1. Ano, ia Mosia i hana ai i keia, hoouna aku la oia mawaena o ka aina a pau, mawaena o na kanaka a pau, e iini ana e ike i ko lakou makemake no ka mea e lilo ai i alii no lakou.

2. A eia kekahi, hiki mai la ka leo o na kanaka, me ka i ana, Ua makemake makou ia Aarona kau keiki, i alii no makou, a i luna no makou.

3. Ano, ua pii aku la o Aarona i ka aina o Nepai, nolaila, ua hiki ole i ke alii ke hoili ai i ke aupuni maluna ona; aole hoi o Aarona i ae e lawe maluna ona i ke aupuni; aole hoi i ae mai kekahi o na keiki a Mosia e lawe maluna iho ona i ke aupuni.

4. Nolaila, hoouna hou aku la o ke alii Mosia mawaena o na kanaka, he oiaio, he olelo i palapala ia kana i hoouna aku ai mawaena o na kanaka. A eia na olelo i palapala ia, i ka i ana:

5. Aia hoi, e oʻu poe kanaka, a me oʻu poe hoahanau, no ka mea, ke manao nei au ia oukou pela; no ka mea, ke makemake nei au ia oukou e noonoo i ka mea i hea ia ai oukou e noonoo; no ka mea, ke iini nei oukou e loaa i alii.

6. Ano, ke hai aku nei au ia oukou, o ka mea nona ke kuleana pololei i ke aupuni ua hoole mai, aole e lawe ae maluna iho ona i ke aupuni.

7. A, ano, ina e wae ia kekahi mea ma kona hakahaka, aia hoi, ke makau nei au e ea mai na paio mawaena o oukou; a owai la ka i ike, e huhu paha auanei kaʻu keiki, ka mea nona ke aupuni, a e kauo aku i kekahi poe o keia poe kanaka mahope ona, a he mea ia e hoala ai i na kaua a me na paio mawaena o oukou; a he mea ia e hookahe aku ai i ke koko a nui, a e hookapae ai i ka aoao o ka Haku; he oiaio, a e luku ai i na uhane o na kanaka he nui.

8. Ano, ke i aku nei au ia oukou, e naauao kakou a e noonoo i ua mau mea nei, no ka mea, aole o kakou pono ke hoopoino i kaʻu keiki, aole hoi o kakou pono ke hoopoino ia hai, ke wae ia ae oia ma kona hakahaka.

9. A ina paha e huli hou ae kaʻu keiki i kona haaheo a me na mea lapuwale, e hoole mai oia i na mea ana i olelo mai ai, a e koi mai i kona hooilina no ke aupuni, a he mea ia e hoala ai ia ia a me keia poe kanaka hoi e hana nui i na hewa.

10. Ano, e naauao kakou, a e nana e imua i ua mau mea nei, a e hana i ka mea e lilo ai no ka malu o keia poe kanaka.

11. Nolaila, owau no ko oukou alii i ke koena o kuu mau la; aka hoi, e wae aku kakou i na lunakanawai, e hookolokolo i keia poe kanaka e like me ko kakou kanawai, a e hooponopono hou kakou i na oihana o keia poe kanaka, no ka mea, e wae aku no kakou i na kanaka naauao i mau lunakanawai, na lakou a hooponopono aku i ua poe kanaka nei e like me na kanawai o ke Akua.

12. Ano, e aho ko ke kanaka hookolokolo ia ana e ke Akua, mamua o kona e ke kanaka, no ka mea, ua pololei mau na hoopai o ke Akua, aka aole pololei mau na hoopai o kanaka;

13. Nolaila, ina paha e hiki ia oukou ke loaa na kanaka pono i poe alii no oukou, he poe e hookupaa ana i na kanawai o ke Akua, a e hooponopono i keia poe kanaka e like me kana mau kauoha; he oiaio, ina paha e hiki ia oukou ke loaa na kanaka i poe alii no oukou, he poe e hana ana e like me koʻu makuakane o Beniamina i hana ai no keia poe kanaka; ke i aku nei au ia oukou, ina he mea hiki mau keia, alaila, he mea kupono ke loaa mau ia oukou na alii e noho alii ai maluna o oukou.

14. A owau hoi, ua hana owau iho me ka mana a pau o ka noeau i loaa ai iaʻu, e ao aku ia oukou i na kauoha a ke Akua, a e hookupaa aku i ka malu mawaena o ka aina, i ole na kaua a me na paio hoi, i ole aihue, aole hoi powa ana, aole hoi pepehi kanaka ana, aole hoi kela ano keia ano o na hewa.

15. A o ka mea nana i hana i ka hewa, ia ia wau i hoopai aku ai i ku i ke kanawai i haawi ia mai ai ia kakou e ko kakou poe kupuna.

16. Ano, ke i aku nei au ia oukou, aole i pono na kanaka a pau, nolaila, aole ia he mea e pono ai no oukou e loaa i alii, a i mau alii, e noho alii ai maluna o oukou.

17. No ka mea, aia hoi, nui na hewa ma o ke alii hewa hookahi la e hana ia ai! He oiaio, a nui loa ka luku ia ana!

18. He oiaio, e hoomanao i ke alii o Noa, i kona hewa a me kana hana hoopailua; a me na hewa a me na mea hoopailua hoi o kona poe kanaka. Aia hoi, nui ka luku ana i ili mai maluna iho o lakou; a no ka lakou mau hala hoi, ua lawe ia lakou iloko o ka noho luhi ana.

19. A ina ua hana ole mai ko lakou Mea naauao loa nana lakou i hana, a o keia no ko lakou mihi io, ina ua noho lakou iloko o ka noho luhi ana me ka hiki ole ke pakele a hiki i keia manawa.

20. Aka hoi, hoopakele mai la oia ia lakou no ko lakou hoohaahaa ana ia lakou iho imua ona; a no ko lakou kahea nui ana ia ia, hoopakele iho la oia ia lakou mailoko aku o ka noho luhi ana; a pela ka Haku e hana ai me kona mana i na manawa a pau mawaena o na keiki a kanaka, e o mai ana i ka lima o ke aloha i ka poe i paulele aku ia ia.

21. A, aia hoi, ke i aku nei au ia oukou, ua hiki ole ia oukou ke hoonele aku i kekahi alii hewa i ka noho alii, ke ole ma o ka paio nui ana la, a me ka hookahe ana i ke koko a nui.

22. No ka mea, aia hoi, ia ia he poe makamaka ma ka hewa, a e hoonoho ana oia i kona poe koa a puni oia; a e hahae ana oia i na kanawai o ka poe i noho alii ai ma ka pono mamua aku ona; a e hehi ana oia malalo iho o kona mau wawae i na kanawai o ke Akua;

23. A e hooholo ana oia i na kanawai, a e hoouna aku ana ia mau kanawai mawaena o kona poe kanaka; he oiaio, i na kanawai mamuli o ke ano o kona hewa iho; a o ka mea i hoolohe ole i kona mau kanawai, e kena aku oia e pepehi ia; a o ka mea i kipi aku ia ia, e hoouna aku oia i kona poe koa e kaua aku ia lakou, a ina e hiki ia ia, e luku no oia ia lakou; a pela kekahi alii pono ole i hookapae ai i na aoao o ka pono a pau.

24. Ano hoi, ke i aku nei au ia oukou, aole ia he mea pono ke kau mai i na mea ino me neia maluna iho o oukou;

25. Nolaila, e koho aku oukou ma ka leo o ua poe kanaka nei i na lunakanawai, i hookolokolo ia ai oukou e like me na kanawai i haawi ia mai ia oukou e ko kakou poe kupuna, a ua pololei ua mau kanawai la, a i haawi ia mai ia lakou ma ka lima o ka Haku.

26. Ano, he mea i ike pinepine ole ia, ka leo o na kanaka e makemake ana i kekahi mea i ku e i ka mea pololei; aka he mea i ike pinepine ia no ka hapa uuku o na kanaka e makemake i ka mea pololei ole; nolaila, o keia ka oukou e malama ai, a e hoolilo ia i kanawai no oukou, e hana i ka oukou hana ma o ka leo la o na kanaka.

27. A ina e hiki mai ka manawa e koho aku ai ka leo o na kanaka i ka hewa, alaila, oia ka manawa e ili mai ai na hoopai o ke Akua maluna iho o oukou; he oiaio, alaila, oia ka manawa e hoopai mai ai oia ia oukou me ka luku nui, me ia i hana mai ai mamua aku i ko keia aina.

28. A, ano, ina he mau lunakanawai ko oukou, a, aole o lakou e hookolokolo aku ia oukou e like me ke kanawai i haawi ia mai ai, alaila ua hiki ia oukou ke hoopii aku e hookolokolo ia ai lakou e kekahi lunakanawai kiekie ae;

29. Ina e hookolokolo ole ko oukou mau lunakanawai kiekie ae i na hookolokolo pololei, alaila e hoakoakoa oukou i kekahi poe he uuku o ko oukou mau lunakanawai haahaa, a na lakou e hookolokolo aku i ko oukou mau lunakanawai kiekie ae, e like me ka leo o na kanaka.

30. A ke kauoha aku nei au ia oukou e hana i ua mau mea nei ma ka makau i ka Haku; a ke kauoha aku nei au ia oukou e hana i ua mau mea nei, a e noho oukou me ke alii ole; ke hana ua poe kanaka nei i na hewa a me na hala, e hooili ia ai ua mau hewa la maluna iho o ko lakou mau poo iho.

31. No ka mea, aia hoi, ke i aku nei au ia oukou, o na hewa o na kanaka he nui ua hana ia ma o na hala la a ko lakou poe alii; nolaila, ua hooili ia ka lakou mau hala maluna iho o na poo o ko lakou poe alii.

32. Ano, ke makemake nei au i pau ai keia like ole ma neia hope aku ma keia aina, o ka oi aku nae mawaena o koʻu poe kanaka nei; aka, ke makemake nei au i ua aina nei e lilo i aina kuokoa, i loaa alikealike ai i kela kanaka keia kanaka kona mau mea e pono ai a me na mea e pomaikai ai, i ka manawa a pau a ka Haku e ike ai he pono, e ola ai a e noho ai kakou ma ka aina; he oiaio, i ka manawa a pau a kekahi o ka kakou poe mamo e noho ai ma ka ili o ka aina.

33. A he nui aku na mea e ae a Mosia ke alii, i palapala ai ia lakou, e wehewehe ana ia lakou i na mea hoao a me na pilikia o ke alii pono; he oiaio, i na mea luhi a pau o ka uhane no ko lakou poe kanaka, a me na ohumu ana a pau o na kanaka i ko lakou alii; a hoomaopopo aku la oia i ua mau mea la a pau ia lakou.

34. A hai aku la oia ia lakou aole ua mau mea nei he mea e pono ai: aka e ili mai ke kaumaha maluna iho o na kanaka a pau, e hiki i kela kanaka keia kanaka ke hapai i kona hapa.

35. A wehewehe aku la no hoi oia ia lakou i na mea e pilikia ai lakou, ma ka noho alii ana o kekahi alii pono ole maluna o lakou;

36. He oiaio, i kona mau hala a mau mea hoopailua, a i na kaua, a me na paio, a i ka hookahe koko ana, a i ka aihue ana a me ka powa ana, a i ka hana ana i na moekolohe, a me kela ano keia ano o na hala, i hiki ole ke helu ia; e hai ana ia lakou aole ua mau mea nei he mea e pono ai; e ku e ikaika ana ua mau mea la i na kauoha a ke Akua.

37. Ano, eia kekahi, mahope iho o ka hoouna ana aku o Mosia ke alii i ua mau mea nei iwaena o na kanaka, ua maopopo ia lakou ka oiaio o kana mau olelo;

38. Nolaila, haalele iho la lakou i ko lakou makemake ana i alii, a makemake nui loa i alikealike ka pono o kela kanaka keia kanaka mawaena o ka aina a pau; he oiaio, a ae mai la kela kanaka keia kanaka e hoopai ia no kona hewa iho.

39. Nolaila, eia kekahi, houluulu aku la lakou ia lakou iho ma na aha a puni ka aina, e koho aku i ko lakou poe lunakanawai, e hooponopono ia lakou e like me ke kanawai i haawi ia mai ai ia lakou; a ua hauoli nui loa iho la lakou, no ua pomaikai la i haawi ia mai ai ia lakou.

40. A mahuahua ikaika ko lakou aloha ia Mosia; he oiaio, ua manao nui aku lakou ia ia mamua o na kanaka e ae a pau; no ka mea, aole lakou i nana aku ia ia me he mea hooluhi la, e imi ana i ka waiwai, he oiaio, no kela waiwai i hoohaumia ai i ka uhane, no ka mea, aole oia i auhau i waiwai mai o lakou aku, aole hoi oia i olioli ma ka hookahe ana i ke koko; aka, ua hookupaa aku oia i ka malu ma ka aina; a ua ae aku la oia i kona poe kanaka e hoopakele ia aku lakou mai na mea ano luhi aku a pau; nolaila, ua manao nui loa lakou ia ia, he oiaio, i hiki ole ke ana ia.

41. A eia kekahi, wae aku la lakou i na lunakanawai e noho luna maluna o lakou, a e hooponopono iho ia lakou e like me ke kanawai; a o keia ka lakou i hana ai mawaena o ka aina a pau.

42. A eia kekahi, wae ia aku la o Alama i lunakanawai nui kiekie; a oia no hoi ke kahuna nui; ua hooili mai kona makuakane i ka oihana maluna ona, a i haawi aku ia ia i ka malama ana no na mea a pau no ka ekalesia.

43. Ano, eia kekahi, hele aku la o Alama ma na aoao o ka Haku, a malama aku la oia i kana mau kauoha, a kau aku la oia i na hoopai pololei; a he maluhia mau mawaena o ka aina;

44. A pela i hoomaka ai ke au o na lunakanawai mawaena o ka aina a pau o Zarahemela, mawaena o na kanaka a pau i kapa ia ko Nepai poe; a o Alama oia no ka lunakanawai mua, a nui kiekie.

45. Ano, eia kekahi, make aku la kona makuakane, he kanawalukumamalua kona mau makahiki, ua ola iho la oia e hooko aku i na kauoha a ke Akua.

46. A eia kekahi, make aku la no hoi o Mosia, ma ka makahiki kanakolukumamakolu o kona noho alii ana, a he kanaonokumamakolu kona mau makahiki; ke hui ia, elima haneri kumamaiwa makahiki mai ka wa mai a Lehi i haalele aku ai ia Ierusalema;

47. A pela i pau ai ke au o na alii maluna iho o ka poe kanaka o Nepai; a pela i pau ai na la o Alama, ka mea nana i hookumu ae i ko lakou ekalesia.