1. Ucat Ammonan jakenacapan Jerson oraken ut-tʼayatapatjja, Laman jakenacan uca orakenacat alis-sutätapatjja, uca orakenquirinacan jiwatanacapar imantatapatjja –

2. Waljanïtap laycuw, jiwatanacapajj jan jaqhutäcänti, janiraquiw Nefi jakenacan jiwatanacapajj jaqhutäcaraquïnti – ucampis jiwatanacar imantatatjja, uqhämaraqui ayunaña mayisiña llaquisiñ urunac sarakatatjja, (ucasti taripirinacar Nefi jakenacjjar sarayäwipan tunca sojjtan maränwa) takpach uca orakenjj jan tucusir sumancañaw utjañ kalltäna.

3. Jakenacasti Tatitun camächitanacaparojj phokhapjjaraquïnwa; jupanacasti Diosan leyinacap Moisesan leyiparjamaw sum phokhapjjaraquïna. Jupanacajj Moisesan leyipar ucan phokhasiñapcam phokher yatichatäpjjänwa.

4. Ucat taripirinacan Nefi jakenacjjar sarayäwipan tunca sojjtan maranjj janiw cuna ojjoñanacas utjcänti.

5. Ucat taripirinacan sarayäwipan tunca pakallkon maranjj jan tucusir sumancañaw utjaraquïna.

6. Ucampis tunca pakallkon mar niy tucusir jacʼanjja, mä jakew Zarahemla marcar jutäna; jupasti Cristjjat jaychasirïnwa. Diosan arjirinacapan arsutäcän uca Criston jutäwipat yatiyäwinac contraw jupajj parlañ kalltäna.

7. Janiw jakenacan iyawsäwipat mutuyir leyejj utjcänti; jakenacar jan quipquïr mä leyin utjañapajj janiw Diosan camächitanacaparjamäcänti.

8. Aqhäm siw kellkatajja: Jichhürpach ajllisim qhitirutejj lokcät uca.

9. Uqhämasti qhititejj Diosar lokañ muncän ucajja, jupatänwa, jan ucajja, jupatejj Diosar iyawsänjja, jupatäscän Diosar lokañapajja. Ucampis janitejj Diosar iyawscänjja, janiw jakenacar ucat catuyañatac leyejj utjcänti.

10. Ucampis maynitejj jiwayänjja, jupajj jiwayataraquïnwa. Maynitejj lunthatänjja, jupajj mutuyataraquïnwa. Maynitejj lunthatjänjja, mutuyatänwa. Maynitejj wachokänjja, jupajj mutuyatänwa; take uca ñankha lurañanacat jupajj mutuyat uñjasïna.

11. Jakenacan leyir pʼaquitaparjam taripañataquiw leyejj utjäna, ucampis jakenacan iyawsäwipat mutuyir leyejj janiw utjcänti. Ucat jakenacajj leyir pʼaquitaparjamaquiw mutuyatäpjjäna; uqhämasti takeniw quipcäpjjäna.

12. Uca Cristjjat jaychasir Korihor sat jakejja (leyejj janiw jupar cuns lurcasapänti) Cristojj janiw utjcanit sasaw jakenacar yatiyañ kalltäna. Aqhäm sasaw jupajj yatiyaraquïna:

13. Inamaya alek suyañamp catuntat juma jakena, cunats uqhäm lokhe amuyunacamp catuntayasipjjta? Cunats Cristor suyapjjta? Janiw qhiti jakes jutir cunaymananacat yatcaspati.

14. Aca jumanacan yatiyäwinac sata, kollan arjirinacan catuyataw sapcta ucanacajja, awquinacasan alek sarapcamaquiwa.

15. Cunjämats ucan chekätapjj yatipjjta? Cuntejj jan uñjapcta ucatjja, janiw yatipcasmati; uqhämasti janiraquiw Criston utjatapjj yatipcasmati.

16. Jumanacajj juchanacajjat pʼampʼachäwiw utjan sapjjtawa, ucampis ucajj lokhe amuyun amuyäwipaquiwa. Jan utjir cunanacar iyawsañatac irpapctam uca awquinacaman saranacap laycuw uca lokhe amuyunacamajj purinipjjtam.

17. Ucat walja uqhäm cunaymananac jupanacar yatiyäna. Jupasti jakenacan juchanacapan tʼakhesiyäwipar phokhañajj janiw utjcaspat saraquïnwa. Antisas sapakat mayniw quipca luräwiparjam aca jacäwinjj sarnake –saraquïnwa. Jupasti sänwa: Sapakat mayniw quipca chʼiqhi amuyuparjam jachʼapti, quipca chʼamaparjam atiparaqui; cuntejj jakenacajj lurapqui ucajj janiw juchäquit –saraquïnwa.

18. Uqhäm jupanacar yatiyäna, waljanir irpakasa, ñankha luräwinacapan pʼekenacap waytayäna. Jupajj walja warminacaru, chachanacarus wachokañar kʼañusiñaruw irpakäna, cunapachatejj mä jakejj jiwqui ucqharuw take cunas tucusi –sasa.

19. Uca jakesti Jerson orakeruw sararaquïna, Ammonan jakenacap taypin yatiyiri. Jupanacajj nayrajj Laman jakëpjjänwa.

20. Ucampis walja Nefi jakenacat sipan jupanacajj walja Nefi jakenacat sipan jucʼamp suma amuyunïpjjänwa; cunalaycutejj jupar catuntapjjänwa, ucatsti ñachʼantasaw, uca marcan Ammon jilïr sacerdoten nayrakatapar irpapjjäna.

21. Ucat jupajj aca oraket juparojj jakonucuyäna. Jupajj Gedeon orakeruw jutäna, jupanacarusti yatiyañ kalltaraquïna. Ucanjj jupajj janiw waljanir iyawsaycänti. Antisas catuntatäpjjänwa, ucatsti ñachʼantat jilïr sacerdotempin uca orakenquir jilïr taripirimpin nayrakataparuw irpcatapjjäna.

22. Jilïr sacerdotesti juparojj sänwa: Cunats take toker sarnakas Tatitun luräwinacap ñankhar tucuyta? Cunats aca jakenacar Criston jan utjatapata, cusisiñanacapar apakañatac yatichta? Cunats takpach kollan arjirinacan kollan yatiyäwinacap contra parlta?

23. Jilïr sacerdoten sutipajj Gidona satänwa. Korihorasti juparojj sänwa: Janiw awquinacaman lokhe saranacap yatichcti. Janiraquiw aca marcarojj yatichcti nayra sacerdotenacan uscut tʼajjmar camächinacapamp luräwinacapamp chʼokjjat sarnakañsa. Jupanacajj chʼamanïñamp chʼaman cancañanïñampiw chʼokjjapjje, jan cuns yatir marcäpjjañapataqui, pʼekenacap jan waytapjjañapataqui. Jan ucasti arunacamarjam amuc altʼapjjañapataqui.

24. Jumanacajj aca marcajj antutataw sapjjtawa. Nayasti jumanacar sapjjsmawa: Jupanacajj mitʼanïpjjewa. Jumanacajj uca nayrapach yatiyäwinacajj chekaw sapjjtawa. Nayajj jumanacaruw sapjjsma: Janiw ucan chekätapjj yatipctati.

25. Aca jakenacajj, awquipan camächit pʼaquitap laycuw juch luriri tincut marcajj sapjjtawa. Nayasti sapjjsmawa: Mä wawajj janiw tatap mamap laycojj juchanïcaspati.

26. Sapjjaractawa: Cristojj jutaniwa –sasa. Nayasti sapjjsmawa: Criston utjañapatjj janiw yatipctati. Jupajj orakenquirinacan juchanacap laycuw jiwayatäni –sapjjaractawa.

27. Uqhäm aca jakenacarojj awquinacaman alek yatit saranacapar quipca munañanacamarjam irpakapjjta. Uqhäm jupanacar mitʼanïcaspas uqhämaw altʼayapjjta, chʼama apsutanacapamp sisantapjjañamataqui. Jupanacasti janiw alajjar uñtañs munapquiti, janiraquiw munañaparjam luräwinacapata cunatejj wactʼqui ucanacat cusisiñs munapquiti.

28. Jïsa, cunatejj jupanacancqui ucamp lurañ ajjsarapjje; uqhäm lurapjjaspajja, sacerdotenacaparuw cutcatapjjaspa. Uca sacerdotenacasti munañaparjamaw jupanacar yucuntapjje; yatit saranacapampi, samcanacapampi, alek munañanacapampi, uñjäwinacapampi, jamas yatitanacapampi, jan arunacaparjam lurañajj mä jan uñtʼat cancañar cutcatañäcaspas uqhäm iyawsayapjjaraqui. Uca jan uñtʼat cancañajj Diosaw –sapjjaraquiwa. Ucampis jupajj janipiniw uñjatäcänti uñjatäcanisa, janiraquiw uñtʼatäcänti uñtʼatäcaraquinisa. Jupajj janipiniw utjcänti, utjcaraquinisa.

29. Jilïr sacerdotempi jilïr taripirimpisti, jupan chuymapan kaljamätap amuyasa, Diosat ñankh parlatap uñjasajja, janiw arunacapjjar arsuñ munapcänti; antisas ñachʼantayapjjänwa. Ucat chʼamaninacan amparanacapar catuyasaw, Zarahemla oraker apayäna, Alman nayrakatapan uñstañapataqui, takpach uca oraker sarayir jilïr taripirin nayrakatapar irpantatäñapataquiraqui.

30. Ucat jupajj Almampin jilïr taripirimpin nayrakatapar irpantatäcän ucapachajj cunjämatejj Gedeon oraken parlcän uca quipcac parlaraquïna. Jïsa, jupajj Diosarojj ñankhachascaquïnwa.

31. Jupasti jachʼa jachʼa tucuñ arunacapampiw Alma nayrakatan parläna. Jupajj sacerdotenacampit yatichirinacampitsti ñankh parläna. Jupanacaw awquinacapan alek saranacapar iyawsasajj marcarojj uca jan walinacan khepap arcayejja, marcan chʼama tucutapamp sistʼasiñataquejja, –sasaw säna.

32. Ucat Almajj jupar säna: Jumajj nanacan aca marcan chʼama tucutanacapamp jan cusisipjjatajj yat-tawa. Nayajj taripirinacan sarayäwipan kalltäwipat jichhacam utjañajjatac quipca amparanacajjampiw trabajta, take orakpachan Diosan arup jakenacajjar yatiyir sarnakquipansa.

33. Take iyawsiri taman luräwinacajjatsa janiw mä senins luräwijjat catokcti; janiraquiw cawquïr jilanacajjas cuns catokapcaraquiti. Jan ucasti taripirin konuñapancasaquiw catokapjjta; ucansti taripapcta uqhämatac leyirjam catokapjjta.

34. Uqhämasti, janitejj iyawsiri taman lurapcta ucanacat cuns catokapcstjja: Cuna asquirac iyawsiri taman trabajañast nanacatac apanisti? Jan ucasti, cunatejj chekäqui uc yatiyasa, jilanacajjan cusisiñapan cusisiñataquiquiwa.

35. Ucat cunats jumajj aca marcar kamiriptañanacamataquiw yatiyapjjta sapjjesta? Juma pachpaw nanacan jan cuns catokatajj yatiractajja. Jichhasti, aca jakenacan chuymanacapar wal cusisiyqui, ucat nanacan cʼarisitanacajjätapar iyawstati?

36. Korihorasti juparojja, jïsa, sänwa.

37. Ucat Almajj jupar säna: Diosan utjatapar iyawstati?

38. Jupasti, janiw –sänwa.

39. Ucat Almajj jupar säna: Diosas Cristos janiw utjquit sascaquïtati? Nayajj sismawa: Diosan utjatapjj yat-twa, Criston jutañaps yatiractwa.

40. Jichhajja, janiw Diosajj utjquiti, Cristojj janiw jutcaniti sañamatac cunas ircatañamatac utjtam? Nayajj sismawa: Juman arumaquiw utjtam.

41. Ucampis nayanjj take cunaw ucanacan chekätapat ircatañatac utjitu. Uqhämaraqui jumanjj take cunaw ucanacan chekätapat ircatañataquejj utjaractam. Ucar jaychasismati? Ucanacan chekätap iyawstati?

42. Nayajj juman iyawsatamjj yat-twa, ucampis cʼari ajayojj juman utji. Jumasti Diosan Ajayupar juman jan utjañapataquiw jarcʼakasta. Supayajj jumjjar chʼamaniwa, jupasti jumaruw irpnaktam, Diosan wawanacapar tucqhir cunaymananac lurasa.

43. Ucat Korihorajj Almar säna: Jumatejj Diosan utjatapar iyawsayatäñajjatac mä unañch uñachayitätajja, jupan chʼamanïtap uñachayitätajja, nayajj arunacaman chekätaparojj iyawsäwa.

44. Ucampis Almajj jupar sänwa: Jumarojj walja uñachayäwinacaw uñachayata, Diosamarut yantʼäta? Take aca jilanacamamp kollan arjirinacampejj ircatapctam uc uñjcasat, mä unañch uñachayit säta? Kellkatanacajj juma nayrakatanquiwa, take cunatejj utjqui ucaw Diosan utjatapat uñtayi. Orakempi take uca patanquir cunanacampi, jit-täwipampi wali sucʼatjam jit-tir planetanacampejj Taket Sipan Jachʼa luririn utjatapat ircatapjje.

45. Take ucanacampi, take toker sarnakasat aca jakenacan chuymanacapar irpakasajj Diosan jan utjatapat jupanacar ircatäta? Take uca ircatirinacar jaychasïtati? Jupasti sänwa: Janitejj unañcha uñachayquitätajja, janiw chekäquit –säwa.

46. Ucat Alma jakejj jupar säna: Juman chuymaman chʼollkhëtapajj llaquisiyituwa. Almaman tucqhatäñapatac cheka ajayutac chʼurqhisitamajj llaquisiyaraquituwa.

47. Walja jakenacar cʼari alek jachʼar aptir arunacamamp tucqhañar irpakañamat sipan, almaman chhaktañapajj jucʼamp sumäspawa. Ucat wastat janiw chekäquit sätajja, Diosajj amuctʼañamataquiw jawkʼantätam. Janiraquiw jucʼamp lacam jistʼarcätati, aca jakenacar jan jucʼamp cʼarintañamataqui.

48. Ucat Korihorajj jupar säna: Janiw nayajj Diosan utjatapajja, janiw chekäquit siscti, antisas nayajj Diosan utjatapjj janiw iyawscti. Nayajj saractwa, janiraquiw jumajj Diosan utjatapjj yatcaractati; janitejj mä unañcha uñachayitätajja, janiw iyawscäti.

49. Ucat Almajj jupar säna: Mä unañchjam churäma, jichhajj arunacajjarjamaw amuctʼäta. Nayajj Diosan sutiparuw sisma: Jan jucʼamp arsuñamataquiw amuctʼäta.

50. Ucat Almajj uca arunac arscän ucqhaw Korihorajj Alman arunacaparjama, jan jucʼamp arsuñapatac amutur tucjjäna.

51. Ucat jilïr taripirejj uc uñjasina, amparap loktasaw Korihorar aqhäm sas kellkäna: Diosan chʼamapan utjatapar iyawstati? Qhitins Alman unañch uñachayañap munäyäta? Mä unañch uñachayañataquejj yakhanacar tʼakhesiyañapt munäyäta? Jichhasti, jupajj mä unañch uñachaytam; jichhajj jucʼamp jaychasiscaquïtati?

52. Korihorasti amparap loktasaw aqhäm sas kellkäna: Nayan amutütajj yat-twa, cunalaycutejj janiw arsquirist-ti. Diosan chʼamapaquiw aqhämarojj puriyitu. Nayasti Diosan utjatapjj yatiyätwa.

53. Ucampis supayaw nayar cʼarintitu. Jupajj alajjpach qhitjam uñstasaw situ: Aca jakenacar wastat iyawsayam; takpachaniw jupanacajj jan uñtʼat Dios toker saranucupjje. Jupasti saraquituwa: Janiw Diosajj utjquiti. Jupaw take cun sañajjatac yaticharaquitu. Nayajj jupan arunacap yatichta; ucanacan janchi amuyur cusisiyañap laycuw uca arunac yaticharacta. Nayasti waljanir iyawsayañajjcamaw yatichta, chekäcaspas uqhäm iyawsatajjcamaraqui. Ucat nayajj cunatejj chekäqui ucataquejj chʼurqhista, aca jachʼa ñankhachäw nayar puriyasitajjcama.

54. Ucat uca arunac kellkcän ucqhajja, jupajj Alman uca ñankhachäw jupat apakañapatac Diosat mayiñapataquiw achictʼäna.

55. Ucampis Almajj juparojj sänwa: Aca ñankhachäwitejj jumat apakatäspajja, jumajj wastat aca jakenacan chuymanacap irpakasma. Uqhämasti Tatitun munañaparjamaw jumampejj luratäni.

56. Ucat ñankhachäwejj janiw Korihorat apakatäcänti. Jupajj utat ut mankʼa mayjasisaw sarnakäna.

57. Jichhajja, cunatejj Korihorar camachcän ucat yatïwejj ucapachatpach takpach uca oraker yatiyatänwa. Jilïr taripirejj uca yatiynokäw takpach jakenacar apayasaw, Korihoran arunacapar iyawsapcän uca jakenacan juchat lak cutiquipstañapataquiw yatiyäna, uca pachpa taripäwin jupanacjjar jan puriñapataqui.

58. Ucat takeniw Korihoran ñankhätapar iyawsayatäpjjäna; ucat wastat takeniw Tatitur cutiquipstapjjaraquïna. Ucaw Korihoran ñankhätaparjam ñankha luräwinacap tucuyi. Korihorasti utat utaruw mankʼa mayjasis jacañapatac saräna.

59. Ucat Nefi jakenacat jithektata Zoram sat mä jaken irpataw Zoram jakenac sat jakenac taypin sarcasaw juparojj nuctʼasin tincuyapjjäna, ucat jaken taquisitaw jiwäna.

60. Uqhämat Tatitun luräwinacapar ñankhar tucuyirin tucusitapjj uñjtan. Uñjaractanwa supayan khep khepa urun wawanacapar jan kemjjäsiñapa, jupanacarojj lakaw mankhapacharojj katatini.