1. Ucat nayajj Ammoron pʼekechirit mä kellkat catokta. Ucajj aqhäm sänwa: Jumanacatejj nuwasïwin catuntat jakenacar catuyjjapjjetätajja, nayajj Antipara marc jumanacar catuyjjapjjäma.

2. Ucampis nayajj pʼekechirir aqhäm sasaw kellkat apayta: Nanacan nuwasiri tamajjan Antipara marcar nuwasiñamp catuñatac chʼamanïtajj yatipjjta. Nanacatejj uca marcatac catuntatanac churapjjerismajja, janiw walïcaspati, catuntat jakenacjja, yakha catuntat jakenac laycuquiw catuyapjjerisma –sasa.

3. Ucat Ammoronajj kellkatajjar jan yäkañ muncänti; janiw catuntatanac turcañ muncänti. Ucat nanacajj Antipara marca contra sarañataquiw waquichasipjjta.

4. Ucampis Antiparanquir jakenacajja, uca marcarojj jaytanucusaw mistjjapjjäna, ucat yakha marcanacaruw chʼamañchir sarapjjäna. Uqhämat Antipara marcajj amparanacajjar purïna.

5. Uqhämaw taripirinacan sarayäwipan pä tunc quimsakallkon marajj tucusïna.

6. Ucat pä tunc llätuncan maran kalltäwipana, nanacajj juyranac nuwasiri tamajjatac catokapjjta, Zarahemla orakempita, ucsa toke orakenacampita. Uqhämaraquiw sojjta warank jakejj chʼamañchañatac puriniraquïna. Uqhämaraqui Ammon jakenacan yokanacapat sojjta tuncanejja, jiscʼa pä warank tama jilanacapar mayachasiñataquiw purinipjjaraqui. Ucat nanacajj chʼamanïpjjäyätwa, jïsa, walja juyranacaw nanacatac apanitaraquïna.

7. Ucat nanacajj Cumeni marc arjjatir uscut nuwasiri tamatomp nuwasiñ munapjjäyäta.

8. Jichhajja, nayajj uñachayämawa, cunjämtejj munañajj phokhapcta uca. Nanacan chʼaman nuwasiri tamajjampi jan ucajja, nuwasiri tamajjat mä kawkhampiquiw Cumeni sat marcarojj arumjar muyuntapjjäyäta, jupanacajj janïr juyranac catokapjjañapäcan ucapachajja.

9. Ucat nanacajj marcar muyuntataw walja arumanacajj kamnokapjjta. Ucampis nanacajj espadanacajj-jjaruw iquipjjäyäta, arjjatirinac uchapjjaraquïyäta, Laman jakenacan nanacar arum jutasin jan jiwayañanacapataqui. Walja cutiw uqhäm chʼamtʼapjjäna, ucampis kawkha cutitejj uc lurañatac chʼamtʼapcän ucqhaw wilapajj wartasïna.

10. Ucat jucʼa pacharuw juyranacapajj purïna. Jupanacajj arumjaruw marcar mantañampïpjjäna, ucampis nanacajj Laman jakenacäñ lanti Nefi jakenacäpjjäyätwa. Ucat jupanacamp juyranacapamp catuntapjjta.

11. Ucat Laman jakenacajj utjayäwipat uqhäm apakatäsinsa, jupanacajj marcar arjjatañataquejj thurtʼasisipcaquïnwa. Ucat uca juyranac Judear apayañampi catuntat jakenacampir Zarahemla oraker apayañampejj waquisïna.

12. Ucat jucʼa urunacjjarojja, Laman jakenacajj take yanap catokañ suyäw chhaktayañ kalltapjjäna; ucat marcjj nanacan amparanacajjar catuyapjjetu. Ucat Cumeni marc catuñ munañanacajjar phokhapjjäyäta.

13. Catuntat jakenacajjajja, walpachanïnwa. Nanacajj waljanïpchïyätsa, take chʼamamp jupanacar uñjapjjañajjaw wactʼapjjetu, jacañataquisa jiwañataquisa.

14. Jupanacajj waljan waljaniw saytʼasipjjäna, kalanacamp lawanacamp cunatejj amparapar purcäns ucanacampiw nuwasipjjäna. Ucat uca nuwasipjjatap laycusti jupanacan nuwasïw catuntatjam catuyasitap khepatjja, nanacajj pä warank jil jupanacar jiwarayapjjta.

15. Ucat nanacan jupanacar jiwayañajj waquisïna, jan ucajj espadanacajj catusin Zarahemla oraker irpañajj waquisiraquïna. Uqhämaraqui juyranacajj nanacataquiquiw utjäna, Laman jakenacat apakapcta uca juyranacanïcasasa.

16. Ucat uqhäm llaquisiñan jicjjatasisa, uca nuwasïwin catuntatanacampejj janiw cunas lurañjamäcänti. Ucat Zarahemla oraker ucanac qhitañ amtapjjäyäta. Ucat jakenacajjat mä kawkhanir ajllisaw jupanacar uca catuntatanacajjatac lurañap wactʼäw churapjjäyäta, Zarahemla oraker sarañapataqui.

17. Ucampis khepürojj jupanacajj cut-tanipjjänwa. Ucat nanacajj janiw uca catuntatanacat jupanacar jisctʼapcäyät-ti, cunalaycutejj Laman jakenacajj niyaw nanacjjar jaljjatapjjetütu; uca jakenacajj Laman jakenacan amparanacapat nanacar khespiyañataquiw ucspach cut-tanipjjatayna. Cunalaycutejj Ammoronajj jupanacarojja, juyranacamp wali chʼaman nuwasiri tamatomp apayatayna.

18. Ucat Laman jakenacajj nanacar atipjañampïsipcän ucqhaw uca catuntatanacamp qhitat jakenacampejj purinipjjäna, ucat thurtʼasipjjäyäta.

19. Ucampis nayan pä warank sojjta tuncan jucʼa tamajjajj ajjsarcañ chʼamampiw nuwasipjjäna. Jupanacajj Laman jakenac nayrakatan walpun saytʼasipjjäna, cawquïrinacatejj jupanacamp nuwasipcän ucanacarusti jiwayapjjänwa.

20. Ucat jiltʼa nuwasiri tamajjajj khepar cut-tañampïsipcän ucqhaw, uca pä warank sojjta tuncanejj wal saytʼasipjjäna, chʼam catjjatapjjaraquïna.

21. Jïsa, jupanacajj jaysasipjjänwa, take cuntejj satäcan ucarjamaw sum phokhapjjaraquïna; jupanacataquisti iyawsataparjamaw lurasïna. Nayasti mamanacajjajj ucanac yatichapjjet –sas sapquit uca arunacat amtasïyäta.

22. Jichhajja, uca yokanacajjamp catuntatanac apir ajllit jakenacamp laycuw uqhäm wal atipapjjäyäta. Jupanacaw Laman jakenacar atipapjjäna, ucat Manti marcar alis-sutäpjjäna.

23. Nanacasti Cumeni marcjj catusipcactwa, espadamp takpach tucqhañat khespipjjta. Ucampis walja jakenac aptʼapjjta.

24. Ucat Laman jakenacan jaltatap khepatsti, ucspachaw nayajj chhojjriñchat jakenacajjar jiwatanac taypit apsuñatac arsta, chhojjrinacap kolljjatañataqui.

25. Ucat pä warank sojjta tuncanijjatjja, pä patacaniw wil tucstayasisajj chʼam thayjtayasipjjäna. Ucampis Diosan sumätaparjama nanacan musphañajjcama, takpak nuwasiri tamatojjan timanacapan musphañapcamaraqui, janiw maynis jupanacat jiwquiti. Sapakat mayniw jupanacat walja chhojjrinacamp chhojjriñchataraquïna.

26. Jupanacar imäwejj takpach nuwasiri tamajjatac muspharcañänwa. Jïsa, jupanacajj jacasipcaquïn ucqhajja, warank jilanacajjaw jiwarayatäna. Jupanacajj iyawsañ yatichatäpcän ucar jachʼa iyawsatap laycuw Diosan muspharcañ chʼamapamp imatäpjjäna. Ucajj chekpachaw sapjjt nanacajja. Asqui Diosan utjataparu, take qhititejj jan pächascaspa ucajja, Diosan muspharcañ chʼamapamp imatäspawa.

27. Ucajj jupanacat parlcta ucanacan iyawsäwipänwa. Jupanacajj waynäpjjewa, amuyunacapasti thurtʼatawa, Diosaruw sapa cut alcatapjjaraqui.

28. Ucat chhojjriñchat jakenacajjar uñjatajjata, nanacan jiwatanacajjs Laman jakenacan walja jiwatanacaps imantatajjatjja, Gidaruw jisctʼapjjta, Zarahemla oraker irpañapäcän uca catuntatanacata.

29. Uca Gidajj uca oraker jupanacar irpañatac jakenacjjar ut-tʼayat jilïr capitanänwa.

30. Acanacaw Gidan nayar arsut arunacapajja: Nanacajj catuntatanacajjampiw Zarahemla oraker sarañ kalltapjjta. Ucat Laman jakenacar uñchʼuquir qhitat ejercitonacasan uñakerinacapampiw jiquisipjjta.

31. Jupanacasti sapjjetuwa: Laman jakenacan nuwasiri tamanacapajj Cumeni marca tokeruw sarapjje. Jupanacjjar jaljjatasaw marcasarojj tucqhapjjani.

32. Ucat catuntatanacajjajj artʼäwinacap istʼasaw, kamas catupjjäna. Ucat nanacar kallcatapjjetu.

33. Ucat kallcatäwip laycuw espadanacajjampejj jupanac contrajj saytʼasipjjta. Ucat mä kotpachaw espadanacajj-jjar jalcatapjjetu. Jilpachaw jupanacat jiwayatäpjjaraquïna, jiltʼirinacasti thac jistʼarasisaw, nanacat jaltapjje.

34. Ucat jupanacajj jaltapcän ucqhajja, jan jicjjatcayaw nanacatac jaltapjje, ucat lakaw Cumeni marcar jutapjjta. Ucat jilanacajjar marc arjjatañan yanapañajjatac puripjjta.

35. Ucat wastat timanacasan amparanacapat khespiyatätan. Diosan sutipajj qhuyapayatawa, cunalaycutejj jupaw jiwasar khespiyquist ucajja; jupaw aca jachʼa cun jiwasatac lurqui ucajja.

36. Ucat naya Helamanajj Gidan uca arunacap istʼasajja, Diosan takpachan jan jiwañanacajjatac imatapat wali cusisiñan phoktʼatäyätwa. Nayasti iyawsaractwa, jiwarayatanacan Diosapan samaräwipar mantatapa.