1. Ano, i aku la o Abinadi ia lakou, ke makemake nei au e hoomaopopo oukou, e iho mai ke Akua, oia iho, ilalo mawaena o na keiki a kanaka, a e hoola i kona poe kanaka;

2. A no kona noho ana ma ke kino, e kapa ia auanei oia ke Keiki a ke Akua; a ua hoolilo ia aku ke kino malalo iho o ka makemake o ka Makua, o ka Makua a me ke Keiki no ia;

3. O ka Makua, no ka mea, ua hoohapai ia oia ma ka mana o ke Akua; a o ke Keiki no ke kino; pela e lilo ai i Makua a i Keiki;

4. A hookahi Akua laua, he oiaio no, o ka Makua io mau loa o ka lani a o ka honua;

5. A pela ka io i lilo ai malalo iho o ka Uhane, a o ke Keiki malalo iho o ka Makua, o ke Akua hookahi no ia, e loaa ana ka hoowalewale ana, aole nae e ae ana i ka hoowalewale ia, aka e ae ana oia e hoomaewaewa ia, a e hahau ia, a e kipaku ia mawaho, a e hoole ia e kona poe kanaka.

6. A pau ia hana a pau, mahope iho o ka hana ana i na hana mana nui he nui loa, mawaena o na keiki a kanaka, e alakai ia oia, he oiaio, me Isaia i olelo mai ai, e like me ka hipa i pane ole imua o ka mea nana ia e ako, pela no oia aole i ekemu ae kona waha;

7. He oiaio, pela no ia e alakai ia ai, kaulia ai, a pepehi ia ai, o ka io e lilo ana ia malalo iho a hiki i ka make, o ka makemake o ke Keiki i ale ia iloko o ka makemake o ka Makua;

8. A pela ke Akua e uhai aku ai i na apo o ka make; me ka loaa ana ka lanakila maluna o ka make; e haawi ana i ke Keiki i ka mana e uwao no na keiki a kanaka;

9. I pii aku ai iloko o ka lani; ia ia ka naau o ke aloha; i hoopiha ia me ka lokomaikai no na keiki a kanaka; e ku ana mawaena o lakou a me ka hoopai; i uhai aku ai i na apo o ka make, a lawe ai maluna ona iho i ko lakou mau hewa a me ka lakou mau hala; i hoolapanai ai ia lakou, a hooko aku ai i na makemake o ka hoopai.

10. Ano, ke i aku nei au ia oukou, owai la ka mea e hai aku i kona hanauna? Aia hoi, ke i aku nei au ia oukou, i kona uhane e lilo ai i mohai hala, e ike oia i kana hua. Ano, heaha la ka oukou e olelo mai ai? A owai la auanei kana hua?

11. Aia hoi, ke i aku nei au ia oukou, o ka mea i lohe i na olelo a na kaula, he oiaio, o ka poe kaula a pau i wanana mai no ka hiki ana mai o ka Haku; ke i aku nei au ia oukou, o ka poe a pau i hoolohe i ka lakou mau olelo, a i manaoio e hoola ana ka Haku i kona poe kanaka, a ua nana imua i kela la no ke kala ia ana o ko lakou mau hala, ke i aku nei au ia oukou, o kana hua no keia poe, a o lakou nei no na hooilina o ke aupuni o ke Akua;

12. No ka mea, o keia ka poe no lakou na hewa ana i kaikai ai; o keia no ka poe no lakou ia i make ai, e hoola mai ia lakou mai ko lakou mau hala mai. Ano, aole anei lakou he poe hua nana?

13. He oiaio, aole anei na kaula kekahi, o kela mea keia mea i ekemu ae kona waha e wanana, i haule ole ai iloko o ka hewa; ke olelo nei au no na kaula hemolele a pau mai ka makamua mai o ke ao nei? Ke i aku nei au ia oukou o lakou no kana poe hua;

14. A o lakou nei no ka poe i hoolaha mai i ka malu, ka poe i lawe mai i na olelo maikai o ka olioli, ka poe i hoolaha aku i ke ola; a i olelo mai ia Ziona, ke noho alii nei kou Akua!

15. A nani wale ma na mauna ko lakou mau wawae!

16. A eia hou, nani wale ma na mauna na wawae o ka poe e hoolaha ana i ka malu, i keia manawa!

17. A eia hou, e nani wale ma na mauna na wawae o ka poe e hoolaha aku ana auanei i ka malu, he oiaio, mai keia manawa aku a mau loa aku.

18. A aia hoi, ke i aku nei au ia oukou, aole o keia mea wale no; no ka mea, e nani wale ma na mauna na wawae o ka mea e lawe mai ana i ka olelo maikai, ka mea i hookumu i ka malu; he oiaio, oia ka Haku, ka mea nana i hoolapanai i kona poe kanaka; he oiaio, o ka mea i haawi mai ai i ke ola i kona poe kanaka;

19. No ka mea, ina aole no ka hoolapanai ana, ana i hana mai ai no kona poe kanaka, i hoomakaukau ia ai mai ka hookumu ia ana mai o ke ao nei; ke i aku nei au ia oukou, ina aole no keia, ina ua make loa io no ka kanaka.

20. Aka hoi, e uhai ia aku auanei na apo o ka make, a ke noho alii nei ke Keiki, a he mana kona maluna o ka poe make; nolaila, e lawe mai ana oia i ke alahouana o ka poe make.

21. A e hiki mai ana kekahi alahouana, he oiaio, he ala mua ana; he oiaio, he alahouana o ka poe i ola, a o ka poe e ola nei, a o ka poe e ola nei, a o ka poe e ola ana auanei, a hiki aku i ka alahouana o Kristo; no ka mea, pela oia e kapa ia ai auanei.

22. Ano, o ke alahouana o ka poe kaula hemolele a pau, a o ka poe a pau i manaoio ma ka lakou olelo, a oia hoi ka poe a pau i malama i na kauoha a ke Akua, e puka mai auanei no lakou ma ke ala mua ana; nolaila, o lakou no ko ke ala mua ana.

23. Ua hoala ia lakou e noho me ke Akua nana i hoola ia lakou; pela lakou i loaa ai ke ola mau loa ma o Kristo la, nana i uhai aku i na apo o ka make.

24. A o lakou nei no ka poe e loaa ke ala mua ana; a o lakou no ka poe i make mamua o ko Kristo hiki ana mai, ma ko lakou naaupo, me ka hai ole ia ana o ke ola ia lakou. A pela ka Haku e lawe mai ai ka hoola ia ana o keia poe; a ia lakou hoi ke ala mua ana, a me ke ola mau loa, i hoolapanai ia e ka Haku.

25. A e loaa no hoi i na keiki uuku ke ola mau loa.

26. Aka hoi, e weliweli a e haalulu imua o ke Akua; no ka mea, he pono no oukou ke haalulu; no ka mea, aole e hoola ana ka Haku i ka mea e kipi ku e ana ia ia, a make iloko o ko lakou mau hewa; he oiaio, o ka poe a pau i make iloko o ko lakou mau hewa mai ka makamua mai o ke ao nei, o ka poe i kipi hookuli i ke Akua, ka poe i ike i na kanawai o ke Akua, aole nae i malama ia mau mea; o lakou no ka poe e loaa ole ai ke ala mua ana.

27. Nolaila, aole anei he pono ia oukou ke haalulu? No ka mea, aole e hiki mai ana ke ola i ka poe me neia; no ka mea, ua hoolapanai ole ka Haku i ka poe me neia; he oiaio, aole hoi i hiki i ka Haku ke hoolapanai i ka poe me neia; no ka mea, ua hiki ole ia ia ke hoole ia ia iho; no ka mea, ua hiki ole ia ia ke hoole i ka hoopai ina he kuleana kona.

28. Ano, ke i aku nei au ia oukou, e hiki mai auanei ka manawa, e hai ia aku ai ke ola o ka Haku i na lahuikanaka a pau, a me na ohana, i na olelo, a me na kanaka.

29. He oiaio, e ka Haku, e hookiekie auanei kou poe kiai i ko lakou leo; me ka leo auanei lakou e hookani pu ai; no ka mea, e alikealike auanei ko lakou ike ana, i ka wa a ka Haku e hoihoi hou mai ai ia Ziona.

30. E hookani olioli, e olioli pu oukou, e na wahi neoneo o Ierusalema; no ka mea, ua hoomaha mai ka Haku i kona poe kanaka, ua hoolapanai oia ia Ierusalema.

31. Ua hoike ka Haku i kona lima hemolele imua o na maka o na lahuikanaka; a e ike auanei na kukulu a pau o ka honua i ka hoola o ko kakou Akua.