Ka Buke A Mosia

1. Ano, aole paio hou ma ka aina a puni o Zarahemela, mawaena o ko ke alii Beniamina poe kanaka, no ia mea, ua maluhia mau ke koena a pau o kona mau la.

2. Eia kekahi, aia he mau keikikane kana ekolu; a kapa aku la oia i ko lakou mau inoa, o Mosia, a o Heloruma, a me Helamana. A kauoha aku la oia e ao ia lakou ma ka olelo a pau o kona poe kupuna, i lilo ai lakou ma ia mea i mau kanaka naauao, i ike ai lakou no na wanana i olelo ia ma na waha o ko lakou poe kupuna, i haawi ia mai ai ia lakou ma ka lima o ka Haku.

3. A ao aku la hoi oia ia lakou no na mooolelo i kahakaha ia maluna o na papa keleawe, i ka i ana, E aʻu mau keiki, ke makemake nei au e hoomanao oukou, ina aole no keia mau papa, me keia mau mooolelo a me keia mau kauoha iloko, alaila, ua noho pilikia kakou iloko o ka naaupo, ma keia manawa, e ike ole ana i na mea pohihihi o ke Akua;

4. No ka mea, he mea i hiki ole ai i ko kakou kupuna kane o Lehi ke hoomanao i keia mau mea a pau, e ao mai i kana poe keiki, ina aole no ke kokua ana o keia mau papa; no ka mea, ua ao ia oia ma ka olelo a ko Aigupita, nolaila, ua hiki ia ia ke heluhelu i na kaha nei, a e ao mai ia mau mea i kana poe keiki, i hiki ia lakou ma ia mea ke ao mai i ka lakou poe keiki, a pela e hooko ana i na kauoha a ke Akua, a hiki loa no i keia manawa.

5. Ke i aku nei au ia oukou, e aʻu mau keiki, ina aole no keia mau mea, i malama ia ai a hoola ia ai ma ka lima o ke Akua, i hiki ia kakou ke heluhelu a ke hoomaopopo i kona mau mea pohihihi, a i loaa mau ai kana mau kauoha imua o ko kakou mau maka, ina no ua emi iho no hoi ko kakou poe kupuna iloko o ka hoomaloka, a alikealike kakou me ko kakou poe hoahanau, o ko Lamana poe, ka poe i ike ole no keia mau mea, aole hoi i manaoio ia mau mea, i ka wa i ao ia aku ai ia mau mea ia lakou, no na mooolelo pololei ole o ko lakou poe kupuna.

6. E aʻu mau keiki, ke makemake nei au e hoomanao oukou he oiaio ua mau olelo nei; a he oiaio no hoi ua mau mooolelo nei. A me na papa no hoi a Nepai, aia no iloko o lakou na mooolelo a me na olelo a ko kakou poe kupuna, mai ka manawa a lakou i haalele ai ia Ierusalema, a hiki i keia manawa; a he oiaio no ia mau mea; a ua hiki ia kakou ke ike i ko lakou oiaio, no ka mea, aia no lakou imua o ko kakou mau maka.

7. Ano, e aʻu mau keiki, ke makemake nei au e hoomanao oukou e huli ia mau mea me ka molowa ole, i pomaikai ai oukou ma ia mea; a ke makemake nei au e malama oukou i na kauoha a ke Akua, i hoopomaikai ia ai oukou ma ka aina e like me na olelo i olelo mua ia ai, a ka Haku i hana mai ai i ko kakou poe kupuna.

8. A he nui loa na mea e ae a ke alii o Beniamina i ao aku ai i kana mau keiki, i palapala ole ia iloko o keia buke.

9. Eia kekahi, mahope iho o ka pau ana o ke ao ana o ke alii o Beniamina i kana mau keiki, elemakule iho la oia, a ike iho la ia e hele koke auanei oia i ke ala o ko ka honua a pau; nolaila, manao iho la ia he mea e pono ai, e hoili aku i ke aupuni maluna iho o kekahi o kana poe keiki.

10. Nolaila, kauoha aku la oia e kai ia mai o Mosia imua ona; a eia no na olelo ana i olelo aku ai ia ia, i ka i ana: E kaʻu keiki, ke makemake nei au ia oe e kukala aku i olelo hoolaha a puni o keia aina a pau, mawaena o keia poe kanaka a pau, oia hoi ka poe kanaka o Zarahemela, a me ka poe kanaka o Mosia no hoi e noho nei ma ka aina, i houluulu ia mai ai lakou ma o ua mea la; no ka mea, i ka la apopo e kukala aku ai au i keia poe kanaka mai kuu waha ponoi aku, ooe ke Alii, a me ka luna maluna o keia poe kanaka a ka Haku ke Akua i haawi mai ai ia kaua.

11. A eia hoi, e haawi aku no au i keia lahuikanaka he inoa, i kaulana ai lakou ma o ia inoa la imua o na kanaka a pau, a ka Haku ke Akua i lawe mai ai mailoko mai o ka aina o Ierusalema; a ke hana nei au i keia, no ka mea, he poe kanaka molowa ole lakou ma ka malama ana i na kauoha a ka Haku.

12. A ke haawi aku nei au he inoa ia lakou, e holoi ole ia a mau loa aku, ke ole ma o ka lawehala la.

13. He oiaio, a eia hoi, ke i aku nei au ia oe, ina e haule aku keia poe kanaka i hoopomaikai loa ia e ka Haku iloko o ka lawehala, a e lilo i lahuikanaka hewa a moekolohe, e hookuu aku ka Haku ia lakou, i lilo ai lakou ma o ua mea la i nawaliwali, e like me ko lakou poe hoahanau; aole oia e hoola hou ia lakou, ma o kona mana kupanaha like ole la, me ia i hoola mai ai i ko kakou poe kupuna mamua aku.

14. No ka mea, ke i aku nei au ia oe, ina aole oia i o mai la i kona lima ma ka hoopakele ana i ko kakou poe kupuna, ina ua haule aku lakou iloko o na lima o ko Lamana poe, a lilo lakou i poe make i ko lakou la inaina.

15. Eia kekahi, mahope iho o ka pau ana o keia mau olelo a Beniamina ke alii i kana keiki, kauoha aku la oia ia ia no na mea a pau e pili ana i kona aupuni.

16. A eia hoi, kauoha aku la oia ia ia no na olelo i kahakaha ia maluna o na papa keleawe; a me na papa o Nepai no hoi; a me ka pahikaua hoi a Labana, a me ka mea poepoe, o ka mea kuhikuhi no ia, o ka mea i alakai mai ai i ko makou poe kupuna mawaena o ka waonahele, i hoomakaukau ia ma ka lima o ka Haku, i alakai ia ai lakou ma o ua mea la, o kela mea keia mea e like me ka hoolohe a me ka molowa ole o lakou ia ia.

17. Nolaila, me lakou i malama pono ole ai, aole lakou i pomaikai, aole hoi i holo mua ma ko lakou huakai hele, aka ua hoihoi ia lakou ihope, a loaa ia lakou ka huhu o ke Akua maluna o lakou; a, nolaila, ua hahau ia lakou me ka wi a me na popilikia eha, e hoeueu ai ia lakou ma ka hoomanao i ko lakou mea pono ke hana.

18. Ano, eia kekahi, hele aku la o Mosia, a hana iho la e like me ka kona makuakane i kauoha mai ai ia ia, a kukala aku la i na kanaka a pau ma ka aina o Zarahemela, i hiki ai ia lakou ke hoakoakoa ia lakou iho, e pii aku i ka luakini, e hoolohe aku i na olelo a kona makuakane e olelo aku ai ia lakou.