59ri Jalja
Moronejj Pahoranar Helamanatac jucʼamp jakenac mayisaw kellke – Laman jakenacajj Nefia marc catupjje – Gobiernon jan yäkasitapat Moronejj colerasi.
1. Ucat taripirinacan Nefi jakenacjjar sarayäwipan quimsa tunc marana, Moronejj Helamanan kellkatap catusin leecän uca khepatjja, jupajj waliquïñata, jïsa, Helamanan apakat orakenac wastat catuñatac wali sum luratapat wal cusisïna.
2. Uqhämaraqui takpach jakenacaruw yatiyäna, jupajj ucanc-cän take ucsa toke orakenquir jakenacaparuw uc yatiyaraquïna, jupanacan cusisiñanacapataquiraqui.
3. Ucat ucspachaw jupajj Pahoranar mä kellkat apayäna, Helamanaru, jan ucajj Helamanan nuwasiri tamanacapar chʼamañchañataqui, muspharcañjam wastat catuñatac yanapatäqui ucsa toke orakenac facilac imas arjjatañapatac jakenac tantachthapiyañap munasa.
4. Ucat Moronejj uca kellkat Zarahemla oraker apaycän ucqhajja, jupajj yakha jiltʼir Laman jakenacan jupanacat marcanacs catut orakenacs catuñapatac mä arustʼäw lurañ kalltäna.
5. Ucat Moronejj uqhäm Laman jakenacamp nuwasir sarañapatac waquichasiscän ucapachaw Moroni marcat, Lehi marcat, Morianton marcat, tantachthapitäpcän Nefia marcanc-cän uca jakenacajj Laman jakenacan jaljjatatäpjjäna.
6. Jïsa, Manti oraket alisnucutäpcän uca Laman jakenacasa, ucsa tokenquir marcanacat alisnucutanacasa, purinipjjänwa, ucat ucsa oraken utjir jakenacampiw chicachasipjjäna.
7. Ucat waljanïsina, sapür jucʼamp jakenac catokasaraquiw jupanacajj Ammoronan arupar jaysasajj Nefia jakenacjjar chhuctʼapjjäna. Jupanacasti walpin jupanacar jiwarayañ kalltapjjaraquïna.
8. Jupanacan nuwasiri tamanacapan waljanïtap laycusti, Nefia marcat jiltʼir jakenacajj jupanacat jaltjjapjjaquïnwa; purinisinsti Moronin nuwasiri tamapampiw mayachasipjjäna.
9. Jichhajja, Moronejj Nefia marcaru uca marc arjjatañatac yanapiri jakenac qhitatäpcaspas uqhäm amuyasina, Laman jakenacan amparanacapar marc jan puriyas arjjatañan jupanacat uc wastat aparañat jucʼamp facilaquïtap yatisaraqui, uca marc facilac arjjatasin catupcaspas uqhäm amuyäna.
10. Ucat takpach nuwasiri tamap wastat catcän uca chekanacar arjjatañatac uscüna.
11. Ucat Moronejj Nefia marcan apakatap uñjcän ucqhajja, jupajj walpin llaquisïna, jakenacan ñankhätap laycu, jilanacapan amparanacapar inas jalantapjjchiñäni –sasaw pächasiñ kalltaraquïna.
12. Take jilïrinacapajj uqhämäpjjaraquïnwa. Jupanacajj Laman jakenacan jupanacar atipatap laycu, jakenacan ñankhätapat pächasisaw muspharapjjäna.
13. Ucat Moronejj gobiernotaqui, jupanacan marcapan antutäwipan jan cunäcaspas uqhäm amuyasitapat colerasïna.