1. Ucat Amulecajj uca arunac parlañ tucuycän ucqhajja, jupanacajj uca walja jakenac taypit mistusaw, Jerson oraker jutapjjäna.

2. Yakha jilanacasti Zoram jakenacar yatiyatapatjja, Jerson orakeruw jutapjjaraquïna.

3. Ucat jucʼamp jilïr Zoram jakenacajj jupanacar yatiyat arunacat arustʼapcän uca khepatjja, jupanacajj arutaquejj colerasipjjänwa arun jupanacan luräwipar tucqhatap laycu; ucat uca arunacar jan yäkapcänti.

4. Jupanacasti takpach uca orakenquir jakenacar tantachthapiyasaw, jupanacamp uca arsut arunacajjat arustʼapjjäna.

5. Jichhajja, sarayirinacapamp sacerdotenacapamp yatichirinacapampejj janiw munañap jakenacar yatiyapcänti. Ucat jamasatjam take jakenacan amuyunacap yatjjatapjjäna.

6. Ucat take jakenacan amuyup yatjjatatapatjja, jupanacajj Almampin jilanacapampin arsut arunacar iyawsirinacaruw uca oraket alisnucupjjäna. Ucanacasti waljanïnwa; jupanacasti Jerson orakeruw jutapjjaraquïna.

7. Ucat Almamp jilanacapampejj jupanacar chuymachapjjäna.

8. Jichhajja, zoramit jakenacajj Jersonancapcän uca Ammonan jakenacapataquiw colerasipjjäna. Ucat jilïr Zoramit sarayirejj wali ñankha jakësaw, Zoram jakenacat jupanacar maqhatirinacar jupanacan orakepat alisnucupjjañapataquejj Ammonan jakenacapar apayäna.

9. Jupasti wal jupana catac achusïna, ucampis Ammonan jakenacapajj janiw arunacapar ajjsarapcänti. Ucat janiw jupanacar alisnucupcänti, antisas take jan utjirin Zoram jakenacaruw catokapjjäna. Jupanacasti uca pobrenacarojj isiyapjjänwa, ucatsti mankʼayapjjänwa, tuti orakenac jupanacar churapjjaraquïna; jupanacan nuwasïwinacaparjamaw jupanacar yanapapjjäna.

10. Ucatsti Zoram jakenacarojj Ammonan jakenacapat colerasiñ utjayäna; jupanacasti Laman jakenacampiw chʼarkhontasiñ kalltapjjäna, jupanacar jupanac contra colerasiñ amtayañ kalltapjjaraquïna.

11. Ucat Zoram jakenacamp Laman jakenacampejj Ammonan jakenacapamp Nefi jakenacamp nuwasiñataquiw waquichasiñ kalltapjjäna.

12. Uqhämaw taripirinacan Nefi jakenacjjar tunca pakallkon marajj tucusiwayäna.

13. Ucat Ammonan jakenacapajj Jerson oraket mistusaw Melec oraker jutapjjäna; Laman jake nuwasiri tamanacamp Zoram jake nuwasiri tamanacamp nuwasiñataquiw Jerson orak chekan Nefi jake nuwasiri tamanacamp jiquisiñatac jutapjjäna. Uqhäm taripirinacan sarayäwipan tunca quimsakallkon maranjja, Laman jakenacamp Nefi jakenacamp nuwasiñajj kalltäna; nuwasïwinacapat khepjjar kellkataraquïniwa.

14. Almampi Ammonampi jilanacapampi Alman pä yokapampejj walja toke orakeruw jutapjjaraquïna. Zoramitanacar juchanacapat cutiquipstañar irpañatac Diosan amparapan apnakatätapatjja, Zarahemla orakeruw cut-tapjjäna. Kawkhaninacatejj juchanacapat cutiquipstañar irpatäpcän ucanacajja, orakepat alisnucutäpjjänwa; ucampis tutinacapatac Jerson oraken orakenac catupjje. Jupanacasti warminacaparu, wawanacaparu jupanac pachpa arjjatasiñataquiw armanac aptapjjäna.

15. Ucat Almajj marcapan ñankhätapa, jupanac taypinquir nuwasïwinaca, wil wartäwinaca, chʼajjwanac laycu llaquisitäsajja, take uca jakenacar sapa marcapanjj ar yatiyir sarasa, jan ucajj ar yatiyir qhitasa, jakenacan chuymanacapan wal chʼollkheptañ kalltatapatjja, arun chʼamätapan jupanacar cutcatañ kalltatap uñjasaw, chuymapan walpin llaquisïna.

16. Ucat yokanacaparu, sapakat maynir asqui cunaymananacat ewjjañatac tantachayäna. Jupanacar churat camächitanacat kellkäwejj jupan quipca kellkataparjamaw jiwasan utjistu.