1. Ano, eia hoi kekahi, ua lawelawe nui aku au, o Iakoba, i koʻu poe kanaka, ma ka olelo, (a he uuku wale no i hiki iaʻu ke kakau iho o kaʻu mau olelo, no ka paakiki o ke kahakaha ana i ka makou olelo maluna o na papa,) a ua ike makou e paa mau ana na mea a makou i kakau iho ai maluna o na papa;

2. Aka o na mea a makou i kakau iho ai maluna o kekahi mea e, ke ole na papa, e lilo i mea ole a e mae wale iho; aka ua hiki ia makou ke kakau iho he mau olelo kakaikahi maluna o na papa, a na ua mau mea nei e haawi aku i ka makou poe hua, a i ko makou poe hoahanau i aloha ia hoi, he wahi ike no makou, a no ko lakou poe kupuna.

3. Ano, ma keia mea ke hauoli nei makou; a ke hana ikaika nei makou e kahakaha i keia mau olelo maluna iho o na papa, me ka manaolana e loaa ia mau mea i ko makou poe hoahanau i aloha ia, a me ka makou poe hua, me na naau aloha, a e nana ia mau mea, i ike ai lakou me ka hauoli, aole me ke kaumaha, aole no hoi me ka hoowahawaha, no na kupuna mua o lakou;

4. No ka mea, no keia manao ua palapala makou i keia mau mea, i ike ai lakou ua ike makou ia Kristo, a he manaolana ko makou no kona nani, he mau haneri makahiki mamua o kona hiki ana mai, a, aole no makou wale no ka manaolana no kona nani, aka o na kaula hemolele no hoi a pau i noho mamua o makou.

5. Aia hoi, ua manaoio lakou ia Kristo, a hoomana aku la i ka Makua ma kona inoa; a ke hoomana aku nei hoi makou i ka Makua ma kona inoa. A no keia mea, ke malama nei makou i ke kanawai o Mose, e kuhikuhi ana ia mea i ko makou mau uhane ia ia; a no keia mea, ua hoolaa ia ia mea i pono no makou, me ia i hoolilo ia ai ia Aberahama ma ka waonahele, e hoolohe aku i na kauoha a ke Akua, i ke kaumaha ana aku i kana keiki ia Isaaka, he mea like no ia me ke Akua a me kana Keiki Hanau-kahi.

6. Nolaila, ke imi nei makou i ka na kaula; a he nui ko makou mau hoikeana, a me ka Uhane o ka wanana; a ia makou keia mau hoike a pau, ua loaa he manaolana ia makou, a ua lilo ko makou manaoio i naueue ole, a hiki io ia makou, ke kauoha aku ma ka inoa o Iesu, a e hoolohe mai no na laau ia makou, a o na mauna, a o na ale o ke kai;

7. Aka e hoike mai ana nae ka Haku ke Akua i ko makou nawaliwali ia makou, i ike ai makou ma o kona lokomaikai la, a me kona aloha nui i na keiki a kanaka, i loaa ai ia makou ka mana e hana i keia mau mea.

8. Aia hoi, he nani a manomano na hana a ka Haku. E! Hiki ole ke huli ia ka hohonu o na mea pohihihi ona; a he mea hiki ole i ke kanaka ke ike i kona mau aoao a pau. A, aole kekahi kanaka i ike aku i kona mau aoao, ke hoike ole ia mai ia mea ia ia; nolaila, e na hoahanau, mai hoowahawaha i na hoike ana a ke Akua.

9. No ka mea, ma ka mana o kana olelo, i hiki mai ai ke kanaka ma ka ili o ka honua nei; a o ua honua nei ua hana ia ma ka mana o kana olelo. No ia mea, ina o ke Akua, i hiki ke olelo aku, a ua hana ia ka honua; a ke olelo aku hoi, a ua hana ia ke kanaka, ea, ina pela, no ke aha la i hiki ole ai ke kauoha mai i ka honua, a i ka hana paha a kona mau lima maluna iho o ka ili o ua honua nei, e like me ka oluolu a makemake ona.

10. Nolaila, e na hoahanau, mai imi e ao aku i ka Haku, aka e loaa mai ka olelo ao mai kona lima mai. No ka mea, ua ike oukou no oukou iho, e ao ana oia ma ke akamai, a ma ka pololei, a ma ka lokomaikai nui, maluna o kana mau mea a pau i hana ai;

11. Nolaila, e oʻu poe hoahanau i aloha ia, e hoolaulea ia oukou ia ia, ma o ke kalahala la o Kristo, o kana Keiki Hanau-kahi, a e loaa ia oukou ke alahouana e like me ka mana o ke alahouana aia no iloko o Kristo, a e haawi ia aku me he poe hua mua la o Kristo, i ke Akua, i loaa ai ka manaoio, a me ka manaolana maikai o ka nani iloko ona, mamua o kona hoike ana ia ia iho ma ke kino.

12. Ano, e na pokii, mai kahaha i kaʻu hai ana aku ia oukou i keia mau mea; no ka mea, no ke aha la e olelo ole aku ai no ke kalahala ana o Kristo, a e loaa ai hoi ka ike lea nona, e like me ka loaa ana o ka ike no ke alahouana a me ke ao e hiki mai ana?

13. Aia hoi, e koʻu poe hoahanau, o ka mea e wanana ana, e wanana aku oia i ka hoomaopopo ana i kanaka; no ka mea, e olelo ana ka Uhane i ka oiaio, a e wahahee ole ana. Nolaila, e olelo ana ia no na mea e like io me ko lakou ano i keia wa, a no na mea e like io me ko lakou ano mahope; nolaila, ua hoike ia mai keia mau mea ia kakou me ke akaka, no ka hoola ia ana o ko kakou poe uhane. Aka hoi, aole o makou wale no na hoike ma keia mau mea; no ka mea, ua olelo no hoi ke Akua i keia mau mea i na kaula o ka wa kahiko.

14. Aka hoi, he poe kanaka ai oolea ka poe Iudaio; a ua hoowahawaha lakou i na olelo moakaka, a pepehi ae la i ka poe kaula, a imi ae la no na mea i hiki ole ai ia lakou ke hoomaopopo. Nolaila, no ko lakou makapo, a ua hiki mai ua makapo nei ma ka nana ana aku ma o aku o ka mea kupono, e pono lakou ke haule; no ka mea, ua lawe aku la ke Akua i kona moakaka mai o lakou aku, a haawi ae la ia lakou i na mea he nui i hiki ole ai ia lakou ke hoomaopopo, no ko lakou makemake ana ia mea. A no ko lakou makemake ana ia mea, ua hana ae la ke Akua ia mea, i hina ai lakou.

15. Ano, ua alakai ia mai la au, o Iakoba, e ka Uhane i ka wanana ana; no ka mea, ke ike nei au ma ka hana ana o ka Uhane iloko oʻu, ma o ka hina ana la o ka poe Iudaio e hoolei aku ai lakou i ka pohaku, kahi o lakou i hiki ai ke kukulu, a loaa ke kahua paa.

16. Aka hoi, e like me ka na palapala hemolele, e lilo auanei keia pohaku i ke kahua nui, a i ke kahua paa, a hope hoi, oia hookahi wale no, kahi o ka poe Iudaio e hiki ai ke kukulu iho.

17. Ano, e oʻu poe pokii, pehea la e hiki ai i keia poe, mahope iho o ko lakou hoole ana i ke kahua paa, ke kukulu maluna ona, i lilo ai ia i pohaku kumu kihi no lakou?

18. Ano, e oʻu poe hoahanau i aloha ia, e wehewehe aku au i keia mea pohihihi ia oukou, ke hoonaueue ole ia mai au, ma kekahi mea, mai koʻu kupaa ana ma ka Uhane, a e hina no ka manao nui oʻu no oukou.