1. Aia hoi, e koʻu poe hoahanau, aole anei oukou i hoomanao i ka heluhelu ana i na olelo a Zenosa ke kaula i olelo aku ai i ko ka hale o Iseraela, i ka i ana:

2. E hoolohe mai oukou, e ko ka hale o Iseraela, a e hoolohe mai i na olelo aʻu, he kaula a ka Haku;

3. No ka mea, aia hoi, penei wahi a ka Haku, E hoohalike au ia oe, e ko ka hale o Iseraela, e like me kekahi laau oliva kahu, a kekahi kanaka i lawe ai a i malama ai iloko o kona pawaina; a ulu ia, a oo iho la, a hoomaka iho la ia e popopo aku.

4. Eia kekahi, hele aku la ka Haku o ka pawaina, a ike aku la oia e hoomaka ana kona laau oliva e popopo; a i ae la ia, E paipai aku au ia ia, a e elieli a puni ia, a e kipulu ia ia, anoai e pepeiao mai ia i na lala hou a palupalu, a e make ole ia.

5. Eia kekahi, paipai ae la oia ia laau, a elieli iho la oia a puni ia, a kipulu ia ia e like me kana olelo.

6. Eia kekahi, mahope iho o kekahi mau la, hoomaka ae la ia e pepeiao iki mai i na lala hou a palupalu; aka hoi, ua hoomaka ae la ka welau nui ona e make.

7. Eia kekahi, ike aku la ka Haku o ka pawaina ia mea, a i mai la ia i kana kauwa, He mea e hoeha ana iaʻu ka lilo ana aku o keia laau; nolaila, ea, o hele aku a e uhaki aku i na lala mai kahi laau oliva ulu wale, a e lawe mai ioʻu nei; a e uhaki aku no kaua i kela mau lala kumu e hoomaka ana e mae wale, a e hoolei aku no kaua ia lakou iloko o ke ahi, i wela ai lakou.

8. Aia hoi, wahi a ka Haku o ka pawaina, e lawe aku au he nui o keia mau lala hou a palupalu, a e pakui aku au i kahi aʻu i makemake ai; a he mea ole ia ina paha e make auanei ke kumu o keia laau, naʻu e malama aku i na hua ona iaʻu iho; nolaila, e lawe aku au i keia mau lala hou a palupalu, a e pakui aku au ia lakou ma kahi aʻu i makemake ai.

9. E lawe oe i na lala o ka laau oliva ulu wale, a e pakui mai ia lakou, ma ko lakou la wahi; a o keia mau lala aʻu i uhaki aku ai, e hoolei aku au iloko o ke ahi, i wela ai lakou, i hoopilikia ole ai lakou i ka aina o koʻu pawaina.

10. Eia kekahi, hana iho la ke kauwa a ka Haku o ka pawaina, e like me ka olelo a ka Haku o ka pawaina, a pakui iho la i na lala o ka laau oliva ulu wale.

11. A kauoha mai la ka Haku o ka pawaina e elieli ia ia a puni, a paipai ia, a e kipulu ia, i ka i ana i kana kauwa, He mea e hoeha ana iaʻu ka lilo ana aku o keia laau; nolaila, ua kanu au i keia mea, i hoola ai paha au i na aa ona i make ole lakou, i malama au ia lakou noʻu iho.

12. Nolaila, ea, o hele aku oe; e malama i ka laau, a e kipulu ia ia e like me kaʻu olelo.

13. A o keia mau lala e waiho no au ma kahi malalo loa o koʻu pawaina, ma kahi aʻu i makemake ai, he mea ole ia ia oe; a ke hana nei au i keia, i hiki ai iaʻu ke malama noʻu iho i na lala maoli o ka laau; i hoahu ai hoi au i na hua ona, no ka wa pono, noʻu iho; no ka mea, he mea e hoeha ana iaʻu ka lilo ana aku o keia laau, a me na hua ona.

14. Eia kekahi, hele aku la ka Haku o ka pawaina, a huna ae la i na lala maoli o ka laau oliva kahu, ma na wahi malalo loa o ka pawaina; o kekahi ma kau wahi, a o kekahi ma kau wahi e, e like me ka makemake a oluolu ona.

15. Eia kekahi, hala iho la ka manawa loihi, a i mai la ka Haku o ka pawaina i kana kauwa, E hele mai, a e hele kaua ilalo iloko o ka pawaina, i hana ai kaua ma ka pawaina.

16. Eia kekahi, iho pu iho la ka Haku o ka pawaina, a me kana kauwa hoi, ilalo iloko o ka pawaina e hana. A i aku la ke kauwa i kona Haku, Aia hoi, e nana maanei; e nana i ka laau.

17. Eia kekahi, nana aku la ka Haku o ka pawaina a ike i ka laau, iloko ona i pakui ia ai na lala oliva ulu wale; a ua ulu mai la ia, a ua hoomaka e hoohua mai i ka hua. A ua ike oia ua maikai; a o na hua ona ua like ia me na hua maoli.

18. A i mai la ia i ke kauwa, Aia hoi, ua loaa i na lala o ka laau ulu wale ke kohu o ke kumu ona, i hoohua mai ai ke kumu ona me ka ikaika nui; a no ka ikaika loa o ke kumu, ua hoohua mai la na lala ulu wale i na hua maoli; ano, ina ua pakui ole kaua i keia mau lala, ina ua make aku la ke kumu ona. Ano, aia hoi, e hoahu au i na hua he nui a ka laau i hoohua mai ai; a o na hua ona e hoahu no au, no ka wa pono, noʻu iho.

19. Eia kekahi, i mai la ka Haku o ka pawaina i kana kauwa, E hele mai, a e hele kaua i kahi malalo loa o ka pawaina, a e nana, malia paha ua hoohua mai na lala maoli i na hua he nui no hoi, i hoahu ai au i na hua ona, no ka wa pono, noʻu iho.

20. Eia kekahi, hele aku la laua i kahi a ka Haku i huna ai i na lala maoli o ka laau, a i mai la ia i ke kauwa, E nana i keia mau mea. A ike aku la oia i ka mua, ua hoohua mai i na hua a nui; a ike aku la hoi ia, ua maikai ia. A i mai la ia i ke kauwa, E lawe aku i ka hua ona, a e hoahu ia mea no ka wa pono, i malama ai au ia mea noʻu iho; no ka mea, aia hoi, wahi ana, ua kipulu au ia mea i keia manawa loihi, a ua hoohua mai ia i na hua he nui.

21. Eia kekahi, i aku la ke kauwa i kona Haku, Pehea la i hiki ai oe ia nei e kanu i keia laau, i ole, i keia lala o ka laau? No ka mea, aia hoi, o kahi panoa loa ia o ka aina a pau o kou pawaina.

22. A i mai la ka Haku o ka pawaina ia ia, Mai ao mai oe iaʻu; ua ike au he wahi panoa ia o ka aina; nolaila, i aku la au ia oe, ua kipulu au ia mea i keia manawa loihi; a ke ike nei oe ua hoohua mai la ia i na hua he nui.

23. Eia kekahi, i mai la ka Haku o ka pawaina i kana kauwa, E nana mai maanei; aia hoi, ua kanu aku la au i kekahi lala e o ka laau hoi; a ua ike oe ua panoa loa keia wahi o ka aina mamua o ko ka mua. Aka, e nana i ka laau; ua kipulu au ia ia i keia manawa loihi, a ua hoohua mai la ia i na hua he nui; nolaila, e hoiliili oe ia lakou, a e hoahu ia mau mea, no ka wa pono, i malama au ia mau mea noʻu iho.

24. Eia kekahi, i hou mai la ka Haku o ka pawaina i kana kauwa, E nana mai maanei, a e ike i kekahi lala e hoi aʻu i kanu aku ai; e nana, ua kipulu au ia ia no hoi, a ua hoohua mai i na hua.

25. A i mai la ia i kana kauwa, E nana mai maanei, a e ike i ka mea hope; aia hoi, ua kanu au i keia ma kahi maikai o ka aina; a ua kipulu au ia ia i keia manawa loihi, a ua hoohua mai kekahi hapa o ka laau wale no i na hua maoli; a o kekahi hapa o ka laau ua hoohua mai i na hua ulu wale; aia hoi, ua kipulu au i keia laau e like me na laau e ae.

26. Eia kekahi, i mai la ka Haku o ka pawaina i kana kauwa, E uhaki aku i na lala i hoohua ole mai i ka hua maikai, a e hoolei aku ia lakou iloko o ke ahi.

27. Aka hoi, i aku la ke kauwa ia ia, E paipai kaua ia ia, a e elieli a puni ia, a e kipulu ia ia i kekahi manawa pokole, malia paha e hoohua mai ia i ka hua maikai nou, i hiki ia oe ke hoahu no ka wa pono.

28. Eia kekahi, malama iho la ka Haku o ka pawaina, a me ke kauwa a ka Haku o ka pawaina i na hua a pau o ka pawaina.

29. Eia kekahi, ua hala aku la kekahi manawa loihi, a i mai la ka Haku o ka pawaina i kana kauwa, E hele mai, e iho pu kaua ilalo iloko o ka pawaina, i hana hou aku ai kaua iloko o ka pawaina. No ka mea, aia hoi, ke kokoke mai nei ka manawa, a e hiki koke mai ana ka hopena; nolaila, he pono noʻu e hoahu i na hua no ka wa pono, noʻu iho.

30. Eia kekahi, iho pu iho la ka Haku o ka pawaina, me ke kauwa, ilalo iloko o ka pawaina; a hiki laua i ka laau nona na lala maoli i haihai ia ai, a i pakui ia ai na lala ulu wale; a, aia ka, luluu iho la ka laau i na ano a pau o ka hua.

31. Eia kekahi, hoao aku la ka Haku o ka pawaina i na hua, o kela ano keia ano e like me kona helu. A i mai la ka Haku o ka pawaina, Aia hoi, o keia manawa loihi ua malama kaua i keia laau, a ua hoahu au noʻu iho no ka wa pono, i na hua he nui.

32. Aka hoi, o keia manawa ua hoohua mai ia i na hua he nui loa, aole kekahi ona i maikai. A, aia no na ano a pau o na hua ino; aole he mea noʻu e pomaikai ai, me ka kaua hana nae a pau; ano, he mea e hoeha ana iaʻu ka lilo ana o keia laau.

33. A i mai la ka Haku o ka pawaina i ke kauwa, Heaha la ka kaua e hana aku ai i ka laau, i hoola hou ai au i na hua maikai ona noʻu iho.

34. A i aku la ke kauwa i kona Haku, Aia hoi, no kou pakui ana i na lala o ka laau oliva ulu wale, ua hookawowo lakou i na aa, i ola lakou, a, aole lakou i make; nolaila, ke ike nei oe ua maikai lakou i keia manawa.

35. Eia kekahi, i mai la ka Haku o ka pawaina i kana kauwa, Aole o ka laau mea e hoopomaikai mai ai iaʻu; aole no o na aa mea e hoopomaikai mai nei iaʻu, ia ia i hoohua mai ai i na hua ino.

36. Aka hoi, ua ike au ua maikai na aa ona; a no kaʻu hana ua malama au ia lakou; a no ko lakou ikaika nui, ua hoohua mai a hiki i keia manawa i na hua maikai mai na lala ulu wale mai.

37. Aka hoi, ua ulu aku la na lala ulu wale, a ua lanakila maluna o na aa ona; a no ka lanakila ana o na lala ulu wale maluna o na aa ona, ua hoohua mai la ia i na hua ino a nui loa; a no ka hoohua ana mai ona i na hua ino a nui loa, ke ike nei oe e hoomaka ana ia e make; a e lilo koke ia i oo, i hoolei ia ai ia iloko o ke ahi, ke hana ole kaua i kekahi mea e hoola ia ia.

38. Eia kekahi, i mai la ka Haku o ka pawaina i kana kauwa, e iho kaua ilalo i na wahi ilalo loa o ka pawaina, a e ike, malia paha ua hua mai la hoi na lala maoli i na hua ino.

39. Eia kekahi, hele aku la laua ilalo i na wahi ilalo loa o ka pawaina. Eia kekahi, ike aku la laua ua lilo na hua o na lala maoli i ino no hoi; he oiaio, o ka mua, o ka lua, a o ka hope no hoi; a ua lilo lakou a pau i ino.

40. A o na hua ulu wale o ka mea hope, ua lanakila ia maluna o ka hapa o ka laau nana i hua mai ai i na hua maikai, a ua mae ua lala la a make.

41. Eia kekahi, uwe iho la ka Haku o ka pawaina, a i mai la i ke kauwa, Heaha la ka mea hou i hiki iaʻu ke hana no koʻu pawaina?

42. Aia hoi, ua ike e au ua lilo na hua o koʻu pawaina a pau, i ino, o keia mau mea wale no i koe. A, ano, o keia mau lala i hoohua mai la i hookahi manawa i na hua maikai, ua lilo ka hoi i ino. Ano, o na laau a pau o koʻu pawaina aohe o lakou mea e pono ai, eia wale no e kua ia ilalo a e hoolei ia aku i loko o ke ahi.

43. Aia hoi, o keia laau hope, nona ka lala i mae, ua kanu au iloko o kahi maikai o ka aina; he oiaio, ma kahi maikai loa iaʻu, mamua o na wahi a pau o ka aina o koʻu pawaina.

44. A ua ike oe ua kua aku au i ka mea i hoopilikia i keia wahi o ka aina, i hiki iaʻu ke kanu iho i keia laau ma kona hakahaka.

45. A ua ike oe i kekahi hapa ona, i hoohua mai la i na hua maikai; a o kekahi hapa ona, ua hoohua mai la i na hua ulu wale. A no koʻu uhaki ole i na lala ona, a hoolei iloko o ke ahi, aia hoi, ua lanakila lakou maluna o ka lala maikai, a ua mae ia.

46. Ano, aia hoi, me koʻu malama ana a pau aʻu i malama ai i koʻu pawaina, ua lilo nae na laau ona i ino, i hoohua ole mai lakou i na hua maikai; a ua lana koʻu manao e malama au i keia mau mea, e hoahu i na hua o lakou, no ka wa pono, noʻu iho. Aka hoi, ua lilo ka lakou i like me ka laau oliva ulu wale; a, aole o lakou mea e pono ai, e kua ia ilalo wale no, a e hoolei ia hoi iloko o ke ahi: a he mea e hoeha ana iaʻu ka lilo ana o lakou.

47. Aka, heaha la ka mea hou i hiki iaʻu ke hana iloko o koʻu pawaina? Ua hoonawaliwali anei au i kuu lima, i kipulu ole au ia ia? Aole; ua kipulu au ia ia, a ua elieli au a puni ia, a ua paipai au ia ia, a ua kipulu au ia ia; a ua o aku la au i kuu lima aneane pau loa ka la; a ke kokoke mai nei ka hopena. A he mea e hoeha ana iaʻu koʻu kua ana ilalo i na laau a pau o koʻu pawaina, a hoolei ana aku ia lakou iloko o ke ahi, i wela ai lakou. Owai la ka i hana ino mai i kuu pawaina?

48. Eia kekahi, i aku la ke kauwa i kona Haku, Aole anei ia no ke kiekie o kou pawaina? Aole anei na lala ona i lanakila maluna o na aa i maikai? A no ka lanakila ana o na lala maluna o na aa ona, aia hoi, ua ulu nui aku lakou mamua o ka ikaika o na aa, e loaa ana ka ikaika no lakou iho. Aia hoi, ke i aku nei au, aole anei keia ke kumu o ka lilo ana o na laau o kou pawaina i ka hoino ia?

49. Eia kekahi, i mai la ka Haku o ka pawaina i ke kauwa, E haele kaua, a e kua aku ilalo i na laau o ka pawaina, a e hoolei aku ia lakou iloko o ke ahi, i hoopilikia ole ai lakou i ka aina o koʻu pawaina; no ka mea, ua hana au i na mea a pau; heaha la ka mea hou i hiki iaʻu ke hana no koʻu pawaina?

50. Aka hoi, i akula ke kauwa i ka Haku o ka pawaina, E hookoe mai ia ia i kekahi manawa hou aku.

51. A i mai la ka Haku, He oiaio, e hookoe aku no au ia ia i kekahi manawa hou aku; no ka mea, he mea e hoeha ana iaʻu ka lilo ana o na laau o koʻu pawaina.

52. Nolaila, ea, e lalau aku kaua i na lala o keia mau mea aʻu i kanu ai ma na wahi ilalo loa o koʻu pawaina, a e pakui aku kaua ia lakou iloko o ka laau nona mai lakou; a e uhaki aku kaua mai ka laau aku i keia mau lala nona na hua awaawa loa, a e pakui aku i na lala maoli o ka laau ma ko lakou hakahaka.

53. A o keia kaʻu e hana ai, i make ole ka laau, malia paha e hoola au noʻu iho i na aa ona, no kaʻu hana iho.

54. Aia hoi, o na aa o na lala maoli o ka laau aʻu i kanu aku ai ma kahi aʻu i makemake ai, aia no ke ola la; nolaila, i hoola ai no hoi au ia lakou, no kaʻu hana iho, e lalau no au i na lala o keia laau, a e pakui au ia lakou iloko o lakou la. He oiaio, e pakui aku au iloko o lakou la i na lala o ko lakou la laau makua, i hoola ai au i na aa hoi noʻu iho, i ka wa e ikaika pono ai lakou, malia paha e hoohua mai lakou i na hua maikai noʻu, a e loaa paha ka nani iaʻu mahope ma na hua o koʻu pawaina.

55. Eia kekahi, lawe aku la laua no ka laau maoli mai i lilo i ulu wale, a pakui aku la iloko o na laau maoli, i lilo hoi i ulu wale;

56. A lawe aku la hoi laua no na laau maoli mai i lilo i ulu wale, a pakui aku la iloko o ko lakou laau makua.

57. A i mai la ka Haku o ka pawaina i ke kauwa, Mai uhaki aku i na lala ulu wale mai na laau aku, o na mea i awaawa loa wale no; a iloko o lakou e pakui aku oe, e like me ka mea aʻu i i aku ai.

58. A e kipulu hou aku kaua i na laau o ka pawaina, a e paipai aku kaua i na lala ona; a e uhaki aku mai na lala aku i kela mau lala i oo, ku pono e make, a e hoolei aku ia lakou iloko o ke ahi.

59. A o keia kaʻu e hana ai, malia paha e loaa i na aa ona ka ikaika, no ko lakou maikai; a no ka loli ana o na lala, i lanakila ai ka maikai maluna o ka ino;

60. A no koʻu hoola ana i na lala maoli, a me na aa ona; a no koʻu pakui hou ana i na lala maoli, iloko o ko lakou laau makua; a hoola hoi i na aa o ko lakou laau makua, i hoohua hou mai paha na laau o koʻu pawaina i na hua maikai; a i loaa hou iaʻu ka olioli ma ka hua o koʻu pawaina; anoai e hauoli nui loa au, i koʻu hoola ana i na aa a me na lala o na hua mua.

61. Nolaila, o hele aku, a e kahea aku i na kauwa, i hana molowa ole ai kakou me ko kakou ikaika iloko o ka pawaina, i hoomakaukau ai kakou i ke ala, e hoohua hou mai ai au i na hua maoli, a o ua hua maoli nei he ono ia, a maikai loa mamua o na hua e ae a pau.

62. Nolaila, e haele kakou, a e hana aku me ko kakou ikaika, i keia manawa hope; no ka mea, ke kokoke mai nei ka hopena; a o ka manawa hope keia naʻu e paipai aku ai i koʻu pawaina.

63. E pakui aku i na lala; e hoomaka ma ka hope, i lilo lakou i mua, a i lilo ka mua i hope, a e elieli ae a puni na laau, o na mea kahiko pu me na mea hou, o ka mua a me ka hope, a o ka hope a me ka mua, i hooulu ia ai lakou a pau i hookahi manawa hou no ka manawa hope.

64. Nolaila, e elieli ae a puni lakou, a e paipai ia lakou, a e kipulu hou ia lakou i hookahi kipulu ana, no ka manawa hope; no ka mea ke kokoke mai nei ka hopena. A ina paha e ulu auanei keia mau mea i pakui hope ia, a e hoohua mai i na hua maoli, alaila na oukou e hoomakaukau i ke ala imua o lakou, i ulu lakou;

65. A ia lakou e hoomaka ai e ulu, e waele aku oukou i na lala e hoohua mai ana i na hua awaawa, e like me ka ikaika a me ka nui o na lala maikai; aole na oukou e waele aku i na mea ino ona, ma ka manawa hookahi, o ikaika loa na aa mamua o ka lala i pakui ia, a e make auanei ka lala i pakui ia, a e lilo aku na lala o koʻu pawaina.

66. No ka mea, he mea e hoeha ana iaʻu ka lilo ana o na laau o koʻu pawaina; nolaila, ea, e waele aku oukou i ka ino, e like me ka ulu ana o ka maikai, i like pu ka ikaika o ke kumu a o ka welau, a hiki mai ka wa i lanakila a ai ka maikai maluna o ka ino, a e kua ia ka ino ilalo, a e hoolei ia aku iloko o ke ahi, i hoopilikia ole ai lakou i ka aina o koʻu pawaina; a pela au e kahili aku ai i ka ino mailoko aku o koʻu pawaina.

67. A e pakui hou no au i na lala o ka laau maoli, iloko o ka laau maoli;

68. A o na lala o ka laau maoli, e pakui no au iloko o na lala maoli o ka laau; a pela au e hoohui pu hou ai ia lakou, i hoohua mai lakou i na hua maoli; a e lilo lakou i hookahi.

69. A e hoolei ia aku ka ino; he oiaio, mailoko aku o ka aina a pau o koʻu pawaina; no ka mea, aia hoi, o keia manawa hookahi wale no kaʻu e paipai aku ai i koʻu pawaina.

70. Eia kekahi, hoouna aku la ka Haku o ka pawaina i kana kauwa; a hele aku la ke kauwa a hana iho la e like me ka ka Haku kauoha ai ia ia, a lawe mai la oia i na kauwa e ae; a he kakaikahi wale no lakou.

71. A i mai la ka Haku o ka pawaina ia lakou, E, o haele aku, a e hana iloko o ka pawaina, me ko oukou ikaika. No ka mea, aia hoi, o ka manawa hope keia e malama ai au i koʻu pawaina; no ka mea, ua kokoke mai ka hopena, a e hiki wawe mai ana ka wa pono; a ina e hana oukou me ko oukou ikaika pu me au, e loaa auanei ia oukou ka hauoli ma na hua aʻu e hoahu ai auanei noʻu iho, no ka wa e hiki koke mai ana.

72. Eia kekahi, hele aku la na kauwa, a hana iho la me ko lakou ikaika; a hana pu mai la hoi ka Haku o ka pawaina me lakou; a hoolohe aku la lakou i na kauoha a ka Haku o ka pawaina, ma na mea a pau.

73. A hoomaka iho la na hua maoli e ulu hou ma ka pawaina; a hoomaka na lala maoli e ulu a kawowo nui loa; a ua hoomaka ae la e uhaki ia ae na lala ulu wale, a hoolei ia aku no; a ua malama lakou i ke kumu a me ka welau ona, i like pu, e like me ka ikaika ona.

74. A pela lakou i hana ai, me ka ikaika loa, e like me na kauoha a ka Haku o ka pawaina, a hiki i ka wa i hoolei ia aku ai ka ino mawaho o ka pawaina, a ua hoola ka Haku nona iho, i lilo hou na laau i na hua maoli; a lilo iho la lakou me he kino hookahi la; a ua like pu na hua; a ua malama iho la ka Haku o ka pawaina nona iho i na hua maoli, i maikai loa ia ia mai kinohi mai.

75. Eia kekahi, i ka wa a ka Haku o ka pawaina i ike ai ua maikai kona hua, a ua ino hou ole kona pawaina, kahea aku la oia i kana poe kauwa, a i mai la ia lakou, Aia hoi, no keia manawa hope ua malama kakou i koʻu pawaina; a ke ike nei oukou ua hana aku la au e like me koʻu makemake; a ua malama iho la au i na hua maoli, i maikai ia, e like me ia ma kinohou; a pomaikai o oukou. No ka mea, ua molowa ole oukou i ka hana pu ana me au iloko o koʻu pawaina, a ua malama i kaʻu mau kauoha, a ua lawe hou mai iaʻu i na hua maoli, i ino hou ole ai koʻu pawaina, a o ka ino ua hoolei ia aku ia, aia hoi, e loaa no ia oukou ka hauoli nui me au, no na hua o koʻu pawaina.

76. No ka mea, aia hoi, no kekahi wa loihi e hoahu ai au i na hua o koʻu pawaina noʻu iho, no ka wa pono, e hiki koke mai ana; a ua malama au i koʻu pawaina no ka manawa hope, a paipai ia ia, a elieli a puni ia, a kipulu ia ia; nolaila, e hoahu ai au noʻu iho i na hua, no kekahi wa loihi, e like me ka mea aʻu i olelo ai.

77. A hiki mai ka manawa e komo hou ai na hua ino iloko o koʻu pawaina, alaila e hoiliili aku au i ka maikai a me ka ino; a e hoola mai au i ka maikai noʻu iho; a e hoolei aku au i ka ino iloko o kona wahi iho. Alaila e hiki mai ana ka wa pono a me ka hopena; e puhi aku au i koʻu pawaina i ke ahi.