1. Ucat cawcnïr Nefi jakenacatejj nuwasiñ armanacan jan jiwayatäcänjja, jiwatanac jupanacan imantatapatjja – uca jiwatanacajj waljätap laycojj janiw jactʼatäcänti – uca jiwatanacapar imantañ tucuyapcän uca khepatjja, takpach jupanacaw orakenacapar utanacapar warminacaparu wawanacaparu cut-tapjjäna.

2. Walja warminacamp wawanacampiw espadamp jiwayatäpjjäna, uqhämaraqui walja uywa tamanacapaw jiwayatäpjjaraquïna. Walja yarana yapunacapasti walja jakenacan tʼustʼjatap laycuw tucqhataraquïna.

3. Kawkha Laman jakenacamp Amlicir arquiri jakenacampitejj Sidon jawir lacan jiwarayatäpcän ucanacajja, Sidon umar jakontatäpjjänwa; jupanacan chʼaqhanacapan waljätap laycusti, lamar pʼiya mankhacamaw puripjje.

4. Uca Amlicir arquiri jakenacasti paranacapan wilamp chimpsusitap laycuw Nefi jakenacan uñtʼatäpjjäna; ucampis janiw Laman jakenacjam pʼekenacap kʼal mururasipcänti.

5. Uca Laman jakenacan pʼekenacapajj kʼala mururatänwa. Jupanacajj kʼalalaquiw sarnakapjjäna, lipʼichimp wacʼtʼataquiw sarnakapjjaraquïna. Uqhämaraqui, jarcʼakasiñatac nuwasiñ isinacapamp ñachʼsutäpjjaraquïnwa; arconacani, michʼinacani, kalanacani, kʼorawaninacäpjjaraquïnwa.

6. Uqhämaraqui, Laman jakenacan janchipajj lakʼa achilanacapar chimpu laycuw chʼiyäräpjjäna. Uca chimpusti jupanacan jucha luratapatänwa. Uqhämaraqui Nefi, Jacob, Jose, Sam jilanacapar kallasipjjatap laycuw uca chimpojj ñankhachäwimp uchatäna. Uca Nefimpi Jacobompi Joseampi Samampejj asqui kollan jakëpjjänwa.

7. Jupanacan jilanacapajj jupanacar tucqhañ chʼamtʼatap laycuw ñankhachatäpjjäna. Dios Tatitusti jupanacarojj mä chimpu uchäna. Jïsa, Lamanaru, Lemuelaru, Ismaelan yokanacaparu, Ismaelit warminacaru.

8. Ucasti jilanacapan jathanacapat jupanacan jathanacapar uñtʼatäñataquiw luratäna. Uqhäm toket Dios Tatitun marcapar imañapataqui, cunatejj jan cheka luräwinacäqui ucanacamp jan chʼallkhontasipjjañapataqui, janirac ucanacarus iyawsapjjañapataqui. Ucanacajj jupanacan tʼunjasiñapataquïsapänwa.

9. Uqhamasti, qhitinacatejj jathapar Laman jakenacan jathanacapamp jarktayqui ucajja, quicpa ñankhachäwi wawanacapar puriyäna.

10. Ucat qhitinacatejj Laman jakenacamp irpcatayasipqui ucanacajja, uca sutit uñtʼatänwa, jupanacarusti mä chimpuw uscutaraquïna.

11. Ucatsti, cawcnïrinacatejj Laman jakenacan saranacapar iyawsapcän ucanacajja, ucatsipana Jerusalenat apanit kellkatanacar iyawsapcäna, awquinacapan cheka saranacapar iyawsapcaraquïna, Diosan camächitanacapar iyawsas phokhapcaraquïn ucanacajja, Nefi jakenaca, jan ucajj Nefi jakenac satäpjjän ucapachat ucsarojja.

12. Jupanacaw marcapan cheka kellkatanacap imapcän ucanacajja, uqhämaraqui kellkatanac imapcän ucanacasa.

13. Jichhasti wastat Amlicir arquiri jakenacat parlañäni: Jupanacarojj mä chimpuw uscutaraquïna. Jupanac pachpaw uca chimpjj chimpusipjjäna, ucasti parapan wila chimpünwa.

14. Uqhämaw Diosan arupajj phokhasi, aca arunacjj jupaw Nefirojj säna: Nayajj Laman jakenacarojj ñankhachtwa. Janitejj jupanacajj ñankha luräwinacapat nayar cutiquipstapquitanejja, janiw qhuyapaycäti. Jupanacarusti mä chimpu uchä, jupanacamp wawanacapampejj jumampit wawanacamampit jichhat wiñaycam yakhäpjjañapataqui.

15. Uqhämaraqui cawquïrinacatejj jathapamp jilanacamamp jarktayapqui ucanacarojj chimptʼaraquïwa, jupanacan ñankhachatäpjjañapataquiraqui.

16. Uqhämaraqui, cawquïrinacatejj jumampir wawanacamampir nuwasipcätamjja, jupanacarojj chimptʼaraquïwa.

17. Uqhämaraquiw nayajj saracta: Cawquïrinacatejj jumat jithektapcätam ucanacajja, janiw jucʼamp jatham satäpcaniti. Nayajj jumampir jatham satäpcän ucanacampiruw jichhat wiñaycam qhuyapayapjjäma; ucanacaw Nefimpir jathapampir Tatitun arsüwinacapajja.

18. Uca Amlicir arquiri jakenacajj paranacapar chimpusiñ kalltapcän ucqhajja, janiw Diosan arupar phokhatap yatipcänti; ucampis jupanacajj Diosar kallcatapjjänwa. Ucat uca ñankhachäwin jupanacar puriñapajj waquisïna.

19. Nayajj jumanacan jupanac pachpa ñankhachäwir puripjjatap amuyapjjañam munta. Uqhämaraqui, cawquïrinacatejj ñankhachatäpqui ucanacajja, quicpa juchañchañap puriyasipjje.

20. Zarahemla oraken Laman jakenacamp amlicitanacamp mä kawkha uru khepatjja, nayrïr nuwasiri tamajj Amlicir arquiri jakenacamp jiquiscän uca quicpa chekan yakha Laman jakenacan nuwasiri tamapajj Nefi jakenacamp nuwasiñatac purïna.

21. Ucat mä nuwasiri tamaw jupanacar uca orakepat alisnucuñatac qhitatäna.

22. Almajj chhojjriñchatäsinjja, janiw ucapachajj Laman jakenacamp nuwasir sarcänti.

23. Ucampis jupajj mä jachʼa nuwasiri tamaruw jupanacamp nuwasir qhitäna. Jupanacasti walja Laman jakenacaruw jiwarayapjjäna, jiltʼirinacarusti orakep thiyat alisnucupjjaraquïna.

24. Ucat jupanacajj cut-tasajj ucapachat ucsaruw wasitat sumancañ uca oraken utjayañ kalltapjjäna, mä kawkha pachatac timanacapan jan llaquisiyatäsa.

25. Takpach ucanacajja, jïsa, take uca nuwasïwinacamp chʼajjwäwinacampejj kalltatänwa tucuyataraquïnwa, taripirinacan sarayäwipan pheskër maran lurasïna.

26. Uca mä maranac walja warank warank jakenacajj wiñay oraker qhitatäjjäna, walïpas jan walipas uca luräwinacapatjam catokañanacapataqui cawquïr ajayurutejj yäkapcäna, suma ajayurus ñankha ajayurusa, ucatjam wiñay cusisiña, jan ucajj, wiñay tʼakhesiñ catokañanacapatac qhitatäpjjaraquïnwa.

27. Jutir urunacat yatiyir ajayun arunacaparjama, qhitirutejj yäkapqui ucat sapakat mayniw pagop catoke; ucat ucajj chekarjamäpan. Uqhäm taripirinacan sarayäwipan pheskër marajj tucusïna.