1. Ano, eia kekahi, o Alama ka mea i holo aku mai na kauwa aku a Noa ke alii, mihi iho la oia i kona mau hewa a me na hala, a hele malu aku la oia mawaena o na kanaka, a hoomaka ae la e ao aku i na olelo a Abinadi;

2. He oiaio, no na mea e hiki mai ana, a no ke alahouana hoi o ka poe make, a me ka hoolapanai ia ana o na kanaka, na mea e lawe ia mai ai ma o ka mana la, a me ka eha ana, a me ka make ana o Kristo, a me kona alahouana a me kona pii ana i ka lani.

3. A o ka poe a pau i hoolohe i kana olelo, ua ao aku oia ia lakou. A ao malu aku la oia ia lakou, i hiki ole ai i ke alii ke ike ia mea. A ua nui loa ka poe i manaoio i kana olelo.

4. A eia kekahi, o ka poe a pau i manaoio ia ia, hele aku la lakou i kahi i kapa ia ai o Moramona, ua loaa ia wahi kona inoa mai ke alii mai, ma na palena o ka aina i hoopilikia e ia mamua i kekahi manawa, a i kekahi mau kau, e na holoholona hihiu.

5. Ano, aia no ma Moramona he punawai maemae, a hele pinepine aku la o Alama ilaila, aia kokoke ma ka wai he ululaau o na lauu uuku, malaila ia i pee ai ma ka la, mai ka imi ana aku o ke alii.

6. Eia kekahi, o ka poe i manaoio ia ia, hele aku la lakou ilaila e hoolohe i kana mau olelo.

7. A eia kekahi, mahope iho o na la he nui wale, ua hoakoakoa ia na kanaka he nui ma kahi o Moramona, e hoolohe mai i na olelo a Alama. He oiaio, ua hoakoakoa ia lakou a pau, ka poe i manaoio i kana olelo, e hoolohe mai ia ia. A ao aku la oia ia lakou, a hai aku la i ka mihi ia lakou, a me ka hoolapanai ana, a me ka manaoio i ka Haku.

8. A eia kekahi, i aku la oia ia lakou, Eia no hoi ka wai o Moramona; no ka mea, pela ia wai i kapa ia ai. A, ano, me oukou i makemake ai e komo iloko o ka pa o ke Akua, a e kapa ia kona poe kanaka, a ua ae aku e kaikai kekahi i ko kekahi mau mea kaumaha, i mama lakou;

9. He oiaio, a ua ae aku e uwe iho me ka poe e uwe ana; he oiaio, a e hooluolu i ka poe ku pono e hooluolu ia, a e ku me he poe hoike la no ke Akua i na manawa a pau, a i na mea a pau, a i na wahi a pau a oukou e noho ai, a hiki aku i ka make, i hoola ia mai ai oukou e ke Akua, a i helu pu ia ai me ka poe o ke ala mua ana, i loaa ai ia oukou ke ola mau loa;

10. Ano, ke i aku nei au ia oukou, ina o keia ka makemake o ko oukou mau naau, heaha la ko oukou mea ku e ai i ka bapetizo ia ana ma ka inoa o ka Haku, i mea hoike imua ona ua komo oukou iloko o kekahi berita me ia, i hookauwa ai oukou nana, a e malama ai i kana mau kauoha, e hiki ia ia ke ninini mai i kona Uhane he nui loa ae maluna o oukou?

11. Ano, i ka wa a na kanaka i lohe ai i keia mau olelo, paipai ae la lakou i ko lakou mau lima no ka olioli, a olelo ae la, Oia no ka makemake o ko makou mau naau.

12. A eia kekahi, lawe aku la o Alama ia Helama, oia no kekahi o na mea mua, a hele ae la a ku iho la iloko o ka wai, a hea aku la, i ka i ana, E ka Haku, e ninini mai oe i kou Uhane maluna o kau kauwa, e hiki ia ia ke hana i keia oihana me ka hemolele o ka naau.

13. A ia ia i olelo aku ai i keia mau olelo, aia maluna ona ka Uhane o ka Haku, a i ae la ia, E Helama, ke bapetizo aku nei au ia oe, ua loaa ka mana mai ke Akua mana loa mai, i mea hoike ua komo oe iloko o kekahi berita e hookauwa aku nana a hiki aku oe i ka make, ma ke kino make; a e ninini ia mai ka Uhane o ka Haku maluna iho ou; a nana e haawi mai i ke ola mau loa ia oe, ma o ka hoolapanai ana la o Kristo, ka mea ana i hoomakaukau ai mai ka hookumu ia ana mai o ke ao nei.

14. A mahope iho o ka Alama olelo ana i keia mau olelo, ua kanu pu ia o Alama laua me Helama iloko o ka wai; a ala mai la laua, a hele mai la mailoko mai o ka wai e hauoli ana, i hoopiha ia ai me ka Uhane.

15. A eia hou, lawe aku la o Alama i kekahi mea e, a hele aku la i ka lua o ka manawa iloko o ka wai, a bapetizo aku la ia ia e like me ka mea mua, aole nae oia i kanu hou ia ia iho iloko o ka wai.

16. A mamuli o keia ano oia i bapetizo aku ai i kela mea keia mea i hele mai ai i kahi o Moramona; a o ka helu o lakou ua aneane elua haneri a me na mea keu eha; he oiaio no, a ua bapetizo ia lakou iloko o na wai o Moramona, a ua hoopiha ia me ka lokomaikai o ke Akua;

17. A ua kapa ia lakou ka ekalesia o ke Akua, a o ka ekalesia o Kristo, mai ia manawa aku. Eia kekahi, o ka mea i bapetizo ia ma o ka mana la a me ka pono o ke Akua, ua hui pu ia i kona ekalesia.

18. Eia kekahi, ua loaa ia Alama ka mana mai ke Akua mai, a hoolilo iho la oia i na kahuna; i hookahi kahuna i kela kanalima i keia kanalima o lakou, oia kana i hoolilo ai e hai olelo ia lakou, a e ao aku ia lakou no na mea e pili ana i ke aupuni o ke Akua.

19. A kauoha aku la oia ia lakou e ao ole aku lakou i kekahi mea, i ole ia he mea ana i ao aku ai, a i olelo ia ai no hoi ma na waha o na kaula hemolele.

20. He oiaio, kauoha aku la oia ia lakou e ao ole aku lakou i kekahi mea, koe wale no i ka mihi a me ka manaoio i ka Haku, nana i hoolapanai i kona poe kanaka.

21. A kauoha aku la oia ia lakou, e paio ole aku kekahi me kekahi, aka e nana lakou imua me ka maka hoohahi, me ka manaoio hookahi a me ka bapetizo hookahi; me ko lakou mau naau i hookui ia iloko o ke kuikahi a o ke aloha, kekahi i kekahi.

22. A pela oia i kauoha aku ai ia lakou e hai aku. A pela lakou i lilo ai i poe keiki na ke Akua.

23. A kauoha aku la oia ia lakou e malama lakou i ka la Sabati, a e hoano ia la, a e aloha aku no hoi lakou i ka Haku i ko lakou Akua i kela la i keia la.

24. A kauoha aku la oia ia lakou, na na kahuna ana i hoolilo aku ai e hana me ko lakou mau lima ponoi no ko lakou ola;

25. A ua hookaawale ia i hookahi la ma kela hebedoma ma keia hebedoma no lakou e houluulu ia lakou iho e ao aku i na kanaka, a e hoomana aku i ka Haku i ko lakou Akua, a e hoakoakoa no hoi ia lakou iho i na manawa a pau e hiki ai.

26. Aole no na kahuna e kaukai aku maluna o na kanaka no ko lakou ola; aka, e loaa no ia lakou ka lokomaikai o ke Akua no ka lakou hana, i hiki ai ia lakou ke mahuahua ma ka Uhane, me ka ike o ke Akua, i hiki ia lakou ke ao aku me ka mana a me ka pono mai ke Akua mai.

27. A eia hou: kauoha aku la o Alama i na kanaka o ka ekalesia e haawi aku i ko lakou waiwai, kela mea keia mea e like me kona lako; ina he lako nui kona, e haawi nui aku oia; a ina he lako uuku kona, he uuku ke makemake ia mai; a e haawi ia aku i ka mea nele.

28. A pela lakou e haawi aku ai i ko lakou waiwai, no ko lakou aloha maoli iho a me na makemake maikai i ke Akua, a i kela poe kahuna i nele, he oiaio, a i na mea nele, kapa ole a pau.

29. A hai aku la oia ia mea ia lakou, no kona kauoha ia ana mai e ke Akua; a hele pololei lakou imua o ke Akua, e haawi ana kekahi i kekahi, ma ko ke kino a ma ko ka uhane no hoi, e like me ko lakou nele a me ko lakou makemake.

30. Ano, eia kekahi, ua hana ia keia mau mea a pau ma Moramona; he oiaio, ma na wai o Moramona, ma ka ululaau kokoke i na wai o Moramona; he oiaio, o kahi o Moramona, o na wai o Moramona, a ka ululaau o Moramona, he nani wale ia mau wahi i na maka o ka poe i loaa malaila ka ike no ko lakou Mea Hoolapanai; he oiaio, he nani ko lakou pomaikai, no ka mea, e memele aku lakou me ka hoolea aku ia ia, ia ao aku ia ao aku.

31. A ua hana ia keia mau mea ma na palena o ka aina, i hiki ole ai i ke alii ke ike ia mau mea.

32. Aka hoi, ua ike aku la ke alii i ka naele ana mawaena o na kanaka, a hoouna aku la oia i kana poe kauwa e hoomakakiu. Nolaila, i ka la a lakou e hoakoakoa ana ia lakou iho e hoolohe i ka olelo a ka Haku, ua loaa lakou i ke alii.

33. Ano, i ae la ke alii e hookonokono ana o Alama i na kanaka e kipi aku ia ia; nolaila, hoouna mai la oia i kona poe koa e luku mai ia lakou.

34. A eia kekahi, ua ao e ia mai o Alama, a me ka poe kanaka o ka Haku no ka hele ana mai o ko ke alii poe koa; nolaila, lawe aku la lakou i ko lakou mau halelewa a me ko lakou mau ohana, a haele aku la iloko o ka waonahele.

35. A o ka helu o lakou ua aneane eha haneri a me kanalima.