1. Ucat jupanacajj catuntat Laman jakenacjjar arjjatirinac ut-tʼayäna, ucatsti jiwatanacapar allintayañataquiw waytʼapjjäna, uqhämaraqui Nefi jake jiwatanacarojj allintayapjjaraquïna. Moronisti jakenacaruw uchäna, jupanacar luräwinacap lurir uñchʼuquipjjañapataqui.

2. Ucat Moronejj Lehimpiw Mulec marcar saräna, ucatsti uca marcatac sarayäw catokasaw, ucjj Lehir churäna. Uca Lehisti jilpach nuwasïwinacapanjja Moronimpïnwa. Jupajj Moronjam jakënwa, jupanacasti purapat arjjatasitapat cusisipjjäna. Jupanacajj purapat munasisaw takpach Nefi jakenacan munatäpjjäna.

3. Ucat Laman jakenacajj jiwatanacapampir Nefi jake jiwatanacampir allintañ tucuyapcän uca khepatjja, jupanacajj Jilarquir orakeruw wastat cut-tayatäpjjäna. Ucat Teancumajj Moronin yatiyäwipana jupanacar Jilarquir orake, jan ucajj Jilarquir marc muytat pʼiy allsuñ kalltayäna.

4. Ucat pʼiyat mankhäjjaruw mä thuru cʼullut patill perk lurayäna; uca pʼiyata, uca thuru cʼullut patilljjar lakʼa kotsupjjäna. Uqhämaw lakʼampit thuru cʼullu wali jachʼa chʼaman perkamp Jilarquir marc muytañapcam Laman jakenacar lurayapjjäna.

5. Ucat uca marcajj ucapachat ucsaruw jachʼa arjjatat marcarojj tucüna. Uca marcansti Laman jake catuntatanac catjjäsipjjäna, jupanacan quipca amparanacapamp lurayat mä perka mankhana. Jichhajja, Moronejj Laman jakenacar trabajayañapänwa, cunalaycutejj lurasipcän ucqhajja, jasaquïn jupanacar uñjañajja; uqhämaraqui Laman jakenacar jaljjatcän ucapachajj take nuwasirinacap catuntañ munaraquïna.

6. Ucat Moronejj uqhäm Laman jakenacan nuwasiri tamanacapat mä jila chʼaman nuwasiri tamar atipasaw catuntäna. Uca Mulec marcasti Laman jakenacan Nefi oraken catuntanacat mä jila chʼaman catutänwa. Uqhäm Moronejj catuntatanacap imañataquejj pucar luraraquïna.

7. Ucat janiw jupajj Laman jakenacamp uca maran jucʼamp nuwasir sarcänti, antisas jakenacaparuw nuwasiñatac waquichayäna. Laman jakenacat jarcʼakasiñatac pucaranac lurayäna, uqhämaraqui warminacapar wawanacapar mankʼat yakha tʼakhesïwinacat khespiyañataqui, nuwasiri tamanacapatac mankʼa utjayañataquiw jakenacapar trabajayäna.

8. Ucat Nefi jakenac taypin mä chʼajjwäw puriyir sallkjjäwi laycuw Moronejj chʼusäcän ucapachajja, Laman jakenacan nuwasiri tamanacapajj inti jalant toke lamar aynach token Nefi jakenacat mä kawkha orakenac catupjjäna. Jupanacasti ucsa toke oraken walja marcanac catuntapjjäna.

9. Ucat Nefi jakenac taypinquir ñankha luräwinaca, jupanac pur chʼajjwanacan sallkjañanacan utjatap laycojj wali ajjsarcañänwa.

10. Jichhasti nayajj mä jucʼa Ammonan nayra Laman jakenacapat arsuñ munta. Ucanacasti Ammonan jilanacapampin jan ucajja, Diosan arupans chʼamapans Tatitur cutiquipstayatäpjjänwa. Jupanacajj Zarahemla oraker irpatäsin, ucapachat ucsarojj Nefi jakenacan arjjatatäpjjänwa.

11. Jupanacan arsüwip laycu, jilanacapjjar nuwasiñanac aytañat jarcʼatäpjjänwa. Jupanacajj jan jucʼamp wil wartañatac arsüw lurapjjäna, ucat jupanacajj arsüwiparjamaw jiwapjjasapäna. Janitejj Ammonamp jilanacapampejj jupanacar wal munasis qhuyapaycasapänjja, jupanacajj jilanacapan amparanacapar puriñ antutasipjjasapäna.

12. Ucat Zarahemla oraker irpatäpjjäna, ucapachatsti Nefi jakenacan arjjatatäpjjänwa.

13. Ucampis Nefi jakenacajj jupanacamp wali tʼakhesiyatäsina, walja tʼakhesïwinacamp llaquinacamp jan wali cunanacamp uñjapcän ucapachajja, jupanacajj qhuyapayasipjjänwa, marcapar arjjatañataquiw armanac aptañ munapjjäna.

14. Ucampis jupanacajj nuwasiñ armanacamp aptañampïpcän ucqhaw jupanacajj Helamanampin jilanacapampin achicäwinacapan jarcʼatäpjjäna. Jupanacajj arsüwi lurapcän uc paquiñampïpjjänwa.

15. Helamanasti uqhäm lurañanacamp almanacap chhakayapjjañapat ajjsaräna. Ucat take arsüw luririnacajj jilanacapar ucapachat ajjsarcañan jicjjatir tʼakhesir uñjapjjañapäna.

16. Ucampis timanacapat arjjatasiñataquejja, nuwasiñ armanacap jan aptañ arsüwir jan mantir walja yokanacapaw utjäna. Ucat jupanacajj ucapachajj cawquïrinacatejj armanac aptirjamäpcän ucanacaw tantachasipjjäna, ucatsti Nefi jakenac sutimpiw sutiñchayasipjjäna.

17. Jupanacasti Nefi jakenacan antutäwipatac nuwasiñataquiw mä arusjäw lurapjjäna. Jïsa, jiwañcam arjjatasis nuwasiñataquiw arsüwir mantapjjäna. Jupanacasti antutäwip janipun churañataqui, jan ucasti, take cunan Nefi jakenacar jupanac pachpar, mitʼanïtat arjjatasiñatac nuwasiñataquiw arsüwir mantapjjäna.

18. Jichhajja pä warank waynajj uca arsüwir mantasaw nuwasiñ armanacap marcapar arjjatañatac aptapjjäna.

19. Ucatsti, jupanacajj ucapachcamajj janipun Nefi jakenacatac chʼamäsajja, ucapachajj jachʼa yanapiriruw tucupjjäna. Jupanacajj nuwasiñ armanacap aptasaw, Helamanan jilïripäñap munapjjäna.

20. Jupanacajj waynanac-camaquïpjjänwa, uqhämaraqui jachʼa kamasan chʼaman kʼaphäpjjänwa. Ucampis ucajj janiw takpachäquiti. Jupanacajj takpach tiempon take jupanacar churat cunan chekap jakenacäpjjänwa.

21. Jupanacajj cheka chacha cancañan jakenacäpjjänwa, jupanacan Diosan camächitanacapar phokhañ jupa nayrakatan suma sarnakañ yatichatätap laycu.

22. Ucat Helamanajj pä warank wayna nuwasirinacap nayrakat, aynach token inti jalant toke lamar ucsa thiyanquir jakenacar yanapiriw saräna.

23. Uqhäm taripirinacan Nefi jakenacjjar sarayäwipan pä tunc quimsakallkon marajj tucusïna.