1. Ucat pä urump pä arumamp sarakatatjja, jupanacajj mä jiwatar imañatac lurat sepulturar jupan amayap uchañampïpjjänwa.

2. Jichhajja, uca pʼekechirin warmipajj Ammonat istʼasaw jupan uc jutañapatac jawsir qhitäna.

3. Ucat Ammonajj uca aruparjam lurasaw, pʼekechirin warmipan uc mantäna, uqhämaraqui cuna lurañaptejj jupajj muncpacha uc yatiñ munäna.

4. Ucat uca warmejj jupar säna: Chachajjan lokerinacapajj juman kollan Diosan arjiripätam jupan sutipar walja jachʼa luräwinac lurañatac chʼamanïtam yatiyitu.

5. Uqhämapunïst ucajja, chachajjan uc sarañam munirista. Jupajj pä urump pä arumampiw iquiñapanqui; yakhepajj janiw jiwatäquit sapjjewa; yakhepanacasti jiwatawa, kʼaphiraquiwa, jupajj sepulturan imantatäñapaw sapjjaraquiwa. Ucampis nayataquejj janiw kʼapquiti.

6. Ucaw Ammonajj muncän ucajja, cunalaycutejj jupajj Lamoni pʼekechirin Diosan chʼamapancatapjj yatïnwa; jupajj uca jan iyawsäwin chʼamac jan uñjäwipan jupan amuyupat apakatäscañapjja, uca amuyupar khanqui uca khanan Diosan khapak cancañapan khanapätapjja, uca khanan jupan sumätapan muspharir khanapätapjj yatïnwa – uca khanajj jupan almaparojj cusisiñ mantayi, chʼamac kenayat apjtcaspas uqhäm jupan almapanjj wiñay jacäwin khanapajj khanti. Jupajj pʼekechirin nayra janchipar atipatapjja, jupan Diosan apatap yatiraquïna.–

7. Ucat cuntejj pʼekechirin warmipajj jupat munqui ucajj jupan mä sapa munañapaquïnwa. Ucat jupajj pʼekechirin warmipan munañaparjamaw pʼekechirin ucar mantäna. Jupajj pʼekechirir uñjasajja, jupan jan jiwatap yatiraquïna.

8. Ucat pʼekechirin warmipar säna: Jupajj janiw jiwatäquiti, antisas jupajj Diosan iquisqui. Kharüruw jupajj wastat sartani. Uqhämasti jan jupar imantamti.

9. Ucat Ammonajj jupar säna: Uc iyawstati? Jupasti juparojj sänwa: Juman arumampi nanacan lokerinacajjan arupampiquiw utjitu, ucampis nayajj uca satamarjamajj iyawstwa.

10. Ammonasti juparojj sänwa: Jachʼa iyawsatam laycojj qhuyapayatätawa. Nayajj jumaruw sisma: Mama, takpach Nefi jakenac taypina, janipiniw uqhäm jachʼa iyawsäwejj utjquiti.

11. Ucat ucapachata, Ammonajj khepürun sartañapatac siscän ucapachcamaw jupajj chachapan iquiñapar uñji.

12. Ucat pʼekechirejj Ammonan aruparjamaw sartäna. Jupajj sartascän ucqhajja, jupajj warmiparojj amparat loktasaw aqhäm säna: Diosan sutipajj qhuyapayatäpan, qhuyapayataraquïtaw jumajja.

13. Cunjämatejj jumajj jac-ctajja; uca pachpa chekampiw nayajj cutsuyirijjar uñjta, jupasti jutaniwa, mä warmit nacini; cawquïr jakenacatejj jupan sutipar iyawsapcan ucanacaruw cutsuyani. Ucat uca arunac arscän ucqhaw jupan chuymapajj cusisiñamp phoktʼatäna. Jupasti cusisiñat wastat liwitat-täna. Pʼekechirin warmipasti Ajayun atipjatäsajj liwitat-taraquïnwa.

14. Laman jakenacajj wali jaqhusiñanac Nefi jakenac taypirojj puriyapjjäna, jan ucajja, Diosan takpach jakenacap taypiruw jaqhusiñ puriyapjjäna, ñankha luräwinacap laycu saranacap laycuraqui. Ucat jupan mayisïwinacaparjama, Laman jake jilanacapjjar Tatitun Ajayupan wartatätap uñjasaw Ammonajj quilltʼasïna. Ucat jilanacapatac Diosan luratap laycuw take chuymamp mayisisajj Diosar yuspagaräna, jupasti cusisiñan atipjataraquïnwa. Uqhäma, quimsanpachaw oraker liwitat-tapjjäna.

15. Ucat pʼekechirin lokerinacapajj jupanacan liwitat-tatap uñjasajja, Tatitun ajjsarañan jupanacar puritap laycuw Diosar artʼañ kalltapjjaraquïna. Jupanacaw pʼekechir nayrakatan Ammonan jachʼa chʼamapat ircatapcän ucanacajja.

16. Jupanacasti wali chʼamampiw Tatitun sutip aytapjjäna, oraker liwitat-tañapcama. Abis sat mä Laman jake warmiquiw, awquipat muspharcañ uñjäw laycu Tatitur walja mara iyawsasina, jan liwitat-tcänti.

17. Ucat Tatitur iyawsasinjja, janiw qhitirus ucjj arscän ti. Ucatsti, takpach Lamonin lokerinacapan oraker liwitat-tatap uñjasa, jupan patronapäcän uca pʼekechirin warmiparu, pʼekechiriru, Ammonar oraker liwisitap uñjasajja, jupajj ucan Diosan chʼamapätap yatïna. Jupanac taypin lurasqui ucjjat jakenacar yatiyasina, jupanacajj uc uñjasajj Diosan chʼamapar iyawsayatäpcaspas uqhäm amuyasaw, jupajj utat ut jaläna, jakenacar ucjjat yatiynokaraquïna.

18. Jupanacasti pʼekechirin utapar tantachasiñ kalltapjjäna. Ucat walja jakenacaw tantachasipjjäna. Jupanacasti pʼekechirimpiru, jupan warmipampiru, lokerinacapampirojj jiwatäcaspas uqhäm oraker liwisit muspharasaw uñjapjjäna. Uqhämaraquiw Ammonar uñjapjjäna, jupasti Nefi jakënwa.

19. Ucat jakenacajj jupanac-camaw thuthuñ kalltapjjäna. Yakhepajj sapjjänwa: Pʼekechiriw Nefi jakerojj aca oraken kamayejja, ucat aca jachʼa ñankhajj jiwasanacaru, jan ucajja pʼekechirimpir utapampirojj puri –sasa.

20. Yakhepanacasti uqhäm sirinacarojj, janiw uqhamäquit sapjjaraquïnwa. Sebus umanacan tamanac chhuqhutatayqui uca lokerinacapar jiwayatap laycuw pʼekechirejj aca ñankhjj utapar apani –sapjjaraquïnwa.

21. Jupanacarusti uca Sebus umanac ucsan saytʼir, pʼekechirin uywa tamanacapar chhuqhutatayir jakenacajj janiw uqhämäcaraquit –sapjjänwa. Uca jakenacajj Ammonan pʼekechirin tamanacapar Sebus umanacawjan arjjatas jupanacan jilanacapar jiwayatap laycuw Ammonataquejj colerasipjjäna.

22. Ucat jupanacat maynejj Ammonataqui jupan jilapan Ammonan espadapan jiwayatätap laycu colerasisaw, espadap apsusin Ammonar jiwayañatac jawkʼantir jaljjatäna. Jupasti espadap jawkʼantañatac aytcän ucqhaw jupajj jiwat liwitat-täna.

23. Jichhajja, Ammonan jan jiwaycayätapjj amuytanwa, Tatitun jupan Mosia awquipar aqhäm satap laycu: Juparojj imäwa; juparusti juman iyawsatamarjamaw luraraquï – ucat Mosiajj juparojj Tatitun imatäñapatac antutäna.

24. Ucat uca jakenacajj Ammonar jiwayir espad aytcän uca jaken jiwatap uñjasaw takpach jupanacajj yakha liwitat-tatanacar llamctʼañ ajjsarapjjäna. Jupanacasti wastat musphañ kalltapjjäna, cunjämats aca jachʼa chʼamajj utji, camsañs munpacha? sasaw sapjjäna.

25. Jupanac taypit waljaniw, Ammonajj Jachʼa Ajayuw –sapjjäna. Yakhepanacasti jupajj jachʼa Ajayun qhitanitaw –sapjjaraquïna.

26. Yakhepanacajj janiw uqhamäquit sasaw takenir sapjjaraquïna. Jupajj Nefi jakenacan jiwasanacar tʼakhesiyir qhitanit jachʼa lakʼow –sapjjänwa.

27. Yakhepanacasti Ammonajj Jachʼa Ajayun jiwasanacan ñankha luräwinacas laycu tʼakhesiyir qhitanitaw sapjjänwa. Uca Jachʼa Ajayuw Nefi jakenacarojj imapuni, jiwasanacan amparanacasat khespiyaraqui sapjjaraquïnwa. Uca Jachʼa Ajayojj walja Laman jake jilatanacasaruw tucqhi –sasaw sapjjaraquïna.

28. Ucat jupanac taypin wal juchiquiñ kalltapjjäna. Jupanacajj juchiquipcän ucqhajja, uca walja jakenacar tantachaycän uca loker warmiw jutäna. Jupasti uca waltʼat jakenac taypinquir juchhiquïw uñjasajja, jachañcamaw llaquisïna.

29. Ucat jupajj pʼekechirin warmipar jacʼachasisaw amparapat waytäna, oraket saytʼayañ munasa. Jupasti amparamp llamctʼatäcän ucspachaw pʼekechirin warmipajj sarthapis saytʼäna; aqhäm jachʼat saraquïna: Qhuyapayat Jesusa, nayar ajjsarcañ mankhapachat khespiyquista! Qhuyapayat Diosay aca marcar qhuyapayam!

30. Ucat uc arsusina, amparanacap kʼopirasisa, cusisiñan phoktʼatäsaw jakenacan jan amuyat walja arunac arsüna. Uc lurasinsti, Lamoni pʼekechirin amparapat waytäna; jupasti sarthapisaw saytʼaraquïna.

31. Jupasti marcap taypin juchhiquïw uñjasajja, ucspachaw jupanacar tokenokäna, Ammonan lacapat istʼcän uca arunac yatichañ kalltäna. Cawquïrinacatejj arunacapar istʼapcän ucanacajja, Tatitur iyawsasaw cutiquipstapjjäna.

32. Ucampis jupanac taypin waljaniw arunacap jan istʼañ munasajj sarjjapjjäna.

33. Ucat Ammonajj saytʼcän ucqhasti, jupampi takpach Lamonin lokerinacapampejj jupanacaruw yatichapjjäna; takpach jupanacajj jakenacaru quipcac yatichapjjäna. Chuymanacajj turcatäjjewa janiw jucʼamp ñankh lurañ munapcti –sapjjänwa.

34. Waljaniw alajjpach qhitanacar uñjat arsupjjäna, jupanacamp parlat arsupjjaraquïna. Alajjpachanquirinacasti Diosan cunaymananacapat asquïtap jupanacar yatiyapjjäna.

35. Ucat waljaniw arunacapar iyawsapjjäna; cawquïrinacatejj iyawsapcän ucanacajja, bautizasipjjaraquïnwa. Jupanacajj asqui marcar tucusaw jupanac taypin iyawsiri tama ut-tʼayapjjäna.

36. Uqhämat Tatitun luräwipajj Laman jakenac taypin kalltäna; uqhäm Tatitojj Ajayup jupanacjjar wartañ kalltäna; cawquïrinacatejj juchapat cutiquipstasin jupan sutipar iyawsapqui take ucanacataquejja, Tatitojj uqhäm amparap lokatati.