1. Ucat jupajj jakenacar parlañ tucuyasinjja, waljaniw jupanacat arunacapar iyawsapjjäna; jupanacasti juchat cutiquipstapjjäna.

2. Ucampis jupanacatjja waltʼataniw Amulecampir Almampir tucqhañ munapjjäna; Alman Zeezromar arsut arunacapan khanätap laycuw Almatac colerasipjjäna. Jupanacasti sapjjaraquïnwa: Amulecajj nanacar cʼarintapjjetuwa, jupajj abogadonacajjata, taripirinacajjata, leyejjat ñankh parli.

3. Jupanacasti Amulecampitac Almampitaquejj colerasipjjänwa; jupanacan ñankha luräwinacapat khan ircatatap laycuw jupanacarojj jamasat tucqhañ munapjjäna.

4. Ucampis janiw ucjj lurapcänti; antisas thuru phalanacamp ñachʼantasaw jupanacar uca orakenquir jilïr taripirin nayrakatapar irpantapjjäna.

5. Ucat jakenacajj jupanac contraw ircatapjjäna: Jupanacajj leyita, abogadonacasata, aca orakjjar takpach aca orakenquir jakenacjjar taripirinacat ñankh parlistu – sasaw sapjjäna; mayni Diosaquiw utji, jupajj Yokaparuw jakenac taypir qhitanini, ucampis jupajj janiw jupanacar khespiycaniti, –sasaw jupanacajj sapjjaraquïna. Walja uqhämanac jakenacajj Amulec contra Alma contrajj ircatapjjäna. Ucasti uca oraken jilïr taripir nayrakatan luratänwa.

6. Ucat Zeezromajj arsut arunacat musphäna; uqhämaraqui jupan cʼari arunacapan jakenacar juyqhu amuyunir tucuyatapat yatiyaraquïna. Ucat chuymapajj jupan quipca ñankha luräwinac luratapat yatisisaw, tʼakhesiñ kalltäna. Jupajj ñankhapachan usunacapan muyuntatäñ kalltäna.

7. Ucat jupajj jakenacar aqhäm sasaw artʼañ kalltäna: Nayajj juchanïtwa, aca jakenacajj Dios nayrakatan jan manchanïpjjewa. Ucat ucapachat ucsaruw jupajj jupanacatac achictʼañ kalltäna. Ucampis juparojj cunayman ñankha arunacampiw jakenacajj tʼakhesiyañ kalltapjjäna. Aqhäm sapjjänwa: Jumajj supayan phokhantataraquïtati? Ucat juparojj thuscatapjjäna, jupanac taypit alisnucupjjäna; uqhämaraquiw Almampin Amulecampin arsut arunacapar iyawsapcän take ucanacarojj alisnucupjjaraquïna. Ucat jupanacar alisnucusajja, kalanacamp cʼupjiriw khepat qhitapjjäna.

8. Ucat warminacapampiru wawanacapampiru mayachthapipjjäna. Ucat cawquïrinacatejj Diosan arunacapar iyawsapcäna, jan ucajj, iyawsañ yatichatäpcän ucanacarojja, ninaruw jakontayapjjäna. Uqhämaraqui cuna kellkatanacapantejj kollan kellkatanacajj utjcän ucanac ninan nakhantas tucqhañataquiw ninar jakontapjjaraquïna.

9. Ucatsti Almampir Amulecampir catjasaw uca jiwayañ chekar callapjjäna, jupanacan ninan nakhantat jiwapqui ucanacar uñjañanacapataqui.

10. Ucat Amulecajj uca ninan jiwir warminacan wawanacan tʼakhesïwip uñjasajj jupajj tʼakhesiraquïnwa. Ucat Almar säna: Camisarac aca ajjtcañ luräwst uñjañänisti? Amparanacas loktasay jiwasanquir Diosan chʼamapamp jupanacar uca ninat khespiyañäni.

11. Ucampis Almajj juparojj sänwa: Ajayojj nayan amparajj loktañ jarqʼituwa. Tatitojj ucanacarojj jupa pachpaw khapak cancañamp catoke; jupasti jupanacan uc lurañapjja, jan ucajj jakenacan uc jupanacar chuymanacapan chʼollkhëtaparjam lurañap antuti, colerasiñapamp jupanacar taripcani uca taripäwinacan chekarjam uñjatäñapataqui. Jan juchaninacan wilapajj jupanacat ircatani, ucasti khep khepa urunjj jupanac contraw wali jachʼat artʼani.

12. Ucat Amulecajj Almar säna: Inas jiwasar nakhantayarac-chistani.

13. Ucat Almajj säna: Diosan munañaparjamäpan; ucampis trabajosajj janïraw tucuyatäquiti, ucat janiw nakhantayapquistaniti.

14. Ucat ninar jakontatanacan janchipajj kʼala nakhantatänwa, jupanacamp chicasti jakontat kellkatanacajj nakhantatäjjaraquïnwa, ucatsti uca orakjjar jilïr taripirejj Almampin Amulecampin ucar jutasaw nayrakatapar saytʼäna. Jupanacajj ñachʼantatäpjjänwa, ucat ajanunacapat tʼajjllinokasaw jupanacar säna: Ucanac uñjasajja, aca jakenacar nina azufre kotar jakontatäñanacapat wasitat yatiyapjjätati?

15. Jumanacajj ninar jakontatanacar khespiyañatac jan chʼamanïtamjj amuyasipjjtawa; janiraquiw jupanacan jumanacjam iyawsatap laycu Diosajj jupanacar khespiycaraquiti. Ucat taripirejj wastat ajanunacapat tʼajjllinokasaw aqhäm jisctʼäna: Camsapjjtas jumanac pachpatjja?

16. Uca taripiristi Gedeonar jiwaycän uca Nehoran yatïwiparjam iyawsir jakënwa.

17. Ucat Almamp Amulecampejj janiw jupar cuns arsupcänti. Ucat jupanacar wastat tʼajjllinokasaw carcelar jakontatäñapatac chʼaman jakenacar jupanac catuyäna.

18. Ucat jupanacajj quimsür carcelancapcän ucqhaw, walja Nehoran yatïwiparjam lurir abogadonaca, taripirinaca, sacerdotenaca, yatichirinacas jutapjjäna. Jupanacasti carcelar mantasaw walja arunacat jupanacar jiscsupjjäna; ucampis Almamp Amulecampejj janiw jupanacar cuns arsupcänti.

19. Ucat taripirejj jupanac nayrakatar saytʼasaw säna: Cunats aca jakenacan arunacapar jan arsupcta? Janit nayan jumanacar ninar jakontañ chʼamanïtajj yatipcta? Ucat jupajj jupanacan parlañapatac säna; ucampis jupanacajj janiw camsapcänti.

20. Ucat jupanacajj mistusaw saratatjjapjjäna. Ucampis khepüruw wastat cut-tapjjaraquïna. Ucat taripiristi wastat tʼajjllinokäna. Uqhämaraqui waljaniw jupanacar jacʼachasisajj tʼajjllinokas sapjjaraquïna: Jumanacajj wastat-t aca jakenacar taripañatac saytʼasipjjta? Wastat-t leyinacajjar juchañchapjjäta? Jumanacatejj jachʼa chʼamanïpstajja, cunats jan khespiyasipjjta?

21. Walja uqhäm arunac jupanacar sapjjäna, laca chʼaqhanacap tʼururasisaw jupanacarojj thuscatapjjäna, aqhäm sapjjaraquïna: Juchañchatäpcä ucqhajja, cunjamäpjjäsa?

22. Walja cunayman uqhäm arunaca, jïsa, take cunayman uqhäm arunac jupanacar sapjjäna. Uqhäm walja uruw jupanacar jiscʼachapjjäna, jupanacarusti awtjayasiñanacapataquejj janiw mankʼ churapcänti. Pharjayasiñanacapataquis janiraquiw um churapcänti. Jupanacat isinacap kʼalanchsuyañcamaw thatsupjjäna. Uqhäm thuru phalanacamp ñachʼantatäsaw carcelan catuntapjjäna.

23. Walja uru uqhäm tʼakhesisinsti jupanacajj (ucasti tunca payanïr uruna, tunquïr phajjsina, taripirinacan Nefi jakenacjjar sarayäwipan tunquïr maränwa) Ammonia orakjjar jilïr taripirimp walja jupanacan yatichirinacapamp abogadonacapampiw Amulecamp Almampejj phalanacamp ñachʼantatäpcän uca carcelar sarapjjäna.

24. Ucat jilïr taripirejj jupanac nayrakatar saytʼasajj wastat jupanacar tʼajjllinokasaw aqhäm säna: Jumanacatejj Diosan chʼamapanïpstajja, aca phalanacat jararasipjjam, ucat nanacajj Tatitun aca jakenacar arunacamarjam tucqhañapar iyawsapjjä.

25. Ucatsti takpachaniw khepacamajj uca quipca arunac arsusajj, maqhatasin jupanacar tʼajjllinokapjjäna; ucatsti, jupan jupanacar parlatap khepat, Diosan chʼamapajj Almampir Amulecampir purïna, jupanacasti sarthapisaw saytʼapjjäna.

26. Ucat Almajj aqhäm sas artʼäna: Cunapachcamas aca jachʼa tʼakhesïwinac tʼakhesipjjä Tatay? Tatay, nanacan Cristor iyawsatajjarjam antutatäñajjcam chʼam churapjjeta. Ucat ñachʼantat phalanacap tʼakjjapjjäna, uca jakenacasti uc uñjasinjja jaltañ kalltapjjäna, cunalaycutejj tʼunjatäñar ajjsarañaw jupanacar purïna.

27. Jupanacan wal ajjsarapjjatap laycusti, orakeruw liwirtapjjäna; janiraquiw carcel anka puncur puripcaraquïnti. Ucat orakejj walpun thaltäna. Carcelan perkanacapasti payar jaljatäsaw oraker llojjertäna. Almampir Amulecampir tʼajjllipcän uca jilïr taripiri, abogadonaca, sacerdotenaca, yatichirinacas perkan llojj-jjat-tataw jiwarayatäpjjäna.

28. Ucat Almamp Amulecampejj jan chhojjriñchatäsaw carcelat mistupjjäna, cunalaycutejj Tatitojj jupanacan Cristor iyawsataparjamaw chʼam churäna. Uca pachpacharaquiw carcelat mistupjjäna, jupanacasti phalanacapat jararatäpjjänwa. Carcelajj llojjesïnwa, take uca mankhanquir jakenacasti jiwarayatäpjjänwa, Almamp Amulecampiquiw jiltʼapjjäna. Jupanacasti ucspachaw marcar sarjjapjjäna.

29. Marcanquir jakenacasti, jachʼa khojjoker istʼasajja, cunäcäntejj uc yatiñataquiw wal chhucthapinipjjäna. Ucat Almampir Amulecampir carcelat mistquir uñjasa, carcel perkanacan oraker llojjesitap uñjasajja, wali ajjsarthapisaw Almampin Amulecampin nayrakatapat jaltapjjäna, cunjämatejj mä ovejajj kallunacapamp pä leonat jaltqui uqhäma. Uqhämaw Almampin Amulecampin nayrakatapat jaltapjjäna.