1. Ucat jupanacajj mä iyawsiri tama uca oraken ut-tʼayapcän uca khepatjja, Lamoni pʼekechirejj Ammonan jupamp chic Nefi oraker awquipar uñtʼir sarañap munäna.

2. Ucat Tatitun arupajj aqhäm sasaw Ammonar purïna: Janiw Nefi oraker sarätati, cunalaycutejj uca pʼekechirejj jumar jiwayañ munani; antisas Midoni orakeruw saräta, cunalaycutejj Aaron jilamamp Muloquimp Ammampejj ucan carcelancapjje.

3. Ucat Ammonajj uc istʼasin Lamonir säna: Nayan jilajjamp jilatanacajjampejj Midoninjj carcelancapjjewa. Nayasti jupanacar antutayiriw sarä.

4. Ucat Lamonejj Ammonar säna: Nayajj Tatitun chʼamapamp take cun lurañam yat-ta. Ucampis nayajj Midoni orakeruw jumamp sarä. Midoni oraken Antiomno sat pʼekechirejj nayamp sumanquiwa. Ucat nayajj pʼekechirir sumaptayiri, jilanacamar carcelat apsuñapataquiw Midon oraker sarä. Ucat Lammonejj jupar säna: Qhitis jilanacaman carcelancatap yatiytam?

5. Ucat Ammonajj jupar säna: Janiw cawcnïr jakes uc yatiyquituti, antisas Diosaw uc nayar yatiyitu. Jupasti nayaruw situ: Jilanacamar antutayir saram, cunalaycutejj jupanacajj Midoni oraken carcelancapjje.

6. Ucat Lamonejj uc istʼasinjja, jupajj lokerinacapar caballonacapa, carronacap waquichayäna.

7. Ucat Ammonar säna: Jutam, nayajj jumampiw Midoni oraker sarä, ucansti nayajj pʼekechiriruw jilanacamar carcelat apsuñapatac achictʼä.

8. Ucat Ammonamp Lamonimpejj ucar sarasipcän ucqhajja, jupanacajj Lamonin take uc-chʼpach orakjjar pʼekechir awquipampiw jiquisipjjäna.

9. Ucat Lamonin awquipajj jupar säna: Nayajj jachʼa mankʼäw yokajjanacatac marcajjatac lurcta ucürojj, cunats jan jutcta?

10. Ucat saraquïnwa: Aca cʼarisirinacan Nefi jakepampejj cawcs saräta?

11. Ucat Lamonejj cawquirutejj sarapcän uc yatiyäna. Chuym usuchjañat ajjsarayasisa.

12. Uqhämaraquiw jupajj yatiyäna, cunat-tejj jancʼas jan jutcän ucata. Ucatsti, cunat-tejj awquipajj waquichqui uca fiestar jan sarcän uc yatiyaraquïna.

13. Ucat Lamonejj take ucanac awquipar yatiyquipan, wali muspharataw awquipan jupatac colerasitap amuyäna, ucat awquipajj Lamonir säna: Lamoni, jumajj cʼarisirïcän ucan Nefi jaken yokanacapar antutayirit sarascta. Uca cʼarisirejj awquinacasat lunthati, jichhasti wawanacapajj jiwasar chʼiqhi jan wali amuyunacapamp cʼarisïwinacapamp sallkjasaw wastat orakenacas apaker jiwas taypir jutapjje.

14. Ucat Lamonin awquipajj Ammonar espadamp jiwayañapataquiw jupar säna. Uqhämaraqui jupan Midoni oraker jan sarañapatac arsuraquïna, antisas Ismael oraker jupamp cut-tañapataquiw saraquïna.

15. Ucampis Lamonejj juparojj sänwa: Janiw nayajj Ammonar jiwaycäti, janiraquiw Ismael orakerus cut-tcaraquïti; antisas najajj Midoni orakeru, Ammonan jilanacapar antutayiriw sarä. Jupanacan asqui jakëtapjj yat-twa, cheka Diosan kollan arjiripätap yatiracta.

16. Awquipasti uca arunac istʼasinjja, jupatac colerasisaw jawkʼantañatac espadap aysusïna.

17. Ucampis Ammonajj maqhatasaw jupar säna: Janiw yokamar jiwaycätati. Ucampis jupan juchanacapat cutiquipstatap laycu jupan tucusiñapajj juman tucusiñamat sipan jucʼamp sumäspawa. Jumatejj jichhajj colerasiñaman tucusismajja, almamajj janiw khespiyatäcaspati.

18. Ucat juman cutekañamajj waquisi. Jumatejj yokamar jiwayasmajja, jan juchan jakëpana, jupan wilapajj Dios Tatituparuw jumar quipc lurañapatac oraket artʼaspa. Inas ñankhachatächisma.

19. Ucat Ammonajj uca arunac jupar satapatjja, jupajj aqhäm sasaw arsüna: Nayatejj yokajjar jiwayiristjja, jan juchan wil wartirista; jumaw jupar tucqhañ munqui ucätajja.

20. Ucat Ammonar jiwayañataquiw amparap aytäna. Ucampis Ammonajj jawkʼanacaparojj thurtʼasïnwa, amparap jan onjjtayañcamaw jawkʼjjäna.

21. Ucat pʼekechirejj Ammonan jupar jiwayañap amuyasaw Ammonarojj jan jiwayañapatac achicañ kalltäna.

22. Ucampis Ammonajj espadap aytasaw jupar säna: Janitejj jumajj jilanacajjan carcelat mistuñap antutcätajja, nayajj jawkʼantämawa.

23. Ucat pʼekechirejj jiwañar ajjsarasaw aqhäm säna: Jumatejj nayar jan jiwayquitätajja, cuntejj muncta, marcajjat chicatcamasa, uc nayajj churäma.

24. Ucat Ammonajj pʼekechirir munañaparjam ajjsarayatap amuyasaw juparojj säna: Jumatejj jilanacajjan carcelat mistuñapatac antutätajja, Lamonejj marcap catjjäsiscaquiraquini, jupatac jan colerascätajja, cuntejj lupʼqui uca quipca, munañaparjam lurañap antutätajja, nayajj janiw jiwaycämati. Jan uqhäm lurcätajja, jiwayañataquiw jawkʼantäma.

25. Ucat Ammonajj uca arunac arscän ucqhajja, pʼekechirejj jacascatapat cusisiñ kalltäna.

26. Ucat Ammonan jupar jan jiwayañ munataparu, Lamoni yokapatac jachʼa munasiñ utjatap uñjasajja, jupajj wali muspharasaw säna: Jilanacamar antutañajja, Lamoni yokajjan marcapar catuscaquiñapac munatam laycuw nayajj yokajjan jichhat wiñaycam marcapar catuñap churäma, janiraquiw jucʼamp jupjjar saraycaraquïti.

27. Uqhämaraqui jilanacaman carcelat mistupjjañapa, jumampin jupanacampin nayan marcajjar jutañam antutaraquïma; cunalaycutejj wal jumanacar uñjañ munapjjäma. Uca pʼekechirejj jupan arsut arunacapata, Lamoni yokapan arsut arunacapat wal muspharäna, ucat ucanac yatjjatañ munäna.

28. Ucat Ammonamp Lamonimpejj Midoni orakeruw sarasipcaraquïna. Uqhämaraqui Lamonin uca orakjjar pʼekechirimp sumancatap laycuw Ammonan jilanacapajj carcelat mistuyatäpjjäna.

29. Ucat Ammonajj jupanacar uñjasa, jupanacan kʼara janchïtap thuru phalanacapan janchipar wal qharsutap laycuw wal llaquisïna. Jupanacajj umata, mankʼata, cunayman tʼakhesiyäwinacat tʼakhesipjjäna. Ucampis take tʼakhesïwipanjj llampʼüpjjänwa.

30. Jupanacajj jucʼamp chʼollkhe jan altʼir marcan amparaparuw puripjjäna. Ucat arunacapar jan yäkapcänti, jupanacajj jupanacar jawkʼapjjänwa. Alisnucupjjaraquïnwa, utat utaru, mawjat mawjaru, Midoni oraker puriñapcamaw alis-supjjaraquïna. Ucan jupanacajj catuntatäpjjäna, thuru phalanacamp ñachʼantata, carcelar jakontatäpjjaraquïna. Walja urunac uca carcelancasin Ammonampin Lamonimpin antutayatäpjjäna.