1. Jichhajja, wawajjay, arsutäc uca cut-tayañjjat nayajj mä jucʼa arsuñ munaracsma. Yakhepanacajj maysaruw kellkatanac uñtayapjje, ucalaycuraquiw maysar saranucupjje. Nayajj ucat amuyuman llaquisitap amuyaracta; ucampis nayaw ucjjat khanañchäma.

2. Uqhämasti, sismaw wawajja: Cut-tayañ arustʼajja, Diosan chekapar uñjañapataquejj waquisipuniwa; cunalaycutejj take cunan cunjämäcäntejj uqhämar cutjtañapajj waquisipuniwa. Criston chʼamaparjam jactäwiparjam jaken ajayupajj janchipar cutcatjjañapajj waquisiwa, chekaparaquiwa. Uqhämaraqui janchirojj take cunanacatejj utjqui ucanacamp cutcatjjañapajj waquisiraquiwa.

3. Uqhämaraqui jakenacan luräwinacaparjam taripatäñapajj Diosan chekapar uñjañapataquejj waquisiraquiwa. Jupanacan luräwinacapamp chuymanacapan munañanacapampitejj aca jacäwin asquïcänjja, khep khepa urunjja, jupanacan asquir cut-tañapajj waquisiraquiniwa.

4. Jupanacan luräwinacapatejj ñankhächejja, ucanacajj ñankharjamaw jupanacar cut-tayatäni. Ucat take cunajj cheka sucʼaparuw cut-tayatäni, take cunas cheka ut-tʼayataparu, jiwir janchejj jan jiwquir janchir aptatäniwa, thujsantañ cancañajj jan thujsantañ cancañaru. Wiñay cusisiñar jactatäsajja, Diosan khapak marcap tutjam catokañataqui, jan ucasti wiñay llaquisiñar jactatäsajja, supayan marcap tutjam catokañataqui; Diosan marcapasti maysana, supayan marcapasti yakhanaraqui.

5. Mayajj cusisiñ munäwinacaparjam cusisiñaruw jactani, jan ucajj asqui munäwinacaparjam asquiruw jactani. Yakhajj ñankha munäwinacaparjam ñankhar aytatawa. Cunjämatejj jupanacajj ur jornal ñankh lurañ munapcänjja, uqhämaraquiw arumtʼcan ucapachajja, luräwinacapat ñankh catokapjjaraquini.

6. Uqhämaraquiw maysa tokenquirinacampejj lurasi. Jupanacatejj juchanacapat cutiquipstapcäna, urunacapan tucusiñcam asc munapcän ucanacajja, luräwinacapat asc catokapjjani.

7. Ucanacaw Tatitun cutsuyatäpcani ucanacajja. Ucanacaw apsutäpqui, wiñay chʼamac arumat khespiyatäpqui ucanacajja. Uqhämat saytʼapjje, jan ucajj liwisipjjesa; jupanacajj asquirus ñankharus ajllisisa, jupanac quipcar taripirinacäpjjewa.

8. Jichhajja, Diosan camächitanacapajj jan turc-cayawa; ucat thaquejj waquichata. Qhitinacatejj ucan sarnakapcanejja, sarnakasajj khespiyasipjjaspawa.

9. Jichhajj wawajjay, jichhacamajj juch lurañataquejj yantʼcta, uca yatichäwin Diosamar mayamp cutcatañ jan yantʼamti.

10. Cut-tayañat arsutanacata, juchata cusisiñaru cut-tayatäñat utjañap jan amuyasimti. Nayajj sismawa: Ñankh lurañajj janipiniw cusisiñäquiti.

11. Jichhajj wawajjay, take jan turcat utjäwinquir jakenaca, nayajj sirist, take janchin irpat jakenacajja, cʼallcʼu mulljam cʼallcʼuncapjjewa, ñankha luräwinacan phalanacapancapjjaraquiwa. Jupanacajj orakencasajja jan Diosampïsajja, Diosan cancañaparuw cutcatapjje; ucat cusisiñan cancañap contra cutcatir utjäwincapjjaraqui.

12. Jichhajja, cut-tayañajj mä cunjäm utjäwinquir cunajj yakha utjäwiru, jan ucajja, utjäwipat maysäjjanquir utjäwir puriyañ sañt muni?

13. Wawajjay, janiw uqhämäquiti, antisas cut-tayañajj sañ muni, ñankhat ñankha, janchin irpatäñat janchin irpatäña, supayjamat supayjamaw cut-tayañajja; asquejj asquita, sumajj sumata, cheka cancañajj cheka cancañata, qhuyapayäwejj qhuyapayäwit cut-tayañawa.

14. Ucat wawajja, jilanacamar qhuyapayam; cheka cancañarjam luram, ascjam taripam, wiñay asc luraraquim. Uqhäm lurätajja, luratamat catokätawa; jïsa qhuyapayäwejj jumar cutcatayatäniwa, cheka cancañajj jumaruw cut-tayatäni, asqui taripäwejj jumar cut-tayataraquïniwa, uqhämaraqui sumajj luratanacamat jumar cut-tayataraquïni.

15. Cuntejj jumajj apaycäta, ucajj jumar cut-tasaw cut-tayatäni. Ucat cut-tayaña arojj juch luririruw phokhatpach juchañchi. Janiraquiw cuna juchapats waliquiw –siscaraquiti.