1. Eia kekahi, hoomaka hou aku la makou e hookupaa i ke aupuni; a hoomaka hou makou e noho ma ka aina me ka malu. A kauoha ae la au e hana ia kela ano keia ano o na mea kaua, e hiki iaʻu ma ia mea ke loaa na mea kaua no koʻu poe kanaka, no ka wa e hele hou mai ko Lamana poe e kaua mai i koʻu poe kanaka.

2. A hoonoho iho la au i na mea kiai a puni ka aina, i hiki ole ai i ko Lamana poe ke lele hou mai maluna o makou me ka ike ole ia aku, a e luku mai ia makou; a pela au i kiai ai i koʻu poe kanaka, a me koʻu mau pua holoholona, a malama ia lakou mai ka haule ana aku iloko o na lima o ko makou poe enemi.

3. Eia kekahi, noho iho la makou ma ka aina o ko makou poe kupuna, no na makahiki he nui; he oiaio, no na makahiki he iwakaluakumamalua.

4. A kauoha ae la au i na kanaka e mahi i ka honua, a e hooulu i na ano a pau o na hua liilii, a i na hua laau a pau, o kela ano keia ano.

5. A kauoha aku la au e milo na wahine, a e hooikaika, a e hana, a e hana i na ano a pau o ka ie makalii; he oiaio, a me ka lole o kela ano keia ano, e hiki ia makou ke hoaahu i ko makou olohelohe; a pela makou i pomaikai ai ma ka aina; a pela no hoi makou i loaa ai ka maluhia mau ma ka aina no na makahiki he iwakaluakumamalua.

6. Eia kekahi, make aku la ke alii Lamana, a hoomaka ae la kana keiki e noho alii ma kona hakahaka. A hoomaka ae la oia e hoeu i kona poe kanaka i ke kipi ku e i koʻu poe kanaka; nolaila, hoomaka mai la lakou e hoomakaukau no ke kaua, a e pii mai e kaua i koʻu poe kanaka.

7. Aka ua hoouna e aku au i koʻu poe kiu ma o a maanei a puni ka aina o Semalona, i loaa ai iaʻu ka ike no ko lakou hoomakaukau ana, i pale aku ai au ia lakou, i hiki ole mai ai lakou maluna o koʻu poe kanaka a e luku mai ia lakou.

8. Eia kekahi, pii mai la lakou ma ka akau o ka aina o Sailoma, me ko lakou poe kaua he lehulehu, o na kanaka i kahiko ia me na kakaka, a me na pua, a me na pahikaua, a me na pahikaua pokole, a me na ala, a me na maa, a ua kole ia ko lakou mau poo, i olohelohe ai lakou; a ua kakoo ia me kekahi kaei ili a puni ko lakou mau puhaka.

9. Eia kekahi, kauoha aku la au e huna ia na wahine a me na keiki a koʻu poe kanaka ma ka waonahele; a kauoha aku la hoi au i na elemakule a pau oʻu i hiki ke hali i na mea kaua, a me koʻu poe kanaka hou hoi i hiki ke hali i na mea kaua, e houluulu ia lakou iho e hele e kaua aku i ko Lamana poe; a hoonoho papa ae la au ia lakou, kela kanaka keia kanaka e like me kona mau makahiki.

10. Eia kekahi, pii aku la makou e kaua i ko Lamana poe. A owau hoi, i koʻu wa elemakule, owau kekahi i pii aku e kaua i ko Lamana poe. Eia kekahi, pii aku la makou ma ka ikaika o ka Haku, e kaua.

11. Ano, aole o ko Lamana poe i ike i kekahi mea no ka Haku, aole no hoi i ka ikaika o ka Haku; nolaila, paulele aku la lakou i ko lakou ikaika iho. Aka, he poe kanaka ikaika lakou, ma ka ikaika o kanaka;

12. He poe hihiu, a hae, a puni koko lakou e manaoio ana i ka mooolelo a ko lakou poe kupuna, eia ia: E manaoio ana ua kipaku ia mai lakou mailoko mai o ka aina o Ierusalema, no na hewa o ko lakou poe kupuna, a ua hoolawehala ia lakou ma ka waonahele e ko lakou poe hoahanau; a ua hoolawehala ia no hoi lakou, oiai e holo mai ana ma ke kai.

13. A eia hou: Ua hoolawehala ia lakou oiai ma ko lakou aina hoilina mua, mahope iho o ko lakou hiki ana mai ma keia aoao o ke kai; a o keia mau mea a pau, no ka oi ana aku o ko Nepai ikaika ma ka malama ana i na kauoha a ka Haku; nolaila, ua lokomaikai ia mai oia e ka Haku, no ka mea, lohe ka Haku i kana mau pule a hooko mai la ia mau mea, a oia no ka mea i alakai ma ko lakou hele ana ma ka waonahele.

14. A ua huhu kona mau hoahanau ia ia, no ka mea, aole lakou i hoomaopopo i na hana a ka Haku; ua huhu no hoi lakou ia ia maluna o na kai; no ka mea, ua hoopaakiki iho la lakou i ko lakou mau naau e ku e i ka Haku.

15. A eia hou: Ua huhu lakou ia ia, ia lakou i hiki mai ai i ka aina i olelo mua ia ai, no ka mea, i mai la lakou ua lawe aku oia i ka noho alii ana maluna o na kanaka mailoko aku o ko lakou mau lima; a imi aku la lakou e pepehi ia ia.

16. A eia hou: Ua huhu lakou ia ia, no kona haalele ana, a me ka hele ana iloko o ka waonahele me ka Haku i kauoha mai ai ia ia, a lawe pu ana i na mooolelo i kahakaha ia maluna o na papa keleawe; no ka mea, i mai la lakou ua hao mai la oia ia lakou.

17. A pela lakou i ao aku ai i ka lakou poe mamo, e inaina mai ai lakou ia lakou nei, a e pepehi mai ai lakou ia lakou nei, a e powa mai ai a e hao mai ai ia lakou nei, a e hana lakou i na mea a pau i hiki ke anai mai ai ia lakou nei; nolaila, he inaina mau loa ko lakou i na mamo a Nepai.

18. No keia kumu i hoopunipuni mai ai ke alii Lamana, ma kona maalea a akamai wahahee, a me kana olelo malimali iaʻu, i lawe mai ai au i koʻu poe kanaka nei, iloko o keia aina, e hiki ia lakou ke luku mai ia lakou nei; he oiaio, a ua pilikia iho la makou iloko o keia mau makahiki he nui ma ka aina.

19. Ano, owau, o Zenifa, mahope iho o kaʻu hai ana i keia mau mea a pau i koʻu poe kanaka no ko Lamana poe, hooikaika aku la au ia lakou e hele e kaua me ko lakou ikaika a pau, e paulele ana i ka Haku; nolaila, paio aku la makou me lakou, he maka no he maka.

20. A eia kekahi, hooauhee hou aku la makou ia lakou mailoko aku o ko makou aina; a pepehi aku la makou ia lakou me ka luku nui, a no ka nui loa aole makou i helu ia lakou.

21. Eia kekahi, hoi hou aku la makou i ko makou aina iho, a hoomaka hou ae la koʻu poe kanaka e malama i ko lakou mau pua holoholona, a e mahi i ka honua.

22. Ano, ua elemakule au, a hoili aku la au i ke aupuni maluna o kekahi o kaʻu mau keiki; nolaila, aole au e olelo hou aku. A na ka Haku e hoopomaikai i koʻu poe kanaka. Amene.