1. Ucat Amaliquiajj marc sarayäw catcän ucapachpachaw jupajj Laman jakenacan chuymanacapar Nefi jakenac contra amtayañ kalltäna; jupajj mä kawkha jakenacaruw ut-tʼayäna torrenacapat Laman jakenacar Nefi jakenac contra parlañapataqui.

2. Uqhäm chuymanacaparojj Nefi jakenac contrajj amtayäna, taripirinacan sarayäwipan tunca llätuncan mar tucuyäw toker ucapachcam munañanacapar phokhasinjja, Laman jakenacjjar pʼekechirit ut-tʼayatäsina, takpach uca orakeru, take uca orakenquir jakenacaru, Nefi jakenacarus Laman jakenacarus sarayañ munaraquïna.

3. Ucat munañap phokhäna; jupajj Laman jakenacan chuymanacapar chʼollkheptayasajja, amuyunacaparuw juyqhuptayäna. Walja walja jakenacar Nefi jakenacamp nuwasir sarañatac tantachthapiñapcamaw, jupanacar colerasiñ amtayäna.

4. Jakenacapan waljanïtap laycusti, jupajj Nefi jakenacaruw atipjañ amtäna, ucatsti mitʼaniptayañataquejj wali amtatapunïnwa.

5. Ucat Nefi jakenacan chʼamap yatipjjatap laycu, imantasiñ chekanac uñjapjjatap laycu, marcanacapan jucʼamp tʼuqhawjanacap yatipjjatap laycuw Zoram jakenacarojj jilïr capitananac jupanacat ut-tʼayäna. Ucat nuwasiri tamanacapatac Zoram jakenac jilïr capitananacjam ut-tʼayäna.

6. Ucat jupanacajj chʼujllanacap apthapisisaw wasaranjam Zarahemla orake toker sarapjjäna.

7. Jichhajja Amaliquiajj sallka chuymamp apjasin chʼamaniptcän ucqhajja, Moronejj jakenacan amuyunacaparojj Dios Tatitupar chekäñapataquiw waquichascäna.

8. Jupajj Nefi jakenacan nuwasiri tamanacapar chʼamañchascasa, jiscʼa pucaranaca, jan ucajja, imantasiñ chekanac lurascäna, nuwasiri tamanacapar muyuntir walja lakʼanac kotsusa, kala perkanac lurasa, jupanacaru, marcanacaparu orak thiyanacaparu, takpach uca orakerus muyuntir perk perkachasa.

9. Jan suma thurtʼatäcän uca arjjatatawjanacaparojj jucʼamp jakenac uscüna. Uqhäm Nefi jakenacan catut orakenacar arjjatañataquejj chʼamañchäna.

10. Uqhämat jupajj waquichasiscäna antutäwipar arjjatasisa, uqhämaraqui orakenacaparu, warminacaparu, wawanacaparu, sumancañapar arjjatañapatac waquichasipjjaraquïna. Dios Tatitupan jacañataqui, timanacapan cristianonacan luräwinacap satäqui uc imañataqui.

11. Moronisti jachʼa chʼaman jakënwa; jupajj phokhat amuyun jakeraquïnwa. Jïsa, wil wartäwit jan cusisir jakënwa. Marcapampin jilanacapampin jan mitʼanïñata, yakhanacat jaysañat antutäwipat cusisir jakënwa.

12. Jakenacapar Diosan walja churat qhuyapayäwinacata, lurañ wactʼäwinacata Diosapar take jachʼa chuymamp yuspagarir jakënwa; jupajj marcapan waliquïñapatac arjjatatäñapat wal lurir jakeraquïnwa.

13. Jupajj Cristor iyawsañan thurtʼat jakënwa. Jupasti jakenacaparu, lurañ wactʼäwinacaparu, marcaparu, iyawsañaparu, wilap wartañcamaw arjjatañataquejj juräwi luraraquïna.

14. Nefi jakenacasti waquiscaspas ucqhajja, timanacapat wil wartañcamas arjjatasiñ yatichatäpjjänwa. Uqhämaraqui janipun qhitirus chuym usuyañ yatichatäpjjänwa, jan ucajja, tima contra jacäwinacap imañataquïcaspas ucqhaquiw espad aytañ yatichatäpjjäna.

15. Acajj iyawsäwipänwa, jupanac uqhäm luripana, Diosajj uca orakenjj jupanacar jachʼaptayaspa, jan ucajja, jupanacatejj Diosan camächitanacapar phokhapjjaspajja, jupajj uca oraken jupanacar jachʼaptayaspawa. Jupajj tucqhatäñan jachʼätaparjamaw ucat jaltañataqui, jan ucajj nuwasir waquichañatac jupanacar yatiyaraquispa.

16. Uqhämaraqui jupanacajj timanacap contra saytʼasiñataquejja, Diosaw cawqhar sarañaps yatiyañapäna, uqhämat jupanacar khespiyañapar iyawsapjjaraquïna. Ucasti Moronin iyawsäwipänwa, chuymapasti ucan cusisiraquïna. Ucampis wil wartañat janiw cusiscänti, antisas asc lurañata, marcapar imañata, Diosan camächitanacapar phokhañata, ñankhat thurtʼasiñat cusisïna.

17. Nayajj chek chekpachaw jumar sisma: Take jakenacatejj Moronjamäpjjasapäna, jupjamäpjjaspa, jutir urunacans jupjamäpjjaraquispajja, mankhapachan chʼamanacapas wiñay thalaratäspawa, supayasti janipiniw jaken wawanacapan chuymanacapjjar chʼamanïcaspati.

18. Moronejj Mosian Ammon sat yokapjama, yakha Mosian yokanacapjama, Almjama jupan yokanacapjam jakënwa; takpach ucanacajj Diosan jakenacapäpjjänwa.

19. Jichhajja, Helamanamp jilanacapampejj jakenacataquejj Moronjam quipca sumäpjjänwa. Jupanacajj Diosan arup yatiyasa, cawquïr jakenacatejj arupar yäkapcän ucanacar juchanacapat cutiquipstañataquiw bautisapjjäna.

20. Uqhäm sarnakapjjäna, jakenacasti jupanacan arunacap laycojja, Tatitun wali qhuyapayatäñapcamaw chuymanacapar llampʼuptayapjjäna. Uqhäm pusi marajj jupanac taypinjj nuwasïwinacas chʼajjwäwinacas jan utjcänti.

21. Ucampis cunjämatejj siscta, tunca llätuncan mar tucuyäw tokeru, jupanac taypin sumancañajj utjc-chïnsa, Laman jake jilanacapampejj munay jan munaw nuwasipjjañapäna.

22. Uqhämaraqui jupanacajj nuwasiñ jan munapc-chïnsa, Laman jakenacamp nuwasïwinacajj walja maraw jan tucuscänti.

23. Jupanacajj Laman jakenacamp nuwasiñatac armanac aptasajj llaquisipjjänwa, wil wartañat jan cusisitap laycu. Janiraquiw ucajj takpachäquiti. Walja jilanacapar Diosapamp jiquisiñatac jan waquichatäsin aca oraket wiñay oraker qhitañajj wal llaquisiyaraquïna.

24. Ucampis mä cunapachas jilanacapäcän ucanacampejj ajjsarcañ khorütap laycu, warminacapar wawanacapar jiwarayañatac jupanacajj jacäwinacap chhakayañ janiw munapcasapänti. Uca jilanacapasti iyawsiri tamapata jupanacat mistusin Laman jakenacamp mayachasir jupanacar tucqhañataquiw sarapjjäna.

25. Diosan camächitanacapar phokherinacajj jan utjapcan ucapachcamajja, janiw jupanacajj jilanacapan Nefi jakenacan wilapat cusisiñap antutapcaspati, cunalaycutejj Diosan arsüwipajj aqhämänwa: Jupan camächitanacaparutejj phokhapjjaspajja, uca oraken jachʼaptapjjaspawa.