62ri Jalja
Moronejj Pahoranar yanapiriw sari – Zarahemlajj kallcatirinacamp wastat catutawa – Helamanar Lehir Teancumaruw yanapapjje – Laman jakenacajj Moroni oraken tantachasipjje – Teancumajj Ammoronaruw jiwayi, ucat jiwayataraqui – Laman jakenacajj oraket alisnucutäpjjewa.
1. Ucat Moronejj uca kellkat catokcän ucqhajja, jupan chuymapajj kamas catusaw wali jachʼa cusisiñan phoktʼatäna, Pahoranan chekapätapa, marcapan antutäwipar jan cʼari jakëtap laycu.
2. Ucampis Pahoranar taripäw konuñat alis-supcän ucanacan ñankha luräwinacapat walpin llaquisiraquïna. Chekpachaw marcap contra Diosap contrajj kallcatapcän ucanac laycojj llaquisïna.
3. Ucat Moronejj Pahoranan munañaparjamaw mä kawkha jakenac irpäna, Lehir Teancumar jiltʼir nuwasiri tamapatac sarayäw churasa, Gedeon orak uñcatat sarantäna.
4. Jupasti antutäw wiphaljja, cawqharutejj mantcän ucqhan aytäna. Ucat Gedeon oraker sarcasajja, kawkha jakenactejj anthapirjamäcän ucanac apthapïna.
5. Ucat warankanacaw wiphalapar jutapjjäna. Jupanacasti jan mitʼaniptatäñanacapataquiw antutäwipar arjjatañatac espadanacap aptapjjäna.
6. Ucat Moronejj tantachthapcän ucarjamaw sarir jakenac tantachthapisin Gedeon oraker purïna. Ucat jupan jakenacapamp Pahoranan jakenacapamp mayachasaw, jupanacajj wali chʼamanir tucupjjäna. Antutat jakenacar Zarahemla oraket alis-scän uca orak catupcän uca kallcatirinacan Pacus pʼekechiripan jakenacapat sipan jucʼamp chʼamaniruw tucupjjäna.
7. Ucat Moronimp Pahoranampejj nuwasiri tamanacapamp Zarahemla oraker sarapjjäna; ucansti marcaruw chhuctʼapjjäna, Pacusan jakenacapasti nuwasiriw mistunipjjäna.
8. Ucat Pacusajj jiwayatänwa; jakenacapasti catuntayasjjapjjaraquïnwa. Pahoranasti taripäw konuñaparuw wastat kontʼayatäna.
9. Ucat Pacusan jakenacapamp catuntatäsin carcelar jakontat pʼekechir jakenacampejj leyirjam taripatäpjjänwa. Ucat jupanacajj leyirjam jiwayatäpjjänwa. Jïsa, Pacusan jakenacapamp pʼekechir jakenacampejj qhitinacatejj marcapar arjjatir armanac jan aptañ munapcäna, jan ucasti jupa contra nuwasipcän ucanacajj jiwayatäpjjänwa.
10. Ucat marcapar sum arjjatañataquiw uca leyir wali sum phokhañajj waquisir tucüna. Uqhämaraqui qhitinacatejj antutäwipar jaychasir jicjjatatäcän ucanacajja, leyirjamaw lak jiwayatäna.
11. Uqhäm taripirinacan Nefi jakenacjjar sarayäwipan quimsa tunc marajj tucusïna. Moronimp Pahoranampisti Zarahemla oraker quipca jakenacap taypin sumancañ cut-tayasa, antutäwipar jan chekapäpcän take ucanacaruw jiwayapjjäna.
12. Ucat taripirinacan Nefi jakenacjjar sarayäwipan quimsa tunc mayan maran kalltäwipan Moronejj ucspachaw Helamanar juyranac apayayasin sojjta warank jaken nuwasiri tamar ucsa toke orakenacar arjjatir yanapir qhitäna.
13. Uqhämaraqui sojjta warank jaken ejercitomp juyranacamp Lehin Teancuman nuwasiri tamanacapar apayaraquïna. Ucanacasti Laman jakenac contra oraker chʼamañchañataquiw luratäna.
14. Ucat Moronimp Pahoranampejj Zarahemla oraken walja jakenac jaytasin, Nefia marcar walja jakenac irpäna, Laman jakenacar uca marcat jakonucuñatac may chuymtʼasa.
15. Ucat jupanacajj uca oraker sarasipcän ucqhajja, Laman jakenacan wali chʼaman ejercitopampiw jicthaptapjjäna. Jupanacatsti waljanir jiwayasaw juyranacapa, nuwasiñanacap aparapjjäna.
16. Ucat jupanacar catuntatapatjja, jan jucʼamp Nefi jakenac contra nuwasiñ armanacap aptañatac arsüwiruw mantayapjjäna.
17. Ucat uca arsüwir mantayatapatjja, Ammonan jakenacapampiw utjir jupanacar qhitapjjäna. Uca jan jiwayatanacasti niyapun pusi warank jakënwa.
18. Ucat jupanacar qhitasinjja, Nefia oraker sarasipcaquïnwa. Ucat Nefia marcar purisajja, Nefia marc jacʼa Nefia pampanacapan chʼujlljam carpanacap ut-tʼayapjjäna.
19. Jichhajja, Moronejj uca Laman jakenacan pampanacar jupanacamp nuwasir mistuñap munäna. Ucampis Laman jakenacajj wali kamasan jakëtap yatisina, waljanïtap uñjasaraquiw, jupanacamp nuwasir mistuñ ajjsarapjjäna. Ucat ucürojj janiw nuwasipcänti.
20. Ucat arumtʼcän ucqhajja, Moronejj arum chʼamacan sarasaw, Laman jakenacan nuwasiri tamapajj marcan cawqhawjar utjnokatap yatjjatiriw perka patar maqhatäna.
21. Ucat jupanacajj mantäw jacʼana, inti jals tokencapjjänwa, jupanacasti takeniw iquirasipcäna. Ucat Moronejj, nuwasiri tamapajj cawqhanc-cäntejj ucqhar cut-tasaw wali thuru phalanacamp maqhatañanacamp perka patat perka mankhar warcurant-tañataquiw mäc waquichayäna.
22. Ucat Moronejj jakenacapar sarayasaw perka patar maqhatayäna. Ucat Laman jakenacajj nuwasiri tamanacapamp jan utjapcän uca inti jalant toke marcawjitar warcurant-tayaraquïna.
23. Ucat takpachaniw arumjarojj thuru phalanacapamp maqhatañanacapamp marcar warcurant-tapjjäna. Ucat willjta tokerojja, takpachaniw marca mankhancapjjäna.
24. Ucat Laman jakenacajj iquit sartapcän ucqhajja, Moronin nuwasirinacapan perkanac mankhancatap uñjasajja, wali ajjsarasapuniw mantäw chek mistusajj jaltjjapjjäna.
25. Ucat Moronejj jupanacan jupa nayrakatat jaltatap uñjasinjja, jakenacapar jupanacjjar qhitjjatasaw waljanir jiwarayäna. Walja yakhanacarusti muyuntasaw catuntapjjäna. Jiltʼirinacasti lamar iran thiyanc-cän uca Moron orakeruw jaltapjjäna.
26. Uqhäm Moronimp Pahoranampejj Nefia marca, jan mayni jakeps chhaktayas catupjjäna; ucampis walja Laman jakenacaw jiwarayatäna.
27. Ucat walja catuntat Laman jakenacajj Ammonan jakenacapamp mayachasisin antutat jakenacar tucuñ munapjjäna.
28. Ucat cawquïrinacatejj munapcän ucanacarojja, munäwinacaparjamaw churatäna.
29. Ucat takpach Laman jake catuntatanacajj Ammonan jakenacapamp mayachasisaw wal trabajañ kalltapjjäna; yap yapuchasa, take cunayman yarananac phawasa, take casta uywa tamanac uywasa. Uqhämat Nefi jakenacajj jachʼa llaquisïw jupanacat apakasipjjäna; jïsa, take catuntat Laman jakenacat antutasitäpjjäna.
30. Ucat Moronejj Nefia marc catutapatjja, walja catuntatanac cat-thapisa, Laman jakenacan nuwasiri tamanacap wal jiscʼaptayasa, walja Nefi jake catuntatanac antutayasa, jupan nuwasiri tamapar wal jiljjatayasaw Moronejj Nefia oraket Lehi oraker saräna.
31. Ucat Laman jakenacajj Moronir jupanac contra jutir uñjasajja, wastat ajjsarasaw Moronin nuwasiri tamap nayrakatat jaltjjapjjäna.
32. Ucat Moronimp nuwasiri tamapampejj jupanacar marcat marcaru, Lehimp Teancumamp jiquisiñapcam arctapjjäna. Ucat Laman jakenacajj Lehimpit Teancumampit lamar iran thiyanacan Moroni oraker puriñapcam jaltjjapjjäna.
33. Ucat Laman jakenacan nuwasiri tamanacapajj Moroni oraken mayaruquiw tantachthapisipjjäna, Ammoron Laman jakenacan pʼekechiripasti jupanacampiraquïnwa.
34. Ucat Moronimp Lehimp Teancumampejj nuwasiri tamanacapampiw Moroni orak muytir thiyanacana, aynach token wasar ucsa thiyanacana, inti jals token wasar ucsa thiyanacan Laman jakenacar muyuntañapcam utjnokapjjäna.
35. Uqhäm arumjarojj utjnokapjjäna, cunalaycutejj Nefi jakenacamp Laman jakenacampejj saräwin jayätap laycojj karitäpjjänwa. Ucat jupanacajj janiw arumajj cun lurañs amuyapcänti, jan ucajja Teancumaquiw arum lurañ amuyäna. Jupajj Ammoronatac wali coleratapunïnwa. Uca jachʼa jaya Nefi jakenacamp Laman jakenacamp wal nuwasiyir wil wartayir machʼa puriyir nuwasïwjj Ammoronampin Amaliquia jilapampin puriycaspas uqhäm jupajj amuyasïna.
36. Ucat Teancumajj colerasisaw Laman jakenacajj utjnokapcän ucar saräna, ucatsti, marca perkanjam warcurant-täna. Ucatsti, jupajj phalamp mäwjat mäwjar pʼekechir jicjjatañcamaw saräna. Ucat uara lawamp jupar jaktasaw lloko jacʼat chhokontäna, ucampis janïr pʼekechirejj jiwcän ucqhaw, lokeripar pʼarjjtayäna; jupanacasti Teancumar arctasaw jiwayapjjäna.
37. Ucat Lehimp Moronimpejj Teancuman jiwatapat yatjjatasajj walpun llaquisipjjäna, cunalaycutejj jupajj marcapatac kamasamp nuwasisajj antutäwin cheka amigopänwa. Jupasti walja sinti jachʼa tʼakhesïwin tʼakhesiraquïna. Ucampis jupajj jiwatänwa, takpach orakenquirinacjamaw sarjjäna.
38. Ucat khepürojj Moronejj Laman jakenacjjaruw saräna, jupanacasti waljanirupuniw jiwarayapjjäna; jupanacarusti uca oraket alisnucupjjaraquïnwa, Laman jakenacasti, jaltjjapjjänwa, ucatsti janiraquiw Nefi jakenac contrajj ucapachan cut-tanipcänti.
39. Uqhäm taripirinacan Nefi jakenacjjar sarayäwipan quimsa tunca mayan marajj tucusïna. Uqhäm jupanac taypin nuwasïwinacasa wil wartäwinacas machʼanacas tʼakhesïwinacas walja maraw utjäna.
40. Jiwayäwinacas chʼajjwanacas kallcatäwinacas take cunayman ñankha luräwinacaw Nefi jakenac taypin utjaraquïna. Ucampis asquinacataqui, jïsa asquinacan Diosat mayisïwinacap laycuw jupanacajj jan tucqhatäpcänti.
41. Ucampis Nefi jakenacamp Laman jakenacamp nuwasïwin jayätap laycojja, waljaniw chʼollkheptapjjäna, nuwasïwin wali jayätapata. Waljaniraquiw tʼakhesïwinacap laycu llampʼuptasa, wali llampʼu chuymanïñcam Dios nayrakatan llampʼuptapjjäna.
42. Ucat Laman jakenac jacʼa orakewjitanacar thurtʼasiñatac chʼamanïñapcam Moronin chʼamañchatapatjja, jupajj Zarahemla marcaruw cut-täna, Helamanasti quipca tuti orakeparuw cut-taraquïna. Wastataw Nefi jakenac taypin sumancañajj ut-tʼayatäna.
43. Ucat Moronejj nuwasiri tamanacapar sarayäwjj Moronia sat yokapan amparanacaparuw catuyäna. Jupasti quipca utaparuw jiltʼir urunacap sumancañan kamañatac sarjjaraquïna.
44. Pahoranasti taripäw konuñaruw cut-täna, Helamanasti jakenacar Diosan arup yatiyäw wastat catjjarüna, walja nuwasïwinac chʼajjwanac laycojja, waquisïn iyawsiri tamar uchañajja cunjämatejj waquisqui uqhäma.
45. Ucat Helamanamp jilanacapampejj jakenac taypir sarasaw Diosan arup wali chʼamamp walja jakenacar ñankha luräwinacapat iyawsayañcam yatiyapjjäna. Uca iyawsatap laycuw jupanacajj juchanacapat cutiquipstasin Dios Tatitupan sutipar bautisasipjjäna.
46. Ucat jupanacajj Diosan iyawsiri tamap wastat uc-chʼpach oraken ut-tʼayapjjäna.
47. Ucat leyejj asquichataraquïnwa; taripirinacamp jilïr taripirinacampejj ajllitäpjjaraquïnwa.
48. Nefi jakenacasti wastat uca oraken jachʼaptaña, miratatasin wali jachʼa chʼamanir uca oraken tucuñ kalltapjjaraquïna; jupanacasti wal kamiriptañ kalltapjjäna.
49. Ucampis kamirïcasasa, chʼamanïcasasa, jachʼaptäwipampisa, uñjcatajj janiw jachʼa jachʼa tucupcänti. Janiraquiw Dios Tatitupar amtasiñatac cʼachhäpcaraquïnti. Antisas jupa nayrakatan chuymanacap walpin llampʼuptayasipjjäna.
50. Jupanacajj Tatitun wali jachʼanac jupanacatac luratap amtasipjjäna. Jupan jupanacar jiwañata, catuntatäñata, carcelanacata, take cunayman tʼakhesïwinacat khespiyatapata, timanacapan amparanacapat khespiyatap amtasipjjaraquïna.
51. Jupanacasti Dios Tatituparuw sapa cut mayisipjjaraquïna. Ucat Tatitojj aruparjamaw jupanacar bendicïna, jupanacan uca oraken chʼamanir tucusin jachʼaptañanacapataqui.
52. Uqhämaw takpach ucanacajj luratäna. Ucat taripirinacan Nefi orakenacjjar sarayäwipan quimsa tunca pheskan maran Helamanajj jiwjjäna.