Ka Buke A Iaroma

1. Ano hoi, ke kakau nei au, o Iaroma, i mau olelo kakaikahi, e like me ke kauoha a koʻu makuakane o Enosa, i malama ia ai ko makou kuauhau.

2. A he uuku no keia mau papa, a ua kakau ia keia mau mea mamuli o ka manao, he mau mea ia e pomaikai ai ko makou poe hoahanau, ko Lamana poe, nolaila, he mea e pono ai naʻu ke kakau uuku; aka aole au e kakau i na mea o kaʻu wanana ana, aole hoi o koʻu mau hoikeana. No ka mea, heaha la ka mea nui aku i hiki iaʻu ke kakau mamua o na mea a koʻu mau kupuna i kakau ai? No ka mea, aole anei lakou i hoike mai i ke kumu manao o ke ola? Ke i aku nei au ia oukou, Ae; a ua lawa keia noʻu.

3. Aia hoi, he mea e pono ai ke hana ia na mea he nui iwaena o keia lahuikanaka, no ka paakiki o ko lakou mau naau, a me ke kuli o ko lakou mau pepeiao, a me ka makapo o ko lakou mau naau, a me ke oolea o ko lakou mau ai; aka hoi, ua lokomaikai nui mai ke Akua ia lakou, a, aole oia i kahili aku ia lakou a hiki i keia wa, mai ka ili aku o ka aina.

4. A he nui wale na mea iwaena o makou i loaa ai na hoikeana he nui; no ka mea, aole lakou a pau he poe ai oolea. A o ka poe a pau i ai oolea ole, a i loaa ka manaoio, he kohu ko lakou me ka Uhane Hemolele, ka mea e hoike mai ana i na keiki a kanaka e like me ko lakou manaoio.

5. Ano hoi, ua hala ae la na makahiki elua haneri, a ua mahuahua ikaika ae la ko Nepai poe ma ka aina. Ua malama aku la lakou i ke kanawai o Mose, a me ka la Sabati hoano i ka Haku. Aole lakou i hoohiki ino; aole no hoi i kuamuamu. A ua ikaika loa na kanawai o ka aina.

6. A ua hookauliilii ia lakou maluna o ka ili he nui o ka aina; a me ko Lamana poe hoi. A ua oi aku ka lehulehu o lakou mamua o ka poe o ko Nepai; a o ka lakou puni ka pepehi kanaka, a inu hoi i ke koko o na holoholona.

7. Eia kekahi, hele mai la lakou i na manawa he nui e ku e mai ia makou, i ko Nepai poe, ma ke kaua. Aka he poe kanaka ikaika ko makou mau alii a me ko makou mau alihi kaua ma ka manaoio i ka Haku; a ao mai la lakou i na kanaka i na aoao o ka Haku; nolaila, ua ku e makou i ko Lamana poe, a kahili aku la ia lakou mailoko aku o ko makou aina, a hoomaka ae la makou e paku aku i ko makou mau kulanakauhale, a me kela wahi keia wahi o ko makou hooilina.

8. A mahuahua nui loa iho la makou, a laha aku la ma ka ili o ka aina, a lilo iho la i poe waiwai loa ma ke gula, a ma ke kala, a ma na mea maikai, a ma ka hana nani o ka laau, i na hale, a i na mikini, a i ka hao no hoi, a me ke keleawe ulaula, a me ke keleawe, a me ke kila, e hana i na mea paahana o kela ano keia ano e mahi i ka aina, a me na mea kaua; he oiaio, i ka pua maka winiwini, a me ka aa pua, a me ka ihe liilii, a me ka ihe, a me na mea lako a pau no ke kaua;

9. A pela i hoomakaukau ia ai e kaua aku me ko Lamana poe, aole o lakou lanakila mai maluna o makou. Aka, ua hooiaio ia ka olelo a ka Haku ana i olelo mai ai i ko makou poe kupuna, i ka i ana, Ina e malama pono oukou i kaʻu mau kauoha, e hoopomaikai ia oukou ma ka aina.

10. Eia kekahi, hooweliweli iho la na kaula a ka Haku i ka poe kanaka o Nepai, e like me ka olelo a ke Akua, Ina aole lakou e malama i kana mau kauoha, aka e haule iloko o ka hewa, e luku ia aku lakou mai ka ili aku o ka aina;

11. Nolaila, ua hana ikaika na kaula, a me na kahuna, a me na kumu, e hooikaika ana me ke ahonui, i na kanaka e molowa ole; e ao ana i ke kanawai o Mose, a me ke kumu o ka haawi ia ana o ia mea; e kono ana ia lakou e nana imua i ka Mesia, a e manaoio ia ia e hiki mai ana, me he mea la ua hiki mai oia. A mamuli o keia ano, ao aku la lakou ia lakou la.

12. Eia kekahi, ma ka hana ana pela, ua hoopakeke lakou ia lakou la i luku ole ia ai lakou la mai ka ili aku o ka aina; no ka mea, ua o aku la lakou i ko lakou la mau naau me ka olelo, e hoeueu mau ana ia lakou la i ka mihi.

13. Eia kekahi, ua hala aku la elua haneri kanakolukumamawalu makahiki, mamuli o ke ano o na kaua a me na paio, a me na ku e, no ka hapa nui o ka manawa.

14. A, aole au, o Iaroma, e kakau hou aku, no ka mea, ua uuku na papa. Aka hoi, e oʻu poe hoahanau, ua hiki ia oukou ke nana i na papa e ae o Nepai; no ka mea, aia hoi, maluna o lakou ua kahakaha ia ka mooolelo o ko makou mau kaua, e like me na palapala ana o na alii, oia hoi na palapala a lakou i kauoha aku ai e palapala ia ai.

15. A ke haawi aku nei au i keia mau papa iloko o na lima o kaʻu keiki o Omanai, i malama ia ai lakou e like me na kauoha a koʻu mau kupuna.