1. Ucat Almajj Diosan arupa ucapachat ucsarojj jakenacar yatiyañ kalltäna; nayrakatajj Zarahemla oraken yatiyäna, ucat takpach ucsa toke orakenacan yatiyaraquïna.

2. Acanacaw quicpa kellkataparjam Zarahemla marcan ut-tʼayat iyawsiri tamanquir jakenacar arsut arunacapajja:

3. Naya Almajja, Alma sat awquijjan yakhaktayatätwa, Diosan iyawsir tamap sarayir jilïr sacerdotëjjañataqui. Awquijjasti ucanac lurañatac chʼamampi munañan cancañamp Diosat catokäna. Ucat nayajj sapjjsma, jupajj mä iyawsiri tama Nefi orak thiyanacanquir orakenjja ut-tʼayañ kalltäna, jïsa, Mormon orake sat orakena; uqhämaraquiw jupajj jilanacapar Mormon umanacan bautizäna.

4. Nayajj sapjjsmawa: Noe pʼekechirin jakenacapan amparanacapat jupanacajj Diosan qhuyapayäwi chʼamapan khespiyatäpjjänwa.

5. Uca khepatjja, wasaran jupanacajj Laman jakenacan catuntatäpjjänwa. Nayajj sapjjsmawa, jupanacajj catuntatäpjjänwa. Tatitusti chʼaman arupampiw jupanacar wastat antutayäna. Jiwasanacasti aca oraker irpanitäpjjtanwa. Acansti Diosan iyawsir tamap aca orak jakenacan ut-tʼayañ kalltapjjaraquïyätan.

6. Jichhasti, jilanaca, juma aca iyawsir tamanquirinacaruw nayajj sapjjsma: Awquinacaman catuntatätapat walt amtasipjjta? Diosan jupanacar qhuyapayäwipata, jupan jupanacatac jachʼa chuymanïtapat amtasipjjtati? Uqhämaraqui, jupan jupanacar mankhapachat cutsuyatapat amtasipjjtati?

7. Jupajj chuymanacap turqui; jiwatjam iquit jupanacar sartayi, jupanacasti Diosaruw pʼarjjtapjjäna. Jupanacajj chʼamac taypincapjjänwa, ucampis chuymanacapajj wiñay arumpiw khantayatäpjjäna. Jupanacajj jiwañan phalanacapampi mankhapachan cadenanacapamp muytatäjjänwa; wiñay tucqhäwiw jupanacar suyaraquïna.

8. Jichhajja, jilanaca, jumanacaruw jisctʼapjjsma: Jupanacajj tucqhatäpjjänti? Nayajj sapjjsmawa: Janiw tucqhatäpcänti.

9. Wastat jisctʼapjjsma: Jiwañan phalanacapajj tʼakanokatänti? Jupanacar muytcän uca mankhapachan cadenanacapajj phisarayatänti? Nayajj sapjjsmawa: Ucanacajj phisarayatänwa, jupanacan chuymanacapasti wayutat-tasaw cutsuyir munasiñar kʼochupjjäna. Nayajj sapjjaracsmawa: Jupanacajj khespiyatäpjjewa.

10. Jichhajj jisctʼapjjsmawa: Cuna laycus khespiyatäpjje? Cunjjarus jupanacajj khespiyasiñar suyapjjäna? Cunats jiwañan phalanacapat mankhapachan cadenanacapat antutayatäpjjäna?

11. Jichhajj nayajj jumanacaruw sapjjerisma: Janit Alma awquijjajj Abinadin lacapan arsut arunacapar iyawscänjja? Janit jupajj kollan arjirïcaraquïnjja? Janit Diosan arunacap jup arsupan Alma awquijjajj ucanacar iyawscänjja?

12. Iyawsataparjamaw chuymapanjj jachʼa turcäwejj luratäna. Nayajj jumanacaruw sapjjsma: Take ucanacajj chekawa.

13. Ucat jupajj awquinacamaruw aru yatiyäna. Jupanacan chuymanacapan jachʼa turcäwiw lurasiraquïna. Jupanacasti llampʼuptayasaw cheka jaquir Diosar iyawsapjjäna. Jupanacasti tucuycamaw saytʼapjjäna iyawsatap laycuraquiw khespiyatäpjjäna.

14. Jichhajja, iyawsir tamanquir jilanaca, jumanacaruw jisctʼapjjsma: Diosat kollanjam yuripjjtati? Uynakanacamajj jupan uynakap quipcar tucuyatäpjjeti? Uca jachʼa turcäwejj chuymanacaman utjänti?

15. Jumanacar lurapctam ucan cutsuyäwipar iyawsañamp luräwinacam lurapjjtati? Jumanacajj iyawsas aca jiwir jañchin jan jiwquir jactañaparu, aca thujsantañ cancañan jan thujsantañ cancañar jactañaparu, Dios nayrakatan saytʼasa, jiwir janchin lurataparjam taripatäñapatac suyapjjtati?

16. Nayajj jisctʼapjjsmawa: Tatitun arup ucürunjja aqhäm sasin istʼapcasmas uqhäm amuyasipjjasmati: Orakjjan luratanacaman asquïtap laycuw juma qhuyapayatanacajj nayar jutapjjam –sasa?

17. Jan ucajja, uca urojj Tatitur cʼarintapjjasmacha, aqhäm sasajja: Tatay nanacan oraken luratanacajjajj asquïnwa. Jupasti jumanacan uqhäm satam laycojj khespiyapjjätamti?

18. Jan ucajja, chuymanacaman pʼenkasisa, llaquisisa, takpach leyir pʼaquitanacamata, jïsa, take ñankha luräwinacamat phokhat amtasisa, Diosan camächitanacapjjar wapuchasitamat amtasisa Diosan taripäwipar irpatäpcasmas uqhäm amuyapjjasmati?

19. Nayajj jumanacaruw sapjjsma: Qhaya urojj asqui kʼoma chuymampi, kʼoma amparanacamp Diosar uñcatapjjätati? Nayajj jumanacaruw sapjjsma: Dios quipca uynakanïsajj jupar uñcatapjjätati?

20. Nayajj sapjjsmawa: Supayamp catuntayasiñcam catjjäsiyasitanacamatjj khespiyatäcasmas uqhämt lupʼipjjasma?

21. Nayajj sapjjsmawa: Qhaya urojj jan khespiyatäñamjj yatipjjätawa, cunalaycutejja, janitejj isipajj jankʼo tʼajjsutäcanejja, janiw qhitis khespiyatäcaniti. Awquinacasan arsutäcäna, marcapan juchanacapat cutsuyir jutcan ucan wilapamp jupan isipajj kʼomachsutäñapawa, take kʼañunacat kʼomachatäñapcama.

22. Jichhajj jilanaca, jumanacaruw jisctʼapjjsma: Jumanacatejj wilamp take cunayman kʼañunacamp kʼañuchat isimp Diosan taripäwip nayrakatan saytʼapjjätajja, cunjamäpjjätasa? Ucanacajj cuns jumanacjjat ircatapjjätam?

23. Janit urunacajj jiwayirïtanacamat take cunayman ñankha luratanacamat ircatapcätam?

24. Jilanaca, Abrahanampi, Isaacampi, Jacobompi takpach kʼomachat jan kʼañuni kʼoma jankʼo isini kollan arjirinacampi mä uqhäm jakejj Diosan khapak marcapan konuñawjanïñapjj amuyapjjasmati?

25. Nayajj jumanacar sapjjsmawa: Janiwa; janitejj Luririmar kalltäwitpach cʼarisiyapcätajja, jan ucajj kalltäwitpach cʼarisirïtap amuyapcätajja, uqhäm jakenacan alajjpach khapak marcan tutinïtapjj janiw amuyapcasmati. Antisas jupanacajj supayan marcapan wawapätap laycojj jakonucutäpjjaniwa.

26. Jichhajja, nayan jilanacajja, jumanacaruw sapjjsma: Chuymanacamatejj turcatäpcänjja, cutsuyir munasiñ kʼochu kʼochurjamäpstajja, jisctʼapjjerismawa: Jichpach uqhäm kʼochurjamäpjjtati?

27. Diosan nayrakatapan jan juchamp sarnakapjjtati? Jichpach jiwapjjañamäcasp ucqhajja, nayajj llampʼu chuymanït sapjjasmati? Marcapar juchanacapat cutsuyir jutcani uca Criston wilapamp nayan isijjajj kʼomachatawa, jankʼor tucuyataw –sapjjasmati?

28. Jachʼa jachʼa tucuñajj jumanacat apaktiti? Nayajj sapjjsmawa: Janitejj uqhamäc-chejja, Diosamp jiquisiñatac janiw waquichatäpctati. Jumanacajj lakaw waquichasipjjañamajja, cunalaycutejj alajjpach khapak marcajj jacʼanquiwa; uqhäm jachʼa jachʼa tucurinacasti janiw wiñay jacäwinïpcaniti.

29. Nayajj sistwa: Jumanacat maynejj kʼenasiñaniti? Nayajj sapjjsmawa: Uqhäm jakenacajj janiw waquichatäpquiti. Nayajj jupanacan lak waquichasiñap munirista, cunalaycutejj ucürojj jacʼanquiwa. Janiraquiw jupanacajj cunapach puriniñaps yatipcaraquiti. Uqhäm jakenacajj juchan jicjjatatäniwa.

30. Uqhämaraquiw sapjjaracsma: Jumanacat maynejj jilapar jiscʼachiti, jan ucajja jilapar wal arcanaketi?

31. Ay uqhäm jakenacata, jupanacajj janiw waquichatäpquiti; janitejj jupanacajj jichhajj juchat cutiquipstapcanejja, janiw khespiyatäpcaspati.

32. Uqhämaraqui, ay take ñankha luririnacata; juchat cutiquipstas cutiquipstapjjam, cunalaycutejj Dios Tatitojj uqhäm arsu:

33. Jupajj take jakenacaruw qhuyapayäwi amparanacap loktʼas jawsi, aqhäm siwa: Juchat cutiquipstapjjam ucat nayajj jumanacar catokapjjäma.

34. Jïsa, jupajj siwa: Nayar jutapjjeta, ucat jacañ kokan achupat mankʼapjjäta. Jacañan tʼantʼapa umapata, munañamarjamaw mankʼas umapjjäta.

35. Nayar jutapjjeta, asqui luräwinac lurapjjaraquim. Uqhämat jan phatʼsutäsin ninar jakontatäpcätati.

36. Cunalaycutejj qhititejj jan wali ach achcanejja, janirac asqui luräwinac lurcaraquinejja, jupan llaquisis jaqhusiñap urojj jacʼanquiwa.

37. Ay juma ñankha luririnaca, juma oraken jila jila tucurinaca, ay juma nayajj asqui thac uñjta sas jan awatirin ovejanacjam saranucurinaca: Awatirejj jumanacar jawsapjjtamwa, jichhacamas jawsasipcaractamwa, ucampis janiw arupar istʼapctati.

38. Nayajj jumanacaruw sapjjsma: Suma awatirejj jumanacaruw jawsapjjtam, jupan Puipca sutipat jawsapjjtam, sutipasti Cristo satawa; janitejj suma awatirin arup istʼapcäta, janirac cuna sutit-tejj jawsapctam ucs istʼapcätajja, janiw suma awatirin ovejanacapäpctati.

39. Jichhajja, janitejj suma awatirin ovejanacapäpcstajja, cawquïr tamanquirïpjjtasa? Nayajj sapjjsmawa: Supayaw awatirimajja, jupan tamapanquirïpjjaractawa. Jichhajja, janiw chekäquit sapjjasmati? Nayajj jumanacaruw sapjjsma: Qhitinacatejj ucajj janiw chekäquiti sapcanejja, ucanacajj supayan cʼarisir wawapäpjjewa.

40. Nayajj sapjjsmawa: Cunatejj sumäc ucajja, Diosat juti, Uqhämaraqui cunatejj ñankhäqui ucajj supayat juti.

41. Ucat mä jaketejj asqui luräwinac lurqui ucajja, jupajj suma awatirin aruparuw jaysi, juparuw arcaraqui. Ucampis cawquïrinacatejj ñankha luräwinac lurapqui ucanacajja, supayan wawaparuw tucupjje, cunalaycutejj jupan arupar jaysasaw jupar arcapjje.

42. Cawquïrinacatejj uqhäm lurapcanejja, jupat payllap catokapjjañapa. Jupanacajj paylljam asqui cunanacat jarcʼaker jiwañ catokapjjani, cunalaycutejj take suma luräwir jiwatäjjewa.

43. Jichhajj jilanaca, chuymajjan chʼamapamp arsutajj laycuw nayar istʼapjjañam munirista. Nayajj khana arunac arsupjjsma, jan pantasipjjañamataqui, sañ muntwa, nayajj Diosan camächitanacaparjamaw arsupjjsma.

44. Nayajj uqhäm arsuñatac jawsatätwa, Diosan kollan sucʼaparjama, ucasti Jesucristonquiwa. Cuntejj awquinacasajj jutaniw sas yatichapcän ucanacat nayajj aca jakenacar ircatañatac camächit catokta.

45. Janiraquiw ucajj takpachäquiti. Janit naya pachpan ucanac yatitajj amuyapcta? Nayajj jumanacaruw ircatapjjsma, cuntejj nayajj arscta ucanacan chekätapjj yat-twa. Cunjäms nayajj chekätapjj yat-tjja? Amuyapjjasmati?

46. Nayajj sapjjsmawa: Ucanacajj Diosan kollan ajayupan nayar yatiyatawa, nayajj walja uruw ucanac yatiñajjataquejj ayunas Diosat mayista. Ucat naya pachpaw ucanacan chekätapjj yat-ta. Dios Tatitojj kollan ajayupampiw ucanac yatiyitu. Ucasti nayancqui uca Diosan yatiñapawa.

47. Ucatsti nayajj jumanacaruw sapjjsma: Awquinacasan arsut arunacapan chekätapatjj uqhämaw nayar yatiyata, nayancqui uca Diosan arjañarjama; ucasti Diosan ajayupan uñstayañaparjamaraquiwa.

48. Nayajj sapjjsmawa: Cuntejj nayajj jutir cunanacjjat sapcäm ucan chekätap yat-ta; nayajj sapjjaracsmawa: Jesucriston jutañapjj yatiractwa. Jupasti Yokawa, Awquin mä sapa jathachasitawa, qhuyapayäwina chekana munasiñan phoktʼatawa. Jupaw oraken juchanacapa, jïsa, cawquïr jakenacatejj jupan sutipar jan onjjtasis iyawsapqui, ucanacan juchanacap apaker jutcan ucataquiwa.

49. Jichhajj nayajj sapjjsmawa: Uca sucʼarjamaw nayajj jawsatäta, jïsa, munat jilanacajjar sapakat mayni aca oraken utjirir yatiyañajjatac jawsatätwa, jïsa, sapakat mayniru, chuymaniru, wawaru, catuntatanacaru, jan catuntatanacar yatiyañataqui. Jïsa, chuymaninacaru, chacha wactʼanacaru, waynanacaru, jumanacar juchat cutiquipstañamataqui wastat yuriñanacamatac artʼañajjatac jawsatätwa.

50. Aqhäm siw ajayojja: Jumanaca, takpach orake thiyanaca, juchat cutiquipstapjjam. Alajjpach khapak marcajj jacʼanquiwa; Diosan Yokapajj khapak cancañapampi chʼamapampi, jachʼa cancañapampi, sarayäwi chʼamapampiw jutani. Munat jilanaca, jumanacaruw sapjjsma. Ajayojj aqhäm siwa: Takpach oraken pʼekechiripan khapak cancañapar uñjapjjam. Uqhämaraqui alajjpachan pʼekechiripajj take jaken wawanacap taypin jucʼa pachat khantani.

51. Uqhämaraqui Ajayojj nayarojj jachʼa arump artʼasaw situ: Saram, aca jakenacar saraquim – Juchat cutiquipstapjjam, cunalaycutejj janitejj juchat cutiquipstapcätajja, janiw cunjämats alajjpach khapak marcjja tutjam catokapcasmati.

52. Uqhämaraquiw sapjjaracsma, Ajayojj saraquiwa: Jichhajja, hachajj kokan saphipar uchatawa; take jan suma achu churir kokajj phatʼsutäniwa, ninar jakontataraquïniwa. Uca jan jiwayañjam ninasti jan tucuscayaraquiwa. Amuyapjjam, kollanäqui ucan uc arsutap amtasipjjaraquim.

53. Jichhajj munat jilanaca, jumanacaruw sapjjsma: Uca arsutanacar thurtʼasipjjasmati? Ucanac maysar apanucusajj kollanäqui ucar taquisipjjasmati? Chuymanacaman jachʼa jachʼa tucupjjasmati? Jila alan isinacamp isthapisisipcaquïtati? Chuymanacamanjj oraken jila tucuñ cunaymaninacapat kamiriptañanacamat lupʼisipcaquïtati?

54. Jumanac purajj nayajj jupat sipan wali jilätwa, sasin amuyasisipcaquïtati? Llampʼuptayasiri, Diosan kollan sucʼaparjam sarnaker jilanacamarojj arcanakasipcaquïtati? Jupanacajja kollan Ajayun kollanaptayatäsin uca kollan sucʼampejj aca iyawsir tamarojj mantayatäpjje. Jupanacasti juchat cutiquipstañ luräwinac lurapjje.

55. Jumanacajj kʼoyanacata tʼakhesitanacata mays uñtasajj yänacamat michʼäsipcaquïtati?

56. Ucat nayajj juma ñankha luräwinac lurasquirinacaruw sapjjsma: Ucanacapí phatʼsutäpjjanejja, ninar jakontatäpjjaraquinejja, janitejj juchat lak cutiquipstapcan ucajja.

57. Jichhajja, cawquïrinacatejj suma awatirin arupar arcañ munapcta, jumanacaruw sapjjsma: Ñankhanac taypit mistupjjam. Jupanacat yakhaktatäpjjam. Jupanacan quipca kʼañu luräwinacap jan lurapjjamti. Jupanacan sutinacapajj chhaktayatäniwa, ñankhanacan sutinacapan asqui jakenacan sutinacapamp jan jaqhutäñanacapataqui, Diosan aqhäm sat arunacapar phokhañataquiraqui: Ñankhanacan sutinacapajj nayan jakenacajjan sutinacapampis janiw chʼarkhotäcaniti.

58. Asqui jakenacan sutinacapajj jacañ kellkan kellkatäniwa. Jupanacarusti cupïjjajjan tuti churäjja. Jichhasti, jilanaca, camsapjjtas ucjjarojja? Nayajj sapjjsmawa: Uca contra arsusipjjätajja, janiw camächcanisa, cunalaycutejj Diosan arupajj phokhasiñapawa.

59. Jumanac taypinjja, cawquïr walja ovejan awatirisa jan sum uñjqui tiwulanacan tamapar mantas jan mankʼantañapataquejja? Mä tiwulajj tamapar mantqui ucqhajja, janit tiwular ucat alis-squi? Jïsa, jiwtʼayañatejj waquisinejja, tiwularojj jiwtʼayaniwa.

60. Jichhajj jumanacaruw sapjjsma: Suma awatirejj jumanacaruw jawsapjjtam; jumanacatejj arupar jaysapjjätajja, jupajj tamaparuw irpantapjjätam, jumanacasti ovejanacapäpjjätawa; jupasti mankʼat jiwat tiwulan jumanac taypir jan mantayapjjañamataquiw camächit churapjjtam, jumanacan jan tucqhatäñanacamataqui.

61. Jichhajj naya Almajj nayar camächit churquitu ucan arup arsusaw jumanacar arsut arunacajjar phokhapjjañamatac camächit churapjjsma.

62. Juma iyawsir tamanquirinacaru camächit churañjam arsupjjsma, juma jan iyawsir tamanquirinacarusti mayipjjsmaw, aqhäm sasa: Jutapjjam, juchat cutiquipstañaru bautizasipjjam, jumanacan jacañ kokan achupat catokerïñanacamataqui.