Mokuna 5
1. Ano, eia kekahi, i ka wa a ke alii o Beniamina, i olelo aku ai pela i kona poe kanaka, hoouna aku la oia iwaena o lakou, me ka makemake e ike no kona poe kanaka mai, ina ua manaoio lakou i na olelo ana i olelo aku ai ia lakou.
2. A hooho aku la lakou me ka leo hookahi, i ka i ana, Ae, ke manaoio nei makou i na olelo a pau au i olelo mai ai ia makou; a ua ike makou ua paa loa, a oiaio ia mau mea, na ka Uhane o ka Haku Mana kiekie loa, i hana mai he hoololi mana iloko o makou, oia hoi ko makou mau naau, i ole makou makemake hou e hana ino, aka e hana mau i ka pono.
3. A o makou hoi, ma o ka lokomaikai mana loa la o ke Akua, a me na hoikeana o kona Uhane, ua loaa ia makou iho ka ike nui no na mea e hiki mai ana; a ina he mea e pono ai, ua hiki ia makou ke wanana aku no na mea a pau.
4. A o ka manaoio a makou i loaa ai no na mea a ko makou alii i olelo mai ai ia makou, oia ka i lawe mai ia makou i keia ike nui, ma o ia mea la e hauoli nei makou me keia olioli nui loa;
5. A ke ae aku nei makou e komo iloko o kahi berita me ko makou Akua, e hana i kona makemake, a e hoolohe i kana mau kauoha, ma na mea a pau ana e kauoha mai ai ia makou, i ke koena a pau o ko makou mau la, i ole ai makou e hooili mai maluna o makou iho i ka ehaeha pau ole, me ia i olelo ia ai e ka anela, i ole makou e inu noloko mai o ke kiaha o ka inaina o ke Akua.
6. Ano, o keia no na olelo a ke alii o Beniamina i makemake ai mai o lakou mai; a nolaila i aku la oia ia lakou, Ua olelo mai oukou i na olelo aʻu i makemake ai; a o ka berita a oukou i hana ai, he berita pono ia.
7. Ano, no keia berita a oukou i hana ai, e kapa ia oukou na keiki a Kristo, o kana poe keikikane, a me kana poe kaikamahine; no ka mea, aia hoi, i keia la ua hanau mai oia ia oukou ma ka Uhane; no ka mea, ke i mai nei oukou ua hoano e ia mai ko oukou mau naau ma o ka manaoio la i kona inoa; nolaila, ua hanau ia mai oukou nana, a ua lilo oukou i poe keikikane a i poe kaikamahine nana.
8. A malalo iho o keia inoa, ua hookuu ia mai oukou; aohe e hiki ia oukou ke hookuu ia ae ma o kekahi inoa e ae la. Aohe e haawi ia mai kekahi inoa e ae, ma o na la e hiki mai ai ke ola; nolaila, ke makemake nei au ia oukou e lawe maluna o oukou i ka inoa o Kristo, e ka poe a pau i komo iloko o ka berita me ke Akua, e hoolohe oukou a hiki i ka hopena o ko oukou mau ola.
9. A e hiki mai keia, o ka mea e hana ana i keia, e loaa no auanei oia ma ka lima akau o ke Akua, no ka mea, e ike no oia i ka inoa i kapa ia mai ai oia; no ka mea, e kapa ia oia ma ka inoa o Kristo.
10. Ano, e hiki mai keia, o ka mea e lawe ole maluna ona i ka inoa o Kristo, e kapa ia no oia ma kekahi inoa e ae; nolaila, e loaa ana oia ia ia iho ma ka lima hema o ke Akua.
11. A ke makemake nei au e hoomanao hoi oukou, o keia no ka inoa aʻu i olelo aku ai e haawi ana au ia oukou, e holoi ole ia ana a mau loa aku, ke lawehala ole; nolaila, e malama oukou i lawehala ole ai, i holoi ole ia ai keia inoa mai ko oukou mau naau aku.
12. Ke i aku nei au ia oukou, ke makemake nei au e hoomanao oukou e hoopaa i ka inoa i kakau mau ia ma ko oukou mau naau, i ole ai e loaa oukou ma ka lima hema o ke Akua, aka i lohe oukou a i ike i ka leo o oukou e kahea ia mai ai, a i ka inoa hoi ana e kapa mai ai ia oukou;
13. No ka mea, pehea la i ike ai kahi kanaka i ka haku ana i hookauwa ole aku ai, a he malihini oia hoi ia ia, a i mamao aku mai na manao a me na makemake o kona naau?
14. A eia hou; ke lawe nei anei kekahi kanaka i kahi hoki o kona hoalauna, a malama ia ia? Ke i aku nei au ia oukou, Aole; aole hoi oia e ae aku e ai ia mawaena o kona mau pua holoholona, aka e hooemu aku no ia ia, a e hookuke aku ia ia mawaho. Ke i aku nei au ia oukou, pela no ia auanei mawaena o oukou, ina aole oukou e ike i ka inoa o oukou i kapa ia mai ai.
15. Nolaila, ke makemake nei au e kupaa a e naueue ole oukou, e lawa mau ana ma na hana maikai, i sila ai o Kristo, ka Haku ke Akua Mana kiekie loa, ia oukou nona, i lawe ia ai oukou i ka lani, i loaa ia oukou ka hoola ia a me ke ola mau loa, ma o ka naauao la, a me ka mana, a me ka hoopono, a me ke aloha ona, nana i hana i na mea a pau, ma ka lani a ma ka honua, oia no ke Akua maluna o na mea a pau. Amene.