1. A eia hou, e oʻu poe hoahanau, ke makemake nei au e maliu mai oukou, no ka mea, he mau mea hou kaʻu e olelo aku ai ia oukou; no ka mea, aia hoi, he mau mea kaʻu e hai aku ai ia oukou, no na mea e hiki mai ana;

2. A o na mea aʻu e hai aku ai ia oukou, ua hoike ia mai iaʻu, e kekahi anela mai ke Akua mai. A i mai la oia iaʻu, E ala; a ala ae la au, a aia, e ku ana oia imua oʻu.

3. A i mai la oia iaʻu, E ala, a e hoolohe mai i na olelo aʻu e hai aku ai ia oe; no ka mea, ua hiki mai nei au e hai aku ia oe i na olelo olioli e hauoli nui ai.

4. No ka mea, ua lohe no ka Haku i kau mau pule, a ua hoopono mai i kou pono, a ua hoouna mai iaʻu e hai aku ia oe i hauoli ai oe, a i hai aku ai oe i kou poe kanaka, i hoopiha ia ai no hoi lakou me ka hauoli.

5. No ka mea, aia hoi, e hiki mai ana ka manawa, aole e liuliu aku ia, e iho mai mai ka lani mai me ka mana, ka Haku Mana kiekie loa, ka mea e noho alii ana, ka mea mamua, a eia hoi ano mai ia ao aku ia ao aku a mau loa aku, mawaena o na keiki a kanaka, a e noho iloko o kahi kino maole, a e hele aku no mawaena o na kanaka, e hana ana i na hana mana nui, e like me ka hoola ana i na mea mai, e hoala ana i na mea make, e hoohele ana i na mea oopa, e haawi ana i ka ike i na mea makapo, a me ka lohe i na kuli, a e hoola ana i kela ano i keia ano o na mai;

6. A e mahiki aku oia i na daimonio, i ole ia, i na uhane ino e noho ana iloko o na naau o na keiki a kanaka.

7. Aia hoi, e loaa no ia ia na hoowalewale, a me ka eha o ke kino, ka pololi, ka makewai, a me ka luhi, e nui aku ana mamua o ka mea i hiki i ke kanaka ke hoomanawanui ai, ke ole nae ia he mea e make ai. No ka mea, aia hoi, e puka mai ana ke koko mai kela makalua keia makalua, no ka nui launa ole o kona ehaeha no ka hewa a me na mea ino o kona poe kanaka.

8. A e kapa ia oia o Iesu Kristo, ke Keiki a ke Akua, ka Makua o ka lani a me ka honua, ka Mea nana i hana i na mea a pau, mai kinohi mai; a o kona makuwahine e kapa ia oia o Maria.

9. Aia hoi, e hiki mai ana ia i kona poe iho, i hiki mai ai ke ola i na keiki a kanaka, ma o ka manaoio la ma kona inoa; a mahope iho o keia mau mea a pau, e manao nae lakou he kanaka ia, a e olelo aku he daimonio kona, a e hahau aku ia ia, a e kau aku ia ia ma ke kea.

10. A e alahou no oia i ke kolu o ka la mai ka make mai; aia hoi, e ku ana oia e hookolokolo i ko ke ao nei. A, aia hoi, ua hana ia keia mau mea a pau, i hiki mai ai ka hooponopono pololei maluna o na keiki a kanaka.

11. No ka mea, ke huikala nei kona koko i na hewa o ka poe i haule ma o ka lawehala la o Adamu, ka poe i make, me ka ike ole i ka makemake o ke Akua no lakou, oia hoi ka poe i hana hewa no ka naaupo.

12. Aka, auwe, auwe ka mea i ike e kipi ana oia i ke Akua; no ka mea, aole e hiki mai ke ola i ka poe e like me ia, koe wale no ma o ka mihi la a me ka manaoio i ka Haku, ia Iesu Kristo.

13. A ua hoouna mai ka Haku ke Akua i kana poe kaula hemolele mawaena o na keiki a pau a kanaka, e hai aku i keia mau mea i kela ohana i keia ohana, i ko kela aupuni i ko keia aupuni, a i kela olelo i keia olelo, ma o ia mau mea la i hiki ai i ka poe e manaoio ana i ka hiki ana mai o Kristo, ke loaa ke kala ia ana o ko lakou mau hala, a e hauoli me ka olioli nui loa, me he mea la ua hiki io mai oia mawaena o lakou.

14. Aka, ike mai la ka Haku ke Akua he poe kanaka ai oolea kona poe kanaka, a hookau mai la oia i kanawai, oia hoi ke kanawai o Mose.

15. A he nui na ouli, a me na mea kupanaha, a me na hoailona, a me na aka, ana i hoike mai ai ia lakou, no kona hiki ana mai; a olelo ae la no hoi na kaula hemolele ia lakou no kona hiki ana mai; aka hoopaakiki aku la nae lakou i ko lakou mau naau, a hoomaopopo ole he mea e pono ole ai ke kanawai o Mose, ke ole ma o ke kalahala ana la o kona koko;

16. A ina paha he mea e hiki ai i na keiki uuku ke hana hewa, aole e hiki ia lakou ke hoola ia; aka ke i aku nei au ia oe, ua pomaikai lakou; no ka mea, e like me ko lakou haule ana ma o Adamu la, i ole ma ke ano maoli, pela no e kalahala ai ke koko o Kristo i ko lakou mau hewa.

17. A eia hoi, ke i aku nei au ia oe, aole e haawi ia mai kekahi inoa e ae, aole hoi kekahi ala e ae, aole hoi mea ma o na la e hiki mai ai ke ola i na keiki a kanaka, maloko a ma o ka inoa la wale no o Kristo, ka Haku Mana kiekie loa.

18. No ka mea, e hookolokolo ana oia, a ua pololei kona hooponopono ana, a e make ole ana ke keiki uuku, ka mea i make ma kona wa uuku; aka e inu ana na kanaka i ka hoohewa ia o ko lakou mau uhane iho, ke hoohaahaa ole lakou ia lakou iho, a e lilo e like me na keiki uuku, a e manaoio aia no ke ola mamua, a i keia manawa, a e hiki mai ana, iloko a ma o ke koko kalahala la o Kristo, ka Haku Mana kiekie loa.

19. No ka mea, he enemi no ke kanaka ma kona ano maoli i ke Akua, a ua like pela, mai ka haule ana o Adamu mai, a pela aku ia ao aku ia ao aku a mau loa aku; ke ole e ae aku oia i ke komo ana o ka Uhane Hemolele, a e waiho aku i ko ke kanaka ano maoli, a e lilo i mea hoano, ma o ke kalahala ana la o Kristo, ka Haku, a e lilo e like me he keiki la, e malama ana, e akahai, e haahaa, e ahonui, piha me ke aloha, e ae ana e noho malalo iho o na mea a pau a ka Haku i ike ai he pono ke hoili iho maluna ona, me he keiki la hoi e hoolohe ana i kona makuakane.

20. A eia hoi, ke i aku nei au ia oe, e hiki mai ana ka manawa, e hoolaha ia aku ka ike o ka Mea e Ola ai mawaena o ko kela aina ko keia aina, a me na ohana, a me na olelo, a me na kanaka.

21. Aia hoi, a hiki mai ia manawa, aole e loaa hewa ole kekahi imua o ke Akua, koe nae na keiki uuku, eia wale no ma ka mihi a me ka manaoio ma ka inoa o ka Haku ke Akua Mana kiekie loa;

22. A i keia manawa hoi, ia oe e ao aku ai i kou poe kanaka i na mea a ka Haku ke Akua i kauoha mai ai ia oe, alaila hoi, e loaa hou ole lakou me ka hewa ole ma ka nana mai o ke Akua, ina aole ku like me na olelo aʻu i olelo aku ai ia oe.

23. Ano, ua olelo aku au i na olelo a ka Haku ke Akua i kauoha mai ai iaʻu.

24. A penei wahi a ka Haku: E ku auanei ua mau olelo nei me he hoike hulali la e ku e i keia poe kanaka, ma ka la hookolokolo; no ia mea, e hookolokolo ia auanei lakou, o kela kanaka keia kanaka, e like me kana mau hana, ina paha he pono ia mau mea, a ina paha he hewa ia mau mea;

25. Ina he hewa ia mau mea, e waiho ia lakou i ka ike weliweli i ko lakou hewa iho a me na hana ino hoi, a he kumu ia e ku emi hope ai lakou mai ke alo aku o ka Haku, iloko o kahi poino a me ka ehaeha pau ole mailaila mai i hiki ole ai ia lakou ke hoi mai: nolaila, ua inu lakou i ka hoohewa ia o ko lakou mau uhane iho.

26. Nolaila, ua inu lakou noloko mai o keia kiaha o ka inaina o ke Akua, ka mea i hiki ole ai i ka hoopono ke hoole ia lakou, e like me ka hiki ole iaia ke hoole i ka haule ana o Adamu, no kona ai ana i ka hua i papa ia; nolaila aole o ke aloha kuleana hou maluna o lakou a mau loa aku.

27. A o ko lakou eha me he loko ahi la a me ke kukae pele ia, nona na lapalapa e pio ole ana, a nona ka uahi e punohu ana ia ao aku ia ao aku. Pela ka ka Haku i kauoha mai ai iaʻu. Amene.