1. Wawajjay, arunacajjar istʼam. Nayajj Helamanarjamaw säma: Diosan camächitanacapar phokhatamarjamaw aca oraken jachʼaptäta. Uqhämaraqui Diosan camächitanacapar jan phokhatamarjamaw jupa nayrakatat jarcʼakatäyäta.

2. Jichhasti wawajjay, juman Diosan thurtʼatätama, jupar iyawsascaquitam laycuw nayajj jumat wal cusisiñ suyta. Cunjämatejj waynäsajj Dios Tatitumar alcatañ kalltcta, uqhäm camächitanacapar phokhascaquiñam suyta. Cawquïrinacatejj tucuycam thurtʼasipcanejja, jupanacajj bendicitäpjjaniwa.

3. Nayajj sismaw wawajja: Juman Zoram jakenac taypin iyawsatam uñachtʼayatamata, llampʼütamata, jan mäc pʼek pasayasitam laycuw wal jumat cusisjjta.

4. Nayajj phalanacamp ñachʼantatätamjj yat-twa; aru laycu kalanacamp cʼuphatätamjj yatiractwa. Take ucanac Tatitun jumampïtap laycuw llampʼu chuymampejj tʼakhestajja. Jichhasti Tatitun jumar antutayatapjj yatiractawa.

5. Jichhajj Siblon wawajja, juman Diosar alcatatamarjama, yantʼanacamata, llaquisiñanacamata, tʼakhesïwinacamat antutayatäsajja, khep khepa urunjj aytatäyätawa.

6. Jichhajj wawajja, janiw nayajj juman naya pachpat ucanac yatitajj iyawsañam muncti. Nayancqui uca Diosan Ajayupaw ucanac yatiyitu; janitejj nayajj Diosat nasquiriscäyätjja, janiw ucanac yatquiriscäyät-ti.

7. Ucampis Tatitojj jachʼa qhuyapayäwipampiw marcap taypin tucqhañ suytʼañajjatac nayar yatiyañatac mä qhit qhitanitu. Nayajj mä qhit uñjta, jupasti ajanuy ajanuw nayar parlitu; arupasti khejjokhejj-jamänwa, orakerusti qhathat-tayaraquiwa.

8. Nayasti quimsa arumamp quimsa urumpiw sinti cʼallcʼu aykoñampejj almajjan wal tʼakhesiñancäyäta. Nayan Jesucrist Tatitur qhuyapayañapatac artʼañajjcamaw juchanacajjajj jan pʼampʼachatäcänti. Ucampis jupar artʼasisaw, chuymajjatac sumancañ jicjjat-ta.

9. Jichhajj wawajja, nayajj uc sisma, juman suma amuyump lurañ yatekañamataqui, nayat yatekañamataqui, Cristonaqui, jupa tokequiraquiw jakenacan khespiyasiñapajj utji. Jupaw acapach oraken khanapajja, jacañasa; jupaw asqui cheka arojja.

10. Jichhajj cunjämatejj ar yatichañ kalltcta, uqhäm yatichascaquiñam munta. Jan karisa, take cunan tupus lurañam munaracta.

11. Jachʼa jachʼa tucuñat amuyasim, juman quipca yatiñamat jachʼa chʼamamat jan pʼek waytamti.

12. Chachjam sarnakam, ucampis jan jachʼa jachʼa uynakamti. Uqhämaraqui take munarañanacamar jarcʼtʼam, munasiñan phoktʼatäñamataqui; janirac jayrasimti.

13. Zoramitanacjam jan mayisimti. Jumajj jupanacan jaken uñjatäñapatac yatiñapatac jachʼar aptatäñapatac mayisitapjj uñjtawa.

14. Diosay, nanacan jilanacajjat jucʼamp jachʼätajj laycuw yuspagarapjjsma –sasajj jan samti. Antisas sam: Tatay, nayan juch lurirïtajj pʼampʼachita, jilanacajjat qhuyapayasis amtasim. Jïsa, Dios nayrakatanjj jan kʼomätam sapa cut arsusim.

15. Tatitojj jumar bendispan; khep khepa urun jupan marcapan sumancas konuñamatac jumar catokaracpan. Jichhajj wawajja, aca jakenacar ar yatichas chacha cancañamp saram. Jiquisiñcam wawa.