1. Eia kekahi, mahope iho o ka Mosia hana ana e like me ka kona makuakane i kauoha mai ai ia ia, a ua kukala aku i kahi olelo hoolaha ma ka aina a puni, hoakoakoa mai la na kanaka ia lakou iho mawaena o ka aina a pau, i hiki ia lakou ke pii aku i ka luakini, e hoolohe i na olelo a ke alii o Beniamina e olelo aku ai ia lakou.

2. A he lehulehu loa lakou, a no ka nui loa aole lakou i helu aku ia lakou; no ka mea, ua laha nui loa aku la lakou, a paapu ma ka aina.

3. A lalau aku la hoi lakou i na hanau mua o ko lakou pua holoholona, e hiki ai ia lakou ke kaumaha iho i mohai a me na mohai kuni e like me ka ke kanawai o Mose;

4. A i hiki hoi ia lakou ke hoalohaloha aku i ka Haku, i ko lakou Akua, nana i lawe mai ia lakou mailoko mai o ka aina o Ierusalema, a nana i hoopakele mai ia lakou mailoko mai o na lima o ko lakou poe enemi, a i wae aku i na kanaka pono i poe kumu no lakou; a i kekahi kanaka pono i alii no lakou, nana i hookupaa i ka maluhia ma ka aina o Zarahemela, a nana i ao aku ia lakou e malama i na kauoha a ke Akua, i hauoli ai lakiou a e hoopiha ia ai me ke aloha i ke Akua, a me na kanaka a pau.

5. Eia kekahi, ia lakou i hiki aku ai iluna i ka luakini, kukulu iho la lakou i ko lakou mau halelewa a puni, o kela kanaka keia kanaka e like me kona ohana, oia hoi o kana wahine, a me kana mau keikikane, a me kana mau kaikamahine, a me ka lakou mau keikikane, a me ka lakou mau kaikamahine, mai ka hiapo a hiki i ka panina, o kela ohana keia ohana i kaawale kekahi mai kekahi ae;

6. A kukulu iho la lakou i ko lakou mau halelewa a puni ka luakini, o ko kela kanaka keia kanaka halelewa me ka puka ona e huli ana i ka luakini, i hiki ai ia lakou ke noho iloko o ko lakou mau halelewa, a e hoolohe aku i na olelo a Beniamina ke alii e olelo mai ai ia lakou;

7. No ka mea, no ka lehulehu nui wale, ua hiki ole i ke alii Beniamina ke ao aku ia lakou a pau iloko o na pa ia o ka luakini; nolaila, kauoha ae la oia e kukulu ia kekahi hale kiai, i hiki i kona poe kanaka ma o ua mea la ke hoolohe i na olelo ana e olelo aku ai ia lakou.

8. Eia kekahi, hoomaka iho la oia e olelo aku i kona poe kanaka mai ka hale kiai; a ua hiki ole ia lakou a pau ke lohe i kana mau olelo, no ka lehulehu o na kanaka; nolaila, kauoha ae la ia e palapala ia na olelo ana i olelo aku ai, a e hoouna ia aku i ka poe i lohe ole i ka pae ana o kona leo, i loaa ai no hoi ia lakou kana mau olelo.

9. A eia na olelo ana i olelo aku ai a i kauoha aku ai e palapala ia, i ka i ana, E koʻu poe hoahanau, o oukou a pau i hoakoakoa mai nei ia oukou iho, ka poe i hiki ke hoolohe mai i kaʻu mau olelo, aʻu e olelo aku ai ia oukou i keia la; no ka mea, aole au i kauoha aku ia oukou e pii mai maanei e paani me na olelo aʻu e olelo aku ai, aka i hoolohe mai ai oukou iaʻu, a hoohamama i ko oukou mau pepeiao i lohe ai oukou, a i ko oukou mau naau i hoomaopopo ai oukou, a i ko oukou manao i wehe ia mai ai na mea pohihihi o ke Akua i ko oukou ike.

10. Aole au i kauoha aku ia oukou e pii mai maanei i makau mai ai oukou iaʻu, aole hoi i manao ai oukou ua kela aku au mamua o ke kanaka ku i ka make;

11. Aka ua like au me oukou iho, e noho ana malalo iho o kela ano keia ano o ka nawaliwali ma ke kino, a me ka naau no hoi; aka me au i koho ia mai ai e keia poe kanaka, a hoolaa ia mai ai e koʻu makuakane, a ae ia mai ai ma ka lima o ka Haku, i lilo ai au i luna, a i alii hoi maluna iho o keia poe kanaka; a ua malama ia mai a hoola ia mai ma kona mana like ole, e hookauwa na oukou me ka mana, naau, a me ka ikaika a pau a ka Haku i haawi mai ai iaʻu;

12. Ke i aku nei au ia oukou, me au i ae ia mai ai e hoopau aku i koʻu mau la ma ka oukou hana, a hiki loa i keia manawa, me ka imi ole i ke gula, aole hoi i ke kala, aole no hoi i kela ano i keia ano o ka waiwai mai o oukou mai;

13. Aole hoi au i ae aku e hoopaa ia aku oukou iloko o na halepaahao pouli, aole hoi i hoolilo ae oukou ia oukou iho i mau kauwa hooluhi kekahi na kekahi, aole hoi e pepehi kanaka oukou, aole e powa, aole e aihue, aole e moekolohe, aole au i ae aku i hana aku ai oukou i kela ano keia ano o ka hewa; a ua ao aku ia oukou he mea pono no oukou ke malama i na kauoha a ka Haku, ma na mea a pau ana i kauoha mai ai ia oukou;

14. A owau hoi, owau iho, ua hana me koʻu mau lima ponoi, i hiki iaʻu ke kokua ia oukou, a i hookaumaha ole ia ai oukou me na auhau, a i ole ai i hiki mai kekahi mea maluna o oukou he luhi ke halihali; a no keia mau mea a pau aʻu i olelo ai, he mau hoike oukou i keia la.

15. Aka, e koʻu poe hoahanau, aole au i hana i keia mau mea i hiki iaʻu ke kaena, aole au i hai aku i keia mau mea i hiki iaʻu ma ia mea ke hoohewa ia oukou; aka, ke hai aku nei au i keia mau mea, i ike ai oukou ua hiki iaʻu ke hoike aku he lunaikehala maemae imua o ke Akua i keia la.

16. Aia hoi, ke i aku nei au ia oukou, no kuu i ana ia oukou ua hoopau aku au i koʻu mau la ma ka oukou hana, aole oʻu makemake e kaena, no ka mea, ma ka hana a ke Akua wale no au.

17. Aia hoi, ke hai aku nei au ia oukou i keia mau mea, i loaa ia oukou ka ike; i ike ai oukou i ka wa a oukou e noho ai ma ka hana a ko oukou poe hoa noho, aia wale no oukou ma ka hana a ko oukou Akua.

18. Aia hoi, ua kapa mai oukou iaʻu, o ko oukou alii; a ina owau nei, ka mea a oukou i kapa mai ai o ko oukou alii, e hana no ke kokua ana ia oukou, alaila, aole anei e pono no oukou ke hana no ke kokua ana i kekahi i kekahi?

19. Aia hoi, ina owau, ka mea a oukou i kapa mai ai o ko oukou alii, ka mea i hoopau aku i kona mau la ma ka oukou hana, ma ka hana nae a ke Akua, e hoalohaloha ia mai e oukou e pono ai, E! Pehea la ko oukou pono e hoalohaloha aku ai i ko oukou Alii lani!

20. Ke i aku nei au ia oukou, e oʻu poe hoahanau, ina e haawi aku oukou i ke aloha a me ka hoonani a pau i hiki i ko oukou uhane a pau ke loaa i kela Akua nana i hana mai ia oukou, a i malama mai, a i hoola mai ia oukou, a i hoohauoli mai ia oukou, a i ae mai hoi i noho ai oukou ma ka maluhia kekahi me kekahi;

21. Ke i aku nei au ia oukou, ina e hookauwa aku oukou na ka mea nana oukou i hana mai mai kinohou mai, a e hoola ana ia oukou ia la aku ia la aku, ma ka haawi ana ia oukou i ea, i ola ai oukou a i hele ai, a hana e like me ko oukou makemake iho, a e hanai ana ia oukou mai kekahi minute aku i kekahi; ke i aku nei au ia oukou, ina paha e hookauwa aku oukou nana me ko oukou mau uhane a pau, he poe kauwa nae oukou e waiwai ole aku ai.

22. Aia hoi, o ka malama ana i kana mau kauoha, oia wale no ka mea ana i makemake ai ia oukou; a ua olelo hoopomaikai mai oia ia oukou, ina e malama oukou i kana mau kauoha, e hoopomaikai ia oukou ma ka aina; aole ia e lauwili ae mai ka mea ana i olelo mai ai; nolaila, ina e malama oukou i kana mau kauoha, e hoopomaikai oia ia oukou, a e hoolako ia oukou.

23. Ano, eia ka mua, ua hana mai oia ia oukou, a haawi mai la ia oukou i ko oukou ola; no ia mea, ua aie aku oukou ia ia.

24. A eia ka lua, ke makemake mai nei oia e hana oukou me ia i kauoha mai ai ia oukou; no ia mea, ina e hana oukou, e hoopomaikai koke mai oia ia oukou, a nolaila, ua uku mai oia ia oukou. A ua aie nae oukou ia ia; i keia manawa, a ia manawa aku, a mau loa aku a mau loa aku; nolaila, o ka mea hea la ka oukou e kaena ai?

25. Ano, ke ninau aku nei au, e hiki anei ia oukou ke olelo iki no oukou iho? Ke pane aku nei au ia oukou, Aole. Aole i hiki ia oukou ke olelo, he lepo o ka honua oukou; aka, ua hana ia nae oukou mai ka lepo mai o ka honua; aka hoi, nana no ia, na ka mea i hana mai ia oukou.

26. A owau, owau nei hoi, ka mea a oukou i kapa mai ai o ko oukou alii, aole au i maikai loa aku mamua o oukou; no ka lepo hoi au. A ke ike nei oukou ua elemakule au, a kokoke au e kuu ae i keia kino make i kona makuwahine honua;

27. Nolaila, me au i i aku ai ia oukou ua hookauwa aku no au na oukou, e hele ana me ka naau maemae imua o ke Akua, pela au i kauoha aku ai i hoakoakoa mai oukou ia oukou iho, i loaa hewa ole au, a i kau ole mai ai ko oukou koko maluna oʻu, iaʻu e ku ai e hookolokolo ia e ke Akua no na mea ana i kauoha mai ai iaʻu no oukou.

28. Ke i aku nei au ia oukou, ua kauoha aku au i hoakoakoa ae oukou ia oukou iho, i hiki iaʻu ke hoomaemae aku i koʻu mau aahu mai ko oukou koko mai, ma keia manawa aʻu i aneane ai e iho ilalo i koʻu lua kupapau, i hiki iaʻu ke iho ilalo me ka malu, a i pii aku ai koʻu uhane palaho ole e hui pu me ka poe mele iluna ma ka hoolea ana i ke Akua pono.

29. A eia hoi, ke i aku nei au ia oukou, ua kauoha aku au i hoakoakoa oukou ia oukou iho, i hiki iaʻu ke hai aku ia oukou, ua hiki ole iaʻu ke noho hou i kumu no oukou, aole hoi i alii no oukou;

30. No ka mea, aia no e haalulu nui loa ana koʻu kino a puni i keia manawa, oiai au e hoao ana e olelo aku ia oukou; aka, ke kokua mai nei ka Haku ke Akua iaʻu, a ua ae mai iaʻu e olelo aku au ia oukou, a ua kauoha mai iaʻu e hai aku au ia oukou i keia la, he alii a he luna kaʻu keiki o Mosia, maluna iho o oukou.

31. Ano, e koʻu poe hoahanau, ke makemake nei au e hana oukou me ka oukou i hana mua ai. Me ka oukou i malama ai i kaʻu mau kauoha, a me na kauoha hoi a koʻu makuakane, a i hoopomaikai ia ai, a i hoopakele ia ai hoi i haule ole ai oukou iloko o na lima o ko oukou poe enemi, pela hoi ina e malama oukou i na kauoha a kaʻu keiki, a i na kauoha a ke Akua, e haawi ia auanei ia oukou e ia, e hoopomaikai ia oukou ma ka aina, aole no he mana ko oukou poe enemi maluna o oukou.

32. Aka, e koʻu poe kanaka, e makaala, o ala mai auanei na paio mawaena o oukou, a e haliu ae oukou e hoolohe i ka uhane ino, i olelo ia mai ai e koʻu makuakane o Mosia.

33. No ka mea, aia hoi, ua hookau ia mai kahi poino maluna o ka mea nana e haliu ae e hoolohe i ua uhane la; no ka mea, ina e haliu ae oia e hoolohe ia ia la, a e noho a e make iloko o kona mau hewa, oia ke inu i ka hoohewa ia o kona uhane iho; no ka mea, e loaa ana ia ia kekahi hoopai mau loa i uku nona, oiai, ua lawehala i ke kanawai o ke Akua, me ke ku e i kona ike iho.

34. Ke i aku nei au ia oukou, aole kekahi mea mawaena o oukou, o ka oukou mau keiki uuku wale no i koe, i ao ole ia no keia mau mea; i ike ole ai he poe aie mau loa oukou i ko oukou Makua i ka lani, e haawi aku ai ia ia i na mea a pau o oukou a me oukou pu kekahi, a i ao ia hoi no na mooolelo i piha ai me na wanana i olelo ia ai e na kaula hemolele, a hiki loa i ka wa a ko kakou kupuna kane a Lehi i haalele mai ai ia Ierusalema;

35. A me na mea a pau no hoi i olelo ia ai e ko kakou poe kupuna, a hiki i keia manawa. Aia hoi, olelo mai la hoi lakou i na mea i kauoha ia mai ai ia lakou e ka Haku; nolaila, ua oiaio a pololei ia mau mea.

36. Ano, ke i aku nei au ia oukou, e koʻu poe hoahanau, mahope iho o ko oukou ike ana a ao ana i keia mau mea a pau, ina e lawehala oukou, a e hele me ke ku e i ka mea i olelo ia ai, i hoonee aku ai oukou ia oukou iho mai ka Uhane o ka Haku aku, i ole no kela kau wahi iloko o oukou e alakai ia oukou iloko o na alanui o ka naauao, i hoopomaikai ia ai oukou, i hoolako ia ai, a i hoola ia ai hoi,

37. Ke i aku nei au ia oukou, o ke kanaka e hana ana i keia, oia kekahi e kipi ana ma ke akea i ke Akua; nolaila, e haliu ana oia e hoolohe i ka uhane ino, a e lilo ana i enemi i ka pono a pau; nolaila, aole no ka Haku kau wahi iloko ona, no ka mea, aole oia e noho ana iloko o na luakini hemolele ole.

38. Nolaila, ina e mihi ole ana kela kanaka, a noho, a make i enemi i ke Akua, e hoala ana ke koi ana o ko ke Akua hoopai i kona uhane make ole i ka ike lea i kona hewa ponoi, a he mea keia e emi aku ai ia mai ke alo aku o ka Haku, a e hoopiha ai i kona naau me ka hewa, a me ka eha, a me ka walania loa, a ua like ia me ke ahi pio ole, nona na lapalapa e pii ae ana ia ao aku ia ao aku.

39. Ano, ke i aku nei au ia oukou, aole o ke aloha kuleana maluna o ua kanaka la; nolaila, o ka noho ma ka ehaeha pau ole ka hoopai hope ona.

40. E, auhea oukou, e na elemakule a pau, a me oukou hoi, e na kanaka opiopio, a me oukou hoi, e na keiki uuku, ka poe i hiki ke hoomaopopo mai i kaʻu mau olelo, (no ka mea, ua olelo akaka au ia oukou, i hiki ia oukou ke hoomaopopo,) ke noi aku nei au e ala ae oukou i ka hoomanao ana i ka noho weliweli ana o ka poe i haule iloko o ka hala;

41. A eia hoi, ua makemake au e noonoo oukou ma ka noho pomaikai a hauoli ana o ka poe i malama i na kauoha a ke Akua. No ka mea, aia hoi, ua hoopomaikai ia lakou ma na mea a pau, o ko ke kino a me ko ka uhane hoi; a ina e hoomau pono lakou a hiki i ka hopena, e hookipa ia aku lakou ma ka lani, i hiki ai ia lakou ke noho pu me ke Akua ma kekahi noho ana o ka pomaikai pau ole. E hoomanao, e hoomanao he oiaio keia mau mea; no ka mea, ua olelo mai ka Haku ke Akua ia mea.