1. Eia kekahi, mahope iho o ka pau ana o ka ke alii Limai olelo ana i kona poe kanaka, no ka mea, olelo aku la oia i na mea he nui wale ia lakou, a he kakaikahi wale no o ia mau mea kaʻu i kakau ai ma keia buke, hai aku la oia i kona poe kanaka i na mea a pau no ko lakou poe hoahanau, ma ka aina o Zarahemela;

2. A hooku ae la oia ia Amona imua o ka ahakanaka, nana e hai aku ia lakou i na mea a pau a ko lakou poe hoahanau i loaa mai ai, mai ka wa a Zenifa i pii mai ai mailoko mai o ka aina, a hiki i kona wa i pii mai ai mailoko mai o ka aina.

3. A hai aku la hoi oia ia lakou i na olelo hope a ke alii Beniamina i ao mai ai ia lakou, a wehewehe aku la ia mau mea i na kanaka o ke alii Limai, i hiki ia lakou ke hoomaopopo i na olelo a pau ana i olelo mai ai.

4. A eia kekahi, mahope iho o kana hana ana i keia a pau, hookuu ae la o ke alii Limai i ka ahakanaka, a kauoha ae la e hoi aku lakou, o kela mea keia mea i kona hale iho.

5. Eia kekahi, kauoha ae la oia e lawe ia mai na papa, kahi i kakau ia ai ka mooolelo o kona poe kanaka, mai ka manawa a lakou i haalele aku ai i ka aina o Zarahemela, imua o Amona, i heluhelu ai oia ia mau mea.

6. Ano, ia Amona i heluhelu ai i ka mooolelo, ninau mai la ke alii ia ia, e ike ina ua hiki paha ia ia ke unuhi i na olelo. A hai aku la o Amona ia ia ua hiki ole ia ia.

7. A i mai la ke alii ia ia, Ua kaumaha iho la au no na pilikia o koʻu poe kanaka, a hoouna aku la au i hookahi kanaha a me na mea keu ekolu o koʻu poe kanaka, e hele aku iloko o ka waonahele, e hiki ia lakou ma ia mea ke loaa ka aina o Zarahemela; i hiki ia makou ke nonoi aku i ko makou poe hoahanau e hoopakele mai ia makou mailoko aku o ka noho luhi ana;

8. A ua hili lakou ma ka waonahele, no na la he nui wale, aka ua molowa ole lakou, aole nae i loaa ka aina o Zarahemela, aka hoi hou mai la i keia aina, mahope o ka hele ana aku ma kahi aina mawaena o na wai he nui wale; ua loaa kahi aina i uhi ia me na iwi o na kanaka, a o na holoholona, a pela aku, a ua uhi ia me na koena o na hale o kela ano o keia ano; ua loaa kekahi aina i hoopiha e ia mamua me kekahi poe kanaka i kinikini e like me na lehulehu o ka Iseraela.

9. A i mea e hoike mai ai he mau mea oiaio ka lakou i olelo mai ai, ua lawe mai lakou i na papa he iwakaluakumamaha, i piha me na kaha; a he gula maemae ia mau mea.

10. Aia hoi, ua lawe mai hoi lakou i na pale umauma, a ua nunui; a he keleawe melemele, a me ke keleawe ulaula ia mau mea, a, aohe kina iki.

11. A eia hou, ua lawe mai lakou i na pahikaua, ua popopo na au o ia mau mea, a ua ai ia hoi na pahi me ke kukae hao; aole kekahi mea ma ka aina i hiki ke unuhi mai i ka olelo a me na kaha maluna o na papa. Nolaila, i aku ai au ia oe, E hiki anei ia oe ke unuhi?

12. A ke i hou aku nei au ia oe, ke ike nei anei oe i kekahi mea e hiki ke unuhi? No ka mea, ua makemake au e unuhi ia keia mau mooolelo iloko o ka kakou olelo. No ka mea, malia paha e haawi mai no ia mau mea i ka ike, no kekahi koena o keia poe kanaka i luku ia, mai ia lakou mai keia mau mooolelo; a i ole ia, e haawi mai paha ia mau mea i ka ike no keia poe kanaka ponoi, ka poe i luku ia; a ua makemake au e ike i ke kumu o ko lakou luku ia ana.

13. Ano, i aku la o Amona ia ia, ua hiki io iaʻu ke hai aku ia oe, e ke alii, no kekahi kanaka i hiki ke unuhi i na mooolelo; no ka mea, nona na mea i hiki ai ia ia ke nana, a ke unuhi i na mooolelo a pau o ka wa kahiko; a he haawina ia mai ke Akua mai. A ua kapa ia keia mau mea he mau mea unuhi olelo; aole e hiki i kekahi kanaka ke nana iloko o laua, ke kauoha ole ia oia, o nana oia no ka mea e pono ole ai ia ia, a e make oia. A o ka mea i kauoha ia mai e nana iloko o laua, ua kapa ia oia, He mea nana-Urima.

14. Aia hoi, o ke alii o na kanaka ma ka aina o Zarahemela, oia no ke kanaka i kauoha ia e lawelawe i keia mau mea, a nana keia haawina kiekie mai ke Akua mai.

15. A i mai la ke alii, Ua nui loa aku ka mea nana-Urima mamua o ke kaula.

16. A i aku la o Amona, O ka mea nana-Urima he mea hoike oia, a he kaula hoi; aole e hiki i ke kanaka, ke loaa ka haawina nui ae, ke ole loaa ia ia ka mana o ke Akua, ka mea e hiki ole ai i ke kanaka; aka e hiki no i ke kanaka ke loaa ka mana nui ke haawi ia mai ia ia mai ke Akua mai.

17. Aka o ka mea nana-Urima ua hiki ia ia ke ike i na mea i hala, a i na mea hoi e hiki mai ana; a ma o lakou la e hoike ia mai na mea a pau, e aho ke olelo, e hoike ia mai na mea huna, a e puka mai i ka malamalama na mea nalo, a o na mea i ike ole ia, e hoike ia mai auanei ma o lakou la; a e hoike ia mai no hoi na mea ma o lakou la, aole e hiki ke ike ia ke ole lakou.

18. Pela ke Akua i hoomakaukau ai i ala i hiki i ke kanaka, ma o ka manaoio la, ke hana i na hana mana nui; nolaila, e lilo ana oia i mea e pomaikai nui ai kona poe hoanoho.

19. Ano, ia Amona i hoopau ai i ka olelo ana i keia mau olelo, hauoli nui loa iho la ke alii, a hoalohaloha aku la i ke Akua, me ka i ana, He oiaio no paha, aia no he mea pohihihi nui iloko o neia mau papa; a he oiaio no, ua hoomakaukau ia keia mau mea unuhi olelo no ka wehewehe ana i na mea pohihihi a pau me neia i na keiki a kanaka.

20. E! Kupanaha na hana a ka Haku, a loihi kona hoomanawanui ana me kona poe kanaka; he oiaio, nui ka makapo a me ka paakiki o ka hoomaopopo o na keiki a kanaka; no ka mea, aole lakou e imi i ka naauao, aole o lakou makemake e noho alii oia maluna o lakou.

21. He oiaio, ua like lakou me he pua hihiu la, e mahuka ana mai ke kahu hipa aku, a e hele liilii ana, a i hoa ia, a i ai ia e na holoholona o ka ululaau.