1. Ucat jupajj wastat marcar sarayir Pahoranar kellkäna. Acanacaw jupan kellkat arunacapajja; siwa: Nayajj kellkatajj jilïr taripir orakjjar sarayir Zarahemla marcanquir Pahoranaruw kellkta. Uqhämaraqui aca nuwasïw sarayas irpañatac aca jakenac take ajllitanacaruw kellkaracta.

2. Nayan mä jucʼa juchañchas jupanacar parlañajjataquiw utjitu. Jumanac pachpaw yatipjjta, jakenacar tantachthapiñataqui, jupanacar espadanac cimitarranac take cunayman casta nuwasiñ armanac laquiñataqui, Laman jakenacajj orakesar mantapcaspas take ucsa toke orakenacar Laman jakenac contra nuwasir qhitañatac ut-tʼayatamatjja.

3. Jichhajja nayajj sapjjsmawa: Nayamp jakenacajjamp Helamanamp jakenacapampejj wali jachʼa tʼakhesïwinac tʼakhesipjjta. Nanacajj mankʼat umat take cunayman casta chʼajjmisis tʼakhesïwinac tʼakhesipjjta.

4. Ucampis take ucanacatejj tʼakhesïwijjäspajja, janiw thuthusis wapuchasipquirist-ti.

5. Ucampis marcas taypin wali jachʼän jiwarayäwejja. Warank warankanacaw espadan jiwarayatäpjje. Jumanacatejj nuwasiri tamanacajjar yanapañ chʼam churapjjasamänjja inas jan uqhamäc-chisapänti. Jumanacan nanacar jaytjatanacamajj jachʼawa.

6. Ucat jichhajj nanacajj cunat-tejj uca jachʼa jaytjañajj utjcän uc yatiñ munapjjta. Nanacajj jumanacan jan cun amuyas utjäwiman cunätapat yatiñ munapjjaracta.

7. Timanacamajj jumanac muytatanacar jiwayapqui ucapachajj jan cun amuyasin sarayäw konuñanacamar konupjjasmati? Jupanacajj warank warank jilanacamar jiwarayapqui ucapachajja –

8. Jïsa, jumanacan jupanacar arjjatañam suyapctam ucanacaru, jïsa, jupanacar yanapañamatac ut-tʼayapctam ucanacaru, jïsa, jumanacajj nuwasiri tamanac jupanacar chʼamañchañatac qhitapjjasamäna, warankanacar espadat khespiyiri.

9. Ucampis ucajj janiw takpachäquiti: Juyranacamjj jupanacar jarcʼakapjjta, waljanin nuwasis wil tucstayasis jiwañapcama, aca jakenacar arjjatañatac jachʼa munatanacap laycu. Jupanacajj mankʼat jiwañampïscän ucapachaw ucanac lurapjje, jumanacan jupanacar jaytjatam laycu.

10. Jichhajja, munat jilanaca, cunalaycutejj munatäpjjañamawa; jumanacajj aca marcan waliquïñapatac antutäwipatac jucʼamp jan karis amtayasipjjañamänwa. Ucampis jumanacajj jupanacaruw jaytjapjjta, warankanacan wilapan pʼekenacamjjar cutsuyañatac jutañapcama. Cunalaycutejj takpach artʼäwinacapajj tʼakhesïwinacapampejj Diosan yatitawa.

11. Sarayäw konuñanacamar konusa, Diosan sinti sumätap laycu jan cun luras jupan jumanacar khespiyañap amuyapjjasmati? Uqhäm amuyapjjstajja, amuyatamajj inamayaquiwa.

12. Walja jilanacamar jiwarayañajj jupanacan ñankhätap laycücaspas uqhäm amuyapjjtati? Nayajj sapjjsmawa: Uqhäm amuyapjjstajja, inamayaw amuyatamajja. Nayajj sapjjsmawa: Waljaniw espadan jiwayatäpjje. Ucasti jumanacaruw juchañchapjjtam.

13. Cunalaycutejj Tatitojj asqui jakenacan jiwayatäñap antuti, chekapar uñjañapamp taripäwipampejj ñankha jakenacjjar puriñapataqui. Uqhämasti, asqui jakenacan jiwapjjatap laycu, chhaktapjjatapjj janiw amuyapjjañamäquiti, antisas jupanacajj Dios Tatitupan samaräwiparuw mantapjje.

14. Jichhajj nayajj sapjjsmawa: Aca jakenacan sinti jayrasitap laycu, jïsa, jan amuyump jaytanucutap laycu, gobiernosan jayrasiñamp jan yäkasiñamp armasitap laycu, jilanacapar anchapun apanucutap laycu, jïsa, jiwayatäpcän uca jilanacapar jaytanucutap laycu, Diosan taripäwinacapan aca marcar puriñapat wal ajjsarta.

15. Cunalaycutejj pʼekesan nayrakat kalltcän uca ñankhajj janitejj utjcasapänjja, timanacasar jan jiwasanacjjar chʼam catuñapataquejj saytʼasipjjasänwa.

16. Janitejj jiwasanac taypinquir nuwasïwejj utjcasapänjja, janitejj uca jiwasanac taypin walja wil wartayir pʼekechir jakenacajj utjcasapänjja, jiwasanac puratejj yakhachasiñat sipan mayachthapisisäna cunjämtejj nayra pachanacajj chʼamamp mayachasipctan uqhäma, janitejj pʼekechir jakenacan jiwasanacar chʼamamp sarayañamp munañajj utjcasapänjja, jupanacatejj jiwasanacjjar wali wil wartaycän uca espadanacap aptasiñap lanti antutäwisar chekapäs jiwasanacamp mayachasis timanacasjjar sarapjjasapänjja, jiwasanacatejj Tatitun chʼamapan jupanacjjar sarapjjsnänjja, timanacasar alis-supjjasänwa, cunalaycutejj jupan arupar phokhañarjam luratäsapänwa.

17. Ucampis jichhajja, Laman jakenacajj jiwasanacjjar jutasin orakenacas catuntasipjje. Jakenacasaruw espadamp jiwarayapjjaraqui; warminacasarus wawanacasarus jiwarayapjjewa, ucatsti walja catuntatanac apapjjaraqui, take cunayman tʼakhesïwimp jupanacar tʼakhesiyasa. Ucasti chʼamamp sarayañamp munapqui uca pʼekechir jakenacan jachʼa ñankhätap laycuwa.

18. Ucampis cunats ucjjat jucʼamp sañajjajja? Jumanac pachpajj inas chʼamanïñ jakenacäsipcsta, janiw nanacajj ucjj yatipcti.

19. Jan ucajja, marca taypincatam laycut arjjatirimp muyuntatätam laycuch mankʼañamp jakenacamp jan apayanipquista, ejercitonacajjar chʼamañchañataqui?

20. Dios Tatituman camächitanacap armasipjjtati? Awquinacaman mitʼanïtapat armasipjjtati? Timanacaman amparanacapat walja cut khespiyatätanacasat armasipjjtati?

21. Jan ucajja, sarayäw konuñanacamar konupcän ucqhajja, Tatitojj jiwasatac utjayqui ucamp jan cuns lurapcañän ucajja, Tatitun jiwasanacar khespiyañap amuyapjjtati?

22. Warankanacajj orak thiyanacan espadamp jiwquipana, chhojjriñchatäpqui wil tucstayasipquipant alekac jan cuns luras konupjjäta, warankanaca, jïsa, warank warank jan cun luras konurinacamp muyuntatäsa?

23. Uqhäm ucanac konur jan cun lurir uñjapct ucqhajja, Diosajj jan juchan jumanacat amuycaspas uqhämt amuyapjjta? Nayajj jumanacar janiw uqhämäquit sapjjsmawa. Nayrakatajj vaso mankhäjjaw kʼomachatäni, ucat ankajjajj kʼomachataraquïni –sas Diosan satapat amtasipjjañam nayajj munta.

24. Janitejj luratanacamat cutiquipstapcäta, ucatsti kʼaphaptasin juyranacamp jakenacamp nanacarus Helamanarus apayanipquitäta, cawquïr orakenactejj jupajj cutekayasqui uc catjjäsiñataqui, nanacasti, cawquïr chekanacatejj janïr amparasancqui ucanac cutsuyjjañataqui. Waquisiniw Laman jakenac contra jan jucʼamp nuwasjjañasajja, jiwasanacan vasos mankhäjj kʼomachañascamajja, jïsa, gobiernosan jachʼa pʼektʼäwipar kʼomachañascama.

25. Janitejj kellkatajjar yäkapcätajja, nayaru cheka antutäw munäw uñstayapquitätajja, nuwasiri tamanacasar chʼamañchañatac jan chʼamtʼapcätajja. Janitejj utjañapatac juyr jupanacar churapcätajja, nayajj mä kawkha antutat jakenacajj acsa toke oraker arjjatañataquiw jaytä; nayasti Diosan chʼamaps qhuyapayäwinacaps jupanacampiw jaytaraquï, take yakha chʼamanacan jupanacjjar jan cuns lurañapataqui.

26. Jupanacan wali jachʼa iyawsäwipa, tʼakhesïwinacapan llampʼütap laycu.

27. Nayasti jumanac contraw jutä. Ucat jumanac taypintejj antutäw munirinacajj utjaspajja, jïsa, mä llipjta antutäwics munaspajja, nayajj jumanac taypin ojjöwinac utjayä, chʼamamp sarayäwimp munirinacan chhaktañapcama.

28. Janiw nayajj chʼamamats sarayäwimats ajjsarcti, antisas Diosajjaruw nayajj ajjsarta, Uqhämaraquiw jupan camächitanacaparjam nayajj espadajj marcajjar arjjatañatac apt-ta. Jumanacan ñankhätam laycuw uca takenac aptʼapjjtanjja.

29. Jichhajja, janitejj marcamampir wawanacamampir arjjatañatac saytʼapcätajja, chekapar uñjañan espadapaw jumanacjjar aytatäni. Ucasti jumanacjjar purisaw kʼala tucqhatäñamcam sartʼapjjätam.

30. Nayajj jumanacat yanap suyta. Janitejj yanapapquitätajja, nayajj jumanac contraw sartä, jïsa, Zarahemla orakeruw jutä, ucat espadampiw jawkʼarapjjäma, aca jakenacan antutäwipan nayrakatar saräwipan jucʼamp jarcʼañamatac jan chʼamanïñamataqui.

31. Tatitojj janiw jacayapcätamti, ñankha luräwinacam jachʼaptañaps muncaniti, asqui marcapar tʼunjapjjañamataquejja.

32. Jumanacajj amuyapjjtati, Tatitun jumanacar khespiyañapa, Laman jakenacarusti juchañchañapa? Laman jakenacan awquinacapan saranacapan uñisisiñ utjayquipana. Jïsa, qhitinacatejj jiwasanacat sarakapquistu ucanacaw jucʼampir ucanacjj puriyapjje. Ucampis jumanacan ñankha luräwinacamajja, jila jil tucuñat juti, acapachan jachʼar aptatäñ cunayman munir chuymat jutaraqui.

33. Jumanacajj Diosan leyinacapar pʼaquitamjj ucanacar tʼustʼjatam yatipjjtawa. Tatitojj nayaruw situ: Sarayirinacatac ut-tʼayapcta ucanacatejj juchanacapata, ñankha luräwinacapat jan cutiquipstapcanejja, jupanacamp nuwasiriw saräta.

34. Jichhajja, naya Moronejj Diosajjan camächitanacapar phokhañatac lurat arsüwijjarjam lurañajjawa. Ucat nayajj jumanacan Diosan arupar chʼamamp catuñanacamjja, nayampir Helamanampir juyranacamp jakenacamp lak apayanipjjañam munta.

35. Ucat janitejj uc lurapcätajja, nayajj lakaw jumanac contrajj jutä. Cunalaycutejj Diosajj nanacan mankʼat jiwañajj janiw muncaniti. Ucat jupajj jumanacan mankʼamata, espadampic-chinisa, churapjjetaniwa. Jichhajj Diosan arupar phokhapjjam.

36. Nayajj Moroni jilïr capitanamätwa. Janiw chʼaman cancañ thakcti, antisaw uc apakañ munta. Janiw oraken wakaychäwinacap muncti, antisas Diosajjan jachʼar aptatäñapa, marcajjan antutäwip waliquïñap munta. Uqhäm kellkatajj tucuyta.