1. Ucat uca Nefi jakenacamp nuwasir sarir Laman jakenacajj wal tucqhañatac chʼamachasipjjatapatjja, jupanacar tucqhañan inamayaquïtap amuyasisaw jupanacajj Nefi oraker cut-tjjapjjäna.

2. Ucat Amalequir arquirinacajj aptʼasipjjatanacapatjj walpin colerasipjjäna. Ucat Nefi jakenacar jan apsusiñjamïpanjja, jupanacajj jakenacaruw Anti-Nefi-Lehi jilanacapat colerasiñ amtayañ kalltapjjäna; ucat wastat jupanacar tucqhañ kalltapjjäna.

3. Uca jakenacasti wastat armanac jan aptañ munapcänti, timanacapan munañaparjamaquiw jiwayayasipjjäna.

4. Ucat Ammonamp jilanacapampejj jupanacan wali munatanacapata, jupanacar wali munirinac taypin uca tucqhäw uñjasajja – uca Ammonamp jilanacapampejj wiñay tucqhäwit khespiyir Diosan qhitanacäpcaspas uqhäm jakenacan amuyatänwa – ucat Ammonamp jilanacapampejj uca jachʼa tucqhäw uñjasajj, qhuyapayasiñat pʼekechirir sapjjäna:

5. Diosan aca jakenacap tantachthapipjjañäni, ucat jan tucqhatäñasatac timanacasan amparanacapat jaltjjañäni, ucatsti Zarahemla oraker Nefit sarakeri jilanacasamp sarapjjañäni.

6. Ucampis pʼekechirejj jupanacarojj sänwa: Nefi jakenacajj tucqhapjjestaniwa, jupanacat waljanir jiwayatasata, jupanac contra juchachasitasata.

7. Ucat Ammonajj säna: Tatituruw ucat jisctʼä, jupatejj jilanacamamp sarapjjam sistanejja, sarapjjätati?

8. Pʼekechiristi juparojj sänwa: Tatitutejj sarapjjam sanejja, nanacajj sarapjjäwa. Ucatsti jupanacat waljanir jiwayapjjatasata, jupanac contra juchachasipjjatasat chekañchañajjcamaw jupanacan mitʼanipäpjjañäni.

9. Ucampis Ammonajj jupar sänwa: Jupanac taypin mitʼanïñan utjañapajja, awquijjan ut-tʼayatawa, jilanacasan leyip contrawa; uqhämasti, sarakapjjañäni, jilanacasan qhuyapayäwipar alcatapjjaraquiñäni.

10. Ucampis pʼekechirejj juparojj sänwa: Tatitur jisctʼam. Jupatejj sarapjjam sapjjestanejja, sarapjjañäniwa, jan uqhämïpansti, aca oraken tucusipjjañäni.

11. Ucat Ammonajj Tatitur jisctʼäna, Tatitusti juparojj sänwa:

12. Aca jakenac aca oraket jan tucusipjjañapatac irpsum; cunalaycutejj supayaw Amalequir arquirinacan chuymaparojj jan antutcay catunti. Jupanacaw Laman jakenacarojj aca oraket jilanacap contra colerasipjjañapataquejj amtayi, jiwayapjjañapataquis amtayaraqui. Uqhämasti aca mita jakenacajj qhuyapayatawa, cunalaycutejj jupanacaruw imä.

13. Ucat Ammonajj pʼekechirin uc sarasajja, cuntejj Tatitojj siscän take uca arsut arunacap yatiyäna.

14. Ucatsti takpach jakenacaparuw tant-thapïna, jïsa, Tatitun takpach jakenacaparu. Ucatsti, takpach uywa tamanacap anthapipjjäna, ucat uca oraket mistupjjäna. Jupanacasti Zarahemla orakemp Nefi orakemp jaljqui uca wasarar purisaw, orak thiyanac jacʼar jutapjjäna.

15. Ucat Ammonajj jupanacar säna: Nayamp jilanacajjampejj Zarahemla orakeruw mantapjjä, jumanacasti cut-taniñajjcamaw aca chekan suytʼapjjetäta. Nanacajj jilanacajjan chuymanacap yantʼapjjä, oraker mantañanacam munataps jan munataps yatiñataqui.

16. Ucat uqhäm sarapquipanjam, Ammonamp jilanacapampejj Almamp jiquisipjjäna, cawqhat-tejj parlatäqui uca chekana; ucasti wali cusisiñ jiquisïwïnwa.

17. Ammonan cusisiñapajj jachʼänwa, cusisiñasti chuymaparuw phoktʼaraquïna. Jupajj Diosapan cusisiñapan uñjasisajja, chʼam thayjtayasiñcamaw cusisïna; jupasti wastat oraker liwitat-täna.

18. Janit ucajj jachʼa cusisiñäqui? Uca cusisiñjja, juchanacapat chekpach cutiquipstat llampʼu cusisiñ thakerinacaquiw catokapjje.

19. Alman cusisiñapasti wali jachʼaraquïnwa, jilanacapamp jiquisitapatjja. Uqhämaraquiw Aaronan Omneran Himnin cusisiñapajj chekpach jachʼäna, ucampis jupanacan cusisiñapajj janiw chʼamanacapar atipcänti.

20. Ucat Almajj jilanacaparojja, Zarahemla orakeru, quipca utaparuw irpäna. Jupanacasti jilïr taripirin uc sarasaw, cunatejj Laman jake jilanacap taypina, Nefi oraken lurascän uc jupar yatiyapjjäna.

21. Jilïr taripiristi take orakpacharuw yatiynokayäna. Uqhämat jupajj marcan arup yatiñ munäna; jilanacaparojj catokapjjaspat janich uc yatiñataqui. Uca jakenacajj Anti-Nefi-Lehi sata jakenacänwa.

22. Ucat jakenacan arupajj aqhamänwa: Nanacajj inti jals toke lamar jacʼana, Jilarquir orakcam utjqui, Jilarquir oraket aynach tokencqui uca Jerson orak churapjjä. Uca Jerson orake tutjam jilanacajjar churapjjä.

23. Nanacasti nuwasiri tamanacajjarojja, Jerson orakemp Nefi orakemp chica taypiruw, Jerson oraken utjir jilanacajjar arjjatañatac uchapjjä. Ucanacsti jilanacajj laycuw lurapjjä, jupanacan jilanacapamp nuwasiñatac armanac aptañ ajjsarapjjatap laycu, inampis juchachasipjjaspa. Uca jachʼa ajjsarañapajj waljanir jiwayapjjatapata, sinti ñankhäpjjatapat cutiquipstatap laycuw utjäna.

24. Ucsti jilanacajjan Jerson orak tutjam catokapjjañapataquiw lurapjjä; ucatsti timanacapat nuwasiri tamanacajjampiw arjjatapjjä, jupanacatejj yänacapat mä kawkh churapjjetani, nuwasiri tamanacajjan utjañapatac yanapasiñataqui.

25. Ucat Ammonajj uc istʼasinjja, wasarar chʼujlljam carpanacap ut-tʼayapcän uca chekaruw Anti-Nefi-Lehi jakenacar Almamp cut-tapjjäna. Ucat Ammonajj take ucanacat jupanacar yatiyäna; Almasti jupan Ammonamp Aaronamp jilanacapamp iyawsirir tucutapat yatiyaraquïna.

26. Ucatsti jachʼa cusisiñ jupanac taypin utjayäna. Jupanacasti Jerson oraker sarasaw uca Jerson orak catupjjäna. Nefi jakenacasti jupanacarojj Ammonan jakenacap sutimpiw uchapjjäna; ucapachat ucsaruw uca sutit uñtʼatäpjjaraquïna.

27. Jupanacasti Nefi jakenac taypincapjjänwa, uqhämaraqui Diosan iyawsiri tamapanquirinacamp jaqhutäpjjaraquïnwa. Jupanacajj Diosarus jakenacarus wali suma phokherïpjjatapat uñtʼatäpjjänwa. Jupanacajj take cunan cheka jakenacäpjjänwa. Jupanacasti Cristor iyawsañanjj tucusiñcamaw thurtʼasipjjäna.

28. Jupanacajj jilanacapan wilap wartañat wal ajjtasipjjäna; janipiniw jilanacapamp nuwasir armanac aptañataquejj amtayañjamäcänti. Janiraquiw jiwañar ajjsarapcänti, Cristompir jactäwimpir suytʼañar iyawsapjjatap laycu. Ucat jiwañajj jupanacataquejja, Criston jiwañar atipäwipan chhakatänwa.

29. Uqhämasti jilanacapar jawkʼañatac cimitarra, espada aptañ lantjja, jucʼamp tʼakhesiyir jiwañ catokapjjäna.

30. Uqhämaw jupanacajj wali suma phokher munata Tatitun bendicit marcäpjjänwa.