1. Uca taripirinacan Nefi jakenacjjar sarayäwipan tunca mayan marana, payïr phajjsin pheskër urunjja, Zarahemla orakenjj walja sumancañ utjipanjja, mä kawkha marataqui, jïsa, pheskër urun payïr phajjsin tunca mayan maracam nuwasïwinac chʼajjwanac jan utjipanjja, uca orakenjj nuwasïwejj utjañ kalltäna.

2. Laman jakenacan nuwasiri tamanacapajj wasar toket uca orak thiyanacar Ammonia marcacam jutapjjatayna; uca jakenacar jiwarayañ kalltasaw uca marcar tucqhañ kalltapjjäna.

3. Ucat Nefi jakenacajj jupanacar janïr alis-suñatac jachʼa nuwasiri tama waquichquipan, uca Laman jakenacajj Ammonia marcanquir jakenacarojj mä kawkha Noe orake thiyanquirinacampir tucqhapjjäna. Uqhämaraqui yakhepanacarojj catuntasin wasarar irpapjjäna.

4. Ucat Nefi jakenacajj uca wasarar catuntatäsin irpatäpcäns ucanacar antutayañ munapjjäna.

5. Ucat Nefi jakenacan nuwasiri tamanacapatac jilïri ut-tʼayatäcän ucajja, (jupasti Zoram satänwa, pä yokaniraquïnwa, Lehimp Ahampi) Zoramamp uca pä yokapampejj Alman iyawsiri tamatac jilïr sacerdotëtap yatisaw, jupan jutir urunacat yatiyir ajayunïtapat istʼasaw, jupanacajj jupan uc sarapjjäna; jupanacajj Laman jakenaca catuntat jilanacapatac thaker wasarar sarañap Tatitun munañaps jan munañaps yatiñ Almat munapjjäna.

6. Ucat Almajj ucataquiw Tatitur jisctʼasïna. Ucat Almajj cut-tasaw jupanacar säna: Laman jakenacajj Manti orake thiya qhurcat aynach toke wasaranjam Sidon jawir maqhatapjjani. Ucat ucanjja Sidon jawirat inti jals token jupanacamp jiquisipjjäta; ucanjja Tatitojj Laman jakenacan catuntat irpat jilanacam jumanacar catuyapjjätam.

7. Ucat Zoramamp yokanacapampejj Sidon jawir nuwasiri tamanacapamp maqhatapjjäna. Ucat Manti orake thiya qhurcataru, aynach tok Sidon jawirat inti jals tokenquir wasararuw sarapjjäna.

8. Ucat Laman jakenacan nuwasiri tamanacapar catjapjjäna, uca Laman jakenacarusti anatatapjjänwa, wasararuw alis-supjjaraquïna. Ucatsti Laman jakenacan catuntat jilanacaparuw jawsthapipjjäna, uca catuntatanacatsti janiw maynis chhakatäcänti. Jupanacasti quipca orakenacapan utjañapataquiw jilanacapan irpatäpjjäna.

9. Uqhäm taripirinacan tunca mayan mara tucusajj sarakäna; Laman jakenacajj uca oraket alis-sutäpjjänwa, Ammonia marcanquirinacajj tucqhatäpjjänwa. Sapa jaquir ammoniaw tucqhataraquïna, uqhämaraqui jachʼa marcapas tucqhatäna, cawquïr marcat-tejj jachʼätap laycojj, janiw Diosajj ucjj tucjcaspat sapcän ucajja, tʼunjataraquïnwa.

10. Mä urunac ucajj jan utjirin tucuyatäna, jupanacan amayanacapasti anunacan wasar lakʼonacan tucqhatänwa.

11. Ucampis walja uru sarakatatjja, jiwat janchinacjj orakeruw kot-thapipjjäna, ucat mä jucʼa lakʼampiw imjjatapjjaraquïna. Ucampis ucan wali kʼaphïtap laycojja, jaya maranacaw jakenacajj uca Ammonia marcar utjirejj jan sarapcänti. Ucat Nehoranacarojj, kʼala tucqhäwi satänjja, cunalaycutejj jiwayatäcän ucanacajj Nehoran yatïwiparjam iyawsirïpjjänwa; jupanacan orakenacapajj jan utjiriniw tucjjäna.

12. Ucat taripirinacan Nefi jakenacjjar sarayäwipan tunca pusin maracamaw Laman jakenacajj Nefi jakenacamp nuwasir jan jutapcänti. Ucat quimsa maraw Nefi jakenacajj uca orakenjj jan nuwasis sumancañanïpjjäna.

13. Ucat Almamp Amulecampejj jakenacarojja, kollan utanacapana, kollan chekanacapana, judionacanquir utachat sinagoganacapan juchat cutiquipstañ yatichapjjäna.

14. Kawkhaninacatejj jupanacan arunacapar istʼañ munapcän ucanacaruw jan inactʼasajj Diosan arup yatiyapjjäna. Jupanacajj qhitirus yatiyasipcaquïnwa.

15. Uqhäm Almamp Amulecampejj sarnakapjjäna, uqhämaraqui walja yakha ucatak ajllit jakenacajj takpak uca orakenjj aru yatiyir sarnakapjjaraquïna. Ucat uca orakenjja ucsa toke orakenacanjja, takpach Nefi jakenac taypin iyawsiri tamajj ut-tʼayatänwa.

16. Jupanac taypinjj janiw yakh yakhäñajj utjcänti. Ucat takpach uca orakjjaruw Tatitojj Ajayup wartäna, jaken wawanacapan amuyunacapar waquichañataqui, jan ucajja, jupanacan chuymanacapajja, jupajj jutcan ucapach yatichat ar catokañapatac waquichatäñataqui.

17. Jupanacan arutac jan chʼollkheptañanacapataqui, jan iyawsapjjatap laycu tucqhäwir jan puriñanacapataqui, jan ucasti cusisis uca ar catokañanacapatac mä laymjam cheka alir alcatayatäñanacapataqui Dios Tatitupan samaräwipar mantañanacapataquiw uc luräna.

18. Uca jakenac taypir sarir sacerdotenacajja, jakenacaruw yatichapjjäna, cʼarisiñ contra, sallkjaña, munapayaña, chʼajjwaña, chhojjriñchañ munaña, ñankh parlaña, lunthataña, lunthatjaña, jiwayaña, wachokaña, take jan tupump munapayaña, take ucanac contraraquiw yatiyapjjaraquïna.

19. Jupanacasti ucat jucʼa pacharojj jutir cunaymananacat jakenacarojj uñachayapjjäna; jupanacajj Diosan Yokapan jutäwipata, jupan tʼakhesïwinacapata, jiwañapata, jiwatanacan jactäwipat jakenacar uñachayapjjaraquïna.

20. Ucat walja jakenacajj, Diosan Yokapajj cawquirutejj jutcani uca chekat jisctʼasipjjäna. Jupanacarusti jupan jactäwip khepat jupanacar uñstañapat yatichasïna. Ucsti jakenacajj wali cusisisaw istʼapjjäna.

21. Uqhämaw iyawsiri tamajj take ucsa oraken ut-tʼayasïna, supayar atipjasa, Diosan arup kʼomätaparjam takpach uca oraken yatiyasa, Tatitojj bendicionanacap jakenacjjar wartasa. Uqhämaw taripirinacan Nefi jakenacjjar sarayäwipan tunca pusin marajj tucusïna.