1. Ucatsti jupanacajj sarnakasaw, jakenacan sinagoganacaparu utanacaru mantasajj, Diosan arup yatiyañ kalltapjjäna; jupanacasti arjj thaquinacapans yatiyasipcaquïnwa.

2. Uqhäma jupanac taypin wal irnakasinjja, jan cunan jakenacaruw iyawsayañ kalltapjjäna. Uca jan cunan jakenacasti jan suma isinïtap laycojj sinagoganacapat alisnucutäpjjänwa.

3. Uqhämasti jupanacajj kʼañüpcaspas uqhämaw sinagoganacapar Diosar yupaychirejj jan mantayatäpcänti; ucat kʼoyañäpjjäna. Jupanacajj thujsäpcaspas uqhäm uca jilanacapajj amuyapjjäna. Uqhämat acapach yänac tokenjja, jan utjirinïpcänti chuyma tokensti, aynachtʼatanacäpjjänwa.

4. Ucat Almajj jakenacaru Onida kollun arsus yatichascän ucapachajja, walja jakenacaw jupan uc jutapjjäna. Ucanacasti cawquïrinacat-tejj arsctan, yänac token aca oraken aynachtʼatäpjjatap laycojj chuyman aynachtʼatäpcän ucanacänwa.

5. Jupanacasti Alman uc jutapjjäna; ucat jupanacat jilïrïqui uca jakew Almarojj säna: Aca jilanacajjajj camächapjjanisa? Jupanacajj jan cunanïtap laycuw take jakenacan uñisitäpjje, Sacerdotenacajjans jucʼamp uñisitäpjjaraqui. Nanacajj quipca amparanacajjamp wali irnakañamp utachapcta uca sinagoganacajjat jupanacajj alisnucupjjetu. Jupanacasti jan cunanïtajj laycuw alisnucupjjetu; janiw Diosajjar yupaychañataquejj mä chekajj utjapquituti, camachapjjäsa?

6. Almajj uc istʼasinjja, cutiquipstasaw ajanup uñcatäna; jachʼa cusisiñampiw jupar uñjaraquïna, cunalaycutejj jupajj tʼakhesiyäwinacapan chuymanacapar chekpach llampʼuptayatap uñjäna. Jupanacan ar istʼañataqui waquichatätap uñjaraquïna.

7. Ucat janiw jucʼamp yakha walja jakenacarojj parlcänti, antisas jupajj amparap loktäna, ucatsti jupajj uñjcän uca juchanacapat chekpach cutiquipstirinacar artʼasin säna:

8. Nayajj chuymanacaman llampʼütap uñjta. Uqhamäpjjsta ucajja, qhuyapayatäpjjtawa.

9. Jilamajj siwa: Camachapjjäsa? – sinagoganacajjat Diosajjar jan yupaychañajjatac alisnucutäpjjta.

10. Nayajj jumanacaruw sapjjsma: Sinagoganacamanacti Diosamar yupaychañ amuyapjjta?

11. Uqhämaraqui jisctʼapjjaracsma: Mä cutiquit sapa pakallk urunjja Diosar yupaychañajja?

12. Nayajj sapjjsmawa: Sinagoganacamat alisnucutätamajj llampʼu chuymanïpjjañamataqui, suma amuyañ yatekapjjañamatac sumawa; sum amuyañ yatekañanacamasti waquisiwa. Jumanacan alisnucutätamatjja jilanacaman jan cunanïtam laycu uñisitätamat llampʼu chuymanïñajj puripjjtam. Jumanacajj waquisitarjamaw llampʼu chuymanacanïpjjta.

13. Jichhasti llampʼu chuymanïpjjañamatac waytʼatäpjjatam laycuw qhuyapayatäpjjta. Mä jaketejj llampʼu chuymanïñapatac waytʼatäqui ucajja, yakhep pachajj juchanacapat cutiquipstañ muni. Ucatsti, chekpachaw juchat cutiquipstirejj, qhuyapayäw jicjjatani; cawquïritejj qhuyapayäw jicjjatasin, tucusiñcam saytʼcan ucajja, khespiyatäniwa.

14. Cunjämatejj sapjjsma, llampʼu chuymanïpjjañamatac waytʼatäpjjatam laycuw qhuyapayatäpjjtajja. Ucat qhitinacatejj arup laycu chuymanacapar chekpach llampʼuptayasipqui ucanacan, jucʼamp qhuyapayatäpcani ucjj janit amuyapcta?

15. Jïsa, qhititejj chuymap chekpach llampʼuptayejja, juchanacapat cutiquipstqui ucat, tucusiñcam saytʼcaraqui ucajja, qhuyapayatäniwa. Jïsa, jan cunanïtap laycu llampʼu chuymanir tucuyatäpqui ucanacat sipan jucʼamp qhuyapayatäniwa.

16. Uqhämasti llampʼu chuymanir chuymapatjam tucuyasirinacajj qhuyapayatäpjjaniwa. Jan ucajja, qhititejj Diosan arupar iyawsqui, uca jan kala chuymamp bautizasqui ucajja, qhuyapayatawa. Jïsa, ar yatiñaru jan nuqhuta, yatiñar jan waytʼata iyawsirinacajj qhuyapayatäpjjewa.

17. Jïsa, waljaniw sapjje: Jumatejj alajjpachat unañcha uñachayapjjetätajja, nanacajj chekätapjj chekpachaw yatipjjä; ucat iyawsapjjä –sapjjewa.

18. Jichhajj jisctʼapjjsmawa: Ucajj iyawsañati? Nayajj jumanacarojj, janiwa sapjjsmawa. Mä jaketejj mä cuns yatispajja, janiw iyawsañapajj waquisquiti.

19. Ucatsti, Diosan munañap yatisin jan phokher jakejja, jucʼamp ñankhachatawa. Qhititejj iyawsaqui, jan ucajja, iyawsañatac waytʼatäqui, ucat juch lurañar jalantqui uca jaket sipana.

20. Jichhasti jumanacaw ucjjat amuytʼapjjäta. Nayajj sapjjsmawa, mayajj mayampi quipcaquiwa. Sapakat mayni jakew luräwiparjam catokani.

21. Cunjämtejj iyawsañata siscta: Iyawsañajj janiw take cunan phokhatpach yatiñäquiti. Ucat iyawsañanïpjjätajja, jan uñjat cheka cunaymananacaruw suyapjjäta.

22. Nayajj sapjjsmawa: Diosajj sutipar take iyawsirinacaruw qhuyapayi, uc amtasipjjañam munirista. Ucalaycuw nayrakat jupajj jumanacan iyawsapjjañam muni, jïsa, iyawsapjjañam muni.

23. Jupasti arupjja, alajjpach qhitanac tokew chachanacarojj churayi, uqhämaraqui warminacarus churayaraqui. Ucasti janiraquiw takpachäquiti. Yatirinacamp yatekatanacampejj jan amuytʼapcaspa uqhämawa. Uca arunacajj walja cutiw jiscʼalalanacar churata.

24. Ucat munat jilanaca, nayarojj jisctʼasipjjestawa; alisnucutäpjjatamata, tʼakhesiyatäpjjatamatjja, camächasispasa uc yatiñ munasa. Chekarjamaquiw uñjañ munapjjsma, janiw jumanacar taripatajj amuyasipjjañam muncti.

25. Janiw nayajj sañ muncti, takpach jumanacajj llampʼu chuymanïñatac waytʼatäpjjtawa –sasajja, cunalaycutejj take chekansa cunjämatsa jumanacat mä kawkhanejj llampʼu chuymanïpjjasapänwa. Ucaruw chekpach iyawsta.

26. Jichhajja, cunjämatejj iyawsañat siscta: Janiw ucajj phokhat yatiñäquiti. Uqhämaraquiw arunacajjampejja. Cunjämatejj iyawsañajj jan phokhatpach yatiñäqui, uqhämaraquiw nayrakat ucanacan chekätapjj jan phokhatpach yatipcasmati.

27. Ucampis jumanacatejj iquitjam sartapjjätajja, amuyunacamar pʼarjjtayapjjätajja, arunacajjar yantʼañcam, mä jucʼsa iyawsapjjaraquïtajja, jïsa, iyawsañ munañaquitejj puripjjeristam ucajja, uca munañjj jumanac mankhan lurañataqui jaytapjjam, nayan arunacajjat mä kawkhataqui mäwjit churañanacamatac iyawsañamcama.

28. Jichhajja, arojj jathäcaspas uqhäm amuyasipjjañäni. Chuymanacaman jathan satatäñapataquitejj mäwjit churapjjätajja, ucatejj cheka, jan ucajj suma jatharaquïchejja, janitejj jan iyawsañamampi Tatitun Ajayupar thurtʼasis uc jakonucupcät ucajja, jathajj chuymanacaman ucapachat ucsaruw aliñ kalltani. Ucat uca jathan pʼutsutap amuyasipcät ucqhajja, chuymanacaman aqhäm sañ kalltapjjäta: Acajj chekpach suma jathäpachawa, jan ucajja, arojj sumawa; cunalaycutejj ucajj chuymajjar jachʼaptayañ kallti. Ucaw amuyujjar khanartayañ kallti. Jïsa, nayataquejj suma mojjsäñ kallti.

29. Janit ucajj iyawsañamar jilaycaspa? Nayajj sapjjsmawa: Jïsa jilayaspawa; ucampis janiw phokhat yatiñcam jilquiti.

30. Ucampis cunapachatejj jathajj pʼusutati, ucat pʼutsu, ucatsti alsu, jilañ kalltcarac ucapachajja, jumanacajj jathajj sumaw sapjjañamawa; cunalaycutejj ucajj pʼusutati, mistu, aliñ kalltaraqui.

31. Ucat ucan suma jathätap chekpach yatipjjtati? Nayajj sapjjsmawa: Jïsa yatipjjtawa, cunalaycutejj sapa jathajj uca quipc jilayi.

32. Ucat jathatejj jilanejja, ucajj sumawa; ucampis janitejj jilcanejja, janiw sumäquiti, ucat jakonucutawa.

33. Ucat yantʼatamata, jatha satatamata, ucan pʼusutatasa mistusa jilañ kalltatapata uca jathan sumätapjj yatipjjañama.

34. Jichhajj yatiñamajj phokhatati? Jïsa ucatjj yatiñamajj phokhatawa, iyawsäwimasti inactʼiwa. Ucasti yatitam laycuwa. Jumanacajj arun chuymanacamar pʼusuntayatap yatipjjta, uqhämaraqui amuyunacamar khanartayañ kalltipan ucan mistutap yatipjjaracta; amuyumasti jachʼaptañ kalltaraqui.

35. Janit ucajj chekäqui? Nayajj sapjjsmawa: Ucan khanätap laycu, cunatejj khanäqui ucan uñjcañätap laycuw sumätap yatipjjañama. Ucat uca khan uñjañam khepatjja, yatiñamajj phokhatati?

36. Nayajj sapjjsmawa: Janiw phokhatäquiti, janiraquiw iyawsäwimjj jaytanucupjjañamäquiti. Jumanacajj iyawsäwimampi jathan sumätaps jan sumätaps yatiñataquiquiw jatha satäpjjtajja.

37. Ucat koka aliñ kalltipanjja, sapjjätawa: Sum aca kokar karpañäni, oraken sum saphintañapataqui, aliñapataqui, ucat achuñapataquiraqui. Ucat waltejj uñjapjjäta, karpapjjät ucajja, oraken saphintaniwa, aliniwa, achusti ucan achuraquini.

38. Ucampis jumanacatejj uca al apanucupjjäta, janirac karpañ amtapcätajja, janiw oraken saphintcaniti. Ucat intin lupipajj ucar cʼasuraycan ucapachajja, jan suma saphinïtap laycuw ucajj wañsus jiwsuni. Ucat jicʼsusaw ucajj jakonucutäjje.

39. Ucatsti janiw jathan jan sumätap laycüquiti, janiraquiw ucan achuñap jan munatap laycücaraquisa. Jan ucasti jan suma orakenïtama, kokar jan karpatam laycuwa. Uqhämasti janiw uca achu uñtʼapcasmati.

40. Uqhämaraqui, janitejj iyawsañampi, achur suyasa, arur karpapcätajja, janipiniw jacañ kokan achup qʼichekapcasmati.

41. Ucampis arur karpapjjätajja, jïsa, kokajj aliñ kalltcani ucqhajja, ucan achupar suyasa janipuni karis iyawsañamampi, llampʼu suyañamp ucar karpapjjätajja, ucajj saphintaniwa. Ucasti wiñay jacañatac alir kokäniwa.

42. Ucat arun jumanacan saphintañapataqui jan karisa, llampʼu chuymamp suyasa, iyawsas arur karpatam laycuw mä urojj ucan achup qʼichekapjjäta. Uca achupasti taket sipansa munata, take mojjsats jucʼamp mojjsa, take jankʼots jucʼamp jankʼo, take kʼomats jucʼamp kʼomawa. Uca achut sistʼasiñcamaw mankʼapjjäta, ucat janiw awtjayasipcätati, pharjayasipcaraquïtasa.

43. Ucapachajj jilanaca, iyawsatam laycu, jan karitama, llampʼu chuymamp jaypach suyatama, jachʼa chuymanïtama, alin jumanacataqui ach achuyañapar suyatam laycuw catokapjjäta.