1. Eia kekahi, mahope iho o kekahi mau makahiki i hala aku, hele mai la kekahi kanaka mawaena o ka poe kanaka o Nepai, a o Serema kona inoa.

2. Eia kekahi, hoomaka aku la oia e hai olelo iwaena o na kanaka, a e hai aku ia lakou, aole loa no he Kristo mahope. A hai aku la oia i na mea he nui e hoomalimali ana i na kanaka; a ua hana oia i keia e hiki ia ia ke hookahuli ae i ke ao ana a Kristo.

3. A hana ikaika aku la oia e hiki ia ia ke alakai aku i na naau o na kanaka, a ua alakai aku oia i na naau he nui wale; a e ike ana oia he manaoio koʻu, ko Iakoba, ia Kristo, ka mea e hele mai ana, imi mai la ia i ka wa pono e hiki mai ioʻu nei.

4. A ua ao ia oia, i ike lea oia i ka olelo a na kanaka; nolaila, ua hiki ia ia ke hoomalimali nui, a ke olelo aku me ka mana o ka olelo, mamuli o ka mana o ke diabolo.

5. A he manaolana kona e hoonaue mai iaʻu mai ka manaoio aku, me na hoikeana he nui nae, a me na mea he nui wale aʻu i ike ai no keia mau mea; no ka mea, ua ike io au i na anela, a ua lawelawe mai la lakou iaʻu. A ua lohe no au i ka leo o ka Haku e olelo mai ana iaʻu me ka olelo io, ia manawa aku ia manawa aku; nolaila, ua hiki ole iaʻu ke hoonaueue ia mai.

6. Eia kekahi, hele mai la ia iaʻu; a eia ke ano o kana olelo ana iaʻu, i ka i ana: E Iakoba, e ka hoahanau, ua imi nui au i ka wa pono e olelo aku ai au ia oe; no ka mea, ua lohe au a ike no hoi, e hele nui ana oe a puni, e hai ana i ka mea au i kapa aku ai ka euanelio, oia hoi ke ao ana a Kristo;

7. A ua alakai aku la oe i kekahi poe he nui loa o keia lahuikanaka, i hookapae ai lakou i ka aoao pololei o ke Akua, aole hoi i malama i ke kanawai o Mose, oia no ka aoao pololei; a hoohuli ae i ke kanawai o Mose i ka hoomana ana i kekahi mea au i olelo ai e hele mai ana ma kekahi mau haneri makahiki, ma neia hope aku. Ano, aia hoi, ke hai aku nei au, o Serema, ia oe, he olelo hoino keia; no ka mea, aohe kekahi kanaka i ike no ia mau mea; no ka mea, ua hiki ole ia ia ke hai mai i na mea e hiki mai ana. A mamuli o keia ano, paio mai la o Serema iaʻu.

8. Aka hoi, ninini mai la ka Haku ke Akua i kona Uhane iloko o koʻu naau, a hoohoka aku la au ia ia ma kana mau olelo a pau.

9. A i aku la au ia ia, Ke hoole mai nei anei oe i ke Kristo ka mea e hele mai ana? A i mai la ia, Ina he Kristo kekahi, aole au e hoole aku ia ia; aka, ua ike au aole he Kristo, aole mamua aku, aole ma neia hope aku.

10. A i aku la au ia ia, Ke manaoio nei anei oe i na palapala hemolele? A i mai la ia, Ae.

11. A i aku la au ia ia, Ina pela, aole oe i hoomaopopo ia mau mea; no ka mea, ke hoike io mai nei ia mau mea no Kristo.

12. Aia hoi, ke i aku nei au ia oe, aole kekahi o na kaula i palapala, aole hoi i wanana, ke olelo ole mai lakou no ua Kristo nei. Aole o keia wale no; ua hoike ia mai ia mea iaʻu, no ka mea, ua lohe no au a ike no hoi; a ua hoike ia mai iaʻu no hoi ma ka mana o ka Uhane Hemolele; nolaila, ua ike au, ke hana ole ia mai ke kalahala ana, e lilo loa aku no na kanaka a pau.

13. Eia kekahi, i mai la ia iaʻu, E hoike mai iaʻu i hoailona ma keia mana o ka Uhane Hemolele, ma o na la i ike nui ai oe me neia.

14. A i aku la au ia ia, Heaha la owau, i hoao aku ai au i ke Akua e hoike mai i hoailona ia oe, ma ka mea au i ike ai he oiaio? Aka e hoole nae oe ia mea, no ka mea, no ke diabolo oe. Aole nae e hana ia koʻu makemake; aka ina e hahau mai ke Akua ia oe, e lilo ia mea i hoailona nou he mana kona, ma ka lani a ma ka honua; a e hiki mai ana no hoi o Kristo. A o kou makemake, e ka Haku, ke hana ia, aole o koʻu.

15. Eia kekahi, iaʻu, ia Iakoba, i olelo aku ai i keia mau olelo, haule mai la ka mana o ka Haku maluna ona, a hina iho la oia i ka honua. Eia kekahi, ua hanai ia oia no na la he nui wale.

16. Eia kekahi, i aku la ia i na kanaka, E akoakoa mai i ka la apopo, no ka mea, e make ana au; nolaila, ke makemake nei au e olelo aku i na kanaka mamua o kuu make ana.

17. A ia la ae, ua hoakoakoa ia mai la na kanaka; a olelo maopopo mai la oia ia lakou, a hoole ae la i na mea ana i ao aku ai ia lakou; a ae mai la oia no Kristo, a me ka mana o ka Uhane Hemolele, a me ka lawelawe ana o na anela.

18. A olelo maopopo mai la oia ia lakou, ua hoopunipuni ia oia ma ka mana o ke diabolo. A olelo ae la ia no gehena, a no kela ao aku, a no ka hoopai pau ole.

19. A i mai la ia, Ke makau nei au anoai ua hana au i ka hala e kala ole ia, no ka mea, ua wahahee aku au i ke Akua; no ka mea, ua hoole aku au ia Kristo, me ka i aku ua manaoio au i na palapala hemolele; a ke hoike io mai nei lakou nona. A no kuu wahahee ana peia i ke Akua, ke makau nui nei au o weliweli ino auanei koʻu noho ana; aka ke hooiaio aku nei au i ke Akua.

20. Eia kekahi, ia ia i olelo aku ai i keia mau olelo, aole i hiki ia ia ke olelo hou; a lele ae la ke aho.

21. A i ka ike ana o ka lehulehu ua olelo mai la oia i keia mau mea i ka wa aneane lele ae ke aho, ua pihoihoi nui loa lakou; a haule mai la ka mana o ke Akua maluna o lakou, a maule iho la lakou, a hina iho la lakou i ka honua.

22. Ano, he mea oluolu keia iaʻu, ia Iakoba; no ka mea, ua noi aku au i koʻu Makua ma ka lani no ia mea; no ka mea, ua lohe oia i kuu hea ana, a hooko mai la i kaʻu pule.

23. Eia kekahi, ua hoi hou mai ka maluhia a me ke aloha o ke Akua mawaena o na kanaka; a huli iho la lakou i na palapala hemolele, a hoolohe hou ole aku i na olelo a keia kanaka hewa.

24. Eia kekahi, ua nui na mea i hana ia e hoohuli mai ai a e hoihoi hou mai ai i ko Lamana poe, i ka ike i ka oiaio; aka, ua make hewa na hana a pau; no ka mea, e lealea ana lakou ma na kaua a ma ka hookahe koko ana; a he inaina pau ole ko lakou ia makou, ko lakou poe hoahanau. A imi mai la lakou ma ka mana o ko lakou mau mea kaua e luku mau mai ia makou;

25. Nolaila, i paku aku ai ka poe kanaka o Nepai ia lakou la me ko lakou poe koa, a me ko lakou ikaika a pau, me ka paulele ana i ke Akua a i ka pohaku o ko lakou ola; nolaila, ua lilo lakou a hiki i keia wa, i poe lanakila maluna o ko lakou poe enemi.

26. Eia kekahi, ua hiki mai ka wa elemakule oʻu, o Iakoba; a ua kakau ia ka mooolelo o keia lahuikanaka ma na papa e ae o Nepai, nolaila, ke hoopau nei au i keia mooolelo, me ka hai ana aku ua kakau iho au mamuli o ka mea aʻu i ike ai, me ka i ana, ua hala aku ka manawa me makou, a ua hala aku hoi ko makou ola, e like me he moe uhane la ia ia makou; he lahuikanaka mehameha a kuoo makou, he poe aea, i hoolei ia mai ai mailoko mai o Ierusalema; hanau ia mai la ma ka popilikia, iloko o ka waonahele, a inaina ia e ko makou poe hoahanau, oia no ke kumu o na kaua a me na paio; no ia mea, ua kaniuhu makou i ko makou mau la a pau.

27. A ua ike au, o Iakoba, e iho koke ana au i koʻu lua kupapau; nolaila, i aku la au i kaʻu keiki o Enosa, E lawe i keia mau papa. A hai aku la au ia ia i na mea a koʻu kaikuaana, a Nepai, i kauoha mai ai iaʻu; a ae mai la ia e hoolohe i na kauoha. A ke hoopau nei au i kaʻu kakau ana maluna o keia mau papa, a o ua kakau ana nei ua uuku ia; a ke aloha aku nei au i ka mea heluhelu, me ka lana o ka manao e heluhelu na mea he nui wale o koʻu poe hoahanau i kaʻu mau olelo. E na hoahanau, e aloha auanei.