O Na Olelo A Moramona

1. Ano, owau, o Moramona, ua aneane au e haawi aku i ka mooolelo aʻu i hana ai iloko o na lima o kaʻu keiki, o Moroni, aia hoi, ua ike au i ka aneane e pau koʻu poe kanaka, o ko Nepai poe i ka luku ia.

2. A he mau haneri makahiki ia mea mahope iho o ka hiki ana mai o Kristo, ka haawi ana oʻu i keia mau mooolelo iloko o na lima o kaʻu keiki; a ke manao nei au e ike oia i ka luku loa ia ana o koʻu poe kanaka. Aka na ke Akua e ae mai ia ia e ola mahope aku o ko lakou make ana, i kakau ai oia i kekahi mau mea no lakou, a i kekahi mau mea no Kristo, i pomaikai ai paha lakou ma ia mea ma kekahi manawa aku.

3. Ano, ke olelo nei au i kekahi mau mea no ka mea aʻu i kakau ai; no ka mea, mahope iho o kaʻu hana ana i ka mooolelo i hoopokole ia mai, mai na papa mai o Nepai, a hiki i ke au o keia alii o Beniamina, a Amaleki i olelo mai ai, imi iho la au iwaena o na mooolelo i haawi ia mai ai iloko o koʻu mau lima, a loaa iho la iaʻu keia mau papa, iloko o lakou keia mooolelo uuku o na kaula, mai Iakoba, a hiki i ke au o keia alii o Beniamina; a a me na olelo he nui no hoi a Nepai.

4. A no ka oluolu o na mea maluna iho o keia mau papa iaʻu, no na wanana e pili ana i ka hiki ana mai o Kristo; a no ka ike ana o koʻu poe kupuna ua hooko ia he nui loa o ia mau mea; he oiaio, a owau kekahi i ike ua hooko ia na mea i wanana ia no makou a hiki i keia la; a o na wanana no na mea mahope aku o keia la, e hiki io mai e pono ai;

5. Nolaila, ke koho nei au i keia mau mea e hoopaa i ke koena o koʻu mooolelo maluna iho o lakou, a e lawe au i ua koena nei mai na papa mai o Nepai; a aole i hiki iaʻu ke kakau i ka hapa haneri o na mea o koʻu poe kanaka.

6. Aka hoi, e lawe au i keia mau papa, aia no iloko o lakou keia mau wanana a me na hoikeana, a e hui pu ia lakou me ke koena o koʻu mooolelo, no ka mea, he mau mea i makemake ia e au; a ke ike nei au e makemake nui ia auanei ia mau mea e koʻu poe hoahanau.

7. A ke hana nei au i keia no kekahi manao naauao; no ka mea, pela ia i hawanawana mai ai iaʻu, e like me ka hana ana o ka Uhane o ka Haku iloko oʻu. Ano, aole au i ike i na mea a pau; aka ua ike ka Haku i na mea a pau e hiki mai ana; nolaila, ke hoolalelale nei oia iloko oʻu e hana e like me kona makemake.

8. A no koʻu poe hoahanau, kaʻu pule i ke Akua, i hiki aku ai lakou i hookahi manawa hou i ka ike i ke Akua; he oiaio, i ka hoolapanai ana o Kristo; i lilo ai lakou i kekahi manawa hou aku i lahuikanaka e olioli ai.

9. Ano, ke hoopau nei au, o Moramona, i ke koena o koʻu mooolelo, aʻu i lawe mai ai mai na papa mai o Nepai; a ke hana nei au ia mea e like me ka naauao a me ka ike a ke Akua i haawi mai ai iaʻu.

10. Nolaila, eia kekahi, mahope iho o ka haawi ana o Amaleki i na papa iloko o na lima o ke alii o Beniamina, lawe aku la oia ia lakou a waiho pu me na papa e ae, i piha ai me na mooolelo i hoili ia mai ai e na alii ia hanauna aku ia hanauna aku, a hiki i na la o ke alii o Beniamina;

11. A ua hoili ia mai ia mau mea mai ke alii Beniamina mai, ia hanauna aku ia hanauna aku, a hiki lakou iloko o koʻu mau lima nei. A ke pule nei au, o Moramona, i ke Akua, i malama ia ai ia mau mea, mai keia manawa aku. A ke ike nei au e malama ia no lakou; no ka mea, ua kakau ia na mea nui maluna iho o lakou, noloko mai o ia mau mea e hookolokolo ia ai koʻu poe kanaka a me ko lakou poe hoahanau, ma ka la nui mahope, e like me ka olelo a ke Akua i palapala ia.

12. Ano, no keia alii o Beniamina: He mau paio kekahi ona iwaena o kona poe kanaka ponoi.

13. Eia hoi kekahi, iho mai la ka poe kaua o ko Lamana poe mailoko mai o ka aina o Nepai, e kaua mai i kona poe kanaka. Aka hoi, houluulu ae la o Beniamina ke alii i kona poe kaua, a ku iho la oia me ke ku e aku ia lakou; a kaua aku la oia me ka ikaika o kona lima ponoi, me ka pahikaua a Labana;

14. A ma ka ikaika o ka Haku i paio aku ai lakou i ko lakou poe enemi, a, pepehi ia aku la he nui na tausani o ko Lamana poe e lakou. Eia kekahi, paio aku la lakou i ko Lamana poe, a hiki i ka wa i kipaku ia aku ai ua poe la mawaho o na aina hooilina a pau o lakou nei.

15. Eia kekahi, a mahope iho o ka hiki ana mai o na Kristo wahahee, a i papani ia ko lakou mau waha, a i hoopai ia lakou e like me ko lakou mau hewa;

16. A mahope iho o ka hiki ana mai o na kaula wahahee, a me na kahuna hai ao a me na kumu wahahee, mawaena o na kanaka, a i hoopai ia lakou a pau e like me ko lakou mau hewa; a mahope iho o ka hiki ana mai o na paio he nui a me na mokuahana he nui, e hoopili aku ana i ko Lamana poe, aia hoi, o ke alii o Beniamina, me ke kokua pu ana o na kaula hemolele e noho ana waena o kona poe kanaka, hookupaa iho la ia i ka maluhia.

17. No ka mea, he kanaka hemolele o ke alii o Beniamina, a noho alii oia maluna o kona poe kanaka ma ka pono; a he nui na kanaka hemolele ma ka aina; a hai aku la lakou i ka olelo a ke Akua, me ka ikaika a me ka mana; a olelo aku la lakou me ka ooi nui no ka ai oolea o na kanaka;

18. Nolaila, me ke kokua ana o keia poe, o ke alii o Beniamina, ma kana hana ana me ka ikaika o kona kino a me ka makaukau o kona uhane holookoa, a me ka na kaula no hoi, ua hookupaa hou oia i ka maluhia ma ka aina.