1. Ucat jupanacajj jaytjasaw, khepar mä jucʼa jupanacat jit-tapjjäna. Ucat Moronejj Zerahemnar säna: Zerahemna, uñjam. Nanacajj janiw wil wartir jakëñ munapcti. Jumajj nanacan amparanacajjancatamjj yat-tawa. Ucampis nanacajj janiw jumanacar jiwarayañ munapcsmati.

2. Nanacajj janiw jumanacjjar chʼamanïñatac wil wartirit jutapcsma. Janiraquiw qhitirus mitʼanïñ yucurjamar puriyañ munapcti. Ucampis ucataquiw jumanacajj nanac contrajj jutapjjesta; jumanacajj iyawsañajj laycuw nanacataquejj colerasipjjta.

3. Ucampis jichhajj jumanacajj Tatitun nanacampïtap uñjapjjtawa. Nanacan amparanacajjar jumanac catuyatap uñjapjjaractawa. Nayajj jumanacan uc amuyañam munta. Uqhämaw nanacampejj lurasi, iyawsañajj laycu, Cristor iyawsatajj laycuraqui. Jichhajj jumanacajj uñjapjjtawa, janiw iyawsäwijjarojj tʼunjapcasmati.

4. Ucat ucan Diosar cheka iyawsäwïtapjj uñjapjjta. Nanacajj Diosar chekapäpcta ucajja, iyawsäwijjar iyawsañajjar chekapäpcaract ucqhajja, Diosan nanacar kemjjäsis imañap jumanacajj uñjapjjaracta. Janitejj nanacajj juch lurañar jalantapcäjja, iyawsäwijjat janirac sarakapcäjja, janipuniw Tatitojj nanacan tucqhatäñajj muncaniti.

5. Jichhajja, Zerahemna, amparanacajjar jumanacjjar chʼam catuñanacajjatac chʼamañchqui uca take chʼaman Diosan sutipjjaruw iyawsäwijjata, iyawsañajjata, yupaychañ luräwinacajjata, iglesiajjata, warminacajjarus wawanacajjarus manüpcta uca kollan kemjjäsiñata, orakenacajjar marcajjar chintʼapquitu uca antutäwijjata; uqhämaraqui cawqharutejj take cusisiñajjat manüpcta uca kollan Diosan arupar imañata, take nanacan jucʼamp munatanacajjat nayajj camächit chursma.

6. Janiraquiw ucajj takpachäquiti; nayajj take jacañatac munäwinacamat camächit chursma, nuwasiñ armanacam nanacar churjjañanacamataqui, nanacasti janiw wil wartañ munapcämati. Antisas jumanacatejj sarjjapjjätajja, janirac wastat nuwasir nanacjjar jutapquitätajja, jacäwinacam churapjjäma.

7. Ucat janitejj uc lurapcätajja, amparanacajjancatam laycojja, nayajj jakenacajjaruw jumanacjjar jaljjatañanacapatac sä. Jupanacasti chhaktañanacamataquiw jiwañan chhojjrinacapamp janchinacamar chhojjriñchapjjätam. Ucat qhitin aca marcjjar chʼamanïtaps uñjañäni, qhitin mitʼaniptayatäñaps uñjañäni.

8. Ucat Zerahemnajj uca arunac istʼcän ucapachajja, jupajj maqhatasaw arcopa, cimitarrapa, espadap Moronin amparapar catuyasin jupar säna: Acajj nuwasiñ armanacajjajja, ucanac jumar catuyjjapjjäma; ucampis janiw jumanacamp arsüwir mantapcäti, cunalaycutejj yatipjjtwa; janiw nanacas wawanacajjas uca arsutarojj phokhapquirist-ti. Nuwasiñ armanacajjac catjjapjjam, ucatsti wasarar mistuñajjatac antutapjjaraquita. Jan ucajja, nanacajj espadanacajj catusisipcaquï, ucat atipapjjämas, jan ucajja, jiwarapjjäsa.

9. Janiw jumanacjam iyawsapcti, amparanacamar catuyapquitu ucan Diosätapjj janiw iyawsapcti. Antisas jumanacan chʼiqhi amuyunïtaman laycu espadanacajjat khespitamaruw iyawsapjjta. Jirut lekʼsut cunaymaninacamaw jumanacarojj imapjjtam.

10. Ucat Zarahemnajj uca arunac arsuñ tucuycän ucqhajja, uqhämajj Moronejj catuyat espadamp, nuwasiñ armanacamp Zerahemnarojj aqhäm sasaw cut-tayäna: Uqhämajj nuwasiñ tucuyapjjañäni.

11. Janiw nayajj arsut arunacajjat janiw siscti sisquirist-ti. Tatitojj chekpachaw jaqui. Ucat uqhäm chekampi, janitejj jan wastat nuwasiñatac mä arsüw lurapcätajja, janiw mistupcätati. Ucat amparanacajjancatam laycu, janitejj nayan arsut arunacar jaysapcätajja, wilam oraker wartapjjä.

12. Ucat Zerahemnajj uca arunac istʼasinjja, espadap catuscaquïnwa. Ucat Moronitac colerasisaw, Moronir jiwayir jalcati. Ucampis espadap aytcän ucqhajja, Moronin nuwasirinacapat maynïriw espadapar jawkʼantasin oraker liwtasiyi; ucatsti catuñap ucar pʼaquektayi. Uqhämaraqui Zerahemnan sonak lipʼichip jawkʼakaraqui, sonak lipʼichipasti orakeruw jalakti. Zerahemnasti jupanac nayrakatat nuwasiri jakenacap taypiruw jaltäna.

13. Ucat ucsa token saytʼir Zerahemnan sonak lipʼichip qharekqui uca nuwasirejj, uca sonak lipʼich ñicʼutat oraket waytäna. Ucat espadap puntaru uc uchasaw, jachʼa arut aqhäm sas jupanacar uñachayäna:

14. Cunjämatejj aca jilïrimanquir sonak lipʼichejj oraker jalaktquejja, uqhämaraquiw oraker liwinucutäpjjäta, janitejj nuwasiñ armanacam catuyapcäta, janirac sumancañatac mä arsüw lurapcät ucajja.

15. Ucat waljaniw uca arunac istʼasina, espadanquir sonak lipʼich uñjasin ajjsarthapipjjäna. Waljaniraquiw maqhatasin armanacap Moronin nayrakatapar liwnokasajj sumancañatac arsüwir mantapjjäna. Kawkhanitejj uca arsüwir mantapcän ucanacajja, wasararuw mistuyatäpjjäna.

16. Ucat Zerahemnajj wali colerasisapuniw jiltʼir nuwasirinacapar jucʼamp chʼamamp Nefi jakenac contra nuwasiñatac colerañ amtayäna.

17. Jichhajja Moronejj uca Laman jakenacan jan kʼewtʼayasirïtap laycuw colerasïna. Ucat jupajj jakenacaparojja, jupanacar jaljjatas jiwarayapjjam säna. Ucat jupanacajj jiwarayañ kalltapjjäna, Laman jakenacasti espadanacapamp chʼamanacapampiw nuwasipjjaraquïna.

18. Ucampis kʼara janchinacapamp kʼara pʼekenacapampejj Nefi jakenacan ari espadanacaparuw jaltʼapjjäna. Jupanacajj chhokhontatäpjjänwa, jawkʼanokatäsinsti mäquiw Nefi jakenacan espadanacap nayrakatar liwirtapjjäna. Jupanacajj Moronin nuwasiripan khanañchäwiparjam liwirtayatäñ kalltapjjäna.

19. Ucat Zerahemnajj takpachanin tucqhatäñap amuyasisajja, jachʼat Moronir artʼäna: Jumanacatejj nanac jiltʼirinacan jacäwinacajj jan apakapquitätajja, nayamp jakenacajjampejj arsüwiruw mantapjjä jan wastat nuwasir jumanacjjar jutapjjañajjataqui –sasa.

20. Ucat Moronejj jiwañar puriyañjj jakenacap taypin suytʼayäna. Ucat nuwasiñ armanac Laman jakenacat apakäna, jupanacasti sumancañatac arsüw lurapjjatapatjja, wasarar mistuyatäpjjänwa.

21. Waljätap laycusti jiwatanacajj janiw jaqhutäpcänti. Jiwatanacajja, Nefi jakenac tokets Laman jakenac toketsa sinti waljapunïnwa.

22. Ucat jiwatanac Sidon umanacar jakontapjjäna, ucanacasti uman apataw, lamar pʼiya mankhan imantatäpjje.

23. Nefi jakenacasti, jan ucajj Moronin nuwasiri tamanacapajja, utanacapar orakenacaparuw cut-tʼjjapjjäna.

24. Uqhämaw taripirinacan Nefi jakenacjjar sarayäwipan tunca quimsakallkon marajj tucuyäna. Uqhäm Alman Nefin tʼalpha lekʼetanacapjjar kellkat kellkäwipajj tucuyaraqui.