1. Wawajjay, arunacajjar istʼam; nayajj juräwi lurarapsma, aqhäm sasa: Diosan camächitanacapar phokhañamarjamaw aca oraken jachʼaptätajja.

2. Awquinacasan mitʼanïtapat nayjam amtasiñam nayajj munta. Jupanacajj mitʼanïpjjänwa, janiraquiw Abrahanans Isaacans Jacobons Diosapat yakhajj jupanacar antutaycasapänti. Jupasti chekpach tʼakhesïwinacapan jupanacar antutayi.

3. Jichhajj Helaman wawajja, jumajj nï wayna wactʼanctawa; ucat arunacajjar istʼañamatac nayat yatekañamataquiw achictʼsma. Cawquïritejj Diosar alcatcan ucajja, yantʼäwinacapana, pʼeke usunacapana, tʼakhesïwinacapan yanapatäniwa, ucatsti khep khepa urun aytatäñap nayajj yat-ta.

4. Janiraquiw naya pachpat yatquirists uqhäm amuyasiñam muncti; jan janchita, jan ucasti, ajayuta, jan janchjam amuyata, jan ucasti Diosata.

5. Jichhajj nayajj sismawa: Janitejj Diosat nasquiriscayätjja, janiw ucanac yatquiriscäyät-ti; ucampis Diosajj jan nayan wactʼäwijjarjamaw kollan qhitapan lacapat ucanac yatiyitu.

6. Nayajj Mosian yokanacapampiw Diosan iglesiapar tucqhañatac sarnakäyäta. Ucampis Diosajj kollan qhitaparuw thaquinjam jarcʼaker qhitanipjjetu.

7. Jupasti khejjokhejjöcaspas uqhäm arumpiw parlapjjetu; orakesti nanacan cayunacajj mankhan qhathat-tayataraquïnwa. Tatitut ajjsarañan nanacar puritap laycuw oraker liwitat-tapjjta.

8. Ucat arojj nayar situ: Saytʼam; nayasti sarthapisaw saytʼäyäta. Ucat qhitar uñjta.

9. Jupajj saraquituwa: Juma pachpas tucqhatäñ muncstasa, Diosan iyawsiri tamapar jan jucʼamp tucqhañatac chʼamtʼcamti.

10. Ucat nayajj oraker liwitat-täyäta; quimsa urump quimsa arumampiw lacajj jan jistʼarcäyät-ti. Janiraquiw amparajjampis cayunacajjampis cuns lurirjamäcäyät-ti.

11. Ucat qhitajj yakhanac nayar parlitu; ucanacsti jilanacajjajj istʼapjjänwa, ucampis nayajj janiw ucanac istʼcäyät-ti. Cunalaycutejj arunacap istʼasajja: Juma quicpas tʼunjatäñ munstajja, jan jucʼamp Diosan iyawsiri tamap tʼunjañatac chʼamachasimti –sir istʼcäyät ucqhajja, nayajj tucqhatäñajjat wal ajjsarasaw muspharasin oraker liwitat-täyäta; janiraquiw jucʼamp istʼcaraquïyät-ti.

12. Wiñay tʼakhesïwimpiw tʼakhesiyatäyätjja, almajjajj juchanacajjamp llaquisitäsin tʼakhesiyatäna.

13. Nayajj takpach juchanacajjat ñankha luräwinacajjat amtasïyäta, ucat mankhapachan usunacamp tʼakhesiyatäyätwa. Nayajj Diosajjar cutcatatajja, jupan kollan camächitanacapar jan phokhatajj uñjäyäta.

14. Nayajj walja wawanacaparuw jiwayäyäta, jan ucajja, tucqhäwiruw jupanacar apayäyäta. Chekpachan jachʼa ñankha luräwinacajj laycuw Dios nayrakatar sarañ lupʼïwejj ajayujjar jan khanañchcay ajjsarañamp tʼakhesiyäna.

15. Lupʼïyätwa, ay, nayatejj alisnucutïrista janchis ajayus tucqhata, Diosan nayrakatapar luräwinacajjarjam taripatäñatac jan irpantatäñajjataqui.

16. Quimsa urump quimsa arumampiw nayajj tʼakhesïyäta, jïsa, juchañchat alman usunacapampiw tʼakhesïyäta.

17. Ucat nayajj walja juchanacajjat amtasisa, llaquisis tʼakhesïwimp tʼakhesiyatäyät ucqhajja, awquijjan jakenacar mä Jesucristo sat Diosan Yokapan jutäwipat yatiyatapat amtasiraquïyäta; jupasti orakenquirinacan juchanacapan tʼakhesiyäwipar phokhañataquiw jutani.

18. Ucat amuyojj uca lupʼïw catupan nayajj chuymajjan artʼäyäta: Jesusay Diosan Yokapa, naya cʼallcʼu mulljam cʼallcʼunc-casa, jan tucusir jiwañan cadenanacapamp muyuntatäct ucqhar qhuyapayita.

19. Ucat nayajj uc lupʼcäyät ucqhajja, janiw aykoñanacajjat jucʼamp amtasirjamäcjjayät-ti. Janiw juchanacajjat amtasiñajj nayar jucʼamp llaquisiyquitänti.

20. Ucat jachʼa muspharcañ cusisiñ khans uñjayäta; jïsa almajjajj tʼakhesiñ quipca tupücaspas uqhäm jachʼa cusisiñan phoktʼatänwa.

21. Nayajj sismaw wawajja: Janiw cunas aykoñanacajj-jjam cʼallcʼücaspati, jachʼäcaraquispasa. Uqhämaraquiw wawajj sisma: Janiraquiw cusisiñajj-jam cunas mojjsäcaspati, jachʼäcaraquispasa.

22. Jïsa, nayajj Lehi awquisjam Diosar jilïr konuñapjjar konuri uñjquirists uqhäm amuyasïyäta. Diosasti muytataraquïnwa jan jactʼcaya Diosar kʼochuri jachʼar aptir qhitanacampi. Almajjasti ucancañ wal munaraquïna.

23. Ucat amparanacajjamp cayunacajjampejj chʼamap catokapjjäna. Nayasti saytʼasaw jakenacarojj Diosat nacitajjat yatiyaraquïyäta.

24. Ucapachat jichhacamajj nayajj jan tucusaw jakenacan juchanacapat cutiquipstañar irpañajjatac lurta, nayajj malltʼcta, uca jachʼa cusisiñ malltʼañar jupanacar irpañajjataqui, Diosat nacisa, Kollan Ajayun phoktʼatäñanacapataqui.

25. Jichhajj amuyam wawajja, Tatitojj luräwinacajjan achupat jachʼa cusisiñ churitu.

26. Nayar churat arup laycojja, waljaniw Diosat nacisa, nayjam malltʼasa, nayjam nayrat nayrar uñjapjje. Ucat jupanacajj nayajj arscta ucanacat nayjam yatipjje; nayan yatïwijjasti Diosat juti.

27. Nayajj take casta yantʼäwita, pʼeke usuta, take cunayman tʼakhesïwit kemitätwa. Diosajj carcelats phalanacats jiwañats antutayituwa. Nayajj juparuw alcat-ta, ucat antutayascaquitaniwa.

28. Khep khepa urun jupamp khapak cancañan utjasiñajjatac jupan nayar aytañap yatiracta. Nayajj wiñayaw jupar yupaychä, cunalaycutejj lakʼa achilanacasarojj egiptot irpsüna, egiptonquirinacar Wila lamaran chhaktayaraquïna. Arsut oraker jupan chʼamapampiw jupanacar irpäna. Jupasti mitʼanïtat catuntatat sapa cutiraquiw jupanacar antutayaraquïna.

29. Uqhämaraqui lakʼa achilanacasarojj Jerusalen oraket irpsuraquïna. Jupasti wiñay chʼamapampiw jupanacar mitʼanïtatjj sapa cuti jichhürcam antutayaraqui. Nayasti catuntatapat amtasipuntwa. Jumasti nayjam catuntatapat amtasiñamaraquiwa.

30. Ucampis wawajjay, ucajj janiw takpachäquiti. Diosan camächitanacapar phokhañamarjam aca oraken jachʼaptañam jumajj nayjam yatiñamaraquiwa. Uqhämaraqui Diosan camächitanacapar jan phokhañamarjam jupa nayrakatat jarcʼakatäñam yatiñamaraquiwa. Ucasti jupan aruparjamawa.