1. Ucat Moronejj nuwasiñatac waquichasiñ janiw samarcänti, jan ucajj jakenacapar Laman jakenac contra saytʼasiñatac waquichasiñjja, janiw tucuycänti. Jupajj taripirinacan pä tunc mara kalltäwipana, nuwasiri tamanacapar take Nefi jakenacan catut orakenacan marcanac muytir kotsut lakʼanac allsuñ kalltayäna.

2. Uca kotsut lakʼanac pataruw jupajj thuru cʼullunac uchayäna. Jïsa, thuru cʼullut luratanac mä jak uc-chʼa marcanac muytquir ayruntayäna.

3. Ucat uca thuru cʼullunac pataruw ari puntaninacan chhokhotcamac uca muytquir thuru cʼullunac patar lurayäna. Ucanacasti jan onjjtcaya jachʼäpjjänwa.

4. Ucat uca ari puntaninacan chhokhotanacat jucʼamp jachʼa pucaranac lurayaraquïna; uca saytʼu pucaranacarusti arjjatat jarqʼir chekanac lurayaraquïna Laman jakenacan kalanacapamp michʼinacapamp jupanacar jan wactʼayas chhojjriñchañapataqui.

5. Jupanacasti munañaparu chʼamaparjama kalanac uca patat jakontañataqui, marca perkanac jacʼar jutirinacar jiwayañataquiw waquichasitäpjjäna.

6. Uqhäm Moronejj arjjatat chekanac timanacapan jutañanacapatac sapa orak tokenquir marc muytir waquichäna.

7. Ucat Moronejj nuwasiri tamanacapar inti jals toke wasararuw qhitäna. Ucanacasti wasarar sarasajja, takpach inti jals toke wasaranquir Laman jakenacaruw Zarahemla oraket aynach toke quipca orakepar alis-supjjäna.

8. Nefi orakesti inti jals toke lamarat inti jalant toke lamarcam chek uñtäna.

9. Ucat jupanacan quipca orakenacapat alay tokencän uca inti jals toke wasarat Moronejj take Laman jakenacar alis-scän uca khepatjja, Zarahemla orakenquirinacar ucsa tokenquir jakenacampirojj, inti jals toke wasararu lamar iran thiyanac-cam sarayasaw uca orak catuyäna.

10. Uqhämaraqui jupajj nuwasiri tamanac aynach tokeru, catut orakenacap thiyar uchasa, nuwasiri tamanacapar jakenacapar timanacapan amparanacapat arjjatañatac pucaranac lurayaraquïna.

11. Uqhäm jupajj inti jals toke wasaranquir Laman jakenacan take chʼamañchatawjanacapar jarcʼakäna. Uqhämaraqui inti jalant tokena, quipc luraraquïna, Nefi jakenacamp Laman jakenacamp puran Zarahemla orakemp Nefi orakemp puran inti jalant toke lamarat Sidon jawir kalltäw chek sarir jaljäw korpa chʼamañchasa. Ucat Nefi jakenacasti take alay toke orakenac catusa, Jilarquir oraket take alay toke orake munañaparjam catupjjäna.

12. Uqhäm Moronejj jupan luräwinacapan cheka phokhata arjjatasiñ jupanacar puriyatap laycuw sapür jilïr nuwasiri tamanacapampi Laman jakenacan chʼamamp catut orakenacapat jarcʼakañ chʼamtʼäna, jan jucʼamp catut orakenacapar chʼamanïñanacapataqui.

13. Ucat Nefi jakenacajj mä marc takanachañ kalltapjjäna; uca marcasti Moroni satänwa. Ucajj inti jals toke lamar ucsancänwa, aynach toke Laman jakenacan catut orakenacap ucsancänwa.

14. Uqhämaraqui Moroni marcamp Aaron marcamp puran mä marca takanachapjjaraquïna. Ucajj Moronimp Aaronamp thiyacamänwa; uqhämaraqui marcajj, jan ucajj ucsa toke orakejj Nefia satänwa.

15. Uqhämaraqui uca pachpa maranjja, walja marcanac alay toker lurañ kalltapjjäna. Mayarojj Lehi sutimpiw uchapjjäna, ucajj mayja luratänwa. Ucasti alay token lamar thiya tokencänwa.

16. Uqhäm pä tunquïr marajj tucuyäna.

17. Uqhäm jachʼaptasaw, Nefi jakenacajj taripirinacan Nefi jakenacjjar sarayäwipan pä tunc mayan mar kalltäwincapjjäna.

18. Jupanacajj wal jachʼaptasaw wali kamirir tucupjjäna, jupanacasti miratatasaw, uca oraken chʼamanïpjjäna.

19. Uqhäm Tatitun jaken wawanacapar take arunacap phokhañapcam luräwinacapan qhuyapayatätap asquïtap uñjtan. Jiwasajj uñjsnawa, jichhacamajj aqhäm sas Lehir arsut arunacapan chekätapjja:

20. Jumamp wawanacamampejj qhuyapayatäpjjtawa; jupanacasti qhuyapayatäpjjaraquiniwa, camächitanacajjar phokhataparjamaw oraken jachʼaptapjjani. Ucampis amtasim, jupanacan camächitanacajjar jan phokhataparjamajja, Tatit nayrakatat jarcʼatäpjjaniwa.

21. Uca arsüwinacan Nefi jakenacar chekätapat uñstatap uñjtanwa, cunalaycutejj jupanac taypin chʼajjwanacapa, chhuchhuñanacapa, jiwayäwinacapa, lunthatjäwinacapa, wacʼan yakha Diosanacar yupaychäwipa, kʼañusiñ wachokañanacapa, ajjtcañ luräwinacapaw nuwasïwinacap tucqhäwinacap jupanacar puriyapjjäna.

22. Tatitun camächitanacapar phokherinacajj sapa cutiw khespiyatäpjjäna, ucampis warank warank ñankha jilanacapajj mitʼaniptayatäpjjänwa, jan ucajj espadan jiwayatäpjjänwa, jan ucasti jan iyawsas tʼuqhartasaw Laman jakenacamp chʼarkhotäpjjäna.

23. Ucampis Nefin urunacapatjja, janipiniw Moronin urunacapat sipan Nefi jakenac taypin jucʼamp cusisiñ pachajj utjcänti. Ucapachasti taripirinacan sarayäwipan pä tunc mayan maränwa.

24. Ucat taripirinacan sarayäwipan pä tunc payan marajj sumancañamp tucusiwayäna; pä tunc quimsan marajj uqhämaraquiw tucusiraquïna.

25. Janitejj jupanac taypin Lehi orakempit Lehi orak thiyanc-cän uca Morianton orakempit chʼajjwajj utjcasapänjja, taripirinacan sarayäwipan pä tunc pusin maran kalltäwin Nefi jakenac taypin sumancañajj utjaraquisapänwa. Uca pä orakesti lamar thiyancänwa.

26. Ucat uca Morianton orak catur jakenacajj Lehi oraket mä kawkhajj nanacanquiw sapjjänwa. Ucat jupanac puraw mä jachʼa chʼajjwäw utjayañ kalltäna. Ucat Moriantonanquir jakenacajj jilanacap contra armanac aptasaw, jupanacar espadamp jiwayañatac mayac chuymtʼapjjäna.

27. Ucampis Lehi orak catur jakenacajj Moronin utjnokäwipar jaltasaw, jupan yanapañapatac achictʼapjjäna; cunalaycutejj jupanacajj janiw pantasipcänti.

28. Ucat Moriantonanquir jakenacajj Morianton sat mä jaken sarayatäsaw, Lehinquir jakenacan Moronin uc jaltatapat yatjjatapcän ucqhajja, jupanacajj Moronin nuwasirinacapan jupanacjjar jutasin tucqhañapat wal ajjsarapjjäna.

29. Ucat Moriantonajj alay toke jachʼa kotan oraker jaltas uca orake catuñataquiw chuymanacapar amtayäna.

30. Jupanacajj uca arustʼa phokhapjjasapäna (ucasti llaquisiñataquïsapänwa) ucampis Moriantonajj jalta chuyman jakësajja, lokerinacapat mä tawakoruw wal nuwjatayna, coleran atipata.

31. Ucat jupajj jaltjjäna, ucatsti Moronin utjnokäwipar jutasin take ucanacat Moronir yatiyäna. Uqhämaraqui alay toke oraker jaltañ munañapat jupar yatiyaraquïna.

32. Ucat Jilarquir orakenquir jakenacajja, sañ munt Moronejja, jupajj uca jakenacan Moriantonan arunacapar istʼasin jupan jakenacapamp mayachasipjjañap amuyasaw ajjsaräna. Uqhämat Moriantonajj ucsa toke orakenac catusapäna, ucasti jan wali cunanacat Nefi jakenac taypin takanachasapäna; uca jan walinacasti antutäwipar atipjañampiw tucusisapäna.

33. Ucat Moronejj mä ejercito jakenacapamp Morianton jakenacar catjañataquiw alay toke oraker jutäwip jarcʼañatac qhitäna.

34. Ucat jupanacan Chʼusa Jaytanucut orake thiyanacar puriñapcamajja, janiw jupanacar catjapcänti. Ucanjja, lamar ucsana, inti jals tokes inti jalant tokes lamar ucsana alay toke oraker sarir cʼullcʼu simpa orak ucsan jupanacar catjapjjäna.

35. Ucat Moronin qhitat Teancum sat jaken sarayat ejercitojj Morianton jakenacampiw jiquisipjjäna. Ucat Morianton jakenacan chʼollkhe amuyunïtap laycu, (Moriantonan ñankhätapana alek jachʼar aptir arunacapan amtayatäsa) jupanacamp nuwasiñ kalltapjjäna. Uca nuwasïwinsti Teancumajj Moriantonar jiwayasaw, nuwasirinacapar atipjäna. Ucat jupanacar catuntasin Moronin ucaruw jupanacar irpäna. Uqhäm taripirinacan Nefi jakenacjjar sarayäwipan pä tunc pusin marajj sarakjjäna.

36. Uqhäm Morianton jakenacajj cut-tayatäpjjäna. Ucat sumancañ imañataquiw arsüwir mantasa, jupanacajj Morianton oraker cut-tayatäpjjäna; Lehinquir jakenacajj orakenacapar cut-tayatäjjaraquïnwa.

37. Ucat Nefi jakenacar sumancañajj cut-tayatäcän uca pachpa maranjj Nefia payïr jilïr taripirejj Dios nayrakatan taripäw konuñan phokhatpach asc taripasaw jiwäna.

38. Ucampis jupajj Almampin awquinacapampin sinti kollanjam amuyat kellkatanac yakha cunaymananac Almat janiw catokañ muncänti. Ucat Almajj ucanac Helaman yokapar catuyäna.

39. Ucat Nefian yokapajj taripäw konuñan awquip lant konuñapatac ut-tʼayatäna. Asquirjam taripañatac jakenacan sumancañap antutäwip imañataqui, Dios Tatitupar yupaychañ kollan wactʼäwinacap jupanacar antutañataqui, takpach urunacapan Diosatac cunanac imas kemiñataqui, ñankha jaker juchanacaparjam mutuyäwir apañatac juräwimp kollan luräwimpiw jupajj jilïr taripirit jakenacjjar sarayirit ut-tʼayatäna.

40. Jupan sutipajj Pahoranänwa. Pahoranasti awquipan konuñapan konusajja, Nefi jakenacjjar sarayäwip pä tunc pusin maran tucuyäwipan kalltäna.