1. Eia kekahi, hoili iho la o Zenifa i ke aupuni maluna o Noa, kekahi o kana mau keikikane; nolaila, i hoomaka ai o Noa e noho alii ma kona hakahaka; aole ia i hele ma na aoao o kona makuakane.

2. No ka mea hoi, aole oia i malama i na kauoha a ke Akua, aka hele aku la oia mamuli o na makemake o kona naau iho. A he nui na wahine a me na haiawahine ana. A he kumu ia no kona poe kanaka e hana ai i ka hewa, a e hana ai i ka mea hoopailua ma ke alo o ka Haku. He oiaio, a ua hana lakou i na moekolohe, a me na ano a pau o ka hewa.

3. A kau mai la oia i ka auhau hapalima maluna o na mea a pau o lakou; i ka hapalima o ko lakou gula a o ko lakou kala, a i ka hapalima o ko lakou zifa, o ko lakou keleawe ulaula, a o ko lakou keleawe melemele a me ko lakou hao; a i ka hapalima o ko lakou mau holoholona i kupalu ia; a i ka hapalima hoi o ko lakou hua liilii.

4. A ua lawe oia i keia mau mea a pau, e hanai ia ia iho, a i kana mau wahine, a i kana mau haiawahine, a i kana poe kahuna, a i ka lakou mau wahine, a i ka lakou mau haiawahine; pela oia i hoololi ai i na oihana o ke aupuni.

5. No ka mea, hoopau ae la oia i na kahuna a pau i hoolaa ia e kona makuakane, a hoolaa ae la i na mea hou ma ko lakou hakahaka, i na mea i hookiekie ia ma ka haaheo o ko lakou mau naau.

6. He oiaio no, a pela lakou i hanai ia ai ma ko lakou palaualelo ana, a ma ko lakou hoomana kii ana, a ma ko lakou moekolohe ana, ma o na auhau la o ke alii a Noa i kau mai ai maluna o kona poe kanaka; pela i hana ikaika ai na kanaka no ke kokua ana i ka hana hewa.

7. He oiaio, o lakou hoi ka i lilo i poe hoomana kii, no ka mea, ua hoopunipuni ia ma na olelo haakei a malimali a ke alii a me na kahuna; no ka mea, ua olelo ae la lakou i na mea malimali ia lakou.

8. Eia kekahi, kukulu iho la o ke alii Noa i na hale nani a akea he nui wale; a hoonani ae la oia i ua mau hale nei me ka hana maikai o ka laau, a me na ano a pau o na mea maikai loa, o ke gula, a o ke kala, a o ka hao, a o ke keleawe melemele, a o ka zifa, a o ke keleawe ulaula;

9. A kukulu no hoi oia i hale alii akea nona, a i noho alii mawaena konu olaila, o keia mau mea a pau o ka laau maikai ia, a ua hoonani ia me ke gula, a me ke kala, a me na mea maikai loa.

10. A kauoha ae la no hoi oia i kana poe paahana e hana i na ano a pau o ka hana maikai iloko o na paia o ka luakini, o ka laau maikai, a o ke keleawe ulaula, a o ke keleawe melemele;

11. A o na noho i hookaawale ia no na kahuna nui, maluna o na noho e ae a pau, oia kana i hoonani aku ai me ke gula maemae; a kauoha aku la ia e hana ia kekahi papa umauma imua o lakou; i wahi no lakou e hilinai ai i ko lakou mau kino a me ko lakou mau lima, oiai lakou e olelo aku ai i na olelo wahahee a haakei i kona poe kanaka.

12. Eia kekahi, kukulu iho la oia i hale kiai ma kahi kokoke i ka luakini; he oiaio, i kahi hale kiai kiekie loa, a no ke kiekie ua hiki ia ia ke ku maluna olaila, a ke nana aku i ka aina o Sailoma, a i ka aina o Semalona hoi, kahi a ko Lamana poe i noho ai; a ua hiki ia ia ke nana aku maluna o ka aina a puni.

13. Eia kekahi, kauoha ae la oia e kukulu ia na hale he nui ma ka aina o Sailoma; a kauoha aku la oia e kukulu ia kekahi hale kiai nui ma ka puu aia ma ka akau o ka aina o Sailoma, kahi a ka poe keiki a Nepai i hele nui ai ma ka manawa a lakou i auhee aku ai mailoko aku o ka aina; a pela oia i hana ai me ka waiwai ana i loaa ai ma ka auhau ana i kona poe kanaka.

14. Eia kekahi, kau aku la oia i kona naau maluna o kona waiwai, a hoomaunauna aku oia i kona manawa, ma ka noho uhauha ana me kana poe wahine a me kana poe haiawahine; a pela hoi kana poe kahuna i hoomaunauna aku ai i ko lakou manawa, me na wahine hookamakama.

15. Eia kekahi, kanu iho la oia i na malawaina a puni ma ka aina; a kukulu iho la oia i na wahi kaomi waina, a hana oia i ka waina a nui loa; a nolaila, lilo iho la oia i mea pakela waina, a me kona poe kanaka no hoi.

16. Eia kekahi, hoomaka ae la ko Lamana poe e hele mai maluna o kona poe kanaka, maluna o na mea he kakaikahi, a e pepehi ia lakou a make ma ko lakou mau kihapai, a oiai lakou e malama ana i ko lakou mau pua holoholona.

17. A hoonoho aku la ke alii Noa i na koa a puni ka aina e pale aku ia lakou; aka aole ia i hoouna aku i ua poe koa nei a lawa, a hiki mai la ko Lamana poe maluna iho o lakou, a pepehi ae la ia lakou a make, a hoa iho la i na pua holoholona he nui o lakou mailoko aku o ka aina; pela i hoomaka ai ko Lamana poe e luku mai ia lakou, a e hoopai mai i ko lakou inaina maluna o lakou nei.

18. Eia kekahi, hoouna aku la ke alii Noa i kona poe kaua e ku e ia lakou la, a ua hooauhee ia lakou la, oia hoi, hooauhee lakou ia lakou la i hope no kekahi manawa; nolaila, hoi hou ae la lakou e hauoli ana no ko lakou waiwai pio.

19. Ano, no keia lanakila nui, ua hookiekie ia lakou ma ka haaheo o ko lakou mau naau; a kaena aku la lakou ma ko lakou ikaika iho, me ka i ana, ua hiki i ko lakou kanalima ke ku e aku i na tausani o ko Lamana poe; a pela lakou i kaena aku ai, a olioli i ke koko, a i ka hookahe ana i ke koko o ko lakou poe hoahanau, a o keia mea no ka hewa o ko lakou alii a me na kahuna hoi.

20. Eia kekahi, aia mawaena o lakou kekahi kanaka, o Abinadi kona inoa; a hele aku la oia iwaena o lakou, a hoomaka iho la e wanana, i ka i ana, Aia hoi, penei wahi a ka Haku, a peneia oia i kauoha mai ai iaʻu, i ka i ana, E hele aku a e olelo aku i keia poe kanaka, penei wahi a ka Haku; Auwe keia poe kanaka, no ka mea, ua ike au i ko lakou mau mea ino, a me ko lakou mau hewa, a me ko lakou mau moekolohe; a ke mihi ole lakou, e hele aku au io lakou la ma kuu inaina.

21. A ke mihi ole lakou, a huli i ka Haku i ko lakou Akua, aia hoi, e haawi aku au ia lakou iloko o na lima o ko lakou poe enemi; he oiaio, a e lawe ia aku lakou iloko o ka noho luhi ana; a e hoopilikia ia lakou ma ka lima o ko lakou poe enemi.

22. A e hiki mai keia, e ike auanei lakou owau no ka Haku ko lakou Akua, a he Akua lili, e hoopai ana i na hala o koʻu poe kanaka.

23. A e hiki mai no hoi keia, ke mihi ole keia poe kanaka a e huli i ka Haku i ko lakou Akua, e lawe ia lakou iloko o ka noho luhi ana; aole loa kekahi mea e hoopakele ia lakou, o ka Haku ke Akua Mana loa wale no.

24. He oiaio, e hiki mai keia i ka wa a lakou e kahea mai ai iaʻu, e lohi no au i ka hoolohe i ko lakou hea ana; he oiaio, a e hookuu aku au ia lakou e hahau ia lakou e ko lakou poe enemi.

25. A ke mihi ole lakou iloko o ke kapa inoino a me ka lehu, a e kahea ikaika mai i ka Haku i ko lakou Akua, aole au e hoolohe aku i ka lakou mau pule, aole hoi au e hoopakele aku ia lakou mailoko aku o ko lakou mau popilikia; a pela wahi a ka Haku, a pela oia i kauoha mai ai iaʻu.

26. Ano, eia kekahi, ia Abinadi i olelo mai ai i keia mau olelo ia lakou, ua huhu lakou ia ia, a imi aku la e kaili aku i kona ola; aka hoopakele aku la no ka Haku ia ia mailoko mai o ko lakou mau lima.

27. Ano, i ka wa a Noa ke alii i lohe ai no na olelo a Abinadi i olelo mai ai i na kanaka, ua huhu no hoi oia; a i aku la oia, Owai la o Abinadi, i hoohewa ia mai ai au me koʻu poe kanaka e ia? A owai la ka Haku, nana e hoili mai maluna iho o koʻu poe kanaka i na popilikia nui me neia?

28. Ke kena aku nei au ia oukou e lawe mai ia Abinadi maanei, i pepehi aku ai au ia ia; no ka mea, ua olelo mai la oia i keia mau mea, e hiki ia ia ke hoeueu i koʻu poe kanaka i ka huhu, kekahi me kekahi, a e hoala i na paio mawaena o koʻu poe kanaka; nolaila, e pepehi aku no au ia ia.

29. Ano, ua hoopouli ia na maka o na kanaka; nolaila, hoopaakiki iho la lakou i ko lakou mau naau e ku e i na olelo a Abinadi, a imi aku la lakou mai ia manawa aku e hopu ia ia. A hoopaakiki iho la ke alii Noa i kona naau e ku e i ka olelo a ka Haku; a, aole oia i mihi i kana mau hana ino ana.