1. Ucat Alman yokanacapajj ar yatiyir jakenac taypir sarapjjäna. Alma pachpasti jan samarañ munasinjja sararaquïnwa.

2. Janiw jucʼamp jupanacan yatiyatanacapat parlcañäniti, antisas acac sañäni: Jupanacajj jutir urunacat yatiyir ajayuta, Diosan yatiyir ajayutjam arjj chek yatiyapjjäna; jupanacasti ucan jawsatäpcän uqhämaruw Diosan uca kollan sucʼataparjam yatiyapjjäna.

3. Jichhasti nayajj taripirinacan sarayäwipan tunca quimsakallkon maran Laman jakenacamp Nefi jakenacamp nuwasïwinacat khanañchäwiruw cut-tä.

4. Zoram jakenacajj Laman jakenacaruw tucqhapjjäna; ucat tunca quimsakallkon maran kalltäwipana, Nefi jakenacajj Laman jakenacar jupanacjjar jutir uñjapjjäna. Ucat nuwasiñatac waquichasipjjäna; jupanacasti nuwasiri tamanacaparuw Jerson oraker tantachayapjjäna.

5. Ucat Laman jakenacajj warank warankanacapampiw jutapjjäna. Jupanacajj Zoram jakenacan Antionum sat orakeruw mantapjjäna; jupanacan jilïripajj Zerahemna sat jakënwa.

6. Jichhajja, Amalequi jakenacan Laman jakenac pachpat jucʼamp ñankha jiwayir amuyun marcätap laycuw Zerahemnajj Laman jakenac taypin jilïr capitananac ut-tʼayäna, ucanacasti Amalequir arquirinacamp Zoram jakenacampcamaquïnwa.

7. Ucjj jupanacan Nefi jakenacar uñisisipcaquiñapataquiw luräna, jupan munäwinacapar phokhañatac jupanacar jawsirir puriyañapataquiraqui.

8. Jupajj Laman jakenacarojj Nefi jakenacatac colerasiñ amtayañ munäna; ucjja jupan jupanacjjar walja chʼamanïñapataqui, uqhämaraqui Nefi jakenacjjar mitʼaniptayas chʼamanïñapataquiw luräna.

9. Jichhajja, Nefi jakenacajj orakenacaparu, utanacaparu, warminacaparu, wawanacaparu, timanacapat amparanacapat imañatac arjjatañ munapjjäna. Uqhämaraqui jupanacajj luräw wactäwinacapa, antutatäwipa, Diosar quipca munäwinacaparjam yupaychañataquiw imañ munapjjäna.

10. Jupanacajj yatipjjänwa, jupanacatejj Laman jakenacan amparapar puripjjasapänjja, qhitinacatejj Diosarojj chekata, ajayuta, cheka jaquir Diosar yupaychapjjasapänjja, Laman jakenacajj ucanacarojj tucqhapjjasapänwa.

11. Uqhämaraqui, jupanacajj Laman jakenacan Anti-Nefi-Lehi Ammonan jakenacap sat jakenacar jachʼa uñisitapjj yatipjjaraquïnwa. Uca Ammonan jakenacapajj janiw armanac aptañ munapcänti; jïsa, jupanacajj arsüw lurapjjäna, ucsti janiraquiw pʼaquipcaraquispati. Ucat jupanacatejj Laman jakenacan amparanacapar puripjjasapänjja, tucqhatäpjjasapänwa.

12. Nefi jakenacajj janiw jupanacan tucqhatäñap munapcänti, ucat tuti orakenac jupanacarojj churapjjäna.

13. Ammonan jakenacapajj Nefi jakenacaru, nuwasiri tamanacapar utjayañataquiw yänacapat walj churapjjäna. Ucat Lamanamp Lemuelamp Ismaelan yokanacapamp amalequir arquirinaca Zoram jakenaca Noen sacerdotenacapat sarakerinac uca Nefi jakenacat misturinacamp chʼarkhot Laman jakenacarojja, Nefi jakenacajj sapaquiw thurtʼasipjjañapäna.

14. Jichhajja, uca sarakerinacasti niyapuniw Nefi jakenacjam quipca waljanïpjjäna. Ucat Nefi jakenacajj wil wartañcamaw jilanacapamp nuwasipjjañapäna.

15. Ucat Laman jakenacan nuwasiri tamanacapajj Antionum oraken tantachatäpcän ucqhajja, Nefi jakenacan nuwasiri tamanacapajj Jerson oraken jupanacamp jiquisisaw nuwasiñatac waquichatäpjjäna.

16. Jichhajja, Nefi jakenacan jilïripa, jan ucajja Nefi jakenacjjar jilïrinatac ut-tʼayatäcän uca jakejja, Moroni satänwa. Jilïristi takpach Nefi jake nuwasiri tamanacatac jilïrïnwa.

17. Moronejj jilïrïsinjja, nuwasïwinacapanjja, takpacharuw sarayäna. Jupajj Nefi jakenacan nuwasiri tamanacapatac jilïri ut-tʼayatäcän ucapachajj pä tunc pheskan maraniquïnwa.

18. Ucat jupajj Laman jakenacan nuwasiri tamanacapamp Jerson orake thiyan nuwasiñataquiw jiquisïna. Jakenacapajj espadanaca, cimitarranaca, take cunayman nuwasiñ armanac apnakapjjäna.

19. Ucat Laman jakenacan nuwasiri tamanacapajj Nefi jakenacana, jan ucajj Moronin jakenacapan chuymatac amparatac jirut lekʼsutanacampi, pʼek jarqʼir casconacamp waquichasitanacap jupanacan thuru isinacamp isthapisitap uñjapcän ucqhajja,

20. Zerahemnan nuwasiri tamapajj janiw uqhämanacamp waquichatäpcänti. Jupanacanjj acanacaquiw utjäna: espadanaca, cimitarranaca, arconaca, michʼinaca, kalanaca, kʼorawanaca. Jupanacajj kʼara janchcamaquïpjjänwa; cinturat wacʼantat mä lipʼichic uchasipjjäna. Takpach jupanacasti kʼara janchcamaquïpjjänwa, Zoram jakenacamp amalequir arquirinacampiquiw jan uqhamäcänti.

21. Ucampis jupanacanjja, janiw chuym jarqʼir lekʼsutanacas jarcʼakerinacas utjcänti. Jupanacajj Nefi jakenacan nuwasiri tamapat sipan jucʼamp waljanïc-chïnsa, jirut lekʼsut jarcʼakasiñanacanïpjjatap uñjasajja, wal ajjsarapjjäna.

22. Ucat jupanacajj ajjsaratap laycuw Jerson thiyanacan Nefi jakenacan nuwasiri tamanacapjjar jan jutapcänti. Ucat jupanacajj Antionum oraket wasarar mistupjjäna. Jupanacasti wasaranjam Sidon jawir kalltäwip tokenjam Manti oraker uca orak catusjjañataquiw sarapjjäna. Jupanacajj Moronin nuwasiri tamanacapajj cawcsar sarataps jan yatipcaspas uqhäm amuyapjjäna.

23. Ucampis jupanacajj wasarar mistupcän ucspachaw Moronejj uñakerinac wasarar jupanacar uñaker qhitäna. Uqhämaraqui, Moronejj jutir urunacat Alman yatiyäwinacapat yatisinjja, mä kawkha ajllit jakenacaru, cawqharus Nefi jakenacan nuwasiri tamanacapajj Laman jakenacat arjjatasir sarapjjañapäcän uc Tatitut yatiñatac Alman mayiñap munasaw jupan uc qhitäna.

24. Ucat Tatitun arunacapajj Almar purïna; Almasti Moronin qhitanacaparojja, Laman jakenacan Manti oraker jutapjjañapatac jucʼamp aynachtʼat jakenacar jaljjatañ kalltapjjañapataquiw wasaranjam muytʼatapat yatiyäna. Uca qhitanacasti cut-tasinjja, Moroniruw uc yatiyapjjäna.

25. Ucat mä kawkha Laman jakenacan mä cunjämats Jerson oraker jutasajj uca marc jan catuñanacapataquiw, Moronejj nuwasiri tamapat mä kawkhanir Jerson oraken jaytasinjj, jiltʼa ejercitopamp Manti oraker saräna.

26. Ucatsti, orakenacaparu, marcaparu, lurañ wactʼañanacaparu, antutatäwipar arjjatañataquiw take ucsa tokenquir jakenacarojj Laman jakenacamp nuwasiñatac tantachayäna. Ucat jupanacajj Laman jakenacan jutäwipatac waquichatäpjjäna.

27. Ucat Moronejj nuwasiri tamaparojj Sidon jawirat inti jalant tokenquir wasaranquir kherwan imantayäna.

28. Moronisti uñakerinac ucsa toker uscüna, Laman jakenacan jutañap yatiñapataqui.

29. Laman jakenacan uc-chʼpach oraken jupanac pachpatac mä sarayäw ut-tʼayañataqui, jilanacapar tucqhaña jan ucajja, jaysayas mitʼaniptayañ munatap Moronin yatitap laycu,

30. Nefi jakenacan munatapajj orakenacap catjjäsiñataquïnwa, uqhämarac antutatäwipar, iyawsiri tamapar imaña. Moronin uc yatitap laycuw, jupajj chʼiqhi amuyump jupanacar arjjatañan jan juchätap amuyasïna. Ucat uñakerinacap tokew Laman jakenacan cawcsar sarañaps yatjjatäna.

31. Ucat nuwasiri tamapar jaljtayäna, chicatarojj kherwaruw irpäna, ucat inti jals tokeru, Ripla koll aynach tokeruw imantäna.

32. Jiltʼirinacarusti inti jalant tokenquir kherwana, Sidon jawirat inti jalant tokeru, uqhäma, Manti orak thiyanacapcamaw imantäna.

33. Ucat nuwasiri tamap munañaparjam uscusinjja, jupanacamp jiquisiñataquiw waquichatäna.

34. Ucat Moronin nuwasiri tamapat mä kawkhanejj imantatäcän uca kollut alay tokeruw Laman jakenacajj jutapjjäna.

35. Ucat Laman jakenacajj Ripla kollu pasasa, kherwar mantasaw Sidon jawir maqhatañ kalltapcän ucqhajja, kollut aynach toker imantat nuwasiri tamajj Lehi sat mä jaken sarayatäsin, jupajj nuwasiri tamar irpanisaw, inti jals toket Laman jakenacarojj khepäjjat muyuntäna.

36. Ucat Laman jakenacajj Nefi jakenacar khepäjjat jutir uñjapcän ucqhajja, cutiquipstasaw Lehin nuwasiri tamapamp nuwasiñ kalltapjjäna.

37. Ucat jiwarayasiñajj purap token kalltäna, ucampis Laman jakenac taypinjja, jucʼamp ajjsarcayänwa, cunalaycutejj Nefi jakenacajj espadanacapampi, cimitarranacapampejj kʼara janchinacapat jawkʼantapjjäna, sapa jawkʼantansti, niyapuniw maynirojj jiwtʼayapjjäna.

38. Ucat mayscatansti, jupanac chuymat jarcʼatïpana, jan ucajj, chuymat pʼeket Laman jakenacan jawkʼanacapat chuymatac lekʼsutanacampi, amparanacapatac imañ lekʼsutampi, pʼek jarqʼir casconacamp jarcʼatïpana, mä kawkhat kawkhatac Nefi jakenacat mä jakejj espadampisa, wil tucstayasisas liwitat-täna. Uqhäm Nefi jakenacajj Laman jakenac taypin jiwañar puriyapjjäna.

39. Ucat Laman jakenacajj jupanac taypinquir jachʼa tucqhäwit ajjsarasaw, Sidon jawir toker jaltañ kalltapjjäna.

40. Lehimp jakenacapampisti jupanacarojj arctapjjänwa; ucat jupanacar Sidon jawirar Lehin alis-sutäsaw, Sidon jawirar maqhatapjjäna. Ucat Lehejj nuwasiri tamanacaparojj Sidon jawir lacan jan maqhatañanacapataquiw jarcʼantäna.

41. Ucat Moronejj nuwasiri tamapampi, Laman jakenacamp Sidon jawirat qhurcatanquir kherwan jiquisïna; jupanacasti Laman jakenacar jaljjatasaw, jiwarayañ kalltapjjäna.

42. Ucat Laman jakenacajj Manti orak toker jupanacat jaltapjjäna, ucatsti, wastat Moronin nuwasiri tamanacapajj jicjjatapjjäna.

43. Ucapachasti, uca Laman jakenacajj walpin nuwasipjjäna; janipiniw kalltäwits cunapachas Laman jakenacajj uqhäm jachʼa chʼamamp kamasampejj nuwasipcänti.

44. Zoram jakenacamp Amalequi jakenacamp jilïri sarayirinacapampejja, jilïripäcäna, jan ucajja jilïr sarayir jilïripäcän uca Zerahemnampejj Laman jakenacaruw amtayapjjäna. Jïsa, Laman jakenacajj leonjamaw nuwasipjjäna. Jupanacajj walja Nefi jakenacan pʼek jarqʼir casconacap jawkʼasaw payar jaljtayapjjäna. Uqhämaraqui walja chuymar jarqʼir lekʼsutanacap junsupjjäna; walja amparanacap tʼiscokayapjjaraquïna. Uqhämaw Laman jakenacajj jachʼa colerasiñapamp saytʼasisin walja Nefi jakenacar jiwarayapjjäna.

45. Ucampis Nefi jakenacajj jucʼamp suma amtañampiw nuwasipjjäna. Jupanacajj janiw pʼekechiritac chʼamanïñatac nuwasipcänti, jan ucasti jupanacajj utanacapataquiw nuwasipjjäna; antutäwinacapataqui, warminacapataqui, wawanacapataqui, takpachataqui, uqhämaraqui yupaychañ wactʼäwinacapataqui, iyawsiri tamapataquiw nuwasipjjäna.

46. Jupanacajj Diosapatac lurañ wactʼcaspas uqhäm amuyasisaw lurapjjäna. Tatitojj jupanacampir awquinacapampirojj sänwa: Jumanacatejj nayrïr cutcatäwits payïr cutcatäwits jan juchanïpcätajja, janiw timanacamamp jiwarayasipcätati.

47. Tatitojj saraquiwa: Jumanacajj wil wartañcamaw familianacamar arjjatapjjäta. Uqhämasti Nefi jakenacajj ucataquiw jupanac pachpar arjjatasiñataquejj nuwasipjjäna, uqhämaraqui familianacaparu, orakenacaparu, marcaparu, lurañ wactʼäwinacaparu, religionapar arjjatasiñataquiw nuwasipjjaraquïna.

48. Ucat Moronin jakenacapajj Laman jakenacan colerasiñapan jachʼätap uñjasinjja, jupanac ajjsarthapisaw jaltañampïsipcäna. Ucat Moronejj munañap amuyasina, uca orakenacapata, antutatäwipata, jïsa, mitʼanït antutatäñapat lupʼïwinac churasaw, chuymanacapar amuyayäna.

49. Ucat Laman jakenacar cutiquipstasaw, Dios Tatitupar antutatäwipatac mä arutjamac mitʼanïtat antutatäñapataquejj artʼapjjäna.

50. Ucat Laman jakenacjjar chʼamamp thurtʼasiñ kalltapjjäna. Ucat Tatitur antutatäwipatac artʼapcän uca pachpa horan Laman jakenacajj jupanacat jaltañ kalltapjjäna; Sidonan umanacapcamaw jaltapjjäna.

51. Jichhajja, Laman jakenacajj Nefi jakenacat pä ucqhamp waljanïpjjänwa, ucampis jupanacajj alis-sutäpjjänwa, mä tamjamaquiw Sidon jawir lacanquir vallen tantachatäpjjäna.

52. Ucat Moronin nuwasiri tamanacapajj paypach jawir qhurcatan muyuntapjjäna, cunalaycutejj Lehin nuwasiri tamanacapajj inti jals tokencänwa.

53. Ucat Zerahemnajj Lehin jakenacapar Sidon jawirat inti jals token uñjasina, Moronin nuwasiri tamanacaparusti Sidon jawirat inti jalant token uñjasina, Nefi jakenacan jupanacar muyuntatap uñjasajja, walpin ajjsarapjjäna.

54. Ucat Moronejj ajjsaratap uñjasaw, jakenacapar wilap wartañ suytʼjjañanacapatac mayïna.