1. Ano, ma Semalona kekahi wahi, kahi a na kaikamahine a ko Lamana poe i akoakoa ai e mele, a e hulahula a e hoolealea ia lakou iho.

2. A eia kekahi, malaila i kekahi la kekahi poe he uuku o lakou i akoakoa ia ai e mele a e hula.

3. Ano, ua hilahila na kahuna a ke alii Noa e hoi hou i ke kulanakauhale o Nepai, he oiaio, ua makau no hoi o pepehi mai na kanaka ia lakou, nolaila, aole lakou i aa e hoi hou i ka lakou poe wahine a i ka lakou poe keiki.

4. A ua noho iho la lakou ma ka waonahele, a ike aku la lakou i na kaikamahine a ko Lamana poe, a pee iho la a hookalakupua iho la lakou ia lakou la;

5. A i ka wa i akoakoa ai he poe uuku o lakou e hula, puka ae la lakou iwaho o ko lakou mau wahi i pee ai, a hopu ia lakou a kaikai aku la ia lakou iloko o ka waonahele; he oiaio, he iwakalua a me kumamaha o na kaikamahine a ko Lamana poe lakou i lawe aku ai iloko o ka waonahele.

6. Eia kekahi, i ka wa a ko Lamana poe i ike ai ua nalowale ka lakou mau kaikamahine, huhu iho la lakou i ka poe kanaka o Limai; no ka mea, manao iho la lakou o ka poe kanaka o Limai no ia.

7. Nolaila, hoouna aku la lakou i ko lakou poe koa; he oiaio, o ke alii kekahi i hele i hele aku la imua o kona poe kanaka; a pii mai la lakou i ka aina o Nepai, e luku mai i na kanaka o Limai.

8. Ano, ua ike aku o Limai ia lakou mai ka hale kiai aku; ua ike aku la oia i ko lakou mau mea makaukau a pau e kaua ai; nolaila, houluulu ae la oia i kona poe kanaka, a hoohalua iho la ia lakou ma na kula, a ma na ululaau.

9. A eia kekahi, i ka wa i hiki mai ai ko Lamana poe, hoomaka ae la ka poe kanaka o Limai e lele maluna o lakou mai ko lakou mau wahi i pee ai, a hoomaka e pepehi aku ia lakou.

10. Eia kekahi, lilo iho la ke kaua i ikaika nui loa, no ka mea, kaua iho la lakou e like me na liona no ko lakou mea i pio ai.

11. A eia kekahi, hoomaka ae la ka poe kanaka o Limai e hooauhee aku i ko Lamana poe imua o lakou; aka aole i like ka nui o lakou me ko ka hapalua o ko Lamana poe. Aka kaua aku la lakou no ko lakou ola, a no ka lakou poe wahine, a no ka lakou poe keiki; nolaila, hooikaika aku la lakou, a e like me na deragona lakou i kaua ai.

12. Eia kekahi, loaa iho la ia lakou ke alii o ko Lamana poe mawaena o ko lakou poe make; aole nae i make oia, ua hoeha ia a haalele ia maluna o ka honua, no ka holo kiki o kona poe kanaka.

13. A lawe aku la lakou ia ia a wahi ae la i kona mau palapu, a kai ae la ia ia imua o Limai, a i ae la, Aia hoi, eia no ke alii o ko Lamana poe; a ua loohia oia i ka eha, a hina iho la mawaena o ka poe make, a ua haalele mai lakou ia ia; a, aia hoi, ua lawe mai makou ia ia imua ou; a, ano, e ae mai oe ia makou e pepehi aku ia ia.

14. Aka, i aku la o Limai ia lakou, Aole oukou e pepehi ia ia, aka e lawe mai ia ia ia nei, i ike ai au ia ia. A kai ae la lakou ia ia. A i aku la o Limai ia ia, Heaha la ko oukou kumu i pii mai ai e kaua mai i koʻu poe kanaka? Aia hoi, aole o koʻu poe kanaka i uhai aku i ka hoohiki aʻu i hoohiki aku ai ia oe; nolaila, no ke aha la oukou i uhai mai ai i ka hoohiki au i hoohiki mai ai i koʻu poe kanaka?

15. Ano, i mai la ke alii, Ua uhai aku au i ka hoohiki, no ke kaikai ana ae o kou poe kanaka i na kaikamahine a koʻu poe kanaka; nolaila, i koʻu huhu ua kena aku au i koʻu poe kanaka e pii mai e kaua i kou poe kanaka.

16. Ano, aole o Limai i lohe e iki no ia mea; nolaila, i aku la oia, E huli aku no au mawaena o koʻu poe kanaka, a o ka mea nana i hana i keia mea e make no oia. Nolaila, kauoha ae la oia e imi ia mawaena o kona poe kanaka.

17. Ano, ia Gideona i lohe ai i keia mau mea, a o ko ke alii kapena no ia, hele ae la ia a i ae la i ke alii, E, ke noi nei au ia oe e hooki ae, a mai imi i keia poe kanaka, a mai kau i keia mea maluna o lakou.

18. No ka mea, aole anei oe i hoomanao i na kahuna a kou makuakane, ka poe a keia poe kanaka i imi aku ai e pepehi? A, aole anei lakou iloko o ka waonahele? Aole anei lakou ka poe na lakou i aihue i na kaikamahine a ko Lamana poe?

19. Ano hoi, e hai aku i ke alii no keia mau mea, i hai aku ai oia i kona poe kanaka, i hoolaulea ia mai ai lakou ia kakou; no ka mea, ke hoomakaukau nei lakou i keia wa e pii ku e mai ia kakou; a, aia hoi, he kakaikahi wale no kakou.

20. Aia hoi! Ke hele mai la lakou me ko lakou puali he lehulehu; a i ole e hoolaulea aku ke alii ia lakou no kakou e luku io ia no kakou.

21. No ka mea, aole anei i ko na olelo a Abinadi, ana i wanana ku e mai ai ia kakou? A o keia a pau no ko kakou hoolohe ole i na olelo a ka Haku, a huli ae mai ko kakou hala aku.

22. Ano, e hoolaulea aku kakou i ke alii, a e hooko aku kakou i ka hoohiki a kakou i hoohiki aku ai ia ia; no ka mea, e aho kakou e noho iloko o ka luhi, mamua o ka lilo ana o ko kakou mau ola; nolaila, e hooki aku kakou i ka hookahe nui ana i ke koko me neia.

23. Ano, hai aku la o Limai i na mea a pau no kona makuakane, a me na kahuna i hee aku ai iloko o ka waonahele, a hoili aku la i ka halihali ia ana aku o ka lakou mau kaikamahine i ua poe la.

24. Eia kekahi, hoolaulea ia iho la ke alii i kona poe kanaka; a i mai la oia ia lakou, E haele aku kakou e halawai pu me koʻu poe kanaka, me na mea kaua ole; a ke hoohiki nei au ia oukou me ka hoohiki, aole e pepehi mai koʻu poe kanaka i kou poe kanaka.

25. Eia kekahi, hahai aku la lakou i ke alii, a hele aku la me na mea kaua ole e halawai me ko Lamana poe. A halawai aku la me ko Lamana poe; a kulou iho la ke alii o ko Lamana poe imua o lakou la, a noi aku la ia lakou no ka poe kanaka o Limai.

26. A i ko Lamana poe i ike mai ai i ka poe kanaka o Limai, a, aole o lakou mea kaua, menemene mai la lakou ia lakou nei, a ua hoolaulea ia lakou, a hoi aku la me ko lakou alii me ka malu i ko lakou aina iho.