1. Uqhämaraqui jilanaca, Dios Tatitojj uca camächitanac wawanacapar churcän ucapachat amuyunacamar lupʼiyañ munapjjsma; Dios Tatitun Yokapan sucʼataparjamäqui uca kollan sucʼataparjam ucanac jakenacar yatichañatac sacerdotenacar ut-tʼayatapat amtasiñanacam munaracta.

2. Uca sacerdotenacasti Diosan Yokapan sucʼataparjam ut-tʼayatäpjjänwa, Diosan Yokap toke, cutsuyapjjañapäcän uc yatipjjañapatac ut-tʼayatäpjjaraquïnwa.

3. Aqhämat ut-tʼayatäpjjänwa: Diosan nayrakat yatiyäwiparjam orak ut-tʼayäwitpach jawsatäsa, jupanacan walja iyawsañanïtap laycu, asqui luräwinacap laycu; nayrakata asquits ñankhats ajllisiñatac antutatäsa, jupanacajj asc ajllisisina, jachʼa iyawsäwiparjam wal lurasina, mä kollan jawsäwimpiw jawsatäpjje, jïsa, uqhämanacatac waquichir cutsuyäwimpi, ucarjamarac waquichatäcän uca kollan jawsäwimpiw jawsatäpjje.

4. Ucat iyawsatap laycuw uca kollan jawsäwir jawsatäpjje; yakhepanacasti Diosan Ajayup alis-supjje, chʼollkhe chuymanïtanacapa, juyqhu amuyunïtanacap laycu. Jan uqhäm lurapcasapänjja, jilanacapjam jachʼa bendicionanïpjjasapänwa.

5. Ucajj sañ muni, nayrajj jupanacajj jilanacap quipcäpjjänwa; ucat uca kollan jawsäwejj orak ut-tʼayäwitpach cawquïrinacatejj chuymanacap jan chʼollkheptayapqui ucanacatac waquichatänwa, waquichatäcän uca mä sapa Jathachasit Yokan juchanacan tʼakhesiyäwipar phokhäwipancquis uca phokhäwip tokësaraqui.

6. Uqhämaw uca kollan jawsäwirojj jawsatäpjjäna, Diosan kollan sucʼataparjamaw jilïr sacerdocior ut-tʼayatäpjjaraquïna, jaken wawanacapar Diosan camächitanacap yatichañataqui, jupan samaräwipar mantapjjañapataquiraqui.

7. Uca jilïr sacerdociojja, Yokapan sucʼataparjamänwa, ucasti orak ut-tʼayäwitpach utjäna, mä arunjja, jan kallta uruni jan tucuy marani, wiñayat wiñaycam take cunat nayrakat yatiyäwiparjam waquichatäsa.

8. Aqhämat jupanacajj ut-tʼayatäpjjäna: Kollan jawsäwimp jawsatäpjjänwa, kollan ut-tʼayäwimp ut-tʼayatäpjjaraquïnwa, ucatsti, kollan sucʼat jilïr sacerdocio catjjarusa, uca jawsäwimp ut-tʼayäwimp jilïr sacerdociompisti janiw kalltäwinïquiti, tucuyäwinïquisa.

9. Uqhämasti, wiñayatac jilïr sacerdotëpjjewa, mä sapa Jathachasit Yokapan sucʼataparjamajj janiraquiw tucuy maranïquisa. Ucajj asqui cancañamp chektʼatawa chekar uñjañampi, chekan phoktʼataraquiwa, ucajj uqhämawa. Uqhämäpan.

10. Jichhajja, cunjämatejj uca jilïr sacerdocion kollan sucʼatapat ut-tʼayatätapat sapcsma uqhämarojj waljaniw ut-tʼayatäna, ucatsti, Diosan jilïr sacerdotenacapar tucupjjaraquïna. Ucasti jupanacan wal iyawsatap laycu, juchat cutiquipstatap laycu, Dios nayrakatan asquïtap laycuraquiw jupanacajj juchat cutiquipstañaru, asqui lurañaru, chhaktañ lant ajllisipjjäna.

11. Ucat uca kollan sucʼatarjamaw jawsatäpjjäna, jupanacasti kollanaptayatäpjjänwa, isinacapasti Corderon wilapamp jankʼo tʼajjsutänwa.

12. Jupanacasti Kollan Ajayun kollanaptayatapatjja, isinacap jankʼor tucuyatïpana, Dios nayrakatanjj jan manchan kʼomäsaw, juch lurañat ajjtasisajj sarnakapjjäna. Walja waljaniw kʼomaptayatäsin Dios Tatitupan samaräwipar mantapjjäna.

13. Jichhajja, jilanaca, nayajj jumanacan Dios nayrakatan llampʼu chuymaniptayasiñama, juchat cutiquipstañatac luräwinac lurañam munta, uca samaräwir mantapjjañamataqui.

14. Nayajj parlcta, uca pachpa sucʼatarjam jilïr sacerdotenacana, wiñayatac jilïr sacerdocio catjjarcän uca Melquisedecan urunacapan jakenacajj lurapcän uqhäm, jumanacajj chuymanacamar llampʼuptayapjjaraquim.

15. Uca pachpa Melquisedecaruw Abrahanajj sapa tunca cunapat may catuyäna; jïsa Abrahan awquisajj take tunca yänacapat may churäna.

16. Uca kollan luräwinacajj uqhäm churatänwa, jakenacan ucampi Diosan Yokapar suyañanacapataqui, cunalaycutejj ucajj jupan sucʼap quipcawa, jan ucajja, jupan sucʼapänwa, uqhäm jupanacan juchanacapar pʼampʼachañatac jupar suyasa, Tatitun samaräwipar mantapjjañapataqui.

17. Uca Melquisedecajj Salem orakjjar pʼekechirïnwa. Marcapajj ñankha ajjtcañ luräwinacan jachʼaptänjja; takpach jupanacaw cheka thaquit saranucusa, take cunayman ñankha luräwinacan phoktʼatäpjjäna.

18. Ucampis Melquisedecajj wali iyawsasa, Diosan kollan sucʼataparjam jilïr sacerdot ut-tʼayäw catokasaw, marcapar Diosar cutiquipstañanacapatac yatiyäna. Ucat jupanacajj juchanacapat cutiquipstapjjäna, Melquisedecasti urunacapanjj uca oraken sumancañ ut-tʼayaraquïna; ucat jupajj Salem oraker pʼekechirïsaw, sumancañ ut-tʼayiri satäna; jupasti awquipan sarayataw marcar sarayäna.

19. Waljaniw jupa nayräjjajj utjapjjäna, waljaniraquiw jupat khepajj utjapjjäna, ucampis jupat jucʼamp jachʼajj janiw utjcänti; ucat jupat jucʼamp parlapjjäna.

20. Janiw nayan ucat walj parlañajj waquisquiti, cuntejj siscta ucajj waliquïspawa. Kellkatanacajj jumanacan nayrakatamanquiwa; jumanacatejj ucanac ñankhachapjjätajja, quipca tucqhäwimataquïniwa.

21. Ucat Almajj uca arunac jupanacar arsusinjja, jupajj amparap loktasaw, jachʼa arut aqhäm sas artʼäna: Jichhaw cutiquipstañataquiwa, cunalaycutejj khespiyäw urojj jacʼachasisinquiwa.

22. Tatitun arupajj qhitanacan lacap toket take orakenacar ucjj yatiyi; jïsa, jumanacan jachʼa cusisiñat cusisiyir yatiyäwinac utjañataquiw ucjj yatiyi. Jupasti take jakenacaparu orakjjar chʼekentatanacarus uca cusisiyir yatiyäwinacjj yatiyaraqui; ucat jiwasanacar purinipjjestu.

23. Ucanacasti jiwasanacarojj khana yatiyatawa, jiwasanacan jan pantasis amuyañanacasataqui; ucasti jiwasanacan jan uñtʼat oraken aywinakerïtas laycuw yatiyata. Ucat takpach uva yapusanjj ucanacan jiwasanacar yatiyatätap laycuw wali suma munatäpjjtan.

24. Jichhpachaw alajjpachanquirinacajj orakesanquirinacat waljanir ucanac yatiyasipqui. Ucasti jaken wawanacapan chuymanacapar jupan khapak cancañamp jutcani ucapachan arup catokañatac waquichatawa.

25. Ucat jupan jutäwipat cusisiyir yatiyäwinacap jupan qhitanacapan lacap tok istʼañasaruc suyapjjtan. Uca pachajj jutaniwa, ucampis cunapach puriniñaps janiw yatipctanti. Nayan jacäwijj ucapachancpan Diosay, ucampis cunapachäpasaya, jayatäpas mäquïpasa, nayajj ucan cusisï.

26. Jupajj jutcan ucapachajja, awquinacasanc-cän uca jutir urunacat yatiyir ajayurjama, jupat arsut arunacaparjama, jupanacan arunacapar phokhañataqui, asqui kollan jakenacaruw qhitanacan lacap toket ucajj yatiyatäni.

27. Jichhajja jilanaca, take chuymajjampiw munta, nayan arunacajjar yäkapjjañama juchanacamar alis-supjjañama, ucanacat cutiquipstañ urunacamjj jan khepar jit-tayañam munaracta.

28. Uqhämaraqui Tatit nayrakatan chuymanacamar llampʼuptayapjjañam munta, kollan sutipat mayisipjjañama, jan inactʼas suyasa, cuntejj thurtʼasipcasma ucat jucʼamp jachʼa yantʼanacaman jan utjañapatac Diosat mayisipjjañama, uqhämat Kollan Ajayump irpayasiñataqui, ucatsti llampʼu chuymanir tucupjjañama, llampʼuru, take cun jaysiriru, jaya suyiriru, munasiñan phoktʼata, pʼek jan mäc pasayasiñan phoktʼatar tucupjjañam munaracta.

29. Tatitur iyawsasa, wiñay jacäw catokañatac iyawsasa, Diosan munasiñapan wiñay chuymanacamancañap khep khepa urun aytatäsin samaräwipar mantapjjañam munaracta.

30. Tatitojj jumanacar juchat cutiquipstaypan, colerasiñap jan jumanacjjar sarakayañapataqui, mankhapachancadenanacapamp jan cadenrantatäpjjañamataqui, payïr jiwañ jan tʼakhesipjjañamataquiraqui.

31. Uqhäm Almajj walja jucʼamp arunac jakenacar parläna, ucampis ucanacajj janiw uca libron kellkatäquiti.