Ka Buke A Omanai

1. Aia hoi, ua kauoha ia mai au, o Omanai, e koʻu makuakane o Iaroma, e kakau iho i kekahi mau mea maluna o keia mau papa, i mea e malama ai i ko makou kuauhau;

2. Nolaila ma koʻu mau la, ua makemake au e ike oukou ua kaua nui aku au me ka pahikaua, no ka hoopakele ana i koʻu poe kanaka, i ko Nepai poe, i haule ole ai iloko o na lima o ko lakou poe enemi, oia ko Lamana poe. Aka hoi, owau la, he kanaka hewa au, a ua malama ole au i na kanawai a me na kauoha a ka Haku, me ka mea oʻu e pono ai.

3. Eia kekahi, ua hala aku la na makahiki elua haneri kanahikukumamaono, a ua loaa ia makou na kau maluhia he nui loa; a he nui wale na kau o na kaua kaumaha a me ka me ka hookahe koko. He oiaio hoi, ua hala aku la elua haneri kanawalu a me na makahiki keu elua, a ua malama au i keia mau papa e like me na kauoha a koʻu mau kupuna; a haawi aku la au ia mau mea i kaʻu keiki ia Amarona. A ke hooki nei au.

4. Ano, ke kakau iho nei au, o Amarona, i na mea aʻu e kakau ai, he kakaikahi nae ia mau mea, iloko o ka buke a koʻu makuakane.

5. Eia hoi kekahi, ua hala aku la ekolu haneri makahiki a me iwakalua, a ua luku ia ka poe hewa loa o ko Nepai poe;

6. No ka mea, aole ka Haku e ae aku, mahope iho o kona alakai ana ia lakou mailoko mai o ka aina o Ierusalema, a malama ana a hoopakele ana ia lakou i haule ole ai lakou iloko o na lima o ko lakou poe enemi; he oiaio, aole oia e ae aku i hooiaio ole ia ai na olelo, ana i olelo mai ai i ko makou poe kupuna, i ka i ana, Ina aole oukou e malama pono i kaʻu mau kauoha, aole e hoopomaikai ia aku oukou ma ka aina.

7. Nolaila, ua hele mai ka Haku io lakou la me ka hoopai nui; aka hoi, ua hookoe mai oia i ka poe pono, i make ole lakou, aka ua hoopakele mai oia ia lakou mailoko mai o na lima o ko lakou poe enemi.

8. Eia kekahi, ua haawi aku la au i na papa i koʻu kaikaina ia Kemisa.

9. Ano, ke kakau nei au, o Kemisa, i na mea kakaikahi aʻu e kakau ai, iloko o ka buke hookahi me koʻu kaikuaana; no ka mea, ua ike au i ka mea hope ana i kakau ai, nana ia i kakau me kona lima ponoi; a ua kakau ia e ia ma ka la ana i haawi mai ai ia mau mea iaʻu. A mamuli o keia ano ke malama nei makou i ko makou mau mooolelo, no ka mea, ua like ia me na kauoha a ko makou poe kupuna. A ke hooki nei au.

10. Aia hoi, he keiki no au, o Abinadoma, na Kemisa. Aia hoi, ua ike au i ke kaua a me ka paio he nui mawaena o koʻu poe kanaka, ko Nepai poe, a me ko Lamana poe; a ua lawe aku la au, me kaʻu pahikaua iho, i na ola o na mea he nui o ko Lamana poe, i ka hoomalu ana i koʻu poe hoahanau.

11. Aia hoi, ua kahakaha ia ka mooolelo o keia poe kanaka maluna o na papa aia no i na alii, e like me na hanauna; aole au i ike i kekahi hoikeana i kakau ole ia, aole hoi i kekahi wanana; nolaila, ua lawa na mea i kakau ia. Ke hooki nei au.

12. Aia hoi, he keiki no au, o Amaleki, na Abinadoma. Aia hoi, e olelo aku no au i kekahi mau mea ia oukou no Mosia, ka mea i hoolilo ia i alii maluna o ka aina o Zarahemela; no ka mea, aia hoi, ua ao ia oia e ka Haku e mahuka aku mailoko aku o ka aina o Nepai, a o ka poe i hoolohe aku i ka leo o ka Haku, e hele pu lakou me ia, iloko o ka waonahele.

13. Eia kekahi, hana iho la oia e like me ke kauoha a ka Haku ia ia. A hele aku la lakou mawaho o ka aina iloko o ka waonahele, o ka poe i hoolohe aku i ka leo o ka Haku; a ua alakai ia lakou ma na hai olelo a me na wanana. A ua ao mau ia lakou ma ka olelo a ke Akua; a ua alakai ia lakou ma ka mana o kona lima, mawaena o ka waonahele, a hiki aku lakou i ka aina i kapa ia o ka aina o Zarahemela.

14. A loaa iho la ia lakou kekahi lahuikanaka, i kapa ia o ka poe kanaka a Zarahemela. Ano, ua nui ka hauoli ana iwaena o ka poe kanaka o Zarahemela; a o Zarahemela hoi kekahi i hauoli nui loa, no ka mea, ua hoouna mai la ka Haku i ko Mosia poe me na papa keleawe, aia iloko o lakou ka mooolelo o ka poe Iudaio.

15. Aia hoi, ike aku la o Mosia ua puka mai la ko Zarahemela poe, mailoko mai o Ierusalema, i ka wa i lawe pio ia aku ai o Zedekia, ke Alii o Iuda, i Babulona.

16. A ua hele ae la lakou ma ka waonahele, a ua lawe ia mai la ma ka lima o ka Haku, maluna mai o na kai nui, i ka aina kahi i loaa ai lakou ia Mosia; a ua noho iho la lakou ilaila ia manawa mai.

17. A i ka manawa i loaa ai lakou ia Mosia, ua lilo lakou i lehulehu loa. Aka hoi, ua loaa ia lakou na kaua a me na paio kaumaha, a ua haule ma ka pahikaua ia manawa aku ia manawa aku; a ua ano e iho la ka lakou olelo; a, aole lakou i lawe pu mai i na mooolelo me lakou; a hoole aku la lakou i ke ola ana o ko lakou Mea nana i hana; aole i hiki ia Mosia, aole hoi i ko Mosia poe, ke hoomaopopo i ka lakou.

18. Aka, eia kekahi, kauoha aku la o Mosia e ao ia lakou ma kana olelo. A, mahope iho o ko lakou ao ia ana ma ka olelo a Mosia, haawi mai la o Zarahemela i kuauhau o kona poe kupuna, e like me ka mea paa naau ia ia; a ua kakau ia ia mau mea, aole nae maluna o keia mau papa.

19. Eia kekahi, hui pu iho la ka poe kanaka o Zarahemela, a me ko Mosia; a ua wae ia aku o Mosia i alii no lakou.

20. Eia kekahi, ma na la o Mosia, ua lawe ia mai kekahi pohaku nui io na la, me na kaha maluna ona; a hoike mai la oia i ke ano o na kaha, ma ka haawina a me ka mana o ke Akua.

21. A hoike mai la ia mau mea i ka mooolelo o kekahi mea i kapa ia o Korianatuma, a me kona poe kanaka i pepehi ia. A ua loaa o Korianatuma i ka poe kanaka o Zarahemela; a noho pu iho la oia me lakou, i eiwa mau mahina.

22. A ua olelo mai la ia he mau olelo kakaikahi no kona poe kupuna. A o kona poe kupuna mua ua hele mai la lakou mai ka hale pakui mai, i ka manawa a ka Haku i hookahuli ai i ka olelo a na kanaka; a haule mai la ka inaina o ka Haku maluna o lakou, e like me kona hoopai ana, a ua pono ia; a ke waiho mokaki la ko lakou mau iwi ma ka aina akau.

23. Aia hoi, ua hanau ia mai la au, o Amaleki, ma na la o Mosia; a ua ola au a ike i kona make ana; a o Beniamina, o kana keiki, ka i noho alii ma kona hakahaka.

24. Aia hoi, ua ike au ma na la o Beniamina ke alii, i kekahi kaua kaumaha, a me ka hookahe koko nui ana, mawaena o ko Nepai poe a me ko Lamana poe. Aka hoi, ua loaa ka lanakila i ko Nepai poe maluna o lakou; he oiaio, a no ia lanakila i kipaku aku ai ke alii o Beniamina ia lakou iwaho o ka aina o Zarahemela.

25. Eia kekahi, hiki mai la ka wa elemakule oʻu; a aole aʻu keiki, a ua ike au he kanaka pono o Beniamina ke alii imua o ka Haku, nolaila, e haawi aku no au i keia mau papa ia ia, e kauleo ana i na kanaka a pau e hele mai i ke Akua la, i ka Mea Hemolele o ka Iseraela, a e manaoio i ka wanana ana, a i na hoikeana, a i ka lawelawe ana o na anela, a i ka haawina o ka olelo ana ma na olelo e, a i ka haawina o ka hoomaopopo ana i ke ano o na olelo, a i na mea a pau i pono; no ka mea, aole kekahi mea pono, ke ole ia mai ka Haku mai; a o ka mea i hewa, mai ke diabolo mai no ia.

26. Ano, e koʻu poe hoahanau i aloha ia, ke makemake nei au e hele mai oukou io Kristo la, oia no ka Mea Hemolele o ka Iseraela, a e loaa ai kona ola, a me ka mana o kona hoolapanai ana. He oiaio, e hele mai io na la, a e haawi aku i ko oukou uhane a pau me he alana la ia ia, a e hoomau ma ka hooke ai ana a me ka pule ana, a e hoomau a hiki i ka hopena; a ma ke ola o ka Haku, e hoola ia oukou.

27. Ano, ke makemake nei au e olelo aku i kekahi mau mea no kekahi poe i pii aku i ka waonahele, e hoi aku ai i ka aina o Nepai; no ka mea, ua nui no ka poe i makemake e loaa ko lakou aina hooilina;

28. Nolaila, pii aku la lakou i ka waonahele. A o ko lakou luna he kanaka ikaika a mana ia, a he kanaka ai oolea, nolaila, nana i hookomo i ka paio mawaena o lakou; a ua pepehi ia lakou a pau, ma ka waonahele, koe wale no he kanalima, a hoi hou mai la lakou i ka aina o Zarahemela.

29. Eia kekahi, kai aku la hoi lakou i kekahi poe e ae, he nui loa, a hele hou aku la i ka waonahele.

30. A he hoahanau koʻu, ko Amaleki, i hele pu hoi me lakou; aole au i lohe hou no lakou mahope mai. A kokoke au e moe ilalo ma koʻu lua kupapau; a ua piha keia mau papa. A ke hooki nei au i kaʻu olelo ana.