1. Ucatsti jupanacan sarayäwipan pheskër maranjja, jakenac pura mä chʼajjwäwiw kalltäna. Amlici sat mä jakejj chʼiqhi jan wali amuyun jakësina, oraken yatekañaparjam yatirïsina, Gedeonar espadamp jiwaycäna, leyirjam jiwatäcäna, uca jakjam iyawsasinjja–

2. Uca Amlicejj chʼiqhi jan wali amuyupampiw walja jakenacar jupa toker irpcatasïna; jupanacasti waljanïtap laycuw chʼamaniptapjjäna. Ucatsti Amliciruw pʼekechirit ut-tʼayañ chʼamtʼapjjäna.

3. Ucasti igles jakenacaru, uqhämaraqui cawquïr jakenacatejj Amlicin iyawsäwinacaparjam jan irpcatatäpcän take ucanacaruw ajjsarayäna. Leyiparjam jakenacan arupamp uqhämanacan ut-tʼayatäñapat jupanacajj yatipjjäna.

4. Amlicitejj jakenacan arup catuspa ñankha jakësajja, iglesian wactʼäwinacap jupanacat apakaspa, cunalaycutejj jupajj Diosan iglesiapar tucqhañ munäna.

5. Ucat takpach uca orakenquir jakenacaw tantachasipjjäna, sapakat maynejj amuyuparjama, Amlicir jakcat-tañ munasas Amlici contrasa, yakha yakh tamäsin wal chʼajjwasaw jupanac purajj walpun uñcatasipjjäna.

6. Uqhämaw jupanacajj ucjjat amuyunacap churañatac tantachasipjjäna; ucanacsti taripirinacaruw yatiyapjjäna.

7. Ucat jakenacan arupajj Amlis contränwa. Ucat jupas jakenacjjar pʼekechirir jan tucuyatäcänti.

8. Cawquïrinacatejj jupar jan munapcän ucanacan chuymanacapanjja, wali cusisiñaw utjäna. Ucampis Amlicejj jupanquirinacaruw uca jupar jan munirinac contra colerasipjjañapataquiw amtayäna.

9. Ucatsti jupanacajj tantachasisin Amlicirojj pʼekechirit ut-tʼayapjje.

10. Amlicejj pʼekechirit ut-tʼayatäcän ucqhajja, jupajj jilanacapamp nuwasiñapataquiw jupanacar waytäna. Ucsti jupanacar jupar yäkayañataquiw luräna.

11. Amlicin jakenacapasti jupan sutip apjjatatäpjjänwa. Mayninacasti Nefi jakenaca, jan ucajj Diosan jakenacap satäjjaraquïnwa.

12. Ucat Nefi jakenacajj Amlicir arquiri jakenacan munañanïtap amuyasipjjäna. Ucat jupanacajj nuwasiñatac waquichasipjjäna. Jupanacajj espadanaca, jachʼa cimitarra sat yakha espadanaca, arconaca, michʼinaca, kalanaca, kʼorawanaca, take cunayman nuwasiñ armanac aptapjjäna.

13. Uqhämaw Amlicir arquirinacan jutañapataquejj waquichatäpjjäna. Uqhämaraqui sarayirinanaca, jucʼamp jilïr sarayirinanaca, jila jilïr sarayirinanac kawkhatejj utjcän ucarjamaw ut-tʼayapjjäna.

14. Ucat Amlicejj jakenacapar take cunayman casta nuwasiñ cunanacs aptayaraquïna. Jupasti jilïrinac ut-tʼayäna, nuwasïw sarayapjjañapataquiw sarayirinac ut-tʼayaraquïna, jilanacapamp nuwasir sarapjjañapataqui.

15. Ucat amlicitanacajj Zarahemla orak tokenjam sarcän uca Sidon sat jawirat inti jals tokencän uca Amnihu sat kollunjam jutapjjäna, ucawjan jupanacajj Nefi jakenacamp nuwasiñ kalltapjjäna.

16. Ucat Almajj Nefi jakenacan jilïr taripiripäsa sarayiripäsaraquiw jakenacapamp sarayirinanacapamp jilïr sarayirinanacapamp nuwasiri tamanacapan nayrakatapan Amlicir arquiri jakenacamp nuwasir saräna.

17. Jupanacasti Amlicir arquiri jakenacarojj Sidonat inti jals tokenquir kollun jiwarayañ kalltapjjäna; Amlicir arquiri jakenacasti Nefi jakenacampejj wali chʼamampiw nuwasipjjäna, walja Nefi jakenacan jupanac nayrakatan jiwarañapcama.

18. Ucampis Tatitojj Nefi jakenacan amparaparojj chʼam churäna, ucat Amlicir arquiri jakenacar jupanacajj jiwarayapjjaraquïna. Sinti jake jiwarat uñjasasti jaltañ kalltjjapjjäna.

19. Ucat ur pakariw Nefi jakenacajj Amlicir arquiri jakenacar arctapjjäna. Waljanir jiwarayañcamaw jupanacarojj jiwarayapjjäna. Uca Amlicir arquiri jakenacatjj tunca payan warank pheska patac sojjta tunc payan jakeraquiw jiwarayatäna.

20. Ucat Almajj Amlicir arquiri jakenacar jan jucʼamp arctañjamïpanjja, jakenacaparuw Gedeon kherwan chʼujlla utachayäna. Uca kherwasti Nehoran espadamp jiwayatäcän uca Gedeonat sutiñchatänwa. Uca kherwan Nefi jakenacajj arumatac chʼujll ut-tʼayapjjäna.

21. Ucat Almajj uñakerinacaruw Amlicin jiltʼir jakenacapar arctir qhitäna, jupanacan arustʼäwinacapat yatiñataqui. Uqhämat marcapan tucqhatäñapat jarcʼakasiñataquiw uqhäm luräna.

22. Amlicir arquiri jakenacar uñaker qhitatäcän ucanacajj aqhäm sutinïpjjänwa, Zeram, Amnor, Manti, Limer. Ucanacapi jiltʼir Amlicir arquiri jakenacar uñaker sarapcän ucanacajja.

23. Khepürusti Nefi jakenacajj utjnokapqui ucawjaruw jupanacajj wali lak purinipjjäna, muspharasa, ajjsarasaraquiw jupanacajj sapjjäna:

24. Nanacajj Amlicir arquiri jakenacaruw arcapjjta, ucat Minon orakenjja Zarahemla oraket alay tokena, Nefi orak tokena, walja Laman jakenacaruw wali muspharat uñjapjjta. Amlicir arquiri jakenacasti jupanacampiw mayachasipjje.

25. Jupanacasti uca orakenquir jilanacasampiw nuwasisipqui. Jupanacasti jupanac nayrakatatjja uywa tamanacapampi warminacapamp wawanacapamp jiwasanacan marcas tokeruw jaltasinipqui. Janitejj lak sarapcañänejja jupanacajj marcasaruw mantantapjjani. Ucatsti tatanacasas warminacasas wawanacasas jiwarayatäpjjaniwa.

26. Ucat Nefi jakenacajj chʼujll aptasaw Gedeon kherwat Zarahemla sat marcapar sarjjapjjäna.

27. Jupanacajj Sidon jawir maqhatasipcän ucqhajja, Laman jakenacamp Amlicir arquiri jakenacampejj niyapuniw lamar chʼalljam jan jactʼcay jupanacar tucqhirejj jutantapjjäna.

28. Ucampis Tatitun amparapaw Nefi jakenacarojj chʼamañchäna, cunalaycutejj jupanacajj takpach chuymampiw Tatitut mayisipjjäna timanacapan amparanacapat khespiyatäñapataqui. Tatitusti artʼäwinacapar istʼasaw jupanacarojj chʼamañchäna. Ucatsti Laman jakenacamp Amlicir arquiri jakenacampejj jupanac nayrakatan aynachtʼapjjänwa.

29. Ucat Almamp Amlicimpejj espadampiw nuwasïna, ajanuy ajanuw purapajj walpin nuwasipjjäna.

30. Ucat Almajj Diosan jakepäsa, walja iyawsañanïsajja aqhäm sasaw artʼäna: Tatay qhuyaptʼayita, nayan aca jakenacar khespiyas imañajjataqui, amparaman apnakatäñajjatac nayan jacäwijj jan apakestati.

31. Ucat Almajj uca arunac arscän ucqhajja, jupajj wastat Amilicimp nuwasi, ucatsti machak chʼamampiw Amilicirojj espadamp jiwayi.

32. Uqhämaraquiw Laman jakenacan pʼekechiripampejj nuwasiraquïna. Ucampis Laman jakenacan pʼekechiripajj Almat jaltasajja, arjjatirinacaparuw Almamp nuwasir qhitäna.

33. Ucampis Almamp arjjatirinacapampejj Laman jakenacan pʼekechiripan arjjatirinacapampiw nuwasïna. Ucatsti jiwarayasaw khepar jit-tayañcam nuwasïna.

34. Uqhäm jiwat Laman jakenacan janchinacap Sidon umar jakontasaw jupajj ucawjaru, jan ucajj, Sidon jawiran inti jalant toke lacapar kʼomachsüna, jakenacapan maqhatañanacapatac mayawja utjañapataqui, Sidon jawir inti jalant tokenquir Laman jakenacamp Amlicir arquiri jakenacamp nuwasiñataqui.

35. Ucat jupanacajj Sidon jawir maqhatapcän ucqhajja, Laman jakenacamp Amlicir arquiri jakenacampejj jan jactʼcay waljanïpc-chïnsa, jupanacat jaltañ kalltapjjäna.

36. Jupanacasti Nefi jakenacat alay inti jalant tok orake thiyanacat qhurcat wasararuw jaltapjjäna. Nefi jakenacasti wali chʼamapamp arcasaw jupanacarojj jiwarayapjjäna.

37. Takewjat Nefi jakenacajj uñstaräna, ucat walja Laman jakenacamp Amlicir arquiri jakenacampejj jiwarayatäsaw alis-sutäpjjäna. Jupanacajj Hermounts sat wasarar puriñcamaw alay toker inti jalant toker chʼeketatatäpjjaraquïna. Uca wasaransti jachʼa mankʼat jiwat lakʼonacaw utjäna.

38. Ucat waljaniw wasaran chhojjrinacapat jiwarapjjäna. Jupanacasti uca jachʼa lakʼonacan siwikʼaranacan mankʼatäpjjaraquïnwa. Jupanacan chʼaqhanacapasti jicjjatasïnwa, ucatsti mayawjar kotuchthapitänwa.