1. Owau, o Zenifa, ua ao ia au ma ka olelo a pau a ko Nepai poe, a ua loaa e iaʻu ka ike no ka aina o Nepai, o ka aina hoilina mua o ko makou poe kupuna, a ua hoouna ia au me he kiu la mawaena o ko Lamana poe, e hoomakakiu aku ai au i ko lakou poe koa, i hiki i ko makou poe koa ke lele maluna o lakou a ke luku aku ia lakou; aku iaʻu i ike ai i ka mea pono mawaena o lakou, ua makemake au e pepehi ole ia lakou;

2. Nolaila, paio aku la au me koʻu poe hoahanau ma ka waonahele; no ka mea, ua makemake au i ka luna o makou e hana i kuikahi me lakou. Aka he kanaka makona a puni koko no oia, kauoha mai la ia e pepehi ia au; aka ua hoopakele ia au ma ka hookahe nui ia ana o ke koko; no ka mea, kaua aku la ka makuakane i ka makuakane, a me ka hoahanau i ka hoahanau, a, luku ia ka nui o ko makou poe koa ma ka waonahele; a hoi hou aku la makou, ka poe o makou i koe, i ka aina o Zarahemela, e hai aku ia mooolelo i ka lakou poe wahine, a me ka lakou poe keiki.

3. Aka ua iini ikaika loa nae au e loaa ka aina o ko makou poe kupuna, a houluulu ae la au i na mea a pau e makemake ana e pii aku e loaa ka aina, a hele hou aku la makou ma ko makou hele ana iloko o ka waonahele, e pii aku i ka aina; aku ua hahau ia mai makou me ka wi a me na popilikia eha; no ka mea, ua lohi makou e hoomanao i ka Haku ko makou Akua.

4. Aka hoi, mahope iho o ka auwana ana i na la he nui ma ka waonahele, kukulu aku la makou i ko makou mau halelewa ma kahi o ko makou poe hoahanau i pepehi ia ai, a ua kokoke ia i ka aina o ko makou poe kupuna.

5. Eia kekahi, hele hou aku la au me na kanaka oʻu eha, iloko o ke kulanakauhale, iloko i ke alii la, i ike ai au i ke ano o ko ke alii manao, a i ike ai hoi au ina paha e hiki iaʻu ke hele iloko me koʻu poe kanaka, a e loaa ka aina me ka maluhia.

6. A hele aku la au iloko i ke alii la, a hana berita mai la oia me au, e lilo iaʻu ka aina o Lehi-Nepai, a me ka aina o Sailoma.

7. A kauoha aku la no hoi oia i kona poe kanaka e hele aku mailoko aku o ka aina, a hele aku la au me koʻu poe kanaka iloko o ka aina, i noho ai makou malaila.

8. A hoomaka aku la makou e kukulu aku i na hale, a e hana hou i na pa o ke kulanakauhale, he oiaio, i na pa o ke kulanakauhale o Lehi-Nepai, a me ke kulanakauhale o Sailoma.

9. A hoomaka ae la makou e mahi i ka honua, he oiaio, me kela ano keia ano o na anoano, me na anoano o ke kurina, a o ka huita, a o ka bale, a me ka neasa, a me ka seuma, a me kela ano keia ano o na anoano o na hua; a hoomaka aku la makou e mahuahua a e hoopomaikai ia mai ma ka aina.

10. Ano, no ka maalea a me ke akamai o ke alii Lamana, e lawe mai ai i koʻu poe kanaka iloko o ka noho luhi ana, i haawi mai ai oia i ka aina, i noho ai makou malaila.

11. Nolaila, eia kekahi, mahope iho o ko makou noho ana ma ka aina no na makahiki he umikumamalua, hoomaka ae la ko ke alii Lamana oluolu ole, o mahuahua paha koʻu poe kanaka a ikaika ma ka aina, a e hiki ole ia lakou ke lanakila maluna o lakou nei a e hooluhi mai ia lakou nei.

12. Ano, he poe molowa a hoomanakii lakou; nolaila, ua makemake lakou e hooluhi mai ia makou, e hiki ai ia lakou ke hoopiha ia lakou iho me ka hana a ko makou mau lima, he oiaio, e hiki ia lakou ke hoomaona ia lakou iho ma na pua holoholona o ko makou kula.

13. Nolaila, eia kekahi, hoomaka ae la ke alii o Lamana e hookonokono i kona poe kanaka, i paio mai ai lakou me koʻu poe kanaka; nolaila, hoomaka aku la na kaua a me na paio ma ka aina.

14. No ka mea, i ka makahiki umikumamakolu o ka noho alii oʻu ma ka aina o Nepai, ma o ma ke kukulu hema o ka aina o Sailoma, i ka wa a koʻu poe kanaka e hoohainu ana a e hanai ana i ko lakou mau pua holoholona, a e mahi ana i ko lakou mau aina, hiki mai la kekahi poe kaua he lehulehu o ko Lamana poe maluna o lakou, a hoomaka ae la e pepehi ia lakou a make, a e lawe aku i ko lakou mau pua holoholona, a me ke kurina o ko lakou mau kihapai.

15. He oiaio, a auhee mai la lakou, ka poe a pau i hopu ole ia, iloko o ke kulanakauhale o Nepai, a noi mai la iaʻu no ka hoomalu ana.

16. Eia kekahi, kahiko aku la au ia lakou me na kakaka, a me na pua, me na pahikaua, a me na pahikaua pokole, me na newa, a me na maa, a me kela ano keia ano o na mea kaua i hiki ia makou ke hana, a hele aku la au me koʻu poe e ku e aku i ko Lamana poe ma ke kaua;

17. He oiaio, ma ka ikaika o ka Haku makou i hele aku ai e kaua aku i ko Lamana poe; no ka mea, kahea ikaika aku la au me koʻu poe kanaka i ka Haku, nana e hoopakele mai ia makou mailoko mai o na lima o ko makou poe enemi, no ka mea, ua hoala ia mai makou e hoomanao i ka hoopakele ia ana o ko makou poe kupuna.

18. A lohe mai la ke Akua i ka makou hea ana, a hooko mai la i ka makou mau pule; a hele aku la makou ma kona ikaika. He oiaio, hele aku la no makou e ku e i ko Lamana poe; a i ka la a me ka po hookahi, i pepehi aku ai makou i ekolu tausani a me kanahakumamakolu; a pepehi aku la makou ia lakou, a hiki i ka wa a makou i hooauhee aku ai ia lakou mailoko aku o ka aina o makou.

19. A owau hoi, ua kokua au me kuu mau lima iho, e kanu i ko lakou poe make. Aia hoi, no ka pepehi ia ana he elua haneri a me kanahikukumamaiwa o ko makou poe hoahanau, ua piha makou i ke kaumaha a kupinai nui.