1. Ucat Almajj Gedeon oraket aynach tokeru, Manti orak toker sarascasaw, jupajj Mosian yokanacapamp Zarahemla oraker sarquir jicjjatasajj muspharat jiquisi.

2. Diosan qhitapajj nayrïr cut Almar uñstcän ucapachajj uca Mosian yokanacapajj jupampïnwa; ucat Almajj jilanacapar uñjasajj wal cusisïna; uqhämaraqui jupanacan Tatitunjj jilanacapäsipcaquitap laycuw jucʼamp cusisïna. Jupanacajj chekat yatïwin jachʼaptapjjäna, cunalaycutejj jupanacajj suma amuyun jakëpjjänwa, Diosan arup yatiñataquejj kellkatanacan sum thakapjjäna.

3. Ucampis ucajj janiw takpachäquiti; jupanacajj wal ayunas mayisisinjja, Diosan yatiyir ajayupanïsaw jutir urunacat yatiyir ajayunïpjjäna. Ucat jupanacajj yatichapcän ucqhajja, Diosan chʼamapamp munañan cancañapampiraquiw yatichapjjäna.

4. Jupanacasti Diosan arup tunca pusin maraw Laman jakenacar yatichapjjäna, waljanir cheka yatïwir irpasa. Jïsa, jupanacan arunacapan chʼamanïtap laycojja, waljaniruw Diosan altärapar irpcatapjjäna, jupan sutip aytañataqui, juchanacap jupa nayrakatan arsusiñataquiraqui.

5. Aqhäm sarnakäwinacaw jupanacarojj uca saräwinacapan lurasiyäna. Jupanacajj wal tʼakhesipjjäna; janchi tokena amuy tokena tʼakhesisa, mankʼata, umata, chʼajjmita, ajayuns tʼakhesipjjaraquïna.

6. Acanacaw jupanacan sarnakäwinacapajja: Jupanacajj taripirinacan nayrïr maran Mosia awquipan ucat mistusajja, awquipamp jakenacan amuyuparjam munañanacapampejj jupanacar marc sarayäw catuyañ muncän ucjj jan catokasa;

7. Jupanacajj espadanacapa, wara lawanacapa, arconacapa, michʼinacapa, kʼorawanacapa, wasaran mankʼan jiwayasiñatac apasaw, Zarahemla oraket mistupjjäna.

8. Uqhämaw wasarar ajllit jakenacamp Nefi oraker sarasajja, Diosan arup Laman jakenacar yatiyirejj sarapjjäna.

9. Ucat jupanacajj walja uruw wasaranjam sarapjjäna, jupanacasti mä jucʼa Tatitun Ajayupat jupanacamp chictʼat sarañatac churañapataqui, lurañäcaspas ucqhajja, Lamanat sarakeri jilanacapar chekat yatïwiru awquinacapan jan cheka catuyat luräwinacapan inamayätapat yatïwir puriyañataqui, Diosan amparapan apnakatäñanacapatac wal ayunasaw mayisipjjaraquïna.

10. Ucat Tatitojj Ajayupampiw jupanacarojj sartʼäna; jupasti jupanacarojj chuymachasipjjam –sänwa, ucat chuymachatäpjjäna.

11. Ucat Tatitojj jupanacar saraquïna: Laman jake jilanacam taypir sarapjjam ucatsti, arujj ut-tʼayapjjam, ucampis jumanacajj jaya suyañan tʼakhesiñan llampʼupjjäta, nayan suma uñachayäwinac uñachayapjjañamataqui. Nayasti walja jakenacar khespiyañataquiw amparajjan jumanacar apnakapjjäma.

12. Ucat Mosian yokanacapampi, jupanac chictʼat sarapcän ucanacan chuymanacapajj, Diosan arup Laman jakenacar yatiyir sarañataquiw kamas catupjjäna.

13. Ucat Laman jakenacan orakep thiyanacar puripcän ucqhajja, jupanacajj take tokeruw saratatapjjäna. Jupanacajj cosechap tucuycän ucqha wastat jiquisiñanacapatac Tatitur alcatasaw maynit maynit mistupjjäna; jupanacajj lurañmunapcäns ucan jachʼätap amuyapjjäna.

14. Ucasti chekpachaw jachʼänjja; jupanacajj ajjsarcañ lakʼo marcaru, kalarat chuyman marcaruw Diosan arup yatiyañataquejj arsupjjäna. Uca marcajj Nefi jakenacar jiwayañatjja, cusisipjjänwa, uqhämarac lunthatañata, jaket apakañata, jupanacan chuymanacapajj kamir cancañar catuyatänwa; korita, kollketa, cʼajquir kalanacat lupʼipjjäna. Ucanac jicjjatañataquisti, jiwayasa, lunthatjasaw ucanac catokañ munapjjäna.

15. Uqhämasti jupanacajj wali jayra marcäpjjänwa, waljaniw wacʼan diosanacar yupaychapjjäna, uqhämaraqui awquinacapan saranacap laycuw Diosan ñankhachäwipajj jupanacar purïna; ucampis Tatitun arsutanacapajj jupanacamp-pachataquïnwa jupanacac juchat cutiquipstapjjaspa ucqha.

16. Ucat Mosian yokanacapajj uca luräw lurañ munapjjäna, inas jupanacar juchat cutiquipstañar irpapjjerista, inas jupanacar cutsuyir arustʼäwir uñtʼayapjjaraquirista –sasa.

17. Ucatsti maynit maynit jithektasjjapjjäna, Laman jakenac taypiruw sapacamac saratatjjapjjäna, jupanac taypiru sapakat Diosan churat aruparjam chʼamaparjamaw sapa maynejj sarapjjaraquïna.

18. Ucat Ammonajj jupanacan jilïripäsa jan ucajja, jupanacar sarayasa, jupanacar jawsäwinacaparjam qhuyapayatapata, Diosan arup jupanacar yatiyatapata, jan ucajj janïr mistcän ucapachajj jupanacar yatichatapata, jupanac taypit mistüna. Uqhäm uca orakenjj maynit maynit take toker sarapjjäna.

19. Ucat Ammonajj Ismaelan orakeparuw saräna, ucajj Ismaelan yokanacap laycuw uqhäm sutinïna. Jupanacasti Laman jakenacaruw tucupjjaraquïna.

20. Ucat Ammonajj Ismael oraker mantcän ucqhajja, uca Laman jakenacajj jupar catuntasaw ñachʼantapjjäna, take jupanacan amparanacapar jaltʼir Nefi jakenacar ñachʼantasin pʼekechiripan uc callirïpcän ucarjama. Ucajj pʼekechirin munañaparjam lurañapataquïnwa; jupaw jiwayañïpan jiwayäna, catuntañïpan catjjasïna, carcelar jakontañïpans jakontäna, orakepat alisnucuñïpans alisnucüna, take cuns munañaparjam chuym khanartayasiñaparjamaw lurirïna.

21. Ucat Ammonajj Ismael oraken pʼekechirip nayrakatar callatänwa. Uca pʼekechirin sutipajj Lamonïnwa, jupasti Ismaelat sarakerïnwa.

22. Ucat pʼekechirejj Ammonar uca orakenjj Laman jakenac taypin, jan ucajj jupan marcap taypin utjañ munañapat jisctʼäna.

23. Ucat Ammonajj jupar säna: Jïsa nayajj mä kawkha pachaw aca marc taypin utjañ munta; inas jiwañcam acan utjañ munarac-chï.

24. Ucat Lamoni pʼekechirejj Ammonat cusisisaw jupan phalanacap jararayäna. Uqhämaraqui jupan mä phuchapamp jakechasiñap munaraquïna.

25. Ucampis Ammonajj jupar sänwa: Janiwa, antisas nayajj lokerimaquïyäwa. Ucat Ammonajj Lamoni pʼekechirin lokeripar tucüna. Ucatsti jupajj yakha lokerinacapamp Laman jakenacan luräwiparjamaw uywa tamanacap awatir qhitatäna.

26. Ucat jupajj quimsüruw pʼekechirir lokasa, jupajj yakha Laman jakenacjam lokerinacamp uywa tamanacamp Sebus umanac sat umaruw sarasipcäna, take Laman jakenacasti umayañataquiw uywa tamanacap ucar anaquipjjerïna.

27. Ucat Ammonamp uca pʼekechirin lokerinacapampejj uywa tamanacap uca umar anaquïpcän uc-chʼañcamaw, uywa tamanacap umar nayrakat anaquipcän uca Laman jakenacat mä kawkhanejj Ammonampin pʼekechirin lokerinacapampin tamanacap chhuqhutatayapjjäna; jïsa, take tokeruw chhuqhutatayapjjäna.

28. Ucat pʼekechirin lokerinacapajj aqhäm sasaw chuchasiñ kalltapjjäna: Cunjämatejj pʼekechirejj jilanacasar uywa tamanacapan uca ñankha jakenacan chhuqhutatayatap laycu jiwaycänjja, uqhämaraquiw jiwasanacarojj jiwayapjjestani. Ucat wal jachañ kalltasaw aqhäm sapjjäna: Uywa tamanacasajj chhakaratäjjewa.

29. Jupanacasti jiwarayatäñat ajjsarañat jachapjjäna. Ammonasti uc uñjasajj chuyma mankhapan cusisïna; cunalaycutejj aqhäm sänwa: Nayajj chʼamajj uñachtʼayä jan ucajj nayancqui uca chʼama, loker masinacajjar aca uywa tamanac pʼekechirir cut-tayasajja; uqhämat aca loker masinacajjan chuymanacap nayamp sumancayirista, jupanacar nayan arunacajjar iyawsayañajjataqui.

30. Uqhamän Ammonajj lupʼcän ucajja, jupan jilanacap satäqui ucanacan llaquisïwinacap uñjasajja.

31. Ucat jupajj arunacapamp aqhäm sasaw jupanacar chuymachäna: Jilanacajja, chuymachasipjjam; jiwasanacajj tamanac thaker sarapjjañäni, ucat ucanac anthapisin, aca umar wastat anaquinipjjañäni. Uqhämat pʼekechiritaquejj uca uywa tamanacap imapjjañäni, ucatsti janiraquiw jiwayapquistaniti.

32. Ucat jupanacajj tamanac thaker sarasajj Ammonar arcapjjäna, ucat lak jalasaw pʼekechirin tamanacap nayrakatar puripjjäna. Ucat wastat ucanac umar anthapipjjäna.

33. Ucat uca jakenacajj wastat tamanacap chhuqhutatayañataquejj saytʼapjjäna. Ucampis Ammonajj jilanacaparojj sänwa: Tamanac muythapipjjam, jan jaltapjjañapataqui. Nayasti tamanacasar chhuqhutatayirinacampiw jaychasir sarä.

34. Ucat jupanacajj Ammonan sataparjamaw lurapjjäna. Ammonasti Sebus umanacawjan saytʼir jakenacamp jaychasiriw saräna; uca jakenacasti janiw jucʼaniquïcänti.

35. Waljanïtap laycojja, jupanacajj Ammonarojj janiw ajjsarapcänti, Mosian yokanacapar jupanacan amparapat antutayañatac Tatitun Mosiar lurat arsüwipat jan yatitap laycojja, mayniquis jupanacat Ammonar munañaparjam jiwaycaspajj uqhäm amuyasipjjäna. Janiraquiw jupanacajj Tatitut cuns yatipcaraquïnti. Ucat jilanacapar tucqhañat cʼuchiquïpjjäna; ucat pʼekechirin tamanacapar chhuqhutatayañataquejj saytʼapjjäna.

36. Ucampis Ammonajj jitcatasaw, kʼorawapamp jupanacar kalamp jupanacar kʼorawtʼañ kalltäna; jupajj wali chʼamampiw jupanac taypir kalanac kʼorawtʼäna. Uqhäm jupajj mä kawkhaniruw jiwayäna, jupan chʼamapat muspharañapcama. Ucampis jupanacajj jiwayat jilanacapat colerasisaw, Ammonar jiwayañatac amtapjjäna. Ucat kalanacapamp jupar jan wactʼayasajja, jachʼa lawanacampiw jiwayir maqhatapjjäna.

37. Ucampis cawquïritejj Ammonar jawkʼañatac amparap aytcän ucarojja, ucan amparanacap espadapamp apakäna. Jupajj amparanacapar espadapan ari kʼachhipamp jawkʼasisaw thurtʼasïna, jupanacasti muspharasaw jupa nayrakatat jaltañ kalltapjjäna. Jupanacasti janiw jucʼanïcänti. Jupajj amparapan chʼamapampiw jupanacar jaltayäna.

38. Sojjtaniw kʼorawampejj jiwayatäna, ucampis jilïriruquiw espadamp jiwayäna. Ammonasti cawquïr amparanacatejj jupar jawkʼañatac aytcän ucanacarojj tʼiscokayänwa; ucanacasti janiw jucʼaquïcänti.

39. Ucat jupajj uca jakenacar jayacam alisnucusajj cut-tanjjänwa. Ucat jupanacarojj uywa tamanacar umayapjjäna, ucatsti pʼekechirin awatiriparuw cut-tayapjjäna; ucat jupanacajj pʼekechirin uc sarapjjäna, Ammonar jiwayañ chʼamtʼirinacan Ammonan espadapamp apakat amparanacap apasa. Uca amparanacsti jupanacan luratanacapat ircatañataquiw pʼekechirin uc markantapjjäna.