1. Ano, manao iho la o ke alii o Beniamina he mea e pono ai, mahope iho o ka pau ana o ka olelo i na kanaka, e hoopaa oia i na inoa o ka poe a pau i komo iloko o ka berita me ke Akua, e malama i kana mau kauoha.

2. Eia kekahi, aole kekahi mea i komo ole iloko o ka berita, a i lawe ole maluna ona i ka inoa o Kristo, o na keiki uuku wale no i koe.

3. A eia hou kekahi; i ka wa a Beniamina ke alii i hoopau ai i keia mau mea a pau, a i hoolaa ai i kana keiki ia Mosia, i luna a i alii maluna o kona poe kanaka, a i haawi aku ai ia ia i na kauoha a pau no ke aupuni, a i wae ai no hoi i na kahuna e ao aku i na kanaka, i hiki ia lakou ke hoolohe a ke ike i na kauoha a ke Akua, a e hoeueu ia lakou e hoomanao i ka hoohiki a lakou i hana ai, hookuu ae la oia i na kanaka, a hoi aku la lakou, kela mea keia mea e like me ka lakou mau ohana, i ko lakou mau hale iho.

4. A hoomaka ae la o Mosia e noho alii ma ko kona makuakane hakahaka. A hoomaka ae la oia e noho alii ma kona makahiki kanakolu, ke hui holookoa ia, aneane eha haneri kanahikukumamaono makahiki mai ka wa mai a Lehi i haalele ai ia Ierusalema.

5. A ola ae la o ke alii o Beniamina i ekolu makahiki, a make aku la ia.

6. A eia kekahi, hele aku la o ke alii o Mosia ma na aoao o ka Haku, a ua hoolohe oia i kana mau olelo paa, a me kona mau kanawai, a ua malama i kana mau kauoha, ma na mea a pau ana i kauoha mai ai ia ia.

7. A kauoha ae la ke alii o Mosia i kona poe kanaka e mahi lakou i ka honua. A ua mahi oia no hoi i ka honua, i hiki ia ia ma ia mea ke lilo i mea hookaumaha ole i kona poe kanaka, i hiki ia ia ke hana mamuli o ka mea a kona makuakane i hana ai, ma na mea a pau. A he paio ole mawaena o kona poe kanaka a pau, no na makahiki ekolu.