaspati, cunalaycutejj Diosan taket sipan jucʼamp qhuyapayasirïtap laycuw, chekaparjam taripañan luräwinacapajj jan tʼunjatäcaspati.

33. Ucampis Diosajj Yokapan sutipjjaruw jakenacar jawsäna, (ucapí ut-tʼayatäc uca cutsuyir arustʼajja), aqhäm sasa: Jumanacatejj juchat cutiquipstapjjäta, janirac chuymanacams chʼollkheptayapcätajja, nayajj mä sapa jathachasita, uca Yokajj toket qhuyapayapjjäma.

34. Ucat cawquïritejj juchat cutiquipstcani, chuymap jan chʼollkheptaycan ucajja, Mä Sapa jathachasit Yokajj tokew aqhäm saspa: Uca qhuyapayäwejj juchanacajjar pampachañataquiw nayanqui –sasa. Jupanacaw nayan samarañajjarojj mantapjjani.

35. Cawquïritejj chuymap chʼollkheptaycani, ñankha luräwinac lurcaraquin ucarojja, nayajj colerasisaw chekpach arsta, jupanacajj samarañajjar janiw mantapcaniti.

36. Jichhasti jilanaca, nayajj sapjjsmawa: Chuymanacamtejj chʼollkheptayapjjätajja, janiw Tatitun samarañapar mantapcätati. Ucat ñankha luräwinacamajj juparuw cutcati, nayrïr cutcatäwinjam colerasiñapjja jumanacar apayaniñapcama, jïsa, jupan aruparjama, khepïr cutcatäwinjja nayrïr cutcatäwinjama, wiñay tucqhatäñanacamataqui; ucat aruparjama, khepïr jiwañjja, nayrïr jiwañjam puriyani.

37. Uqhämasti jilanaca, ucanac yatisa, ucanac chekëpanjja, juchat cutiquipstapjjañäni; janirac chuymanacas chʼollkheptayapcañäniti, Dios Tatitusar jan cutcatasa, aca payïr churat camächitanacapanjja, colerasiñap jiwasanacjjar jan apayaniñapataqui. Antisas aruparjam waquichat Diosan samarañapar mantapjjañäni.