Ka Buke A Enosa

1. Aia hoi, ua ike no au, o Enosa, i koʻu makuakane, he kanaka pono ia; no ka mea, ao mai la oia iaʻu ma kana olelo iho, a ma ka hoopono a me ka hoonaauao o ka Haku. A e hoomaikai mau ia ka inoa o koʻu Akua no ia mea.

2. A e hai aku no au ia oukou no ka hakoko ana oʻu imua o ke Akua, mamua o ka loaa ana iaʻu ke kala ia o koʻu mau hala.

3. Aia hoi, hele aku la au e alualu aku i na holoholona hihiu ma ka ululaau; a o na olelo aʻu i lohe pinepine ai i kuu makuakane e olelo ana no ke ola mau loa, a me ka hauoli o ka poe hoano, ua komo loa iloko o kuu naau.

4. A pololi ae la koʻu uhane; a kukuli iho la au ilalo imua o koʻu Mea nana i hana, a kahea aku la ia ia ma ka noi a me ka pule ikaika, no koʻu uhane iho; a pau loa ae la ka la koʻu hea ana ia ia; he oiaio, a hiki mai la ka po, e hookiekie mau ana au i koʻu leo iluna, i hiki ai ia i na lani.

5. A pae mai la kekahi leo iaʻu, i ka i ana, E Enosa, ua kala ia ae la kou mau hala nou, a e pomaikai auanei oe.

6. A, ua ike au, o Enosa, ua hiki ole i ke Akua ke wahahee; nolaila, ua kahili ia ae la koʻu mau hewa.

7. A i aku la au, E ka Haku, pehea la ia i hana ia ai?

8. A i mai la ia iaʻu, No kou manaoio ia Kristo, ka mea au i lohe ole e ai mamua, aole hoi i ike. A e hala ana na makahiki he nui loa mamua o kona hoike ana ia ia iho ma ke kino; nolaila, o hele aku, ua ola oe i kou manaoio.

9. Ano, eia kekahi, iaʻu i lohe ai i keia mau olelo, hoomaka ae la ka makemake iloko oʻu no ka pomaikai o koʻu poe hoahanau, o ko Nepai poe; nolaila, ninini aku la au i koʻu uhane a pau i ke Akua no lakou.

10. A oiai au e aumeume ana pela ma ka uhane, aia hoi, hiki hou mai la ka leo o ka Haku iloko o koʻu naau, i ka i ana, E hele no au i kou poe hoahanau, e like me ko lakou ikaika ma ka malama ana i kaʻu mau kauoha. Ua haawi aku au i keia aina ia lakou a he aina hoano ia; a e hoomainoino ole ana au ia ia, ke ole no ka hana hewa; nolaila, e hele aku au i kou poe hoahanau me aʻu i olelo aku ai; a e hoohaule au i ko lakou mau lawehala me ke kaumaha maluna o ko lakou mau poo iho.

11. A mahope iho o koʻu lohe ana i keia mau olelo, hoomaka ae la ka manaoio oʻu e onipaa i ka Haku; a pule aku la au ia ia me na aumeume loihi no koʻu poe hoahanau, no ko Lamana poe.

12. Eia kekahi, mahope iho o koʻu pule, a hana ana me ka ikaika a pau, i mai la ka Haku iaʻu, E ae aku au ia oe e like me kou makemake, no kou manaoio.

13. Ano hoi, eia no ka makemake aʻu i makemake aku ai ia ia: Ina paha, e haule aku koʻu poe kanaka, ko Nepai poe, iloko o ka hewa, a ma o kekahi mea la e anai ia ai, a e anai ole ia ko Lamana poe, na ka Haku ke Akua e malama i kekahi mooolelo o koʻu poe kanaka, o ko Nepai poe; ina paha ma o ka mana la o kona lima hemolele i hoopuka ia aku ai ia mea, ma kekahi la aku, i ko Lamana poe, i kai ia mai ai paha lakou i ke ola:

14. No ka mea, ua makehewa ko makou hooikaika ana i keia manawa, e hoihoi hou ia lakou i ka manaoio. A hoohiki ae la lakou ma ko lakou huhu, ina he mea hiki, e hoopau loa lakou i ko makou mau mooolelo i kakau ia, a me makou pu kekahi; a, i na mooolelo a pau no hoi o ko makou poe kupuna.

15. Nolaila, no koʻu ike ana ua hiki i ka Haku ke Akua ke malama i ko makou mau mooolelo, kahea mau aku la au ia ia; no ka mea, ua i mai la oia iaʻu, O ka mea au e noi mai ai ma ka manaoio, me ka paulele ana hoi e loaa ana ia oe ma ka inoa o Kristo, e loaa no ia ia oe.

16. A he manaoio koʻu, a kahea aku la au i ke Akua nana e malama i na mooolelo; a berita mai la oia iaʻu, nana e hoopuka aku ia mau mea i ko Lamana poe, i kona wa ku pono.

17. A ua ike au, o Enosa, e like auanei ia me ka berita ana i hana mai ai; nolaila, ua maha kuu uhane.

18. A i mai la ka Haku iaʻu, Ua noi mai kou mau makua a me na kupuna hoi iaʻu i keia mea; a e hana ia auanei ia mea ia lakou e like me ko lakou manaoio, no ka mea, ua like ko lakou manaoio me kou.

19. Eia kekahi, kaahele aku la au, o Enosa, iwaena o ka poe kanaka o Nepai, me ka wanana ana aku no na mea e hiki mai ana, a e hoike aku ana no na mea aʻu i lohe ai a i ike ai hoi.

20. A ke hoike aku nei au ua imi ikaika ka poe kanaka o Nepai e hoihoi hou mai i ko Lamana poe i ka manaoio oiaio i ke Akua. Aka, ua makehewa ka makou hana; ua paa ko lakou inaina, a ua alakai ia aku lakou e ko lakou ano ino, i lilo lakou i lahuikanaka hihiu, a hae, a puni koko; piha me ka hoomana kii, a me ka pelapela; e ai ana i na holoholona hihiu, e noho ana ma na halelewa, a e auwana ana a puni iloko o ka waonahele, me ke kaei ili pokole a puni i ko lakou mau puhaka, a ua kole ia ko lakou mau poo; a o ko lakou akamai aia no ma ke kakaka, a ma ka pahikaua pokole, a me ke koi lipi. A he nui loa na mea o lakou i ai i ka io maka wale no; a e imi mau ana lakou e pepehi mai ia makou.

21. Eia kekahi, mahi aku la ka poe kanaka o Nepai i ka aina, a loaa mai la kela ano keia ano o na hua liilii, a o na hua laau, a me na pua o na mea wawae eha, a me na pua o na holoholona a pau, o kela ano keia ano, a o na kao, a o na kao hihiu, a me na lio he nui loa.

22. A ua lehulehu na kaula mawaena o makou. A o na kanaka he poe ai oolea lakou, he paakiki ma ka hoomaopopo ana.

23. Aole o kekahi mea, o ka paipai ikaika wale no, e hai olelo ana a e wanana ana no na kaua, a me na paio, a me na poino, a e olelo mau ana ia lakou no ka make, a me ka mau loa ana o kela ao aku, a me na hoopai a me ka mana o ke Akua; a o keia mau mea a pau e hoeueu ana ia lakou, i noho ai lakou me ka makau i ka Haku. Ke i aku nei au, aohe kekahi mea ke ole keia mau mea, a me ka olelo aku me ka maopopo loa, i hoola ai ia lakou mai ka iho koke ana i ka make. A mamuli o keia ano aʻu e kakau iho nei no lakou.

24. A ike aku la au i na kaua mawaena o ko Nepai poe a me ko Lamana poe, ma na la oʻu.

25. Eia kekahi, hiki mai ka wa elemakule oʻu, a ua hala na makahiki hookahi haneri kanahikukumamaiwa mai ka manawa a ko makou kupunakane, a Lehi, i haalele aku ai ia Ierusalema.

26. A ua ike au e iho koke ana au i koʻu lua kupapau; a ua hooikaika ia au ma ka mana o ke Akua i hai olelo aku ai a i wanana aku ai au i keia lahuikanaka, a i hai aku ai i ka olelo e like me ka oiaio iloko o Kristo. A ua hai aku au ia mea, ma na la a pau oʻu, a ua hauoli loa au ma ia mea, imua o ko ke ao nei.

27. A e hele koke ana au i kahi oʻu e maha ai, oia pu no me koʻu Mea Hoolapanai; no ka mea, ua ike au iloko ona e maha ai au; a ke hauoli nei au i ka la e aahu ai koʻu palaho i ka palaho ole, a e ku imua ona; alaila, e ike au i kona maka me ka olioli, a e i mai oia iaʻu, E hele mai ioʻu nei, e ka mea pomaikai, aia no he wahi i hoomakaukau ia ai nou ma na hale o koʻu Makua. Amene.