1. O na olelo a Iakoba, ke kaikaina o Nepai, i olelo ai i ka poe kanaka o Nepai, mahope iho o ka make ana o Nepai:

2. Ano, e oʻu poe hoahanau i aloha ia, owau, o Iakoba, e like me ka mea i hooili ia mai ai maluna iho oʻu e ke Akua, e hoonani mau aku i kaʻu oihana me ke kuoo, a i hiki no hoi iaʻu ke hoomaemae i koʻu aahu mai ko oukou mau hewa ae, ua pii mai au iloko o ka luakini i keia la, i hiki iaʻu ke hai aku i ka olelo a ke Akua ia oukou;

3. A ua ike oukou, a hiki i keia manawa ua molowa ole au ma ka hana o kaʻu oihana; aka, o keia la ua hookaumaha ia au ilalo me ka makemake a me ka manao nui loa no ka hoola ia ana o ko oukou poe uhane, i oi aku mamua o koʻu i loaa ai mamua aku nei.

4. No ka mea, aia hoi, a hiki i keia manawa, ua hoolohe oukou i ka olelo a ka Haku, aʻu i haawi aku ai ia oukou.

5. Aka hoi, e hoolohe mai oukou iaʻu, a e ike, ua hiki iaʻu ma o ke kokua ana la o ka Mea Mana loa, nana i hana i ka lani a me ka honua, e hai aku ia oukou no ko oukou mau manao, a no ka hoomaka ana o oukou e hana iloko o ka hewa, a o ua hewa nei i koʻu nana ana aku, he mea hoopailua loa ia iaʻu, he oiaio, a he mea hoopailua hoi i ke Akua.

6. He oiaio, ke hoeha mai nei ia mea i koʻu uhane, a he mea ia e ku emi ai au me ka hilahila imua o ke alo o koʻu Mea nana i hana, i hoike aku ai au ia oukou no ka hewa o ko oukou mau naau;

7. Eia hoi, he mea e hoeha mai ana iaʻu naʻu e olelo aku me ka wiwo ole i ka olelo no oukou, imua o ka oukou poe wahine a me ka oukou mau keiki, o ka nui o ko lakou mau manao ua palupalu loa, a maemae, a lahilahi imua o ke Akua, a ua oluolu ia mea i ke Akua;

8. A ke manao nei au ua pii mai lakou maanei e hoolohe mai i ka olelo olioli a ke Akua, he oiaio, o ka olelo e hoola ana i ka uhane i hoeha ia.

9. Nolaila, ke hookaumaha nei ia mea i koʻu uhane, i koi ia mai ai au no ke kauoha ikaika aʻu i loaa ai mai ke Akua mai, e paipai ia oukou, e like me ko oukou mau hewa, e hoonui i na palapu o ka poe i hoeha ia i keia manawa, aole hoi e hooluolu a e hoola aku i ko lakou mau palapu; a o ka poe i hoeha ole ia hoi, ma kahi o ka ahaaina ana ma ka olelo olioli a ke Akua, e loaa na pahi oi ia lakou e hou i ko lakou mau uhane, a e hoeha i ko lakou mau manao.

10. Aka, me ka nui nae o ka mea kaumaha, e hana no au e pono ai e like me na kauoha ikaika a ke Akua, a e hai aku ia oukou no ko oukou mau hewa a mau mea ino, imua o ke alo o ka poe maemae ma ka naau, a me ka naau pepe, a malalo iho hoi o ka nana ana mai o ka maka oi o ke Akua Mana Loa.

11. Nolaila, he mea e pono iaʻu ke hai aku i ka oiaio, e like me ke akaka o ka olelo a ke Akua. No ka mea, iaʻu i ninau aku ai i ka Haku, peneia i hiki mai ai la ka olelo iaʻu, i ka i ana, E Iakoba, e hele ae oe iluna iloko o ka luakini i ka la apopo, a e hai aku i ka olelo, aʻu e haawi aku ai ia oe, i keia poe kanaka.

12. Ano, aia hoi, e oʻu poe hoahanau, eia ka olelo aʻu e hai aku nei ia oukou, ua hoomaka iho la he nui loa o oukou e imi i ke gula, a i ke kala, a me kela ano keia ano o na mea maikai i eli ia; a ua nui loa o ia mau mea ma keia aina, a he aina pomaikai ia ia oukou, a i ka oukou poe hua.

13. A ua lokomaikai mai ka lima o ka Haku ia oukou a oluolu loa, i loaa ia oukou ka waiwai a nui loa; a no ka loaa ana i kekahi poe o oukou ka waiwai a nui loa aku mamua o ko oukou mau hoahanau, ua hookiekie ia oukou iluna ma ka haaheo o ko oukou mau naau, a hele me na ai oolea, a me na poo kiekie, no ka nui o ke kumu kuai o ko oukou kapa, a hoomaau ae i ko oukou poe hoahanau, no ko oukou manao wale ua oi aku ko oukou maikai i ko lakou.

14. Ano, e koʻu poe hoahanau, ke manao nei anei oukou e hoapono ana ke Akua ia oukou ma keia mea? Ke i aku nei au ia oukou, Aole. Aka ke hoohewa nei oia ia oukou, a ina e hoomau aku oukou ma keia mau mea, e hoea hikiwawe mai no kona hoopai ana maluna o oukou.

15. E! Ina e hoike mai oia ia oukou ua hiki ia ia ke hou mai ia oukou, a ua hiki ia ia ke hahau koke ia oukou i ka lepo, me ka nana hookahi ana mai o kona maka.

16. E! Ina e hoohemo ae oia ia oukou mailoko ae o keia hewa a mea hoopailua. A ina e hoolohe mai oukou i ka olelo a kana mau kauoha, a e ae ole aku i keia haaheo o ko oukou mau naau e luku i ko oukou mau uhane.

17. E hoomanao i ko oukou mau hoahanau, e like me oukou iho, a e launa me na mea a pau, a e lokomaikai hoi me ko oukou waiwai, i waiwai lakou e like me oukou.

18. Aka mamua o ko oukou imi ana i ka waiwai, e imi aku no oukou i ke aupuni o ke Akua.

19. A mahope iho o ko oukou loaa ana ka manaolana iloko o Kristo, e loaa no ia oukou ka waiwai, ke imi oukou ia mea; alaila e imi oukou ia mau mea, me ka manao e hana i ka maikai; e hoaahu i na mea kapa ole, a e hanai i na mea pololi, a e hookuu i ka mea i pio, a e hooluolu i na mea mai, a me na mea pilikia.

20. Ano, e oʻu poe hoahanau, ua olelo aku la au ia oukou no ka haaheo; a o ka poe o oukou i hoopilikia ae i ko oukou hoalauna, a i hoomaau ae ia ia, no ka haaheo o oukou ma ko oukou mau naau, no na mea a ke Akua i haawi mai ai ia oukou, heaha la ka oukou no ia mea?

21. Aole anei oukou i manao ua hoopailua ia na mea e like me neia e ia, e ka Mea nana i hana mai i ka io a pau? A ua like ka maikai o kekahi mea me kekahi imua o kona maka. A no ka lepo mai na io a pau; a no ka hopena hookahi oia i hana mai ai ia lakou, i malama lakou i kana mau kauoha, a e hoonani aku ia ia no ka wa pau ole.

22. Ano, ke hooki aku nei au i kaʻu olelo ana ia oukou no keia haaheo. A ina aole he pono naʻu e olelo aku ia oukou no ka hewa i oi aku ka ino i kela, ina ua olioli nui loa kuu naau, no oukou.

23. Aka, ke hookaumaha mai nei ka olelo a ke Akua iaʻu no ko oukou mau hewa i oi ae. No ka mea, aia hoi, penei wahi a ka Haku, Ke hoomaka nei keia poe kanaka e mahuahua ma ka hana ino; aole lakou i hoomaopopo i na palapala hemolele; no ka mea, ke imi nei lakou e hoapono ia lakou iho ma ka moekolohe, no na mea i palapala ia no Davida, a me Solomona kana keiki.

24. Aia hoi, he oiaio no, he nui loa na wahine a me na haiawahine ka Davida a me ka Solomona, a he mea hoopailua ia imua oʻu, wahi a ka Haku; nolaila, penei wahi a ka Haku;

25. Ua alakai mai la au i keia poe kanaka noloko mai o ka aina o Ierusalema, ma ka mana o koʻu lima, i hiki ai iaʻu ke hoala mai noʻu i kekahi lala pono mai ka hua mai a ka puhaka o Iosepa.

26. Nolaila, aole owau, ka Haku ke Akua, e ae aku i keia poe kanaka e hana e like me lakou o ka wa kahiko.

27. Nolaila, e koʻu poe hoahanau, e hoolohe mai iaʻu, a e hoolohe i ka olelo a ka Haku; no ka mea, hookahi wahine wale no ka ke kanaka e loaa ai mawaena o oukou; a o na haiawahine aole nana kekahi;

28. No ka mea, e oluolu ana owau, ka Haku ke Akua, i ka maemae o na wahine. A o na moekolohe he mea hoopailua ia imua oʻu; pela wahi a ka Haku o na Lehulehu.

29. Nolaila, e malama mai keia poe kanaka i kaʻu mau kauoha, wahi a ka Haku o na Lehulehu, i ole, e hoomainoino ia ka aina no lakou.

30. No ka mea, ina wau e makemake, wahi a ka Haku o na Lehulehu, e hoala i hua naʻu, e kauoha aku no au i koʻu poe kanaka; a i ole pela, e hoolohe mai no lakou i keia mau mea.

31. No ka mea, aia hoi, ua ike au, o ka Haku, i ke kaumaha, a lohe hoi i ka uwe ana o na kaikamahine a koʻu poe kanaka ma ka aina o Ierusalema; he oiaio, a ma na aina a pau o koʻu poe kanaka, no ka hewa a me ka hana hoopailua a ka lakou poe kane.

32. A aole au e ae aku, wahi a ka Haku o na Lehulehu, e pae mai ioʻu nei ka uwe ana o na kaikamahine ui a keia poe kanaka, aʻu i alakai mai ai mailoko mai o ka aina o Ierusalema, me ke ku e i na kane o koʻu poe kanaka, wahi a ka Haku o na Lehulehu;

33. No ka mea, aole loa lakou e alakai pio i na kaikamahine a koʻu poe kanaka, no ka palupalu o ua poe kaikamahine nei, ke hahau ole au ia lakou me kekahi mainoino eha, a hiki wale i ka anai ia ana aku, no ka mea, aole loa no lakou e moekolohe, e like me ka poe o ka wa kahiko, wahi a ka Haku o na Lehulehu.

34. Ano, aia hoi, e koʻu poe hoahanau, ua ike oukou ua haawi ia mai keia mau kauoha i ko kakou makuakane ia Lehi; nolaila, ua ike e oukou i keia mau mea mamua; a ua komo oukou malalo iho o ka hoohewa nui ia; no ka mea, ua hana oukou i keia mau mea, i pono ole ia oukou ke hana.

35. Aia hoi, ua hana oukou i na mea oi aku mamua o ka ko Lamana poe, ko kakou poe hoahanau. A ua hoopepe oukou i na naau o ka oukou mau wahine palupalu, a ua lilo aku ka paulele o ka oukou mau keiki, no ka oukou hana pono ole imua o lakou; a ke pii aku la ka uwe o ko lakou mau naau i ke Akua la e ku e ia oukou. A no ka ikaika o ka olelo a ke Akua, i iho mai ai e ku e ia oukou, ua make na naau he nui, i hou ia me na eha hohonu.