1. Uqhämaraqui naya Almajj uca Ammonia marcanquir jakenacar Amulec irpasaw wastat yatiyañajjatac Diosat camächit catokasin jupanacar yatiyañ kallt-ta. Ucat jupanacajj aqhäm sasaw nayamp juchhiquiñ kalltapjjäna:

2. Qhitiraquït jumasti? orakejj tucusiniw sasas mä jakejj yatiyasp ucarojj iyawsapquirist uqhämt amuyta?

3. Jupanacajj arsupcän uca arunac janiw amuyasipcänti; jupanacajj oraken tucusiñapat janiw yatipcänti.

4. Jupanacasti sapjjaraquïnwa: Jumatejj aca jachʼa marcan mä urun tucqhatäñapat khanañchasas yatiycasma ucqhas, janiw arunacamar iyawsapcämati.

5. Diosajj muspharcañanac lurcaspa ucanacjja, janiw amuyapcänti, cunalaycutejj kala chuyman jakenacänwa, jan altʼir chuyman jakenacaraquïnwa.

6. Jupanacasti sapjjänwa: Qhitis Diosajja, uqhäm jachʼa muspharcañ cunaymananacan chekätap yatiñatac mä jakec marcap taypir qhitanirejja?

7. Ucat jupanacajj nayar catuntañataquiw jitcatapjjetu, ucampis janiw catuntapquituti; nayasti chachjamaw ircatañatac saytʼ-ta. Nayasti aqhäm sasaw jupanacarojj kamasamp ircatäyäta:

8. Jumanaca ñankha, asquit cutekat mita, cunjäms awquinacaman saranacapat armasipjjta? Jïsa, ay, cunj mäquis Diosan camächitanacapat armasipjjtajja!

9. Janit Lehi awquisan Diosan amparapamp Jerusalenat irpsunitapat amtasipcta? Janit takpach jupanacar chʼusa wasaranjam jupan irpatapat amtasipcaracta?

10. Kawkha cutitejj jupajj lakʼa achilanacasarojj timanacapan amparanacapat antutaycäna, quipca jilanacapan amparapan tucqhañat-tejj jupanacar imcän, ucanacatjj mäquit armasipjjaracta?

11. Janitejj jupan taket sipan jucʼamp chʼamapamp qhuyapayäwipamp jiwasanacatac jan mäc pʼek pasayasiñapampejj utjcasapänjja, nayrapachaw ac-chʼpach orakjjat willsutäpjjañasäna. Inas jan tucusir tʼakhesiñ llaquisiñ utjäwir qhitatächisäna.

12. Ucampis nayajj sapjjsmawa: Jupajj jumanacan juchat cutiquipstañanacamataquiw camächit churapjjtam. Janitejj juchat cutiquipstapcätajja, janipiniw Diosan khapak marcapanjj tut catokapcätati. Ucampis ucajj janiw takpachäquiti. Jupajj juchat cutiquipstañanacamatac camächit churapjjtam. Janitejj uqhäm lurapcätajja, jupajj ac-chʼpach orakjjat kʼal tucqhapjjätam. Colerasiñapampiw jupajj jumanacar sartʼapjjätam; jachʼa colerasiñapatjja janiw mays uñtcaniti.

13. Janit aqhäm sas Lehir parlat arunac amtasipcta: Nayan camächitanacajjarutejj phokhapjjätajja, aca oraken jachʼaptapjjätawa. Ucatjj saraquïnwa: Janitejj camächitanacajjar phokhapcätajja, Tatitun nayrakatapat jarcʼakatäpjjätawa.

14. Jichhasti, Laman jakenacan Diosan camächitanacapar jan phokhapjjatapat Tatitun ucat jarcʼakatapat amtasipjjañam munirista. Jichhajj Tatitun arupan ucan phokhasitap amuyasipjjtan; aca oraken juch lurañ kalltapcän ucapachat Laman jakenacajj Tatitun nayrakatapat jarcʼakatäpjje.

15. Ucampis sapjjsmawa: Taripäw urunjja jupanacan tʼakhesiñapajj jumanacan tʼakhesiñapat sipan jucʼaquïniwa, jumanacatejj juchanacaman kamasipcaquïta; jïsa, aca orakenjj jupanacataquejj sujaquïniwa, jumanacan sarnakäwimat sipana. Jumanacatejj jucha lurañanacat cutiquipstapcät ucqhaquiw jan uqhämäcaniti.

16. Cunalaycutejj walja arsüwinacaw Laman jakenacarojj churasi, lakʼa achilanacapan saranacap laycuw jichhürcam jan yatisajj sarnakasipqui; ucalaycuw Tatitojj jupanacat qhuyapayasini, aca orakensti janiw mäc jupanacar tʼunjcaraquiniti.

17. Uqhämaraqui mä uruw jupan aruparojj iyawsayatäpjjani, lakʼa achilanacapan saranacapan jan chekätap yatipjjaraquini; waljaniw jupanacat khespiyatäpjjani cunalaycutejj cawquïrinacatejj jupan sutipar mayisipcan ucanacarojja, Tatitojj takpach ucanacaruw qhuyapayani.

18. Ucampis nayajj sapjjsmawa: Ñankha luräwinacam lurasipcaquïtajja, aca oraken urunacamajj janiw waljäcaniti. Laman jakenacaw jumanacjjar qhitanitäpjjani. Janitejj jumanacajj juchat cutiquipstapcätajja, jan yatit pachan jupanacajj qhitanitäsaw kʼala tucqhañamp sartʼapjjätam; ucasti Tatitun jachʼa colerasiñaparjamäniwa.

19. Ñankha luräwinacamamp marcapar tucqhañatac jacapjjañamjj janiw jupajj muncaniti. Nayajj janiw uqhäm antutcanit sapjjsmawa, antisas jupajj Laman jakenacan takpach Nefi jakenac sat marcapar tucqhañap munaspa, marcapatejj ley pʼaquiñaru juch lurañaru jalantapcasp ucqhajja, Dios Tatitupan uqhäm walja khana yatiñajj jupanacar churatäcän uca khepatjja.

20. Tatitun wali qhuyapayat munat marcätapatjja, takpach yakha orakenacat familianacat lajjranacat jakenacat jucʼamp qhuyapayatätapatjja, mayisïwinacapar iyawsäwinacapar munañanacaparjam utjcäna, utjqui, utjcaraquinejja, ucanacat takpachajj jupanacar yatiyatätapatjja;

21. Jïsa, Diosan Ajayupan tumpatätap khepata, alajjpach qhitanacamp parlatapat khepata, Tatitun arupan jupanacar parlatapat khepata, jutir urunacat yatiyir ajayun Diosan yatiyir ajayunïtapat khepata, walja churäwinacanïtap khepata, yakha lajjranacamp parlañ churäwi, yatiyañ churäwi, Kollan Ajay churäwi, yakha arunac arsuyas amuyañ churäwi, uqhämanacanïtap khepata,

22. Diosan, Jerusalen oraket Tatitun amparapamp irpsutätap khepata, machʼata usunacat take cunayman casta usunacat khespiyatapat khepata, nuwasiñan jan tucqhatäñanacapatac nuwasïwin jachʼa chʼamanïtap khepata, sapa cuti mitʼanïtat antutayatapat khepata, jichhacam imatäs utjayatätapat khepata, jupanacan yänacatjam take cunaymanamp kamirïñapcam jachʼaptayatätap khepatjja–

23. Jichhajj nayaw sapjjsma: Aca Tatitun amparapan walja qhuyapayäwinac catoker marcatejj jupanacanquir khana yatïw contra juch lurasipcaquinejja, nayajj sapjjsmawa: Uqhäm lurasipcaquinejja, juch lurañar jalantasipcaquinejja, Laman jakenacajj jupanacat sipan qhuyaptʼayasiñamp uñjatäniwa.

24. Tatitun arsüwinacapajj Laman jakenacampachatac luratawa. Ucampis jumanacatejj juch lurasipcaquïtajja, janiw jumanacat luratäcjjeti. Janit Tatitojj aqhäm khan arscänjja, leyjam siscaraquïnjja: Jupanacatejj nayar kallcatapquitanejja, uc-chʼpach orakjjat kʼala tucqhatäpjjaniwa –sasa?

25. Ucat jumanacan jan tucqhatäpjjañanacamataquiw Tatitojj qhitapar walja jakenacapar tumpir qhitäna. Uca qhitasti jupanacarojj aqhäm sas aca jakenacar wal artʼapjjañapataquiw yatiyi: Juchat cutiquipstapjjam, cunalaycutejj alajjpach khapak marcajj jacʼanquiwa.

26. Acat jucʼa urunacarojja Diosan Yokapajj khapak cancañampiw jutani, khapak cancañapasti Awquin mä Sapa jathachasitan khapak cancañapäniwa. Ucasti qhuyapayäwina, chekar uñjañana, chekana, llampʼu chuymamp suyañana, munasiñana, pʼek jan mäc pasayasiñan phoktʼatawa. Lakaw marcapan artʼäwinacapar istʼi, mayisïwinacaparusti lakaw phokharaqui.

27. Jupajj cawquïrinacatejj sutipar iyawsas juchat cutiquipstañatac bautizasipcan ucanacaruw cutsuyir jutani.

28. Uqhämasti Tatitun thaquip waquichapjjam; cunapachatejj take jakenacajj lurataparjam apthapipcan ucapachajja, jacʼanquiwa. Jupanacatejj asquïpcanejja, Jesucriston antutayir chʼamaparjama, almanacapar khespiyäw catokapjjani. Jupanacatejj ñankhäpcanejja, supayan catuntir chʼamaparjamaw almanacapar juchañchäw catokapjjani.

29. Ucajj jakenacar artʼqui uca qhitan arupawa.

30. Jichhasti, munat jilanacajja, nayan jilanacajjäpjjatam laycuw jumanacajj munatäpjjañamaraqui. Juchat cutiquipstañatac luräwinac lurapjjañamawa, niyaquitejj chuymanacamajj Diosan arupatac wal chʼollkheptchi, chhakat tincut marcätam laycuraqui.

31. Ucat naya Almajj uca arunac arscäyät ucqhajja, uca jakenacajja, chʼollkhe chuyman jan altʼir marcäpjjtaw satajj laycuw nayatac colerasipjjäna.

32. Uqhämaraqui chhakat tincut marcäpjjtaw satajj laycuraquiw nayatac colerasipjjäna. Ucatsti carcelar jakontañataquiw nayar amparanacapamp catuntañatac chʼamtʼapjjäna.

33. Ucampis Tatitojj jupanacan ucapach catuntas nayar carcelar jakontañapjj janiw muncänti.

34. Ucat Amulecajj saytʼasaw jupanacar yatiyañ kalltaraquïna. Takpach Amulecan arunacapajj janiw kellkatäquiti, ucampis aca libronjja, yakhep arunacapaquiw kellkata.